Duahia Taudia Edia Henanadai
Efeso 3:14, 15 dekenai ia gwau “famili ibounai, guba dekenai bona tanobada dekenai, be Tamana dekena amo edia ladana idia abia.” Guba dekenai famili idia noho a, bona tanobada taudia edia famili ese edena dala amo edia ladana be Iehova amo idia abia?
Tanobada dekenai idia noho famili be mai edia tama, sina, bona natudia, tauanina dalanai idia ibounai be varavara, to guba dekenai be unai bamona famili idia noho lasi. (Luka 24:39; 1 Korinto 15:50) Iesu ese ia hahedinaraia aneru idia headava lasi, bona gau ta ese ia hahedinaraia lasi idia ese natudia idia havaraia.—Mataio 22:30.
To, Baibel ia gwau Iehova ena guba oreana be iena adavana bamona; lauma dalanai ia adavaia. (Isaia 54:5) Unai guba oreana ese natudia, hegeregere aneru ia havaraia. (Iobu 1:6; 2:1; 38:4-7) Vadaeni, unai dala amo guba dekenai lauma famili ia noho.
Inai danu, guba dekenai famili bamona oreana matamatana ta ia vara noho, unai orea taudia be Iesu Keriso bona iena headava matamata kekenina, 144,000 taudia unai. (2 Korinto 11:2) Unai horoa taudia edia helaro be guba dekenai idia do noho bona idia momo be idia mase vadaeni. Haida be idia do mauri noho tanobada dekenai. Idia ibounai ese mai ura bada ida “Mamoe ena Natuna ena headava,” guba dekenai do ia vara gauna, idia naria noho. Baibel ese unai headava negana be kahirakahira do ia vara hisihisi bada herea negana ida ia hakapua—unai neganai Babulonia Badana do idia hadikaia ore, bena Satani ena tanobada oreana orena do idia haorea vaitani.—Apokalupo 18:2-5; 19:2, 7, 11-21; Mataio 24:21.
Efeso 3:15 dekenai aposetolo Paulo ese tanobada taudia edia famili ia gwauraidia neganai, ia hahedinaraia lasi famili ta ta iboudiai be Iehova amo edia ladana idia abia. To ia ese famili edia bese ia lalodia, idia dainai ladana ia boio lasi. Iosua karoa 7:16-19 ese unai ia haheitalaia. Unai neganai Iehova ese Akana ena kara dika ia hahedinaraia. Unai kerere tahua karana ai ia ese Iuda iduhuna ia abia hidi. Bena unai iduhu amo Sera ena bese ia abia hidi. Bena dokonai, Sera ena bese amo Akana ena famili ia abia hidi edia kara dika ia hahedinaraia. Akana, mai ena adavana bona edia natudia ida, be Akana ena tubuna, Sabadi ena famili taudia idia gwauraidia. Edia bese lalonai, unai famili ese edia tubuna Sera ena ladana idia gaukaralaia noho.
Heberu taudia huanai, edia bese edia ladana gaukaralaia noho karana be mai anina bada. Baibel lalonai momo idia torea. Dirava ese unai kara ia durua bona dala ia karaia unai ia vara totona. Hegeregere, bema famili lalonai tau ta ia mase, to ia be mai ena natuna merona ta lasi, iena kakana eiava tadina ese iena vabu ia adavaia, natuna merona ia havaraia iena ladana do ia boio lasi totona.—Genese 38:8, 9; Deuteronomi 25:5, 6.
Bese badana ma ta ena haheitalai ita laloa neganai, Iesu, Davida ena natuna ita laloa. Momokani, ia be Davida ese ia havaraia lasi, badina Davida ia mase bena lagani momo murinai Iesu ia vara. To, Iuda taudia momo idia diba, Mesia do idia dibaia dalana ta be ia be Davida ena bese lalonai do ia vara. (Mataio 22:42) Iesu be Davida ena bese lalonai ia vara, badina iena sinana bona iena ubua tamana be Davida ena bese taudia.—Mataio 1:1; Luka 2:4.
To, edena dala amo unai famili ese edia ladadia be Iehova amo idia abia? Momokani, nega haida Iehova ese bese edia kwarana tauna ena ladana ia henia—Aberahamo bona Isako dekenai ia karaia hegeregerena. (Genese 17:5, 19) Unai be kara idauna. Iehova ese famili ta ta dekenai lada ta ia henia lasi edia natudia idia henia totona.
To, Iehova ese taunimanima edia famili orea ia havaraia, Adamu bona Heva be inai oda herevana ia henidia neganai: “Emui bese do umui havaraia, do umui momo herea. Tanobada ena gabu ibounai dekenai do umui noho.” (Genese 1:28) Bona Iehova ese dala ia kehoa, goevadae lasi taudia Adamu bona Heva ese natudia idia havaraia totona, unai amo tanobada besedia ibounai idia vara. (Genese 5:3) Unai badina idauidau dainai, Dirava ita gwauraia diba, bese edia ladana Havaraia Tauna.
Hari, bese momo lalodiai, edia bese ena ladana be uru lalonai idia gaukaralaia noho karana idia laloa bada lasi. Ena be unai ia vara, to tano ibounai dekenai Keristani taudia ese Iehova idia tanikiu henia famili orea ia havaraia dainai, bona edia famili orea ta ta ai idia noho namo totona idia gaukara goada karana amo ia idia hanamoa.