Basileia Haroro Ripoti

Bible Ena Hereva be “mai Ena Siahu”

TANOBADA ena gavamani ese moni bada bona nega bada idia haorea, kara dika taudia koudia totona. Drag ania kava, henaohenao, bona ala-ala idia taravatulaia, to unai taravatu ese taunimanima dikadia na taunimanima namodia ai idia halaodia lasi. To Dirava ena Hereva, Bible unai, be idau; ia be mai ena siahu, ena taravatu idia badinaia taudia be kara maoromaoro bona lalo-manau taudia ai do ia halaodia.​—Roma 12:2.

◻ Haheitalai ta be inai: Australia dekenai, Witness taudia rua ese noho kava uhaudia haida idia lou henidia. Ruma lalonai idia vareai neganai, daiutu ta lalonai idia vareai, ia dibura bona kwalahu amo ia honu. Pata dekenai mariuana gaukaralaia gaudia idia noho, bona ben taudia edia laulau badadia momo be haba dekenai idia noho. Ilektrik gita edia regena habadaia gaudia be haba ta badinai idia noho. Unai daiutu lalonai ben taudia idia gadara loulou. Witness taudia be unai uhau toi ida Bible stadi idia hamatamaia, boga tamona amo idia vara taudia unai. Lagani haida gunanai edia sinana be Witness taudia ida idia stadi, bona buka ta, ladana Mauri Hanaihanai Paradaiso Lalonai amo ena natudia be Dirava ena paradaiso gwauhamatana ia hadibadia. Bena, unai ruma bese idia lao idau gabuna ta dekenai, unai dainai ena stadi ia doko. Bible stadi ese unai uhau edia lalokau hereva momokani dekenai ia hamauria lou, bena edia turadia rua danu ese stadi lalonai idia helai vareai.

Hua toi idia do ore lasi neganai, idia ta ese haroro gaukara ia karaia matamaia, bena ma hua ta murinai ma rua idia karaia matamaia. Bend amo idia doko, bona hua 4 idia do ore lasi neganai, idia toiosi ese haroro gaukara idia karaia. Unai nega lalonai, edia sinana, edia tadina, bona edia taihuna badana, ia headava vadaeni hahinena, ese Bible idia stadilaia matamaia. Nega sisina murinai edia turana ma ta ia ura ta ese do ia stadi henia. Moale havaraia gauna be inai: Sekit hebouhebou ta ai, nega tamona idia 5 idia bapatiso! Idia ma rua idia hegaegae noho bapatiso totona, bona edia sinana bona edia taihuna badana idia goada idia lao noho. Momokani, Dirava ena Hereva be mai ena siahu.

◻ Argentina dekenai, bisinesi tauna ta ena gaukara tauna ta be ia lahedo, ia koikoi, bona ena biaguna amo moni bada herea ia abia torehai. Dina ta ai unai gaukara tauna ia boio. Bena, lagani momo murinai, ena biaguna ese ena ruma kahirakahira dekenai ia hedavari henia. Gaukara tauna ese ia hamaoroa, ia gwau: “Oiemu ruma lau raka henia inai, badina lau ura oiemu amo lau abia torehai monina lau haloua. Oiemu moni inai. Tanikiu bada herea, bona lau sori badina lau haloua haraga lasi; mani egu kerere oi gwauatao.” Bisinesi tauna ia hoa bona hari tau ena kara ia nanadailaia. Gaukara tauna ia gwau: “Lau ese Bible lau stadilaia hari, bona lau be Iehova ena Witness tauna ta ai lau lao vadaeni. Bible ia gwau, ‘Tau ta dekena amo umui abitorehai lasi. To inai gau tamona umui laloa noho be namo: ta ta dekenai do umui lalokau henia noho.’ Unai dainai oiemu moni lau haloua inai.” Bisinesi tauna ia henanadai,ia gwau: “Bible ena siahu be dahaka, tau ta ena kara be inai bamona do ia haidaua?” Bena Bible ia stadilaia matamaia, bona hari ia danu ese hereva momokani ia dibaia, badina Bible ena hereva momokani ese ena gaukara tauna gunana ena kara ia haidaua dainai.

Kudou-maoro taudia momo Argentina dekenai ese Bible ena hereva momokani idia abia dae bona edia mauri daladia idia haidaudia. Sivarai ta be inai:

◻ Witness tauna ta ia gwau: “Dina ta, haroro gaukara ai karaia lalonai, ruma ta ena iduara dekenai ai pidipidi neganai, haida ai kamonai, ruma lalonai idia tai lolololo. Tau ta be ruma amo ia raka lasi​—ia badu dikadika. Aiemai vadivadi ena badina ai gwauraia hedinarai toho, to ia gwau iena ruma amo ai do ia lulua. Mai emai manau ida ai hereva henia, bena sisinasisina ena lalona ia keru. Unai dainai Dirava ena ura namona taunimanima totona ai gwauraia. Unai hereva ia moalelaia, bena ai hoa badina ia gwau: ‘Dirava ese umui ia siaia iniseniai umui mai totona.’ Bena ai ia abia dae ena ruma lalonai. Daiutu ena daiguni ai ena hahine bona ena natudia idia helai hebou bona idia tai noho. Bena ena kerere ia gwauraia hedinarai; ia gwau: ‘Umui ginidae neganai, egu ruma bese bona sibogu danu lau hamasea gwauraia. Lau be helaro lasi! Lauegu moni gaukara amo lau idia hadokoa, inai ruma amo ai do idia lulua, bona moni bada herea lau abia torehai.’ ”

Hari sivarai ena dokona be namo. Taihu ta ese moni gaukara ia davaria hari tau ena, bona ruma idauna ta ia davaria. Ia mai ena “adavana” ida Bible idia stadilaia matamaia. Guna, lagani 15 lalodiai ia be ena hahine ida idia noho hebou, to idia be dala maorona ai idia do headava lasi; to Bible idia stadilaia matamaia murinai, edia headava idia hamaoromaoroa.

Inai sivarai ese idia hahedinaraia hegeregerena, Bible ena hereva momokani be “mai ena siahu.” Bema ta be lalo-manau tauna bona Bible ena hereva do ia stadilaia bona do ia badinaia, Bible be mai ena siahu ia dekenai.

[Blurb on page 7]

“Dirava ena hereva be ia mauri noho, bona ia be mai ena siahu.”​—HEBERU 4:12