Evanelia Ena Hereva Momokani

LAGANI 1901 amo ema bona hari, Mataio ena Evanelia bukana ena kahana maragidia toi, P⁶⁴ idia gwauraia gaudia, be Magdalen College ai idia noho, Oxford, England dekenai. Lagani momo lalodiai, diba momo taudia idia laloa unai gau be lagani 150 C.E. murinai idia torea gaudia.

Vanegai, Germany dekenai, Carsten P. Thiede, revareva gunadia stadilaia tauna ta mai ena diba bada, ese P⁶⁴ ia tahua namonamo, unai pepa dekenai be Mataio karoa 26 ena siri 10 edia kahana. Dahaka ia davaria? Magasin ta ladana Zeitschrift für Papyrologie und Epigraphik (Pepa Revarevadia Stadilaia Karana Bona Toretore Karana Edia Magasin) lalonai, Thiede ia gwau unai buka ena kahana maragidia Oxford dekenai idia noho be “Keristani bukana ena, lagani 100 C.E. be do lasi neganai idia torea gaudia, reana lagani 70 C.E. be do lasi neganai idia torea.”

Thiede ena hereva dainai, niuspepa, reidio, bona TV dekenai idia herevalaia momo, bona diba momo taudia danu ese idia herevalaia. Badina be dahaka? Badina be hari idia gwau Evanelia edia revareva ena kahana gunana momokanina, ia noho ema bona hari gauna, be P⁵²; unai be Ioane ena Evanelia bukana ena kahana maragina ta lagani 125 C.E. bamona amo, lagani 100 C.E. murinai idia torea gauna unai.

Ita do diba lasi idia momo ese unai pepa ena kahana maragidia ladana P⁶⁴ torea negana herevana matamatana do idia abia dae eiava lasi. Bema unai hereva be maoro, anina be P⁶⁴ be Evanelia bukana ena kahana maragidia gunadia momokanidia; bona do ia hahedinaraia Mataio ese ena Evanelia be lagani 100 C.E. be do lasi neganai ia torea; reana unai be 70 C.E. be do lasi neganai, Iesu ese ia karaia karadia idia itaia taudia momo idia do noho bona Evanelia ena hereva idia hamomokania diba neganai.

[Picture Credit Line on page 32]

By permission of the President and Fellows of Magdalen College, Oxford.