Momo Idia Gwau Idia be mai Edia Abidadama

BRAZIL dekenai tomadiho goadalaia hahinena ta ia gwau: “Iesu be hereadae! Ia be namo herea!” Momokani, Iesu ena ladana ena siahu ita gorea diba lasi. Guna amo ema bona hari, taunimanima be ia dainai mai edia ura ida hisihisi idia ania bona idia mase.

Aposetolo Petero bona Ioane be ‘Iesu ena ladana dekenai’ Ierusalema ai idia haroro. Unai bamona idia karaia dainai, idia dogodiatao bona idia botadia. To idia ese “kaunsolo idia rakatania mai moale bada danu. Edia moale badina be, Dirava ese idia ia abia hidi vadaeni Iesu ena ladana dainai hisihisi do idia abia.”​—⁠Kara 5:​28, 41.

Anetipa danu be aposetolo taudia edia negai ia noho Keristani tauna ta, Iesu ena ladana ia matauraia tauna. Baibel ena buka ginigabena, Apokalupo, lalonai Iesu ese ia herevalaia, ia gwau: “Satani ia noho gabuna dekenai lau ia gwauraia hedinarai momokani tauna, Anetipa idia alaia mase neganai, oiemu abidadama lau dekenai oi rakatania lasi.” (Apokalupo 2:13) Anetipa bona Keristani taudia ma haida Peregamo dekenai idia ura lasi edia abidadama Keriso dekenai do idia hunia. Anetipa be Iesu ena ladana ia dogoatao auka, herevana ena mauri ia haboioa!

Lagani 50 bamona murinai, lagani 155 C.E. ai, sibona ia gwauraia Keristani tauna ta, Polycarp, be unai bamona hahetoho ia davaria. Unai neganai ia idia hagania Keriso do ia gwauraia dika. Iena haere be inai: “Lagani 86 Iena hesiai gaukara lau karaia, bona lau dekenai kerere ta Ia karaia lasi. Edena bamona lauegu King, lau ia hamauria tauna, lau hadikaia diba?” Polycarp ia ura lasi Keriso ia gorea dainai, au dekenai idia gabua.

Aposetolo taudia, Anetipa, bona ma haida edia lalona idia hegeregere mase amo edia Keriso harorolaia karana idia hamomokania! Hari inai negai idia noho taudia be edena bamona?

Iesu Ena Ladana Hari Inai Negai

Iesu ena ladana ese hemami goadadia ia havaraia noho. Latin America dekenai, sibodia idia gwauraia Iesu abidadama henia taudia edia dubu edia namba be hanaia laganidia 20 bamona lalonai ia bada herea. Hanua maragimaragidia danu be mai edia Pentecostal dubu ta. Danu, unai dubu edia politikol siahuna ia bada ia lao. Hegeregere, Brazil gavamani ena Congress bona Senate oreadia lalonai, dagi 31 be unai bamona dubu taudia ese idia dogoatao.

United States dekenai tomadiho orea matamatana ta ese Iesu ia abia isi danu. Unai orea taudia be sibona idia gwauraia Gwauhamata Badinaia Taudia. Lagani 1997 ai, Time magasin ia gwau edia hebou dekenai idia lao taudia edia namba be lagani 1991 ai 4,200 amo ia bada daekau milioni 1.1 lagani 1996 dekenai. Edia ane ta ena hereva be inai: “Kwalimu be Iesu dainai, lauegu Hahemauri Tauna ela bona hanaihanai.”

To, Iesu ena ladana dainai idia vara hemami ibounai idia namo sibona lasi. Nega momo taunimanima be Iesu ena ladana idia kamonai neganai, tuari idia laloa. Iuda taudia idia hamasea, Dirava diba lasi taudia idia alaia, lalo-tamona lasi taudia idia hahisia, idia hadikaia, bona au dekenai idia gabua​—⁠Iesu ena ladana dainai. Bona vanegai sibona, haroro amo bisinesi idia karaia karana ia bada herea. Unai ibounai be dika momokani bona Iesu ena ladana bona ena anina gaukaralaia kerere kara dikadia!

Danu, unai kara dainai henanadai haida idia vara: Iesu ena ladana abidadama henia karana ena anina be dahaka? Bona Iehova ena Witness taudia edia lalohadai unai hereva dekenai be dahaka? Hereva gabena ese unai henanadai do ia haerelaia.