Aniani Maua ese Ia Hadibaia

KOBE, Japan dekenai, January gunana ai ia vara tano mareremarerena ena murina dinadia ai, ia hadikaia gabudia taudia ese aniani idia davaria be auka. To, Iehova ena Witness taudia be aniani dekenai idia dabu lasi, badina be edia bamodia edia heduru dainai. Dina rua o toi tano mareremarere murinai, kahirakahira ai idia noho kongregesen taudia ese raisi idia mailaia. Bena, edia bamodia, mai edia hebogahisi taudia, ese maua ai idia kumia anianidia idia hegaegaelaia. Unai maua dekenai, momo ese edia hebogahisi herevadia idia torea pepapepadia idia atoa. Unai aniani idia davaria taudia idia gwau edia aniani negadia iboudiai aniani be “mai edia damena” badina unai toretore idia duahia neganai edia matana ranudia idia diho.

Iehova ena Witness taudia ese edia aniani be dabu taudia ida idia haria. Witness tauna ta be ia ida kampani tamona ai idia gaukara hebou tauna ta, Witness lasi tauna, ida motuka amo idia heau noho lalonai ena dina tubua aniani ia ania. Unai dainai ia abia aniani mauana ta be ia ida ia haria.

Ena gaukara turana ia henanadai: “Inai dina tubua ena aniani maua be edeseniai oi hoia?” Tadikaka ese Witness taudia edia heduru gaukarana ia herevalaia. Unai tau be mai moale ida ia gwau: “Lau be dina momo lalodiai au rau lau do ania lasi. Haida do lau rakatania bena egu ruma bese totona ruma dekenai do lau abia lao.”

Nega ihatoina ai ma ia vara lou neganai, ena gaukara turana ese yen 3,000 (K46 bamona) ia henia Witness tauna dekenai bena ia gwau: “Lau be emui gaukara lau diba, unai dainai lau ura emui gaukara totona kontribusen lau henia. Lau ida emu dina tubua aniani oi haria karana lau laloa bada. Momokani, emu turana iboudiai be taunimanima namodia.”