Hari Inai Negai Iehova Ena Hamauria Karadia

BAIBEL ese Iehova ena kara be inai bamona ita ia hadibaia: “Kara maoromaoro tauna ena hisihisi be momo, to Iehova ese idia iboudiai dekena amo ia hamauridia” bona, “Bema hisihisi bona metau Dirava badinaia taudia dekenai idia noho neganai, [Iehova] ese inai hisihisi dekena amo idia ia hamauria diba.”​—Salamo 34:19; 2 Petero 2:9.

Iena taunimanima ese hisihisi idia davaria neganai, Iehova ese edena dala amo ia durudia? Durudia totona ia ese idia vara kava gau dikadia be hoa dalana ta amo ia koudia lasi. Ena be taunimanima momo idia laloa unai ia karaia be namo, to ia ese siahu gauna ma ta, taunimanima momo idia diba namonamo lasi gauna ia gaukaralaia​—unai be lalokau. Oibe, Iehova ese iena taunimanima ia lalokau henidia, bona mai goada danu idia lalokau heheni totona ia hadibadia namonamo, unai dainai, idia totona ia karaia karadia be hoa karadia bamona.​—1 Ioane 4:​10-12, 21.

Haida idia gwau dika ta ia vara neganai, taunimanima be aniani, muramura, bona kohu ma haida idia abia be namo​—lalokau be gau badana lasi. Momokani, aniani, muramura, bona kohu ma haida idia abia be gau badana. To, aposetolo Paulo be inai bamona ia hereva: “Bema lauegu abidadama dekena amo ororo lau kokia diba, to lauegu lalokau be lasi neganai, lau be anina lasi gauna bamona. Bema lauegu kohu ibounai ogogami taudia dekenai lau henia, bona bema lauegu tauanina lau henia, lau heagilaia totona, to lauegu lalokau be lasi neganai, lau be namo lasi.”​—1 Korinto 13:​2, 3, NW.

Nega momo ita duahia sivaraidia idia gwau taunimanima durua gaudia idia siaia, to uopu dekenai idia noho kava bona idia bodaga eiava bita ese idia ania, bona unai heduru gaudia idia ura abia taudia be gorere bona hitolo dainai idia mase. To gau dikana be inai, unai heduru gaudia be nega haida mata-ganigani bona kara maoromaoro lasi taudia edia imana dekenai idia lao, bona unai amo sibodia totona moni idia abia. Momokani, ia namo heduru gaudia idia noho, to gau badana be dika idia davaria taudia ese unai heduru gaudia idia abia. Mai edia lalokau bona idia ura momokani idia heduru taudia ese namo idia havaraia diba.

Lalokau Karadia

September 1992 ai, lai-gubana ladana Hurricane Iniki be Hawaii ena Kauai motumotuna ia botaia, unuseniai taunimanima 55,000 idia noho. Hora tamona lalonai, unai lai-gubana ia heau ena sipidi be kilomita 210, bona nega ta ta ai ena sipidi ia bada daekau 260 kilomita hora tamona lalonai; unai lai-gubana ese taunimanima rua ia hamasedia bona 98 dekenai bero ia henidia, edia ruma 100 100 amo 75 75 idia dika, bona taunimanima 8,000 edia ruma be lasi, unai lai-gubana ese dika bada ia havaraia, bona gabu idia hanamoa lou davana be K1,000,000,000 bamona. Unai motumotu maragina dekenai idia noho taudia amo 800 be Iehova ena Witness taudia, bona edia kongregesen be 6. Idia ese dika idia davaria, a?

Iniki be ia do ginidae lasi neganai, sekit naria tauna ena hereva hegeregerena, kongregesen edia elda taudia ese kongregesen iboudiai edia memba taudia idia tahudia, idia ura diba, dika idia davaria lasi totona gabu namona dekenai idia noho, bona unai dika do ia mai totona idia hegaegae vadaeni. Unai lalokau heduru karana be mai anina bada, badina Witness taudia ese bero badadia eiava mase idia davaria lasi.​—Isaia 32:​1, 2 itaia danu.

Ena be sivarai siaia dalana bona loaloa dalana idia dika, to unai lai-gubana ia ore neganai, ami oreana amo gwaumaoro idia abia dainai, tatau toi be peleini amo Watch Tower Bible and Tract Society ena Honolulu brens opesi amo idia ginidae Kauai dekenai, idia ginidae taudia ginigunadia unai. Karaharaga, idia ese unai gabu Witness taudia idia tahudia, bona unai dina murinai ena daba kahanai, idia hebou bona idia hegaegae namonamo taunimanima durudia palani karaia totona. Taunimanima be dahaka idia abia be namo idia diba totona, bona ruma haginia kohudia idia abia totona, komiti idia hegaegaelaia bona Honolulu ena brens opesi amo unai kohu idia abia. Dina bona hanuaboi idia gaukara, bona idia gaukara goada dabu taudia dekenai heduru gaudia idia henia totona, edia ruma idia hagoevaia bona idia dika rumadia idia hanamodia totona.

Motumotu ma haida dekenai, Witness taudia be karaharaga idia dabu tadikaka bona taihu idia durudia. Kauai airport idia kehoa neganai, Witness taudia 70 be peleini amo idia mai do idia heduru totona. Bouti amo idia siaia heduru gaudia be paoa masini, lahi au ena sitou, lamepa, bona aniani; ibounai ena davana be K100,000. Unai motumotu ena Kingdom Hall ta dekenai unai kohu ibounai idia haboua; to, taunimanima ma haida ese do idia henaoa garina idia gari. Daudau lasi murinai, Ami taraka haida be Kingdom Hall ena motuka atoa gabuna dekenai idia mai vareai, bona motuka haheaua taudia ese gwaumaoro idia tahua edia taraka unuseniai idia noho totona. Ami ese edia taunimanima haida idia atodia edia taraka idia naridia totona, bona idia noho dainai taunimanima ese unai heduru gaudia idia henaoa garina tadikaka idia gari lasi.

Tadikaka ese ruma ta ruma ta ai paoa masini idia abidia lao, bona ruma iboudiai dekenai, hora rua eiava toi lalodiai unai masini amo paoa idia henidia, edia frisa idia keru noho diba totona. Tadikaka oreadia idia siaia bona idia heduru ruma idia hagoevaia bona idia hanamodia totona. Guna, taihu ta ena adavana be ia dagedage henia bada, to tadikaka ese iena ruma idia hanamoa ia itaia neganai, unai ese ena kudouna ia hamarerea bada dainai, ia gini sibona bona ia tai. Vadivadi tauna United States ena tano badana dekena amo ese Witness oreana idia gaukara hebou ia itaia neganai, edia kara bona edia hegaegae dalana ia hoalaia dainai, idia dekenai ia lao bona dahaka dainai idia be orea ma haida amo idia idau herea ia henanadailaia. Tadikaka ta ese ia hamaoroa idia ese Dirava bona edia Keristen bamodia idia lalokau henidia dainai unai gaukara idia karaia, bena unai tau ia gwau: “Dirava lau diba dalana be dahaka?” (Mataio 22:​37-40) Bena murinai ia gwau: “Umui taunimanima be umui hegaegae namo herea, bona egu gabu, Florida dekenai, do lau giroa neganai, reana tau ta oi hegaegaelaia lau ia naria totona!”

Kauai dekenai, Iehova ena Witness taudia idia heduru ruma 295 idia hagoevaia eiava idia hanamodia totona. Unai namba amo, idia hanamoa ruma 207 edia dika be sisina sibona, to ruma 54 edia dika be bada, bona ruma 19 idia ore vaitani. Edia gaukara ta danu be unai motumotu dekenai idia noho Witness taudia iboudiai idia lao henidia, idia ura iboudiai idia durudia. Heduru kohu idia ginidae neganai, unai heduru gaudia be taihu ta dekenai idia mailaia, ena dekena tauna be Buddha tomadiho tauna, bona ia gwau iena orea dekena amo kohu ia abia lasi, ti sisina danu ia abia lasi. Witness orea ese Witness lasi hahine ta ena ruma idia hagoevaia, bona ia gwau: “Nega momo umui be lauegu iduara dekenai umui mai haroro totona, bona lau diba umui be dekena taudia namodia, to umui ese lauegu ruma umui hagoevaia karana be dekena taudia lalokau henia kara korikorina, bona hari emui orea ena kara lau diba. Emui gaukara bada dainai umui lau tanikiu henia.”

Edia Keristen tadikaka bona taihu idia durudia tauanina dalanai sibona lasi, to heduru gaukara idia naria taudia be lauma dalanai idia ura durudia danu. Unai lai-gubana ia toa dina ta mai kahana murinai, kongregesen haida ese edia hebou ma idia karaia. Karaharaga, buka stadi grup hebou maragidia ma idia karaia. Motumotu ma haida dekena amo elda taudia 10 idia mai Kauai dekenai unai gabu ena elda taudia idia durudia totona, bena unai motumotu dekenai Witness taudia iboudiai durudia totona idia vadivadi henidia. Murina Sunday ai, kongregesen iboudiai 6 ese edia Gima Kohorona Stadi idia karaia, bona miniti 30 lalonai, Heduru Komiti ena memba tauna ta ese hereva ia henia, bona miniti 30 lalonai, Honolulu amo ia mai Brens Komiti memba tauna ta ese hereva ia henia. Unai hebou dekenai ia lao tauna ta ia gwau: “Idia abia heduru hereva namodia dainai, iboudiai idia goada bona lauma dalanai idia hegeregere idia do noho hekwakwanai idia hanaidia totona. Unai hebou idia hadokoa neganai, helai taudia kahirakahira iboudiai idia tai, bona karaharaga edia imadia idia patapataia.”

Tanobada Ibounai Tadikaka Oreana

Tanobada ibounai lalonai, unai bamona lalokau bona heduru karana be Iehova ena taunimanima edia toana. Lagani tamona bamona gunanai, lai-gubana ladana Cyclone Val be Western Samoa ia botaia neganai, dika bada ia havaraia, to karaharaga tanobada ena kahana idauidau amo, Iehova ena Witness taudia ese edia tadikaka bona taihu idia durudia. Gabeai, gavamani ese moni ia siaia tomadiho orea iboudiai dekediai​—Iehova ena Witness orea dekenai danu​—edia ruma hanamodia totona, to Witness taudia ese unai moni idia siaia lou; revareva lalonai gavamani idia hadibaia edia ruma idia hanamodia vadaeni, bona reana unai moni do idia gaukaralaia diba gavamani edia ruma haida idia hanamodia lou totona. Unai idia karaia dainai, unai sivarai be unai gabu ena niuspepa lalonai idia torea. Unai ia kamonai neganai, gavamani tauna ta ia gwau ena dubu orea ena kara dainai ia hemarai, badina idia be mai edia insurens lai-gubana ese ia hadikaia rumadia do idia hanamodia lou totona, to gavamani ia henia monina idia dogoatao.

Unai hegeregerena, September 1992 ai, France ena sautist kahanai, Ouvèze Sinavai ena ranu ia daekau bona Vaison-la-Romaine bona ia kahirakahira hanua 15 lalodiai abata ia vara, karaharaga Witness taudia idia heduru. Hanuaboi tamona lalonai, unai abata dainai taunimanima 40 idia mase, ruma 400 ia haoredia, bona ruma handred momo ia hadikadia, bona ruma bese tausen momo edia ranu bona paoa be lasi. Daba ia rere neganai, unai gabu ena kongregesen amo Witness taudia idia mai abata amo dika idia davaria taudia idia durudia totona, idia be heduru henia taudia ginigunadia unai. Unai gabu Witness taudia be mai lalokau danu edia ruma idia dika taudia be edia ruma dekenai idia abidia dae. Daudau amo bona kahirakahira amo Witness taudia handred momo idia mai heduru idia henia totona. Kahirakahira ia noho Orange siti dekenai, heduru komiti idia haginia volantia taudia orea hani edia gaukara idia biagua totona, idia ese kopukopu idia kokia bona ruma idia hagoevaia, mai ena kopukopu dabuadia momo herea idia huridia, bona idia hegaegaelaia aniani bona idia inua diba ranuna idia haridia idia dabu taudia dekenai. Danu, idia volantia unai gabu ena sikuli bona kaunsolo rumadia haida idia hagoevadia totona. Edia tadikaka bona taihu sibona lasi, to hanua taudia danu be edia gaukara goadagoada dainai idia moale.

Gabu idauidau momo lalodiai, idia vara kava gau dikadia dainai, taunimanima momo hegeregeredia, Iehova ena Witness taudia ese abata, lai-gubadia, bona tano mareremarere amo dika idia davaria. Idia lalo-parara taunimanima ta lasi ia diba unai dika do ia mai bona ta ese ia koua diba lasi, unai dainai, idia gwau lasi Dirava eiava taunimanima ta ese unai dika ia havaraia. (Kohelete 9:11) Oibe, herevana dahaka dika do idia davaria, to idia diba edia Witness bamodia be sibona ia tahua lasi lalokau karana amo do idia durudia. Edia abidadama be tamona dainai unai bamona lalokau idia hahedinaraia diba. Hahediba tauna Iakobo ia gwau: “Sedira tadikaka ta o taihuna ta be dabua lasi, bona ia be aniani lasi. Vadaeni umui ta ese bema ia hamaoroa ia gwau, ‘Dirava ese oi do ia hanamoa, oiemu kopina do oi hasiahua, bona do oi boga kunu.’ Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi. Abidadama danu be inai bamona. Bema abidadama sibona ia noho, to kara be lasi, unai abidadama be anina lasi.”​—Iakobo 2:​15-17.

Durua Momokani Ia Mai Dalana

Iehova ena Witness taudia ese dika ta idia davaria neganai, idia laloa lasi Dirava ese hoa dalana amo do ia kokia, to idia diba edia tanobada ibounai Keristen orea dekena amo heduru do idia davaria diba. Oibe, hisihisi negana ta lalonai, unai orea ese heduru bada ia henia diba be hoa gauna ta bamona. Idia ese Iesu ena hereva Mataio 17:20 dekenai idia laloatao, ia gwau: “Umui emui abidadama be maragimaragi dainai. Umui lau hamaoroa momokani, bema umui emui abidadama ena bada be mastadi uhena sibona bamona, inai ororo bema umui hereva henia, bema umui gwau, ‘Iniseni amo oi lao unuseniai,’ be do ia lao. Kara ibounai danu do umui karaia diba.” Oibe, ena be hekwakwanai ena bada be ororo bamona, to Keristen momokani ena abidadama bona lalokau gaukaralaia neganai, unai hekwakwanai idia ore.

Ita be kara idauidau bona kara dika negana lalonai ita noho, to, tanobada ibounai lalonai, Iehova ena taunimanima be mamina idia abia edia Dirava ese ia naridia. Edia hemami be salamo torea tauna ena hemami bamona, ia gwau: “Maino dekenai do lau hekure diho bona do lau mahuta, badina Iehova e, oi sibona ese lau oi gimaia dainai gari lasi dekenai lau noho.” (Salamo 4:8) Gari lasi dekenai, idia ese inai gaukara idia karaia noho: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Bona idia diba momokani Iehova ia gwauhamatalaia tanobada matamatana do ia mai, bona unai maino bona kara maoromaoro negana idia naria noho; bona unai nega lalonai taunimanima amo eiava idia vara kava gau dikadia amo dika ta do idia davaria lou lasi.​—Mika 4:4.

[Pictures on page 12]

Witness taudia be daudau bona kahirakahira amo idia mai abata amo dika idia davaria taudia durudia totona