Abidadama Momokanina Dekenai Ita Ia Hakaua Lao Ladana

HAHINE ta ese Iehova ena Witness tauna ta ia hamaoroa, ia gwau: “Umui be Iesu bona ena dika kokia rarana umui abia dae lasi.” Tau ta ia gwau: “Umui be sibona umui gwauraia Iehova ena Witness taudia, to lau be Iesu ena witness tauna.”

Vaia, taunimanima momo edia lalohadai be Iehova ena Witness taudia ese Iesu idia abidadama henia lasi eiava idia abia isi momokani lasi. To, sivarai momokani be dahaka?

Momokani, Iehova ena Witness taudia ese Dirava ena ladana, Iehova, idia laloa bada.a Brazil dekenai Witness tauna ta, Itamar, ia gwau: “Dirava ena ladana lau dibaia ese egu mauri ia haidaua. Nega ginigunana lau duahia neganai, toana be mahuta mase amo lau noga bamona. Unai ladana Iehova ese lau ia udeudea bona lau ia hamarerea; egu lalona korikori ia hamarerea.” To, ma ia gwau: “Lauegu kudouna be Iesu lalokau henia mamina amo ia honu danu.”

Oibe, Iehova ena Witness taudia idia lalo-parara mauri hanaihanai idia abia totona, Dirava ena Natuna, Iesu, “ena ladana ai” idia abidadama be gau badana. (1 Ioane 5:​13, NW) To unai hereva ‘Iesu ena ladana ai’ ena anina be dahaka?

Iesu Ena Ladana Ena Anina

‘Iesu ena ladana ai’ bona unai bamona hereva ma haida be Keristani Greek Revarevadia, eiava “Taravatu Matamatana,” lalonai ita davaria diba. Momokani, unai hereva “ladana” idia gaukaralaia neganai, nega 80 mai kahana be Iesu ena gaukara ia herevalaia, bona idia amo, nega 30 be Kara bukana sibona dekenai idia hedinarai. Aposetolo taudia edia nega ai idia noho Keristani taudia be Iesu ena ladana ai bapatiso idia karaia, iena ladana ai gorere idia hanamoa, iena ladana ai idia hadibaia, iena ladana ai idia boiboi, bona iena ladana idia abia isi.​—⁠Kara 2:​38; 3:​16; 5:​28; 9:​14, 16; 19:⁠17.

Baibel diksenari ta ia gwau, Greek herevana idia hahanaia “ladana,” be Baibel dekenai idia gaukaralaia momo “unai ladana lalonai gau ibounai, anina be siahu, kara, dagi, hairai bada, goada, matauraia karana, bona unai bamona gaudia, unai ladana henunai idia noho gaudia ibounai, ia herevalaia” totona. Unai dainai, Iesu ena ladana be hairai bada bona siahu bada herea, Iehova Dirava ese ia henia gauna, ia hahedinaraia. Iesu ia gwau: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) Petero bona Ioane ese aena dika tauna ta idia hanamoa neganai, Iuda tomadiho gunalaia taudia idia henanadai: “Edena siahu dekenai, o daika ena ladana dekenai inai kara umui karaia?” Bena Petero be mai ena goada ida ena abidadama Iesu ena ladana ese ia laulaulaia siahuna bona goadana dekenai, ia gwauraia hedinarai. Ia hamaorodia “Iesu Keriso, Nasareta tauna, . . . iena ladana dainai inai tau be umui emui vairana dekenai ia gini mai goada danu.”​—⁠Kara 3:​1-10; 4:​5-10.

Iesu Abidadama Henia Eiava Kaisara Abidadama Henia?

To, Iesu ena ladana ai ta ese ena abidadama ia gwauraia hedinaraia be mai ena hekwarahi. Iesu ena peroveta herevana hegeregerena, iena hahediba taudia be ‘iena ladana dainai bese ibounai ese do idia badu henia.’ (Mataio 24:⁠9) Dahaka dainai? Badina Iesu ena ladana ese ena dagi, Dirava ese ia abia hidi Lohiana, king ibounai edia King, ia laulaulaia, bona bese ibounai be iena siahu henunai do idia noho be namo, to unai karaia totona idia hegaegae lasi, eiava idia ura lasi idia karaia.​—⁠Salamo 2:​1-7.

Iesu ena negai idia noho tomadiho gunalaia taudia danu idia ura lasi Iesu ena siahu henunai idia noho. Idia gwau: “Ai be mai emai king ta lasi, Kaisara sibona,” unai amo idia ese Dirava ena Natuna idia dadaraia. (Ioane 19:​13-15) To, idia ese Kaisara ena ladana​—⁠ena goada bona siahu​—⁠bona ena gavamani idia abidadama henia. Danu, edia lalona idia hadaia Iesu do idia hamasea be namo, unai dala amo edia dagi bona siahu do idia dogoatao.​—⁠Ioane 11:​47-​53.

Iesu ia mase murinai, lagani handred haida lalodiai, sibodia idia gwauraia Keristani taudia momo be Iuda gunalaia taudia edia lalohadai bamona idia laloa. Unai sibodia idia gwauraia Keristani taudia be Gavamani ena goada bona siahu idia abidadama henia bona ena hepapahuahu lalonai idia vareai. Hegeregere, lagani 1000 C.E. murinai, dubu ese idia noho kava tuari taudia be militia Christi, eiava Keristani tuari taudia, oreana dekenai idia haboua murinai, “kara maoro tuarina karaia ena maduna be Kerisendom ena gavamani taudia amo idia kokia bona dubu ese ena Keristani tuari taudia oreana ena gaukara amo ia abia.” (The Oxford History of Christianity) Unai sivarai ia gwau pope ena oda herevadia haida dainai unai tuari taudia idia laloa tuari lalonai idia vareai karana amo “Dirava ida kontraka ta idia karaia bona unai amo idia be mai edia gabu ta Paradaiso dekenai.”

Reana haida idia gwau Iesu idia badinaia diba bona unai nega tamona ai politikol karadia lalonai, bese edia tuari karadia lalonai danu, idia vareai diba. Reana idia laloa dika ia hedinarai neganai, Keristani tauna ena maduna be unai dika do ia koua, bona unai ena anina be bema dala ma ta be lasi do idia tuari danu. To Keristani taudia ginigunadia be unai lalohadai idia abia dae, a?

The Christian Century magasin ena sivarai ta lalonai ia gwau: “Keristani taudia ginigunadia be tuari oreadia lalonai idia vareai lasi.” Ia gwau guna negana amo ema bona lagani 170-180 C.E. lalonai, gau ta ese ia hamomokania lasi Keristani taudia be ami lalonai idia vareai. Unai sivarai ma ia gwau: “Unai murinai sibona, metairametaira Keristani taudia ese ami gaukara dadaraia karana idia negea.”

Unai dainai dahaka ia vara? The Christian Century ena sivarai be ma ia gwau: “Reana Keristani tomadiho ena ladana ia hadikaia bada herea gauna be tuari lalonai idia vareai, bona unai kara be Keristani lasi taudia edia amo ia idau lasi. Keristani taudia be Hahemauri Tauna mai ena manau ena abidadama dalana idia abia dae, to mai edia ura ida tomadiho eiava bese edia tuari idia durua karana amo unai abidadama idia hadikaia momokani.”

Hari Inai Negai, Keristani Taudia Ginigunadia Tohotohoa

Keristani taudia hari inai negai be Keristani taudia ginigunadia edia haheitalai namona idia tohotohoa diba, a? Hari inai negai, Iehova ena Witness taudia ese idia hahedinaraia idia karaia diba. Holocaust Educational Digest ena edita tauna be idia ia herevalaia, ia gwau: “Iehova ena Witness taudia ta lasi be tuari lalonai do ia vareai. . . . Bema tanobada dekenai dagi siahudia idia abia taudia ibounai be unai tomadiho taudia, [Tanobada Ibounai Tuarina Iharuana] do ia vara lasi.”

Vanegai laganidia lalonai, tano ta ta dekenai idia vara tuaridia, hegeregere Northern Ireland dekenai ia vara gauna, be unai bamona ita gwauraia diba danu. Lagani haida gunanai, Iehova ena Witness tauna ta be Belfast hanua ena Protestan taudia edia gabu ai ruma ta ruma ta dekenai ia haroro. Ruma ta ai, ruma tauna be gabeai ia diba unai Witness tauna be guna Katolik tauna neganai, ia henanadai: “Oi be Katolik tauna neganai, IRA [Irish Republican Army] oi durua, a?” Unai Witness tauna ia lalo-parara unai tau ese ia dagedage henia diba, badina be mai ena ipidi danu Katolik tauna ta alaia totona ia lao neganai idia dogoatao, bona vanegai sibona dibura amo idia ruhaia. Unai dainai, Witness tauna ia haere, ia gwau: “Hari lau be Katolik tauna lasi. Lau be Iehova ena Witness tauna ta. Lau be Keristani momokani tauna dainai, gavamani eiava ma tau ta dainai ta do lau alaia lasi.” Unai neganai ruma tauna ese iena imana ia udeudea bona ia gwau: “Ala-ala karadia iboudiai be kerere. Umui be gaukara namona umui karaia. Namona be umui karaia noho.”

Iesu Ena Ladana Abidadama Henia Ena Anina

To, Iesu ena ladana abidadama henia ena anina be tuari amo oi gini siri sibona lasi. Ena anina be Keriso ena hahegani ibounai badinaia. Momokani, Iesu ia gwau: “Lauegu taravatu do umui badinaia, unai dekena amo lauegu turana do umui lao,” bona iena hahegani ta be “umui ta ta do umui lalokau henia.” (Ioane 15:​14, 17) Lalokau ena anina be ma haida kara namo henia dalana ita tahua. Bese, tomadiho, eiava orea idauna ta inai henia kava karadia ibounai ia kokia. Iesu ese unai kara ia haheitalaia.

Iesu ena nega lalonai, Iuda taudia be Samaria taudia idia inai henia momokani. To, Iesu be Samaria hahinena ta ia hereva henia, bena unai amo ia bona ma taunimanima momo be Iesu ena ladana idia abidadama henia. (Ioane 4:​39) Danu, Iesu ia gwau iena hahediba taudia be iena ladana do idia gwauraia hedinarai “Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:⁠8) Iena mauri henia sivaraina be Iuda taudia sibona dekenai idia henia lasi. Unai hegeregerena, Dirava ese Petero ia hamaoroa Roma tuari biaguna Korenelio do ia vadivadi henia. Ena be Iuda tauna ta ese idau bese tauna ta ia vadivadi henia be taravatu, to Dirava ese Petero ia hadibaia namona be “tau ta [ia] gwauraia lasi ia be miro o dika.”​—⁠Kara 10:⁠28.

Iehova ena Witness taudia be Iesu ena haheitalai idia tohotohoa, bona mai edia ura ida taunimanima ibounai​—⁠bese, tomadiho, eiava noho daladia idauidau taudia​—⁠idia durua Iesu ena ladana amo ia vara hahemauri idia diba totona. Iesu ena ladana abidadama henia karana ese edia lalona ia hamarerea dainai taunimanima vairanai ‘Iesu idia gwauraia ia be Lohiabada.’ (Roma 10:​8, 9) Umui ai hagoadaia namona be edia heduru umui abia dae, bena umui danu be Iesu ena ladana abidadama henia karana do umui diba.

Unai ladana, Iesu, ese ita lalonai hanamoa karana, hemataurai, bona kamonai karana ena mamina ia havaraia be namo. Aposetolo Paulo ia gwau: “Iesu ena ladana hanamoa totona ibounai be dohore idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.” (Filipi 2:​10, 11) Ena be tanobada noholaia taudia momo be reana idia ura lasi Iesu ena lohia siahuna henunai idia noho, to Baibel ese ia hahedinaraia taunimanima ibounai be unai bamona do idia karaia negana be ia kahirakahira, bema lasi do idia mase ore. (2 Tesalonika 1:​6-9) Unai dainai, namona be harihari Iesu ena ladana oi abidadama henia, iena hahegani oi badinaia karana amo.

[Footnote]

[Picture on page 6]

Iesu ena ladana ai, milioni momo idia ala-ala bona milioni momo idia alaia

[Picture on page 7]

Iesu be bese idauna inai henia kava hemamina ta ia dogoatao lasi. Oi danu, a?