Basileia Haroro Ripoti

Dirava Ena Hereva Ena Siahu ese Ia Haidaua

TAU ta be sibona ena kara ia gwauraia, ia gwau: “Gunaguna lau ese Keriso lau hereva dika henia, lau dagedage henia, bona iena ladana lau hadikaia.” (1 Timoteo 1:​13) To iena kara ia haidaua! Aposetolo Paulo ese ena kara ia haidaua vaitani, unai dainai gabeai ia gwau diba: “Lau karaia bamona do umui karaia, Keriso ena kara lau karaia bamona.”​—⁠1 Korinto 11:1.

Hari inai negai, mai edia momokani ida Dirava idia tomadiho henia taudia tausen momo tanobada hegegemadai ese edia kara idia haidaua. Dahaka ese idia ia durua edia kara do idia haidaua totona? Idia ese Dirava ena Hereva idia dibaia bona edia mauri lalonai idia badinaia. Henunai ia noho sivaraina ese ia hahedinaraia Dirava ena Hereva be mai ena siahu, taunimanima edia kara haidaua totona.

Slovenia ai, tau burukana ta mai ena adavana be hanua murimuriai idia sibona idia noho. Unai tau, ladana Jože, iena mauri laganidia be 60 bamona bona kekero muramurana dekenai ia tabekau momokani. To, ia ese ena adavana, ia gorere hahinena, Ljudmila, ia naria. Dina ta Basileia harorolaia taudia rua be Jože dekenai idia lao. Ia ese unai Witness taudia ia noia ena ruma lalonai do idia vareai, bena iena adavana be unuseniai idia hedavari henia. Ljudmila ese Basileia sivaraina ia kamonai neganai, ia moale dikadika dainai ena mata ranudia be ena vairana ai idia diho. Jože danu ese ia kamonai herevadia ia moalelaia bona henanadai momo ia henidia. Witness taudia ese Baibel gwauraia magasin idia henidia bena idia rakatania.

Hua ta murinai Witness taudia be mai edia dala idia lou henidia, bona edia pata latanai buka ta ladana Mauri Hanaihanai Paradaiso Lalonai idia itaia. Jože idia nanadaia unai buka be edeseniai ia abia neganai, ia gwau: “Umui be lau umui henia magasinidia ta ena rau ginigabena ai unai buka abia dalana herevana lau duahia. Unai dainai emui opesi Zagreb ai lau tore henia bona lau noia buka ta do idia siaia lau dekenai.” Baibel ena hereva ia ura henia dainai, Keriso ena mase laloa lou hebouna, Memorial, dekenai idia boiria mai. Unai hebou be daudau lasi murinai do idia karaia Kingdom Hall lalonai. Witness taudia idia moale, badina be unai hebou dekenai ia lao!

Nega daudau lasi Baibel stadi be ia ida idia hamatamaia, bena lauma dalanai ia goada ia lao. Hegeregere, Baibel ena hereva, “laulau ta do umui karaia lasi, . . . laulau o kaivakuku ta dekenai do umui tomadiho henia lasi, bona iena hesiai gaukara do umui karaia lasi,” be idia hahedinaraia neganai, maoromaoro Jože ese kaivakuku bona tomadiho laulau iboudiai iena ruma lalonai ia gogoa bena ia negea.​—⁠Esodo 20:​4, 5.

Jože be Dirava ena hereva momokani totona ia ranu mase bamona urana idia hagugurua. To madi, ia be ma gau ta totona ia do ranu mase. Lagani 18 lalodiai, dina ta ta iboudiai uaina lita 7 bamona ia inua. Kekero muramurana dainai ia hekwakwanai, unai dainai iena oromana ia laloa lasi. To Dirava ena lalohadai kekero muramurana gaukaralaia kerere karana dekenai ia diba murinai, ena lalona ia hadaia ena kara do ia haidaua.

Iena inuinu karana be metairametaira ia hamaoromaoroa toho; dina ta ta iboudiai ia inua uaina ena bada be pepa ta ai ia torea. Daudau lasi murinai uaina ena hesiai ia lao henia lasi. Iena Baibel stadi amo ia diba Dirava ia ura Keristani taudia korikoridia edia tauanina idia goeva. Unai dainai, Witness taudia dekenai moni ia henia, ia gwau: “Vadaeni, umui lao bona dahaka dabua lau atoa be namo Keristani heboudia bona haroro gaukarana totona, be umui hoia lauegu!” Witness taudia idia lou mai neganai, henu dabuadia, sokisi, tamaka, siedi, piripou bona kouti, nekatai, bona baege ta idia mailaia.

Lagani tamona lalonai Baibel idia stadilaia, bena Jože bona Ljudmila idia hegeregere Witness taudia idia bamoa ruma-ta-ruma-ta haroro gaukarana ai. Hua toi murinai Iehova ena Witness taudia edia distrik hebouhebouna ta ai ranu lalonai bapatiso idia abia, edia gwauhamata Dirava dekenai ena toana unai. Ena be Jože ia buruka bona ia gorere, to hua iboudiai sivarai namona ia harorolaia bona gabeai kongregesen lalonai hesiai tauna gaukarana ia karaia mai ena kamonai ida danu ela bona ia mase, May 1995 ai. Hari manau tauna bona ena adavana edia mauri lalonai huahua namona ia vara; unai ese ia hamomokania Dirava ena Hereva be mai ena siahu, taunimanima edia kara haidaua totona!