Kota Ena Hahemaoro Namona

APRIL 1995, ta be kota ai ia kwalimu neganai, unai be mai anina bada. Unai hepapahuahu ena badina be January 28, 1992 ai ia vara. Luz Nereida Acevedo Quiles, ena mauri lagani 24, be El Buen Pastor Hospital, Puerto Rico dekenai ia vareai, operesen ia abia gwauraia neganai. Idia abia vareai neganai, ia hamaorodia bona pepa amo ia hadibadia, ia be Iehova ena Witness hahinena ta dainai, rara do ia abia lasi. (Kara 15:​28, 29) Luz idia durua hospital gaukara taudia bona doketa tauna be iena ura idia diba goevagoeva.

Operesen idia karaia, bena dina rua murinai, Luz be rara bada herea ia haboioa bona unai dainai animia gorerena ia davaria. Unai gaukara ia naria tauna, Doketa José Rodríguez Rodríguez ia laloa idia durua diba dalana tamona be rara do idia henia. Unai dainai, Luz ia hadibaia lasi bona iena gwaumaoro ia abia lasi, to maoromaoro ia lao, rara do idia henia hanai kota oda ia abia totona.

Ena be Luz be ia noga noho bona ena ura ia gwauraia diba, to Doketa Rodríguez ia gwau, idia kara haraga be namo dainai, nega be lasi ta ena gwaumaoro do idia abia. Distrik loea, Eduardo Pérez Soto, ese fom ia sainia, bona distrik diadi, Honorable Angel Luis Rodríguez Ramos, ese kota oda ia henia rara henia hanai totona.

Unai dainai, January 31, 1992 ai, Luz idia abia lao operesen daiutuna dekenai, bena unuseniai rara idia henia. Rara idia henia noho lalonai, ia kamonai hospital gaukara taudia haida ese idia kirikirilaia. Haida ese idia gwau henia, idia gwau rara idia henia be durua totona. Mai ena goada ibounai ida ia koudia toho​—⁠to ia kwalimu lasi. Unai dina ena dokona ai, Luz be rara unit hani idia henia vadaeni.

Puerto Rico ai, Luz ena kota hepapahuahu be rara henia hanai karana bona Iehova ena Witness taudia dainai kota idia karaia negana ginigunana lasi bona ginigabena lasi. Iena hekwakwanai ia do vara lasi neganai, Iehova ena Witness tataudia bona hahinedia edia ura idia dadaraia bona rara henia hanai kota oda 15 idia henia vadaeni, bona Luz ena hekwakwanai negana ema bona hari oda ma haida idia henia vadaeni. Madi, gorere hahinena ta be ia maserea lalonai, unai kota oda ta hegeregerena rara idia henia.

To, Luz ese ia koudia karana be operesen daiutuna lalonai ia ore lasi. October 1993 ai Luz ese Puerto Rico ena gavamani samania pepana be kota dekenai ia atoa. Kota Badana ese iena hereva ia kamonaia, bena April 18, 1995 ia totona hahemaoro namona ia henia. Kota ia gwau, rara henia hanai odana be ‘tano ena taravatu hegeregerena lasi, bona ia ese Luz ena maoro tomadiho totona, ena ura-kwalimu, bona ena tauanina ia biagua karana ena taravatu ia utua.’

Unai hahemaoro herevana be mai anina bada, badina unai be nega ginigunana Puerto Rico dekenai rara henia hanai bona Iehova ena Witness taudia dainai idia kota karaia neganai, Iehova ena Witness taudia totona hahemaoro namona idia henia. Taunimanima momo herea ese unai hahemaoro idia moalelaia. Niusi herevalaia taudia edia hebou idia karaia, bona unai hebou dekenai niuspepa, reidio, bona televisen edia kampani badadia edia ripoti taudia idia lao.

Unai hanuaboi ai, Luz ena loea idia henanadai henia reidio program ta lalonai. Kamonai taudia idia noidia, bema mai edia henanadai, reidio steiseni do idia rini henia. Doketa bona loea taudia momo idia rini bona unai hahemaoro namona dainai edia moale herevana idia gwauraia. Ia rini tauna ta ia gwau: “Saiens taudia be idia do hamomokania lasi rara henia hanai karana ese taunimanima do ia hamauria diba, bona ia be maoro lasi bema ita laloa unai ia karaia diba.” Ma ia gwau: “Kahirakahira, do ia hedinarai rara henia hanai karana be maoro lasi bona ia be gorere idia hanamoa toho taudia edia kerere badana ta.”

Gabeai, taravatu profesa ta mai ladana bada ese Watch Tower Society ena brens opesi ia rini henia bona ia gwau ia moale bada herea “kota dekenai idia kwalimu momokani” dainai. Ma ia gwau, unai kota ena hahemaoro ese Iehova ena Witness taudia sibona lasi to Puerto Rico tano taudia ibounai edia maoro unai tano ena taravatu hegeregerena ai ia abia isi.