Duahia Taudia Edia Henanadai
Ioane Ginigunana 4:18 ia gwau: “Lalokau tauna be gari lasi tauna, badina be lalokau momokani ese gari ia lulua siri momokani.” To Petero ia gwau: “Keristani taudia ibounai do umui lalokau henia. Dirava do umui gari henia.” (1 Petero 2:17) Unai siri ruaosi be edena bamona ita hahegeregerea diba?
Petero bona Ioane ruaosi be aposetolo taudia, Iesu Keriso ese ia hadibaia taudia. Unai dainai ita diba idia torea herevadia idia hakoikoia heheni lasi. Ataiai ai torea siridia lalonai, aposetolo ta ese gari ta ia herevalaia, bona ma ta ese gari idauna ia herevalaia.
Petero ena sisiba mani ita laloa guna. Unai karoa lalonai ia ese ena Keristani tadikakadia be edia lalohadai siahu taudia dekenai ia sisibalai henidia; unai sisiba be Dirava ena amo. Ia ese lalohadai maorona siahu taudia idauidau kamonai henia karana dekenai ia herevalaia. Keristani taudia ia hamaoroa, namona be siahu taudia gavamani lalonai, hegeregere king bona gavana taudia, do idia kamonai henia. (1 Petero 2:13, 14) Ma ia gwau: “Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.”—1 Petero 2:17.
Unai karoa ena siri ma haida ese idia hahedinaraia goevagoeva, Keristani taudia ese ‘Dirava do idia gari henia’ herevana be Petero ese ia gwauraia neganai, ena hereva ena anina be, Dirava do ita matauraia bada bona ena siahu hereadaena dainai do ita habadua garina do ita gari be namo.—Heberu 11:7 itaia.
Aposetolo Ioane ena hereva be edena bamona? Ioane Ginigunana karoa 4 ena hereva ginigunadia lalonai, ia gwau namona be taunimanima edia hereva, “lau be Lauma Helaga lau abia vadaeni” herevana, do idia tohoa guna, badina be peroveta koikoi taudia be momo. Idia edia hereva be Iehova Dirava ena amo idia mai lasi; idia be tanobada dikana amo idia mai eiava tanobada ena lalohadai idia hahedinaraia.
To horoa Keristani taudia be idau, idia be “Dirava ena.” (1 Ioane 4:1-6) Unai dainai, Ioane ese ia hamaorodia, ia gwau: “Lauegu lalokau taudia e, ita ta ta dekenai ita lalokau henia be namo. Badina lalokau be Dirava dekena amo.” Dirava ese lalokau ia hahedinaraia guna—“iena Natuna ia siaia, ia sibona be iseda dika gwauatao dalana [ai ia lao] totona.” (1 Ioane 4:7-10) Unai dainai, edena bamona ita kara be namo?
Namona be iseda lalokau Diravana ida do ita tamona. Namona be ita do ia hadikaia garina ita gari lasi eiava ita guriguri henia gwauraia neganai ita heudeheude lasi. Ioane be guna ia gwau: “Bema iseda lalona ese ita idia kota henia lasi neganai, ita be Dirava ena vairanai do ita raka kahirakahira lao, gari ta lasi. Vadaeni do ita noia gaudia ibounai be ia ese ita dekenai do ia henia. Badina be iena taravatu ita badinaia noho.” (1 Ioane 3:21, 22) Oibe, iseda lalona idia goeva neganai, Dirava vairanai ita raka kahirakahira lao diba; ita do ia hadikaia garina ita gari lasi. Lalokau dainai, guriguri amo Iehova ita hereva henia diba, koua gauna ta be lasi. Unai dala ai, “lalokau tauna be gari lasi tauna.”
Vadaeni, unai gari herevadia ruaosi mani ita kwatua hebou. Namona be Keristani tauna ese Iehova ena dagi, ena siahu, bona ena hahemaoro maoromaoro ia matauraia bada dainai, nega iboudiai Iehova ia gari henia mai ena hemataurai bada ida. To danu, Dirava be iseda Tamana dainai, ita lalokau henia, ita tura henia, bona ia vairanai ita raka kahirakahira lao, koua gauna ta lasi. Ita do ia hadikaia garina ita gari lasi, to ita abidadama henia dainai ia dekenai ita raka kahirakahira lao diba, mero maragina ese ena lalokau tamana dekenai ia raka kahirakahira lao diba hegeregerena.—Iamesi 4:8.