‘Lau be mai Anina Dirava Dekenai, A?’

“LAU be mai Anina A? Dirava ese Lau Ia Laloa, A?” Magasin ta ladana Christianity Today ena hereva ta ena kwarana be unai. Unai hereva ia torea tauna, Philip Yancey ia gwau: ‘Lau be buka torea tauna bona egu buka lalodiai hisihisi lau gwauraia momo. Henanadai haida lau laloa loulou, ta ese ia namo lou lasi berona ta ia daua toho loulou hegeregerena. Lauegu buka idia duahia taudia ese lau idia tore henia, bona edia lalohisihisi sivaraidia ese lau laloa momo gaudia idia hamomokania.’

Reana oi danu oi laloa, Dirava ese oi ia laloa eiava lasi. Reana Ioane 3:16 ena hereva oi diba: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai.” Eiava reana Mataio 20:28 oi duahia vadaeni, ia gwau Iesu ia mai “iena mauri do ia atoa diho, taunimanima momo edia dika davana karaia totona.” To reana oi henanadai, oi gwau: ‘Dirava ese lau ia itaia, a? Ia ese lau ia laloa, a?’ Do ita itaia, badina namona ta dainai oi abia dae diba ia ese oi ia itaia bona ia laloa.