Duahia Taudia Edia Henanadai

Hahediba tauna Iamesi ia gwau: “Lauegu varavara taudia e, umui momo ese hadibaia gaukara umui abia be namo lasi. Badina be ai hadibaia taudia be Dirava ese do ia kota henia auka, haida bamona lasi.” (Iamesi 3:1) Iena hereva ena anina be dahaka?

Momokani, Iamesi ese Keristani taudia ia koua toho lasi, hereva momokani be ma haida do idia hadibalaidia lasi totona. Mataio 28:​19, 20 ai, Iesu ese ena hahediba taudia ia hagania, ‘bese ibounai be diba tahua taudia do idia halaoa, bona . . . idia dekenai do idia hadibaia, idia dekenai ia henia hereva ibounai be do idia badinaia.’ Unai dainai, Keristani taudia iboudiai be hadibaia taudia ai idia lao be namo. Aposetolo Paulo ese Heberu Keristani taudia ia sisiba henia, badina be idia be hadibaia taudia ai idia do lao lasi. Ia gwau: “Nega ia ginidae vadaeni, umui be hadibaia taudia do umui halaoa totona. To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo.”​—Heberu 5:12.

Vadaeni, Iamesi ese dahaka ia herevalaia? Ia ese hadibaia dagidia kongregesen lalonai idia abia taudia ia herevalaia. Efeso 4:11 ena hereva be inai: “Keriso [ekalesia ena Kwarana] ese harihari gaudia taunimanima dekenai ia henia. Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia.” Aposetolo edia negai hegeregerena, hari inai negai danu, kongregesen lalodiai haida be mai edia hadibaia dagidia idaudia. Hegeregere, Hakaua Oreana be ‘hesiai tauna mai ena kamonai bona mai ena kara maoromaoro’ ena ladana ai ia hereva, bona ia be mai ena maduna idauna, orea ibounai tanobada hegegemadai hadibaia gaukarana unai. (Mataio 24:45) Sekit bona distrik naria taudia bona kongregesen edia elda taudia danu be mai edia hadibaia gaukarana madunadia idaudia.

Iamesi ese Keristani tataudia mai edia diba be ia hamaorodia hadibaia tauna dagina do idia abia dae lasi, Dirava ese do ia kota henidia auka garina, a? Lasi vaitani. Elda dagina be hahenamo badana, 1 Timoteo 3:​1 ese ia hahedinaraia hegeregerena; ia gwau: “Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai.” Ta be do ia hegeregere unai dagi do idia henia, namona be “hadibaia gaukara namona do ia karaia diba.” (1 Timoteo 3:2) Paulo ena hereva, lauma helaga ena hahekau amo ia torea herevadia, be Iamesi ese ia hakoikoia lasi.

To, toana be aposetolo edia negai tatau haida, ena be idia be hegeregere lasi bona orea naria taudia ese dagi idia henidia lasi, to idia sibodia be hadibaia taudia ai idia halaoa. Reana badina be idia laloa unai dagi ai ladana bada do idia abia, bona idia ura taunimanima ese do idia hanamodia bada. (Mareko 12:​38-40; 1 Timoteo 5:17 itaia.) Aposetolo Ioane ese Diotrepe ia herevalaia, ia gwau ia be ‘sibona ia gwauraia ia be gunalaia tauna, ia ese Ioane ena hereva ia kamonai henia lasi.’ (3 Ioane 9) Timoteo Ginigunana 1:7 ese haida ia gwauraia, ia gwau: “Idia ura Dirava ena taravatu hadibaia gaukara idia karaia, to edia hereva edia anina, bona idia hereva goadagoada gaudia edia anina, idia diba lasi.” Iamesi 3:1 ena hereva be mai anina bada tatau haida dekenai; idia ura hadibaia taudia ai do idia lao, to unai be edia ura kererena dainai. Idia ese mamoe oreana idia hadikaia bada diba, bena unai dainai Dirava ese do ia kota henidia auka.​—Roma 2:​17-21; 14:12.

Idia hegeregere bona hadibaia gaukarana idia karaia taudia danu ese Iamesi 3:1 ena hereva idia laloa be namo. Iesu ese gau momo ia henidia dainai, idia dekenai gau momo do ia tahua. (Luka 12:48) Ia gwau: “Hereva kava ibounai taunimanima ese do idia gwauraia, be Dirava ena Kota Badana dina dekenai, edia davana do idia abia.” (Mataio 12:36) Unai be mai anina bada elda taudia dekenai, badina be edia hereva be mai edia siahu taunimanima momo dekenai.

Elda taudia ese edia kara, Iehova ena mamoe dekenai idia karaia karadia, edia anina be Dirava vairanai do idia gwauraia hedinarai. (Heberu 13:17) Edia hereva be mai anina edia mauri dekenai. Unai dainai, namona be elda ta ese mamoe edia lalona do ia ania lasi, sibona ena lalohadai do idia abia dae totona, bona do ia hadikadia lasi, Farisea taudia idia kara hegeregerena. Namona be lalokau dobuna, Iesu ena hegeregerena, do ia hahedinaraia. Ena hadibaia gaukaradia iboudiai lalodiai elda ta ese ena hereva do ia naria namonamo, bona anina lasi herevadia o sibona ena lalohadai do ia gwauraia lasi. Unai be mai anina bada hahemaoro gaukarana do ia karaia negadiai. Bema mamoe naridia tauna ese Iehova, iena Hereva, bona iena hadibaia herevadia iena orea ena amo be ia abidadama henia momokani, Dirava ese do ia hanamoa bada, do ia “kota henia auka” lasi.