“Heau Mauri Hanua” ai Oi Noho Bona Oi Mauri!

“Iena heau mauri hanua dekenai do ia noho ela bona Hahelagaia Tauna Badana do ia mase.”​—Numera 35:28.

1. Daika be rara Davana Henia Tauna, bona kahirakahira ia be edena bamona do ia kara?

IEHOVA ena ladana ai rara davana do ia henia Tauna, Iesu Keriso, be kahirakahira unai do ia karaia. Mai ena aneru oreadia ida, kahirakahira ia ese rara dainai idia kerere bona idia helalo-kerehai lasi taudia edia davana do ia henidia. Oibe, kahirakahira do ia vara “hisihisi bada herea” lalonai, Iesu ese Dirava ena ladana ai do ia hamasedia ore. (Mataio 24:​21, 22; Isaia 26:21) Unai neganai edia kerere rara dainai be do idia abia.

2. Heau mauri gabuna korikorina tamona be dahaka, bona dahaka henanadai edia haere do ita davaria be namo?

² Ta do ia roho mauri dalana be, heau mauri hanuana ese ia laulaulaia gauna lao henia dalana ai do ia vareai bena do ia heau mauri! Bema hanua ai idia abia dae, unuseniai do ia noho be namo, badina be roho mauri gabuna korikorina tamona be unai. To reana oi henanadai, oi gwau, ‘Ita momo be ta ita alaia lasi​—momokani ita be mai eda kerere rara dainai, a? Dahaka dainai Iesu be rara Davana Henia Tauna? Hari inai nega ena heau mauri hanuana be dahaka? Gabeai do ita rakatania bena do ita noho namo diba, a?’

Ita be Momokani mai Eda Kerere Rara Dainai, A?

³ Mose ena Taravatu ena kahana ta ese ita ia hadibaia, tanobada taudia bilioni momo iboudiai be mai edia kerere rara dainai. Dirava ese Israela taudia ia hadibaia, idia iboudiai be mai edia kerere rara bubua karana dainai. Bema mase tauna ta idia davaria bona idia diba lasi daika ese ia alaia, hahemaoro taudia ese mase tauna bona kahirakahira hanuadia edia padadia idia hahetohoa, edena be kahirakahira idia diba totona. Toana be unai hanua be mai ena kerere rara dainai; vadaeni unai kerere abia oho totona, hanua ena tau badadia ese boromakau natuna hahinena ta, idia do gaukaralaia lasi gauna, be idia laohaia, idia birulaia lasi kourana ta ai ena aiona idia hakwaidua. Unai be Levi hahelaga taudia vairadiai idia karaia, ‘badina be Iehova ese ia abidia hidi vadaeni, idia ese heai bona heatu ibounai do idia tahua bona hamaoromaoroa.’ Hanua ena tau badadia ese unai boromakau ataiai edia imadia idia huria, idia gwau: “Aiemai imana ese inai tau ena rarana idia habubua lasi, bona aiemai matana dekenai inai alaia karana ai itaia lasi. Lohiabada e, oiemu bese Israela, oi ese Aigupito dekena amo oi hamauria besena do oi bogahisihisi henia. Ai ura lasi inai kerere lasi tauna ena rarana be oiemu bese Israela edia latanai do ia noho.” (Deuteronomi 21:​1-9) Iehova Dirava ia ura lasi Israela tanona be rara amo do idia hamiroa eiava rara dainai do idia kerere hebou.

4. Dahaka sivarai ese idia hahedinaraia Babulonia Badana be mai ena kerere rara dainai?

⁴ Oibe, edia hanua taudia edia kara dainai idia kerere hebou diba rara dainai. Babulonia Badana, tanobada ena tomadiho koikoi basileiana, ena kerere badana rara dainai be mani oi laloa. Iehova ena hesiai taudia edia rara ia inua kekero! (Apokalupo 17:​5, 6; 18:24) Kerisendom ena tomadiho oreadia idia gwau Maino Lohiana idia badinaia, to bese idauidau edia tuari, bona tomadiho kota karadia mai dagedage ida, bona tomadiho oreadia edia tuari dainai, Dirava vairanai ia be rara dainai ia kerere. (Isaia 9:6; Ieremia 2:​34) Momokani, lagani 1900 murinai idia karaia tuaridia bada hereadia ruaosi lalodiai idia mase taudia milioni milioni momo edia mase dainai iena kerere be bada. Unai dainai, Dirava vairanai, tomadiho koikoi idia badinaia taudia bona taunimanima edia tuari idia durudia bona idia tuarilaidia taudia danu be mai edia kerere rara dainai.

5. Edena dala amo taunimanima haida be Israela ai aksiden amo ta ia alaia mase tauna bamona?

⁵ Taunimanima haida ese ma haida idia hamasedia mai edia ura ida, eiava idia naria namonamo lasi dainai idia hamasedia. Ma haida be idia ala-ala hebou, reana badina be edia tomadiho gunalaia taudia ese idia hamaorodia Dirava ena ura be unai. Ma haida ese Dirava ena hesiai taudia idia dagedage henidia bona idia aladia mase. Ena be unai bamona karadia ita karaia lasi, to unai ala-ala dainai ita be iseda bese taudia ida ita kerere hebou, badina be guna Dirava ena taravatu bona ena ura ita diba lasi. Ita be aksiden amo ta ia alaia tauna bamona; ia “ese ma tau ta, ia badu henia lasi tauna, ia alaia kava.” (Deuteronomi 19:4) Namona be unai bamona taudia ese Iehova do idia noia goadagoada do ia hebogahisi henidia, bona heau mauri hanuana ese ia laulaulaia gauna lalonai do idia heau vareai be namo. Bema lasi, idia be rara Davana Henia Tauna ida do idia hedavari bena do ia aladia mase.

Iesu Ena Dagi Badadia

⁶ Israela lalonai mase tauna ena varavarana ta ese ena rara ena davana ia abia. Taunimanima iboudiai edia varavara ta sibona be hegeregere, tanobada ai idia hamasedia taudia iboudiai edia rara Davana Henia Tauna ai do ia lao, bona unai be mai anina bada, Iehova ena hesiai taudia, haida ese idia alaia mase taudia, dekenai. Tauna be Iesu Keriso. Ia vara neganai, ia be taunimanima goevadaena. Iesu ese ena kara dika lasi maurina be mase lalonai ia atoa diho, mauri davalaia boubouna, bena ia toreisi lou bona guba dekenai ia daekau neganai, unai boubou gauna ena davana be Dirava ia henia, Adamu ena bese taudia mai edia kara dika, idia mase noho taudia, hamauridia totona. Unai amo Iesu be taunimanima Hoidia Lou Tauna, iseda varavara korikorina, ai ia lao​—unai dainai rara Davana Henia Tauna ai ia lao be maoro. (Roma 5:12; 6:23; Heberu 10:12) Baibel ese ia hahedinaraia Iesu be ena aena gabudia ai idia raka taudia, horoa taudia, edia kakana. (Mataio 25:​40, 45; Heberu 2:​11-17) Guba dekenai Pavapava ai ia lao, bena ena boubou karana amo namo do idia davaria taudia, iena Basileia henunai tanobada dekenai do idia mauri noho ela bona hanaihanai taudia, edia “Hanaihanai Noho Tamana” ai ia lao. (Isaia 9:​6, 7) Unai dainai Iehova ese Iesu, tanobada taudia edia Varavarana, be rara Davana Henia Tauna ai ia halaoa vadaeni.

7. Hahelaga Tauna Badana ena dagi gaukarana ai, Iesu ese taunimanima be edena bamona ia durudia?

⁷ Inai danu, Iesu be Hahelaga Tauna Badana mai ena kara dika lasi, idia tohoa vadaeni tauna mai ena hebogahisi. (Heberu 4:15) Unai dagi gaukarana ai, ia ese ena boubou gauna, kara dika kokia gauna, ena namo ia gaukaralaia, taunimanima hanamodia totona. Gunaguna heau mauri hanuadia idia abia hidi, ‘Israela taudia, bona idau taudia, idia edia huanai idia noho taudia danu, noho daudau, o noho daudau lasi taudia, edia heau mauri hanua.’ (Numera 35:15) Unai dainai Hahelaga Tauna Badana ese ena boubou gauna ena hahenamo amo ena horoa orea taudia, “Israela taudia,” ia hanamoa guna. Hari ia ese unai hahenamo ia gaukaralaia, ‘idau taudia, edia huanai idia noho daudau, o noho daudau lasi taudia,’ heau mauri hanuana ese ia laulaulaia gauna lalonai idia noho taudia, hanamoa totona. Unai “mamoe idaudia,” Lohiabada Iesu Keriso ena, edia helaro be tanobada ai do idia noho ela bona hanaihanai.​—Ioane 10:16; Salamo 37:​29, 34.

Hari Inai Nega Ena Heau Mauri Hanuana

⁸ Heau mauri hanuana ese ia laulaulaia gauna be dahaka? Ia be tanobada gabuna ta lasi, Heberona hegeregerena gabuna ta lasi; unai hanua, Levi taudia ese idia noholaidia heau mauri hanuadia 6 amo, be Israela ena hahelaga tauna badana ena. Hari inai nega ena heau mauri hanuana be Dirava ena hahemauri dalana, iena taravatu, rara ena helaga taravatuna, ita utua dainai do ita mase garina ita ia hamauria dalana unai. (Genese 9:6) Unai taravatu idia utua taudia iboudiai, herevana mai edia ura ida idia utua o idia diba lasi neganai idia utua, to namona be idia iboudiai ese Dirava idia noia, edia dika do ia gwauatao badina be Hahelaga Tauna Badana, Iesu Keriso, ena rara idia abidadama henia dainai. Horoa Keristani taudia mai edia guba helarona bona “hutuma bada herea” mai edia tanobada helarona ese Iesu ena boubou gauna, dika abia oho gauna, ena namo idia abia dae, bona heau mauri hanuana ese ia laulaulaia gauna lalonai idia noho.​—Apokalupo 7:​9, 14, NW; 1 Ioane 1:7; 2:​1, 2.

9. Saulo, Taso tauna ese Dirava ena taravatu rara dekenai edena bamona ia utua, to edena bamona ia hahedinaraia ia helalo-kerehai?

⁹ Keristani tauna ai ia do lao lasi neganai, aposetolo Paulo ese rara taravatuna ia utua. Ena ladana idia gwauraia Saulo, Taso tauna neganai, Iesu ena orea taudia ia dagedage henidia bona aladia mase karana ia hanamoa. Paulo ia gwau: “To Dirava ese lau ia bogahisihisi henia, badina be abidadama lau do diba lasi, bona egu kara ena dika lau do diba lasi dainai.” (1 Timoteo 1:13; Kara 9:​1-19) Saulo ia helalo-kerehai murinai, ena abidadama karadia momo amo unai ia hamomokania. To, ta ese Iesu ena boubou gauna ia abidadama henia dainai mo lasi, to ma kara haida ia karaia danu dainai, ia hegeregere heau mauri hanuana ese ia laulaulaia gauna lalonai do ia vareai.

10. Lalo-goeva abia dalana be dahaka, bona dogoatao dalana be dahaka?

¹⁰ Aksiden amo ta ia hamasea tauna ese Israela ena heau mauri hanuadia ta lalonai ia noho diba badina tamona be, ia hamomokania diba Dirava vairanai ena lalona ese rara dainai ia samania lasi. Iseda lalona be unai bamona idia goeva totona, namona be Iesu ena boubou gauna ita abidadama henia, iseda kara dikadia amo ita helalo-kerehai, bona dala idauna do ita rakalaia. Namona be Keriso ena amo Dirava ita guriguri henia, ita noia iseda lalona do ia hagoevadia, bona iseda mauri ita gwauhamatalaia ia dekenai, bena unai ena toana hegeregerena ranu lalonai bapatiso ita abia be namo. (1 Petero 3:​20, 21) Inai lalo-goeva dainai ita be dala goevana ai Iehova ida ita hetura heheni diba. Iseda lalona do idia goeva noho dalana tamona be inai: Dirava ena hahegani do ita badinadia bona idaunegai heau mauri hanuadia ai heau mauri taudia ese Taravatu idia badinaia bona hanua taudia ese idia henidia gaukaradia idia karaia hegeregerena, ita ese heau mauri hanuana ese ia laulaulaia gauna lalonai ita idia henia gaukarana do ita karaia. Hari inai negai Iehova ena orea taudia edia gaukara badana be Basileia sivaraina harorolaia gaukarana. (Mataio 24:14; 28:​19, 20) Unai gaukara karaia karana ese ita do ia durua, hari inai nega ena heau mauri hanuana lalonai do ita noho kava lasi totona.

11. Hari inai nega ena heau mauri hanuana lalonai do ita noho namo totona, edena bamona do ita kara lasi be namo?

¹¹ Bema hari inai nega ena heau mauri hanuana ita rakatania, mase do ita davaria diba, badina be kahirakahira rara Davana Henia Tauna ese rara dainai idia kerere taudia iboudiai edia davana do ia henidia. Namo lasi hari inai negai inai henari hanuana murimurinai eiava ena tano ena hetoana kahirakahira ai do ita lao, bena unuseniai dika do ita davaria. Hahelaga Tauna Badana ena boubou gauna, kara dika abia oho gauna, bema ita abidadama henia noho lasi, ita be heau mauri hanuana ese ia laulaulaia gauna murimurinai do ita noho. (Heberu 2:1; 6:​4-6) Bona, bema tanobada taudia edia kara ita tohotohoa, bema Iehova ena orea ena isena ai ita gini, eiava bema iseda Tamana guba ai ena hahegani maoromaorodia amo ita raka siri, dika do ita davaria diba.​—1 Korinto 4:4.

Heau Mauri Hanuana amo Ruhaia

¹² Taravatu ia gwau, Israela lalonai aksiden amo ta ia alaia tauna be heau mauri hanuana ta lalonai do ia noho “ela bona Hahelagaia Tauna Badana do ia mase.” (Numera 35:28) Unai hegeregerena, namona be guna idia be mai edia kerere rara dainai taudia be heau mauri hanuana ese ia laulaulaia gauna lalonai do idia noho ela bona edena negai? Ela bona Hahelaga Tauna Badana, Iesu Keriso ena heduru idia abia be namo negana do ia ore. Paulo ia gwau: “Iesu be mai ena siahu, iena ladana dainai Dirava dekenai idia mai taudia do ia hamauridia.” (Heberu 7:​25) Kara dika ena anina dikana o guna rara dainai idia abia kererena ia do ore lasi neganai, goevadae lasi taudia ese Hahelaga Tauna Badana ena heduru do idia abia noho be namo, Dirava vairanai do idia maoromaoro totona.

13. Hari inai negai daidia be “Israela taudia,” bona namona be “heau mauri hanua” lalonai do idia noho ela bona edena negai?

¹³ Mani inai oi laloa, idau negai heau mauri hanuadia idia abia hidi, “Israela taudia,” bona idau taudia, edia huanai idia noho daudau, o noho daudau lasi taudia, edia. “Israela taudia” be lauma Israela taudia. (Galatia 6:16) Tanobada ai idia do noho negana ibounai lalonai, heau mauri hanuana ese ia laulaulaia gauna lalonai idia noho be namo. Badina be dahaka? Badina be edia goeva lasi tauanidia ai idia do noho, bona unai dainai edia Hahelaga Tauna Badana guba ai ena boubou gauna ena hahenamo idia abia noho be namo. To unai horoa Keristani taudia idia mase bena idia toreisi lou bona lauma maurina be guba dekenai idia abia neganai, Hahelaga Tauna Badana ena hesiai gaukarana ena anina idia dekenai be ia ore; edia tauanidia bona rara dainai idia abia kererena be idia rakatania vadaeni, ela bona hanaihanai. Unai horoa taudia, idia toreisi lou vadaeni taudia, dekenai Hahelaga Tauna Badana be idia ia naria bona edia dika ia kokia gaukaradia ia masetania bamona.

14. Dahaka danu dainai mai edia guba helarona taudia be hari inai nega ena heau mauri hanuana lalonai do idia noho?

¹⁴ Guba ai ‘Dirava ese Keriso ia henia hanamoa gaudia do idia abia danu’ taudia be taunimanima, unai dainai idia be heau mauri hanuana ese ia laulaulaia gauna lalonai do idia noho mai edia kamonai ida, ela bona edia mauri tanobada ai be mase ai do ia ore. Do ida mase neganai, edia tanobada maurina do idia atoa diho ela bona hanaihanai. (Roma 8:17; Apokalupo 2:10) Iesu ena boubou gauna be mai anina taunimanima sibodia mo dekenai. Unai dainai, lauma Israela taudia be lauma ai idia toreisi lou neganai, idia dekenai Hahelaga Tauna Badana be ia mase bamona. Idia ese “Dirava ena mauri” idia abia, bona guba dekenai do idia noho ela bona hanaihanai.​—2 Petero 1:4.

15. Hari inai negai daidia be ‘idau taudia, idia edia huanai noho daudau, o noho daudau lasi taudia,’ bona Hahelaga Tauna Badana ese edena bamona do ia durudia?

¹⁵ Edena negai ‘idau taudia, idia edia huanai idia noho daudau o noho daudau lasi taudia’ dekenai Hahelaga Tauna Badana be do ia “mase” bamona, bena unai dainai heau mauri hanuana ese ia laulaulaia gauna do idia rakatania diba? Hisihisi bada hereana do ia ore murinai, unai taunimanina hutuma bada be maoromaoro unai heau mauri hanuana amo do idia raka lasi diba lasi. Badina be dahaka? Badina be edia goevadae lasi tauanidia be do mai edia dika dainai, Hahelaga Tauna Badana ese do ia naridia noho be namo. Lagani 1,000 lalodiai do ia pavapava bona hahelaga gaukarana do ia karaia; bema unai nega lalonai iena heduru idia abia dae noho, idia be taunimanima goevadaedia ai do idia lao. Bena Iesu ese idia be Dirava do ia henia, bena edia kara maoromaoro tohoa totona Satani bona ena lauma dikadia do ia ruhaia nege nega sisina, bena unai hahetoho ena anina do ia noho ela bona hanaihanai. Unai hahetoho ai do idia kwalimu dainai, Iehova ese do ia gwauraidia maoromaoro. Unai amo do idia goevadae vaitani.​—1 Korinto 15:28; Apokalupo 20:​7-10.a

16. Hisihisi bada hereana amo do idia roho mauri taudia edia dika kokia gaukarana be edena negai Hahelaga Tauna Badana ese do ia hadokoa diba?

¹⁶ Unai dainai, hisihisi bada hereana amo do idia roho mauri taudia edia lalona do idia goeva noho totona, namona be heau mauri hanuana ese ia laulaulaia gauna lalonai do idia noho ela bona Keriso ena Lagani 1,000 Lohia Negana ena dokona. Unai neganai taunimanima goevadaedia ai ia halaodia vadaeni dainai, edia kara dika kokia gaukarana be Hahelaga Tauna Badana ese do ia karaia noho be badina lasi, bona do ia naridia lou lasi. Unai neganai Iesu ese unai gaukara do ia rakatania, Hahelaga Tauna Badana ese ena dagi gaukarana ia masetania bamona, badina be ena boubou gauna ena rara amo ia hagoevadia gaukarana be ia ore. Unai neganai idia ese heau mauri hanuana ese ia laulaulaia gauna do idia rakatania.

17. Dahaka dainai Keriso ena Lagani 1,000 Lohia Negana lalonai do idia toreisi lou taudia be heau mauri hanuana ese ia laulaulaia gauna lalonai do idia vareai bena unuseniai do idia noho be badina lasi?

¹⁷ Iesu ena Lagani 1,000 Lohia Negana lalonai idia toreisi lou taudia be heau mauri hanuana ese ia laulaulaia gauna lalonai do idia vareai bona unuseniai do idia noho ela bona hahelaga tauna badana do ia mase, a? Lasi, badina be edia mase amo edia kara dika ena davana idia henia. (Roma 6:​7; Heberu 9:27) To, Hahelaga Tauna Badana ese do ia durudia ela bona do idia goevadae. Bema Lagani 1,000 Negana murinai hahetoho ginigabena ai idia kwalimu, Dirava ese danu do ia gwauraidia maoromaoro bona mauri hanaihanai tanobada ai do ia henidia. To, momokani, Dirava ena hahegani idia badinadia lasi dainai edia kara maoromaoro tohoa negana ginigabena ai idia kwalimu lasi taudia, be do ia gwauraidia dika bena do ia hamasedia ore.

18. Iesu ena king dagina bona ena hahelaga dagina gaukaradia dainai, dahaka be taunimanima dekenai do ia noho ela bona hanaihanai?

¹⁸ Israela ena hahelaga taudia idia buruka idia lao bena idia mase. To Iesu be “Hahelagaia Tauna Badana ia [lao] vadaeni. Ia be Melekisedeka ena orea tauna ela bona hanaihanai.” (Heberu 6:​19, 20; 7:3) Ena be Iesu ena dagi, Dirava bona taunimanima padadiai ia gaukaralaia Hahelaga Tauna Badana dagina, be do ia doko, to unai ese ena mauri do ia hadokoa lasi. Iena gaukara, Pavapava bona Hahelaga Tauna Badana edia dagi gaukaradia, edia anina namona be taunimanima dekenai do ia noho ela bona hanaihanai, bona unai dainai idia be mai edia abitorehai ia dekenai, ela bona hanaihanai. Inai danu, Iesu ese Iehova tomadiho henia karana goevana do ia gunalaia ela bona hanaihanai.​—Filipi 2:​5-11.

Ita Ia Hadibaia Gaudia Namodia

¹⁹ Heau mauri hanuadia ia henidia ese gau haida ita ia hadibalaia. Hegeregere, mai ena badu ida ta ia alaia tauna be heau mauri hanuana ta lalonai ia noho diba lasi. (Numera 35:​20, 21) Vadaeni, heau mauri hanuana ese ia laulaulaia gauna lalonai ia noho tauna ese ena lalona ai ena tadikaka be edena bamona ia inai henia diba? Aposetolo Ioane ia gwau: “Iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” Unai dainai “ita ta ta dekenai ita lalokau henia be namo. Badina lalokau be Dirava dekena amo.”​—1 Ioane 3:15; 4:7.

20. Rara Davana Henia Tauna ese do ia aladia mase lasi totona, heau mauri hanuana ese ia laulaulaia gauna lalonai idia noho taudia be edena bamona idia kara be namo?

²⁰ Gunaguna, aksiden amo haida idia hamasedia taudia be rara davana henia tauna ese do ia hadikadia lasi totona, namona be heau mauri hanuana ta lalonai idia noho bona ena tano ena hetoana idia hanaia lasi. Vadaeni, heau mauri hanuana ese ia laulaulaia gauna lalonai idia noho taudia be edena bamona? Rara Davana Henia Tauna badana ese do ia aladia mase lasi totona, namona be hanua do idia rakatania lasi. Momokani, namona be do idia naria namonamo, gau ta ese do ia dibaganidia bena do idia kara hegeregere tano ena hetoana dekenai idia lao bamona garina. Namona be do idia naria namonamo, edia lalona ai Satani ena tanobada do idia ura henia matamaia garina. Reana unai ena anina be do idia guriguri bona do idia hekwarahi, to edia mauri do idia dogoatao dalana tamona be unai.​—1 Ioane 2:​15-17; 5:19.

21. Dahaka gaukara mai ena davana namona be hari inai nega ena heau mauri hanuana lalonai idia noho taudia ese idia karaia noho?

²¹ Aksiden amo haida idia alaia mase taudia idaunegai heau mauri hanuadia lalodiai ese gaukara namodia idia karaia be namo. Unai hegeregerena, horoa “Israela taudia” ese uma ena anina gogoa gaukarana bona Basileia harorolaia gaukarana idia karaia namo herea. (Mataio 9:​37, 38; Mareko 13:10) Hari inai negai idia haida be tanobada ai idia do noho, bona ‘idau taudia, idia edia huanai idia noho taudia’ hegeregeredia, Keristani taudia mai edia tanobada helarona be idia ida inai hahemauri gaukarana idia karaia hebou. Bona inai gaukara be mai ena davana namo hereana! Heau mauri hanuana ese ia laulaulaia gauna lalonai idia gaukara mai edia kamonai ida taudia, ese mase hanaihanai be rara Davana Henia Tauna ena imana amo do idia abia lasi. Lasi, to Dirava ena Hahelaga Tauna Badana dagina ai ia karaia gaukarana amo hahenamo hanaihanai do idia abidia. Vadaeni, heau mauri hanuana lalonai do oi noho bona do oi mauri ela bona hanaihanai, a?

[Footnotes]

Edena Bamona Oi Haere?

◻ Dahaka dainai ita gwau diba tanobada taudia bilioni momo iboudiai be mai edia kerere rara dainai?

◻ Dahaka dagi be Iesu Keriso ese ia abidia, taunimanima ia kara henidia totona?

◻ Heau mauri hanuana ese dahaka ia laulaulaia, bona vareai dalana be dahaka?

◻ Edena negai ia ese taunimanima be heau mauri hanuana ese ia laulaulaia gauna amo do ia ruhadia nege?

◻ Heau mauri hanuadia ia henidia ese dahaka gau mai edia anina bada be ita ia hadibaia?

3. Dahaka hereva Mose ena Taravatu lalonai dainai, ita diba tanobada taudia bilioni momo iboudiai be mai edia kerere rara dainai?

6. Dahaka dainai ita gwau diba Iesu be tanobada taudia edia varavara korikorina?

8. Heau mauri hanuana ese ia laulaulaia gauna be dahaka?

12. Namona be guna rara dainai mai edia kerere taudia be heau mauri hanuana ese ia laulaulaia gauna lalonai do idia noho ela bona edena negai?

19. Heau mauri hanuadia ia henidia ese dahaka ia hahedinaraia badu bona lalokau karadia dekenai?

[Picture on page 16]

Oi diba Iesu Keriso ese dahaka dagi badadia ia abia, a?