Henia Karana Oi Goadalaia, A?

TAUNIMANIMA be lalohadai idauidau dainai harihari gaudia idia henia​—unai oi itaia vadaeni, ani? Reana harihari gauna ta be lalokau ena toana, o harihari bada ena toana, o tanikiu ena toana. Eiava henia tauna ia ura ia abia tauna ese ia do ia lalo-namo henia, ani? Eiava ia henia, badina ia laloa ena maduna be unai, o badina be ia ura davana do ia abia.

Reana harihari gauna kumilaia gauna be varovaro mai hairaina amo idia kwatua. To palaoapalaoa, o aniani, o hebogahisi karana ta danu be harihari gaudia namodia, ani? Momokani, haida dainai oi hekwarahilaia gaudia be idia momo ese idia laloa bada harihari gaudia.

Ta Ena Lalo-Namo Oi Tahua, A?

Ta ese ena lalo-namo ia tahua tauna dekenai harihari gauna ia henia be kara matamatana lasi. Tano haida ai, bema tauhau ta ese haneulato ta ia ura henia, palaoapalaoa ia mailaia ia dekenai. Aonega haneulatona ese harihari gauna sibona ia laloa lasi. Tauhau ena lalohadai ia tahua, unai gau be mai ena lalokau ida ia henia dainai, adavana namona ai do ia lao, eiava? Bema unai bamona harihari gauna ese lalohadai maoromaorona ia hahedinaraia, ia dainai henia tauna bona abia tauna danu ese moale bada idia davaria diba.

Abigaila, Nabala ena adavana, be Baibel ese ia sivarailaia. Nega ta ia ese harihari gauna badana ia hegaegaelaia Davida ena. Ia diba Dirava ese ia abia hidi Israela ena king ai do ia lao. Iena lalo-namo ia tahua. Ena adavana ese Davida ia dadaraia vadaeni bona ena orea taudia ia gwau dika henidia vadaeni. Davida ese tuari taudia 400 ia hakaudia lao, Nabala bona ena bese taudia do idia hadikaia ore totona. Unai dika koua totona, Abigaila ese harihari gauna, aniani momo, be Davida dekenai ia siaia haraga, ena orea taudia edia. Unai murinai Davida dekenai ia lao, ena adavana ena kara dainai sori herevana ia gwauraia ia dekenai. Unai murinai Davida ena lalona ia ania neganai, sibona ena aonega bada ia hahedinaraia.

Abigaila ena palani be namo, bona anina namona ia havaraia. Davida ese ena harihari gauna ia abia dae, bena ia hamaoroa, ia gwau: “Oiemu ruma dekenai do oi giroa lou, bona do oi laloa hekwarahi lasi. Lau ese oiemu ura gauna do lau karaia.” Gabeai, Nabala ia mase murinai, Davida ese Abigaila ia hamaoroa ia ura do ia adavaia, bena ena hereva ia abia dae mai ena moale ida.​—1 Samuela 25:​13-42.

To, nega haida, harihari gauna ia henia tauna ese ia abia tauna ena lalona ia ania toho, kara kererena do ia karaia totona o hahemaoro do ia hagagevaia totona. Ia laloa namo do ia davaria, to sibona ena lalona ia hahekwarahia. Ia diba reana haida ese ena kerere do idia davaria bena do idia samania. Ena be ia tahua gauna ia abia, to reana taunimanima ese do idia abidadama henia lasi. Baibel ese Dirava ena aonega ia hahedinaraia, ia ese unai bamona harihari gaudia henia karana ia taravatua.​—Deuteronomi 16:19; Hadibaia Tauna 7:7.

Mai Emu Ura ida Oi Henia, A?

Momokani, sibomu emu ura dainai gau ta be emu lalokau tauna ta oi henia neganai, emu moale be bada; haida edia lalo-ani dainai oi henia neganai, emu moale be maragi.

Aposetolo Paulo ese Keristani taudia ogogamidia durulaidia monidia gogoa karana ia herevalaia neganai, Dirava ena ura hegeregerena henia daladia ia gwauraia. Ia gwau: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.” Ma ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 8:12; 9:7) Oi sibomu oi laloa namonamo be namo. Harihari gaudia momo henidia totona moni oi abia torehai lasi a, to emu moni ena bada hegeregerena mo oi henidia, a? Emu bamodia o bisinesi oreadia edia lalo-ani dainai lasi, to sibomu emu lalohadai hegeregerena oi kara, a? Keristani taudia ginigunadia, unai dala maorona idia badinaia taudia, be Paulo ese inai bamona ia gwauraia: “Idia sibona edia ura dainai, ai dekenai idia noinoi, edia moni haida do ai abia lao, Dirava ena taudia Iudea dekenai durua totona.”​—2 Korinto 8:4.

Dala idauna be Royal Bank Letter, November/December 1994 gauna, ese ia gwauraia. Kerisimasi negana puradia ia gwauraia, ia gwau: “Unai neganai taunimanima idia moale kava, badina be bisinesi oreadia ese edia lalona idia ania goadagoada, gau haida do idia hoia totona; bema unai lalo-ani be lasi, unai gau idia hoidia lasi.” Bema unai gau be kredit amo idia hoidia, henidia karana ena moale be bili peidia negana ai do ia ore haraga.

Dahaka Oi Laloa Bada​—Dina A? Eiava Lalokau Hahedinaraia Karana?

Dina haida be harihari gaudia henia dinadia idia gwauraia dainai, unai dina sibodia ai harihari gaudia oi henia, a? Bema unai bamona, reana henia karana ena moale oi reaia badabada.

Harihari gaudia be unai dina badadia dekenai henidia karana be taunimanima momo ese idia moalelaia lasi. Buka torea hahinena ta ia gwau ena natuna ese harihari gaudia do idia abia dinana be kahirakahira neganai, edia mataganigani ia hedinarai. Ia gwau harihari gauna namona ta ia moalelaia momokani lasi, badina be ia ura gau idauna do ia abia. Ripoti momo ese idia hahedinaraia, holide badadia ai moale karadia idia karaia bona harihari gaudia be ta ta dekenai idia henia lalonai, lalo-metau bona inuinu kekero karana be bada.

Profesa ta ese ia itaia, holide negana ai harihari gaudia henia karana goadalaia karana ese nega haida memero kekeni ia hadikaia. Iena sisiba, The New York Times lalonai idia torea, be inai: “Harihari gaudia haida be dina idaudia ai do umui henidia dalana umui laloa. Lalo-hekwarahi hamaragia dalana ta be unai.” Oi laloa unai ese anina namona do ia havaraia, a?

Tammy, lagani 12 kekenina ta, ena famili ese Kerisimasi bona vara dinadia idia moalelaia lasi. Ia gwau: “Harihari gauna ta oi naria lasi neganai bema oi abia, emu moale be bada.” Ia gwau, lagani ta ta ai nega tamona o nega rua sibona lasi, to lagani ibounai lalonai, ena tamana bona sinana ese ia bona ena taihuna be harihari gaudia idia henidia. Ia laloa gau ta ese unai harihari gaudia ia hereaia. Ia herevalaia, ia gwau: “Egu famili ena mauri be mai moale bada herea.”

Buka ladana Secrets of Strong Families be ia gwau: “Lagani ta ta iboudiai ita momo ese harihari gaudia namodia ita abia hidi bena ita hoidia, iseda lalokau taudia edia vara dinadia o edia headava dinadia dainai, o holide dainai. Harihari gauna hereadaena be davana lasi. Bona oi kumia lasi. Bema taunimanima momo hegeregeredia oi laloa emu mauri be emu kohu hereadaena, emu mauri ena kahana ta be emu harihari gauna namo hereana. Iseda nega be iseda lalokau taudia ita henidia neganai, unai harihari gauna namo hereana ita henidia unai.”

Emu famili sibona lasi, to ma haida danu be unai bamona oi henidia diba. Haida idia dabu gaudia bema oi henidia, emu lalona do ia namo momokani. Iesu Keriso ia gwau, namona be ita ese ogogami taudia, aena dika taudia, bona matakepulu taudia edia namo be unai bamona do ita tahua mai eda lalokau ida. Ma ia gwau: “Unai dekena amo do oi namo, badina idia be kohu lasi.”​—Luka 14:​12-14.

Vanegai Rockland Journal-News (U.S.A.) ese unai bamona henia karana ta ia ripotilaia. Matakepulu hahinena burukana ta ena ruma ia moru neganai, ena turana ese ena ruma matamatana idia haginia. Kampani haida ese moni idia henia, bona kaunsolo danu ese. Unai niuspepa ia gwau: “To anina bada gauna be inai: Taunimanima 150 bamona ese edia nega idia henia ruma haginia totona; idia momo be Haverstraw ena Iehova ena Witness taudia.”

Ma ia gwau: “Ruma haginia gabuna ai be idia haboua kohudia idia noho; idia badinai be pata, aniani amo idia honu. Dina rua lalodia gaukara taudia ese sitori toi rumana ta, famili rua ese idia noholaia diba gauna, be idia haginia. . . . Taunimanima idia diba Iehova ena Witness taudia ese ruma idia haginidia haraga diba. . . . Ena be idia gaukara haraga, to edia ura be nega daudau do ia noho gauna be edia lalokau karana amo do idia karaia. Ms. Blakely ese ena ruma matamatana ia itaia diba lasi, to ena imana ese idia daua toho diba, bona ena lalona ia diba unai lalokau karana ese edena bamona ia hamarerea vadaeni.”

Lagani Ibounai Lalonai Idia Harihari Bada

Hariharibada momokani taudia ese dina badadia idia naria lasi. Sibodia edia namo mo idia tahua lasi. Gau namona ta idia abia neganai, idia haria mai edia moale ida. To harihari gaudia idia henia kava lasi. Edia henia karana amo sibodia edia famili idia ha-ogogamidia lasi. Bona edia kara ena anina harihari gauna ia abia tauna dekenai be idia laloa. ‘Taunimanima dekenai idia henia lao,’ Iesu ese ena hahediba taudia ia hadibaia hegeregerena.​—Luka 6:38.

Edia turadia bona edia dekena taudia, idia buruka, o idia gorere, o idia lalo-metau taudia, edia noho be idia diba. “Harihari gauna” idia henidia dalana be, reana idia lao sitoa edia ura gaudia abia totona o ruma gaukaradia haida idia karaia, eiava edia lahi au idia siria. Eiava reana aniani idia nadua edia, o hora ta lalonai idia vadivadi henidia bona idia ida idia duahiduahi hebou. Ena be idia bisi, to idia be mai edia nega do idia heduru. Idia diba vadaeni, momokani “henia kara ena moale be bada, abia kara ena moale be maragi.”​—Kara 20:35.

To, momokani, Henia Tauna hereadaena be ita ia karaia Diravana, Iehova. “Ia sibona ese mauri bona laga bona gau ibounai ia henia noho taunimanima dekenai.” (Kara 17:25) Baibel lalonai, ia ese diba danu ita ia henia; iena palani​—kara dika, gorere, bona mase do ia haorea, bona tanobada be paradaiso ai do ia halaoa palanina​—be ita ia hadibalaia. (Salamo 37:​10, 11; Apokalupo 21:​4, 5) Harihari bada taudia ese unai sivarai namona idia kamonai neganai, idia dogoatao lasi sibodia edia. Haida dekenai idia hariharilaia mai edia moale bada ida. Momokani, Dirava hegeregerena idia ese henia karana idia goadalaia. Oi ese oi goadalaia toho, a?

[Pictures on page 7]

Harihari gaudia namo hereadia haida be davana lasi