Basileia Haroro Ripoti

Kara Namodia ese Iehova Idia Hanamoa

ORORO ai ia haroro neganai, Iesu ese ena hahediba taudia ia hereva henia, ia gwau: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:16) Unai hegeregerena, hari inai negai Keristani taudia korikoridia edia “kara namodia” ese Iehova idia hanamoa.

Unai kara namodia be dahaka dahaka? Sivarai namona harorolaia gaukarana sibona lasi, to nega momo iseda kara namodia ma haida ese taunimanima idia veridia mai Keristani kongregesen dekenai. Ekspiriens haida ai torea iniseniai, idia hahedinaraia Iehova ena Witness taudia Martinique dekenai ese ‘edia diari taunimanima edia vairana dekenai idia hahedinaraia noho.’

◻ Ruma-ta-ruma-ta gaukarana ai, Iehova ena Witness hahinena ta ese Katolik hahinena ta ia davaria. Lagani 25 lalonai unai hahine be tau ta ida idia noho hebou, to idia headava lasi. Ia be Iehova ena Witness taudia edia hahediba herevadia ia diba, badina be lagani 7 bamona gunanai, buka ta ladana Mauri Hanaihanai Paradaiso Lalonai ia abia.a Ia ese Witness hahinena ia hamaoroa, ia gwau: “Tomadiho daladia be momo herea. Lau diba lasi inai heiriheiri bogaraginai edena do lau abia dae be namo.” Witness hahinena ese ia hamaoroa, hereva momokani be Baibel sibona lalonai do ia davaria, bona davaria totona, namona be Baibel do ia stadilaia namonamo bona Dirava do ia noia, ena lauma do ia henia bona do ia hakaua.

To, ena be unai hahine ese Baibel stadilaia karana ia moalelaia, to idia boiria negadiai ia ura lasi Keristani heboudia do ia lao henidia Iehova ena Witness taudia edia Kingdom Hall ai. Badina be dahaka? Badina be ia hemarai bada. To, idia boiria Keriso ena mase lalolaia lou hebouna do ia lao henia neganai, ena hemarai ia koua bena ia lao.

Hebou ia laloa bada, badina be Kingdom Hall ai lalokau ena mamina ia abia. Guna unai bamona hetura karana momokanina be ena dubu lalonai ia davaria lasi! Unai murinai ia be Witness taudia edia hebou iboudiai ia lao henia matamaia, bena nega daudau lasi ia ese guna ia ida ia noho hebou tauna ia adavaia. Hari ia be kongregesen ena bapatiso hahinena ta.

◻ Witness hahinena ta ena kara namodia ese anina namona idia havaraia. Ia be mai ena dagi namona opesi ta ai. Tau ta Réunion motumotuna amo idia hagaukaraia murinai, gaukara taudia haida ese idia kirikirilaia loulou, badina be ena tauanina ia kwadogi. To nega ibounai Witness hahinena ese ia kara henia mai ena hebogahisi bona mai ena hemataurai ida. Nega daudau lasi unai tau ese ia nanadaia dahaka dainai ia idau vaitani.

Hahine ia gwau ia matauraia badina be Iehova ena Witness taudia ese Baibel ena sisiba herevadia idia hadibaia dainai. Ia ese danu Dirava ena palani bona tanobada matamatana helarona be Baibel amo ia hadibalaia. Unai tau ese Baibel stadi ia abia dae, Keristani heboudia ia lao henidia, bona ia ese guna ia ida ia noho hebou hahinena ia adavaia.

Gabeai ia be Réunion dekenai ia giroa lou. Guna, ia be ena varavara bona ena nakimi taudia ida idia hepapahuahu, to ia lou lao murinai idia ese ena Keristani karadia namodia idia laloa bada. Unai tau be bapatiso ia abia, bona hari ia be kongregesen ena hesiai tauna ta. Ena adavana bona ena natuna kekenidia rua bona ena varavara haida be Keristani kongregesen lalonai idia gaukara, Dirava ena Basileia sivaraina namona idia harorolaia.

[Footnotes]