Ia be Anina Lasi Karana A?

KATOLIK taudia ese kara dika gwauraia hedinarai karana be lagani momo lalonai idia badinaia. To, idia momo dekenai ia be anina lasi karana ta. Haisikuli ta ena hahediba tauna badana ladana Bob, be ena matamata negana ia laloa, bona ia gwau: “Lau be mero matamata, to unai neganai kara dika gwauraia hedinarai karana lau laloa bada lasi.” Badina be dahaka? Ia dekenai kara dika gwauraia hedinarai karana be anina lasi karana ta ai ia lao. Ia gwau: “Kara dika gwauraia hedinarai karana be hegeregere emu baege, kara dika amo ia honu gauna, be peleini gabuna dekenai baege sekea tauna dekenai oi abia lao. Oi karaia kara dika ia henanadailaia, bena tano ta dekenai oi hoia dava bada gaudia edia takisi monina oi henia murinai oi ia siaia lao.”

Unai hegeregerena, Frank Wessling be U.S. Catholic magasin lalonai kara dika gwauraia hedinarai karana inai bamona ia gwauraia: “Ia be auka lasi dalana ai idia karaia, guna be dina ibounai idia karaia kara dika maragidia gwauatao totona helalo-kerehai guriguri idia gwauraia bena ena kara dika dainai sori ia hahedinaraia karana ta do ia karaia.” Wessling ena lalohadai dokona be dahaka? Ia gwau: “Lau diba momokani kara dika gwauraia hedinaraia karana be iseda lauma dalana ia hagoadaia. To Katolik taudia ese idia karaia dalana be ia kerere.”

Baibel ese kara dika gwauraia hedinarai karana be dala idauna dekenai ia gwauraia. Anina bada gauna be Dirava dekenai kara dika gwauraia hedinarai karana. (Salamo 32:​1-5) Bona Keristani hahediba tauna Iamesi be inai bamona ia torea: “Umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai. Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai, Dirava ese emui mauri do ia hanamoa.”​—CIamesi 5:​14, 16.

Ena kara dika dainai ia lalo-metau Keristani tauna ese kongregesen naria taudia ia boiridia diba, idia ese Baibel ena sisiba namodia amo kara dika tauna do idia durua kara dika ia rakatania totona. Kongregesen naria taudia ese lauma dalanai ia gorere tauna be ia goada ia lao noho lalonai idia durua diba. Unai be idau momokani, inai nega ena dubu ese idia karaia kara dika gwauraia hedinarai karana amo! Kongregesen elda edia heduru amo idia goada dainai, kara dika amo idia helalo-kerehai taudia ese Davida ia abia hahenamo idia mamia diba. Salamo ta lalonai Davida ia gwau: “Unai neganai lauegu kara dika, be oi dekenai lau gwauraia hedinarai. Lauegu kerere lau hunia lasi. Lau gwau, ‘Lauegu kerere, be Lohiabada ena vairanai do lau gwauraia hedinarai,’ vadaeni oi ese lauegu kara dika oi gwauatao.”​—Salamo 32:5.