Duahia Taudia Edia Henanadai

Filipi 2:​9 ai, Paulo ese Iesu ia herevalaia, ia gwau: “Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia.” Iena ladana matamatana be daika? Bona bema Iehova ese Iesu ia hereaia, Iesu ena ladana ese ladana iboudiai edena bamona ia hereaia?

Filipi 2:​8, 9 ia gwau: “Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase. Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia.”

Ena be Iehova sibona mo ena ladana ese ladana iboudiai ia hereaia vaitani, to unai siri ese idia hahedinaraia lasi Iesu bona Iehova be Dirava tamona. Filipi karoa 2 ena siri ma ta ese ia hahedinaraia hegeregerena, Iesu ia toreisi lou murinai unai atai ladana ia abia. Guna, unai ladana ia abia lasi. To Iehova be nega ibounai ia atai herea momokani, bona ena dagi be nega ta ia senisi lasi. Iesu ese ia abia ladana ese gunaguna tanobada ia do mai lasi neganai ia abia ladana ia hereaia; unai ese ia hahedinaraia ia be Iehova ida ia hegeregere lasi. Paulo ena hereva, Dirava ese Iesu be ladana ta ia henia, ladana iboudiai ia hereaia ladana, ena anina be, ia henia ladana ese Dirava ese ia karaia gaudia iboudiai edia ladadia ia hereaia.

Iesu ena atai ladana be daika? Isaia 9:6 ese ita ia durua ita haere totona. Unai siri ese do ia mai Mesiana, Iesu, ia perovetalaia, ia gwau: “Ia be iseda gunalaia tauna do ia lao, bona iena ladana do idia gwauraia, ‘Sisiba Henia Tauna Namo Herea,’ ‘Siahu Bada Dirava,’ ‘Hanaihanai Noho Tamana,’ ‘Maino ena Lohia.’ ” Unai siri lalonai Iesu ena “ladana” be iena atai dagina bona ena siahu dainai ia abia ladana, bona ai laloa iena ladana, Filipi 2:9 ai Paulo ese “ladana ibounai ia hereaia” ladana ia gwauraia gauna, be unai hegeregerena. Iboudiai idia hagania Iesu ena ladana hanamoa totona do idia tui diho, unai amo do idia hahedinaraia idia diba Iehova ese atai siahu dagina ia henia vadaeni​—ia karaia gaudia iboudiai ia henidia dagidia ia hereaia dagina unai.

Mai eda moale bada ida ita be aneru bona taunimanima mai edia kamonai iboudiai ida Iesu ena ladana hanamoa totona ita tui diho! Anina be, Iesu ita kamonai henia, badina be Iehova ese atai dagina mai siahuna ia henia​—‘unai dekena amo Tamana Dirava ena ladana ita abia isi momokani.’​—Filipi 2:11; Mataio 28:18.