Memorial Oi Badinaia Maoromaoro

NISANA 14, 33 C.E. ena adorahi ai, Iesu ese Memorial badinaia karana ia hamatamaia.a Ia karaia dinana ita diba momokani, badina unai be ia be ena aposetolo 12 ida Pasova idia badinaia murinai. Ia ia hadikaia tauna, Iuda, ia siaia oho murinai, “Iesu ese paraoa ia abia, ia guriguri, Dirava dekenai ia tanikiu henia, ia makohia, idia dekenai ia henia, ia gwau, ‘Umui abia, lauegu tauanina be inai.’ Kapusi ia abia, ia tanikiu henia, ia henia idia dekenai, idia ibounai idia inua. Idia dekenai ia hamaoroa, ia gwau, ‘Lauegu rarana be inai, taravatu matamata ena rarana, ia bubua taunimanima momo dainai.’ ”​—⁠Mareko 14:22-​24.

Iesu ese ena hahediba taudia ia hagania iena mase do idia laloa lou badina be ia be mai anina bada. (Luka 22:19; 1 Korinto 11:23-​26) Iena boubou gauna mo ese taunimanima be kara dika bona mase, Adamu ena amo idia abia gaudia, amo ia hamauridia diba. (Roma 5:​12; 6:​23) Ia gaukaralaia paraoa bona uaina ese ena tauanina goevadaena bona ena rarana idia laulaulaia. Ia karaia dinana ita diba dainai, lagani ta ta amo unai dina ai ita badinaia diba, Iuda taudia edia Pasova idia badinaia hegeregerena. To namona be ita badinaia maoromaoro. Dahaka dainai?

Aposetolo Paulo ia gwau paraoa idia ania bona uaina idia inua taudia ese “Lohiabada ena mase [idia] gwauraia hedinarai, ela bona do ia giroa mai.” (1 Korinto 11:26) Unai kara amo idia ese Iesu ena mase bona unai ena anina taunimanima dekenai idia gwauraia hedinarai. Namona be idia karaia mai edia hemataurai ida, bona unai neganai Dirava ena kara namo idia laloa lou, bona Iehova bona ena Natuna edia heduru dainai ita lalodia bada dalana danu. (Roma 5:8; Tito 2:​14; 1 Ioane 4:​9, 10) Unai dainai Paulo ia gwau: “Unai dainai tau ta ese bema inai paraoa do ia ania, bona inai kapusi do ia inua mai ena kerere danu, ia ese Lohiabada ena tauanina bona iena rarana do ia hadikaia.”​—⁠1 Korinto 11:27.

Maoromaoro​—⁠Edena Bamona?

Momokani, bema unai hebou be tomadiho koikoi karadia o kara kereredia idaudia amo ita hadikaia, Dirava ese unai ia moalelaia lasi. (Iamesi 1:​27; 4:​3, 4) Anina be Ista neganai idia karaia karadia danu. Iesu ena hahegani, “inai bamona do umui karaia, lau dekenai do umui laloa totona,” be ita badinaia neganai, namona be Memorial ita badinaia, matamana ai ia karaia hegeregerena. (Luka 22:19; 1 Korinto 11:24, 25) Anina be Kerisendom ena tomadiho oreadia ese idia iusilaia gaudia be ita iusilaia lasi. New Catholic Encyclopedia ia gwau: “Hari inai nega ena Mass be Keriso bona Iena Aposetolo taudia ese idia karaia karana haragana amo ia idau vaitani.” Bona Kerisendom ese Mass be nega momo, o dina iboudiai, ia karaia dainai, Iesu ese ia gwauraia dalana amo ia siri bona unai kara ena anina ia hamaragia.

Ena revareva lalonai Paulo ese Keristani taudia Korinto ai ia sisiba henidia, badina be edia kongregesen lalonai Lohiabada ena Adorahi Anibouna idia karaia maoromaoro lasi dainai. Haida idia laloa ia be kara helagana lasi. Edia aniani idia mailaia bena hebou negana vairanai o lalonai idia ania. Nega momo idia aniani momo bona idia inuinu momo. Unai dainai idia ura mahuta bona idia laloa namonamo diba lasi. Edia lalona ai bona lauma dalana ai idia noga lasi dainai, idia “laloa lasi unai be Lohiabada ena tauanina,” bona unai dainai ‘Lohiabada ena tauanina bona iena rarana idia hadikaia.’ Bona idia aniani lasi taudia idia hitolo dainai, idia danu idia laloa namonamo lasi. Iesu ena tauanina bona ena rarana idia laulaulaia gaudia idia ania bona idia inua neganai, idia kahirakahira iboudiai idia hegeregere lasi unai kara ena anina bada do idia laloa goevagoeva​—⁠idia laloa lasi unai be Lohiabada ena mase laloa lou karana. Unai kara idia matauraia lasi dainai, idia be mai edia kerere Dirava vairanai.​—⁠1 Korinto 11:27-​34.

Ita Lalo-Parara be Namo

Haida ese Memorial gaudia idia ania bona idia inua vadaeni, to gabeai, edia lalona idia parara unai bamona idia kara be kerere. Mai edia maoro ida Memorial gaudia idia ania bona idia inua taudia be Dirava ese ia abia hidi vadaeni, bona Dirava ena lauma ese unai ia hamomokania. (Roma 8:​15-​17; 2 Korinto 1:​21, 22) Idia hegeregere, sibodia edia lalohadai dainai lasi, eiava sibodia edia lalo-goada dainai lasi. Dirava ia gwau vadaeni 144,000 mo be Keriso ida do idia lohia guba ai. Idia be momo lasi, to Keriso ena boubou amo hahenamo idia abia taudia iboudiai be momo herea. (Apokalupo 14:​1, 3) Abidia hidi karana be Iesu ena negai ia matamaia, unai dainai hari inai negai paraoa idia ania bona uaina idia inua taudia be momo lasi. Bona idia haida idia mase neganai, edia momo ia diho be maoro.

Dahaka dainai ta ese paraoa ia ania bona uaina ia inua kerere? Reana badina be ena tomadiho dalana gunana ai ia laloa abidadama taudia iboudiai idia lao guba. Eiava reana badina be ia hekokoroku​—⁠ia laloa haida ia hereaia​—⁠bona ia ura ladana bada do ia abia. Eiava reana badina be hekwakwanai badadia o hisihisi badana ia lalohisihisilaia bada dainai, ia ura lasi tanobada ai do ia mauri. Eiava reana badina be ia be Dirava ese guba maurina do ia abia totona ia boiria tauna ta ida idia hetura heheni dainai. Namona be ita ibounai ita laloatao Dirava ena ura mo be mai anina, iseda ura be herevana. (Roma 9:​16) Unai dainai, ‘tau ta ena lalona ia tahua namonamo’ neganai, bema ia diba paraoa ia ania bona uaina ia inua be kerere, namona be unai kara ia hadokoa.​—⁠1 Korinto 11:28.

Dirava ese taunimanima momo herea ia henia helarona be mauri hanaihanai paradaiso tanobadana ai helarona. Unai be helaro namo hereana, ita abia dae haraga diba helarona. (Genese 1:​28; Salamo 37:​9, 11) Tanobada ai, abidadama taudia be edia lalokau taudia, idia toreisi lou taudia, ida do idia hedavari lou, bona idaunegai kara maoromaoro taudia, Aberahamo, Sara, Mose, Rahaba, Davida, Ioane Bapatiso, bona ma haida ida danu​—⁠idia iboudiai be idia mase guna, Iesu ese guba maurina abia dalana ia do kehoa lasi neganai.​—⁠Mataio 11:11; ma danu 1 Korinto 15:20-​23 itaia.

Tanobada helarona idia abia taudia ese Lohiabada ena Adorahi Anibouna idia badinaia maoromaoro dalana be inai: Idia lao henia, bona ena be paraoa idia ania lasi bona uaina idia inua lasi, to idia kamonai namonamo mai edia hemataurai ida. Idia danu be Keriso ena boubou ese ia hanamodia; ia dainai Dirava ese ia lalo-namo henidia. (Apokalupo 7:​14, 15) Haroro herevana idia kamonai lalonai, gau helagadia laloa bada karana idia goadalaia, bona edia ura, Dirava ena orea taudia iboudiai ida do idia lalo-tamona noho urana, be ia bada ia lao.

Inai lagani ai, Tuesday, April 2 ai, dina do ia diho murinai, tanobada hegegemadai ai, Iehova ena Witness taudia edia kongregesen 78,000 bamona lalodiai, Memorial do idia karaia. Do oi lao henia a?

[Footnotes]

[Picture on page 8]

Lagani ta ta lalodiai dina tamona ai Iehova ena Witness taudia ese Memorial idia karaia