Imana Goevadia ida Iehova Tomadiho Henia
LAUMA helaga ese ia hasiahua neganai, salamo torea tauna Davida be inai ane ia abia: “Lohiabada e, egu imana lau huria noho, egu maoromaoro bona kerere lasi do lau hahedinaraia totona, bona oiemu boubou patana lau raka hagegea noho.”—Salamo 26:6.
Davida ese unai ane ia torea neganai, reana ia ese Israela ena Levi iduhuna ena helaga taudia ese boubou patana dekenai idia daekau bona edia boubou gaudia be lahi dekenai idia atoa karana ia herevalaia unai. To helaga taudia ese unai tomadiho karana idia do karaia lasi neganai, taravatu hegeregerena edia imana bona edia aena idia huria guna. Unai be mai anina bada. Bema helaga tauna ta ese unai kara ginigunana ia karaia lasi, iena mauri ia haboioa diba!—Esodo 30:18-21.
Haheitalai dalana ai, hurihuri dainai ta be lauma dalanai ia goeva bona ena kara ia goeva danu. (Isaia 1:16; Efeso 5:26) Iehova ia ura hari iseda hesiai gaukara amo ‘iena boubou patana do ita rakaia hegege.’ To ia ura iseda imana goevadia ida do ita karaia—Davida ia hereva bamona, kara “maoromaoro bona kerere lasi” ida do ita huridia guna. Unai taravatu ena anina be maragi lasi, badina kara mirodia idia karaia taudia be Dirava ena Basileia lalonai do idia vareai lasi. (Galatia 5:19-21) Ta be ena mauri lalonai Dirava ena hesiai gaukara ia karaia neganai, namo lasi ia laloa unai dainai ia be mai ena maoro kara bodaga do ia karaia. Unai hegeregerena aposetolo Paulo ia gwau: “Lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida do lau haroro henidia, to gabeai lau sibona egu mauri do lau halusia garina.”—1 Korinto 9:27.
Dirava ena lalo-namo bona moale korikorina idia tahua taudia ese edia imana goevadia ida Iehova ena hesiai idia lao henia be namo. Davida bamona, idia be “mai maoromaoro bona momokani” ida idia raka.—1 King Taudia 9:4.