Dika Gabudia ai Heduru Idia Henia

DIKA badana murinai taunimanima edia hekwarahi heduru idia henia totona ita hanamoa be namo. Heduru henia program momo ese ruma idia haginidia lou, famili taudia idia haboua, bona gau badana, taunimanima momo idia hamauria.

Dika badana ia vara neganai, Iehova ena Witness taudia ese heduru henia program idauidau ese idia henia heduruna idia gaukaralaia​—bona unai dainai idia tanikiu henia. Nega tamona ai, idia be Baibel ena taravatu henunai idia noho, ia gwau “Keriso ena abidadama henia taudia do [idia] durua bada herea be namo.” (Galatia 6:10) Oibe, Witness taudia idia laloa idia be varavara; idia ta ta idia laloa idia be “famili.” Unai dainai ta ta idia gwauraia “tadikaka” bona “taihu.”​—Mareko 3:​31-​35 itaia; Filemona 1, 2.

Unai dainai dika badana ia vara neganai, Iehova ena Witness taudia edia elda taudia idia hekwarahi bada kongregesen ena memba taudia ta ta be edeseni ia noho bona edena heduru ia abia be namo idia diba totona, bona dala idia tahua heduru idia henia totona. Accra, Ghana ai; San Angelo, U.S.A. ai; bona Kobe, Japan ai unai ia vara momokani, mani ita laloa.

Accra​—“Noa Ena Nega Bamona”

Medu be 11 okaloka hanuaboi ai ia diho matamaia, bona hora momo lalonai ia diho goadagoada. John Twumasi, Accra ena Iehova ena Witness tauna ta, ia gwau: “Medu ia diho goadagoada dainai egu famili ibounai ai mahuta diba lasi.” Daily Graphic ia gwau ia be “Noa Ena Nega Bamona.” John ma ia gwau: “Emai davana bada kohu haida be ataiai daiutuna dekenai ai abia lao toho, to vadavada ena iduara ai kehoa neganai, abata ranu goadana ia aru vareai.”

Siahu taudia ese hadibaia hereva idia halasia, gabu ai rakatania totona, to momo idia daradara dainai idia noho, idia laloa idia rakatania neganai​—ena be ranu ese ia hahonua​—raskol taudia ese reana kohu do idia henaoa. Ena be haida idia ura ruma idia rakatania to idia rakatania diba lasi. Kekeni ta ladana Paulina ia gwau: “Egu sinana bona lau be hegeregere lasi iduara ai kehoa. Ranu ia daekau noho dainai, ai be au daramu latanai ai gini bona guhi ena au badana ai dogoatao. Dokonai, 5 okaloka bamona daba ai, emai dekena taudia ese ai idia hamauria.”

Ia hegeregere neganai maoromaoro, Iehova ena Witness taudia ese gaukara idia hamatamaia. Keristani taihu ta ladana Beatrice ia gwau: “Kongregesen ena elda taudia ese ai idia tahua, bona Witness turana ta ena ruma dekenai ai idia davaria, ai be unuseniai ai heau mauri. Dina toi sibona abata murinai, elda taudia bona kongregesen ena matamata taudia idia mai bona emai ruma lalonai bona murimuri ai ia noho kopukopu idia kakasia oho. Watch Tower Society ese hagoevaia muramura, gaigai maragidia hamasea muramura, peni, mahuta bedi, bilankesi, dabua, bona natudia edia dabua ia henia. Tadikaka ese dina haida lalonai aniani idia siaia ai dekenai. Unai ese egu kudouna ia hamarerea momokani!”

John Twumasi, guna ena hereva haida ai gwauraia, ia gwau: “Ai noholaia ruma badana dekenai idia noho bese ma haida lau hadibaia emai Society ese hagoevaia muramura bona gaigai maragidia hamasea muramura ia siaia​—edia bada be hegeregere ruma ibounai ai hagoevaia totona. Idia noho taudia 40 bamona ese hagoevaia gaukarana idia durua. Hagoevaia muramura haida lau henia egu dekena taudia dekenai, bona unai gabu ena pris tauna dekenai danu. Guna egu gaukara turadia idia laloa kerere, Iehova ena Witness taudia be edia orea taudia sibona idia durua.”

Keristani tadikaka bona taihu ese idia abia heduru idia laloa bada. Tadikaka Twumasi ena hereva dokonai ia gwau: “Ena be abata lalonai lau haboioa kohu edia davana be bada bona lau abia heduru gaudia edia davana idia hanaia, to egu famili bona lau ai laloa Society ia henia heduru namona dainai ai abia gaudia ese ai haboioa gaudia idia hanaia.”

San Angelo​—“Regena be Tanobada Ena Dokona Ena Regena Bamona”

May 28, 1995 ai, San Angelo idia hadikaia idia giroagiroa lai dikadia ese au idia kokia, paua audia idia makohia, bona paua ia noho paualaini be dala dekenai idia negea. Lai edia sipidi be kilomita 160 hora tamona lalonai, bona idia ese gavamani ia haginia bona ia gaukaralaia gaudia idia hadikaia. Ruma 20,000 mai kahana lalonai paua idia abia lasi. Bena medu, aisi nadi bamona, ia diho. National Weather Service ena ripoti ia gwau ‘aisi nadi edia bada be sentimita 4 bamona,’ gabeai ‘sentimita 10 bamona,’ bona dokonai ‘sentimita 12 bamona.’ Aisi nadi idia diho ena rege dainai ai be taia kudima bamona. Unai gabu dekenai ia noho tauna ta ia gwau: “Regena be tanobada ena dokona ena regena bamona.”

Lai bona medu badana ia ore murinai, regerege be lasi momokani. Metairametaira taunimanima be aisi nadi ese idia botaia rumadia amo idia mai, dika ena bada idia itaia totona. Idia do gini noho audia edia rau iboudiai ia kokia. Idia do gini noho rumadia edia toana be gau ta ese edia kopina ia kokia bamona. Gabu haida dekenai tano ia koua aisi nadi edia dobu be mita tamona. Ruma bona motuka edia uindo tausen momo be lai ese ia makohia, bona unai dainai hari idia makohi galasi momoru be tano idia koua aisi nadi danu idia diaridiari. Hahine ta ia gwau: “Ruma dekenai lau giroa neganai, ruma ena dala dekenai motuka lalonai lau helai sibona bona lau tai. Dika ena bada dainai egu taitai lau koua diba lasi.”

Heduru henia program bona hospital ese karaharaga heduru idia henia, hegeregere moni, ruma haginia kohu, medikal heduru, bona sisiba. Lai bona medu lalonai dika idia davaria taudia danu idia hekwarahi ma haida idia durua totona, unai be kara namona.

Iehova ena Witness taudia edia kongregesen idia gaukara danu. Aubrey Conner, San Angelo ena elda tauna ta, ia gwau: “Lai badana ia ore murinai maoromaoro, telefon amo ta ta ena noho dalana ai tahua. Ai ta ta bona emai Witness lasi dekena taudia ai durua, uindo be reirei amo ai koua, guhi be plastik amo ai koua, bona lai bona medu idia vareai lasi totona ruma ai hanamodia toho. Bena kongregesen taudia ibounai, edia ruma be dika taudia unai, edia ladana be lista dekenai ai torea. Ruma handred bamona be idia dika bona ta ese ia hanamoa be namo, bona heduru oreadia ese idia henia ruma haginia kohu be hegeregere lasi. Unai dainai ai be kohu ma haida ai hoia bona gaukara totona ai hegaegae. Unai gaukara lalonai Witness taudia 1,000 bamona ese edia heduru idia henia, pura ta ta ena dokona dinadia ai taunimanima 250 bamona idia gaukara. Haida be daudau, kilomita 740 amo idia mai. Ibounai be idia gaukara goadagoada, nega momo dina ena siahu be 40° C. lalonai. Ena mauri lagani be 70 taihu ta be ai ida pura ibounai edia dokona dinadia ai ia gaukara, nega tamona sibona ia gaukara lasi, bona unai be ia sibona ena ruma idia hanamoa neganai. Bona unai dinadia ai, ia be sibona ena guhi dekenai ia noho hanamoa gaukarana ia durua totona!

“Nega momo gaukara idia raraia taudia edia hereva ai kamonai, idia gwau, ‘Tomadiho ibounai be inai bamona edia memba taudia totona idia karaia be do ia namo herea, ani?’ Emai dekena taudia idia hoa bada badina idia itaia volantia taudia (taihu danu) 10 ia lao 12 be Friday dabai momokani ai, Witness turana ena ruma dekenai idia ginidae, guhi do idia hanamoa eiava matamata idia karaia totona, davana lasi. Nega momo unai gaukara be pura ena dokona dinadia ai sibona idia haorea. Nega haida, kampani ta ena gaukara taudia ese edia gaukara idia hamatamaia vadaeni emai grup be dekena tauna ena ruma dekenai idia ginidae neganai. Ai ese emai guhi gunana ai kokia bona matamata ai karaia bona gabu ai hagoevaia, idia be edia gaukara idia do haorea lasi neganai. Nega haida edia gaukara idia hadokoa ai idia raraia totona!”

Dokonai tadikaka Conner ia gwau: “Ai ibounai be ai gaukara hebou amo ai abia ekspiriens momo do ai laloa bada. Tadikaka dekenai lalokau ai hahedinaraia idia ese ai dekenai idia hahedinaraia guna bamona lasi, bona unai amo ai ibounai ese dala idauna ai ta ta ai diba heheni. Ai laloa inai be Dirava ena tanobada matamatana lalonai do ia vara gauna ena haheitalai, tadikaka bona taihu be idia ura bada dainai ta ta idia durua heheni.”​—2 Petero 3:​13.

Kobe​—“Au, Pilasta, Bona Mase Taudia Edia Momoru Gabuna”

Kobe dekenai idia noho taudia idia laloa idia hegaegae vadaeni. Momokani, September 1 ta ta ai Dika Koua Dinana idia karaia. Sikuli natudia ese tano mareremarere lalonai do idia karaia gaudia totona idia hegaegae, ami taudia ese helikopita amo taunimanima idia durua gaukarana idia tohoa, bona lahi habodoa taudia ese edia tano mareremarere ia tohotohoa masini idia mailaia, unai ena bada be daiutu ta ena bada hegeregerena bona ia mareremarere tano ia mareremarere bamona, unai lalonai volantia taudia ese tano mareremarere lalonai do idia karaia gaudia idia tohoa. To tano mareremarere korikorina be January 17, 1995 ai ia vara neganai, unai hegaegae gaudia ibounai be anina lasi bamona. Guhi tausen momo idia moru​—tohoa masini lalonai unai bamona ia vara lasi. Trein idia giroa; dala badadia edia kahana kahana idia dika idia lao; gas bona ranu paipa idia makohi; ruma be cardboard bamona idia moru. Time magasin ese unai gabu ia gwauraia “au, pilasta, bona mase taudia edia momoru gabuna.”

Unai murinai lahi idia matamaia. Lahi habodoa taudia be mai lalo-hekwarahi ida motuka ena laini lata herea momokani dokonai idia noho, lahi ese ruma idia aradia noho lalonai. Lahi gabuna dekenai idia ginidae taudia be nega momo idia davaria siti ena ranu paipa idia dika dainai ranu idia abia diba lasi. Gavamani ena gaukara tauna ta ia gwau: “Dina ginigunana be dika herea. Lau hegeregere lasi mamina lau abia, egu mauri ibounai lalonai be unai bamona guna lau mamia lasi, badina lau diba lahi idia araia noho ruma lalodiai taunimanima momo idia noho. Bona lau diba lau durua dalana be lasi momokani.”

Taunimanima 5,000 bamona idia mase, bona ruma 50,000 bamona idia moru momokani. Kobe dekenai aniani ia hegeregere lasi ibounai totona. Ranu idia abia totona haida ese idia makohi ranu paipa henunai ia noho ranu mirona idia abia. Ruma lasi taudia momo ese roho mauri ruma badadia dekenai idia heau lao, idia haida lalonai aniani idia haria, taunimanima ta ta ibounai dekenai raisi bolo maragina tamona idia henia dina ta ta ai. Karaharaga taunimanima idia badu. Tau ta ia maumau: “Siahu taudia ese gau ta idia karaia lasi. Bema edia heduru ita naria hitolo dainai do ita mase.”

Iehova ena Witness taudia edia kongregesen Kobe bona kahirakahira idia noho gabudia dekenai ese maoromaoro gaukara totona idia hegaegae. Helikopita ia taria tauna, edia gaukara ia itaia namonamo tauna unai, ia gwau: “Tano mareremarere dinana dekenai dika bada ia vara gabuna dekenai lau lao bona unuseniai pura ta lau noho. Roho mauri ruma badana ta dekenai lau ginidae neganai, daradara bada ia noho. Heduru gaukarana ta idia do karaia lasi. Iehova ena Witness taudia sibona ese unai gabu dekenai idia mai haraga, bona gaukara ta ta idia karaia.”

Momokani, gaukara badana ia noho. Kingdom Hall 10 be idia gaukaralaia diba lasi, bona Witness taudia 430 mai kahana be ruma lasi. Idia noholaia rumadia ma haida 1,206 be idia dika bona idia hanamodia be namo. Unai sibona lasi, to unai dika badana lalonai idia mase Witness taudia 15 edia famili taudia be hahegoada idia abia be gau badana.

Witness taudia 1,000 bamona, tano ena kahana ibounai amo, ese edia nega idia henia hanamoa gaukara lalonai durua totona. Tadikaka ta ia gwau: “Idia do bapatiso lasi Baibel stiuden taudia edia ruma dekenai ai gaukara neganai, idia nanadaia loulou, ‘Inai gaukara ibounai totona davana hida do ai henia?’ Ai hamaorodia kongregesen ese unai gaukara idia durua neganai, ai idia tanikiu henia, idia gwau, ‘Ai stadi gaudia be hari idia vara momokani!’ ”

Witness taudia ese dika badana murinai karaharaga bona dalana namona ai heduru idia henia karana be momo ese idia hoalaia. Guna ena hereva ai gwauraia helikopita taria tauna ia gwau: “Lau hoa bada. Umui ese ta ta ‘tadikaka’ bona ‘taihu’ umui gwauraia. Umui durua heheni dalana lau itaia vadaeni; momokani umui be famili ta.”

Witness taudia danu ese tano mareremarere amo diba namona idia abia. Taihu ta ia gwau: “Guna lau laloa orea ta be ia bada ia lao neganai, ta ta durua karana be ia auka ia lao.” To ia abia heduru namona ese ena lalohadai ia haidaua. “Hari lau diba Iehova ese ita ia naria, orea ibounai ia durua dalana sibona amo lasi to ita ta ta ia durua danu.” To, dika badadia amo heduru korikorina ita abia negana be do nega vairai.

Heduru Korikorina be Kahirakahira!

Iehova ena Witness taudia ese vaira negana idia laloa bada, unai negana mauri bona mauri durua gaudia be dika badadia ese do idia hadikaia lasi. Dirava ena tanobada matamatana lalonai, taunimanima be diba do idia abia tanobada do idia hadikaia lasi totona. Taunimanima be sibona edia namo tahua karadia idia haorea neganai, idia vara kava dika badadia ese taunimanima do idia hadikaia lasi.

Ma danu, Iehova Dirava​—tanobada ena siahu gaudia ia Havaraia Tauna​—ese do ia itaia tanobada taudia bona tanobada dekenai ia havaraia gaudia be nega ta tanobada ena siahu gaudia dainai dika do idia davaria lasi. Unai neganai tanobada be paradaiso momokanina. (Isaia 65:17, 21, 23; Luka 23:43) Apokalupo 21:4 ena peroveta hereva be dala hereana amo do ia guguru: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”

[Picture on page 5]

Beatrice Jones (laurina kahanai) ese ia hahedinaraia edena bamona ia bona ma haida be ta ta idia dogoatao bona abata gabuna idia hanaia

[Picture on page 6]

Heduru gaukarana idia giroagiroa lai dikadia murinai