Dirava, Gavamani, Bona Oi

“Ireland ai, Dubu Bona Gavamani Idia Heatu Headava Makohia Taravatu Ena Maoro Eiava Ena Dika Voutilaia Dainai”

INAI hereva kwarana be The New York Times ai, ia hahedinaraia hari taunimanima vairanai abia hidi rua idia noho; Gavamani ena ura do idia karaia, eiava dubu ena hadibaia herevadia do idia badinaia.

Unai niuspepa ena sivarai ia gwau: “Pura toi mai kahana idia do noho bena vouti do idia karaia, headava makohia karana taravatuna do idia kokia, eiava. Roman Katolik tanona Ireland ai, nega momo ia vara lasi hekwakwanai ia vara; Gavamani ena gunalaia taudia bona dubu ena gunalaia taudia huanai heiriheiri ia vara.” Gavamani ia ura headava makohia taravatu idia kokia, to Katolik Dubu ese headava makohia bena headava lou karana idia dadaraia vaitani. Ireland Katolik taudia ese edia lalona do idia hadaia Dubu eiava Gavamani do idia abia hidi. Gavamani ia kwalimu, to kahirakahira idia abia vouti be idia hegeregere lasi.

To gau idauna ta be, lagani momo lalodiai Northern Ireland dekenai idia noho taudia idia laloa bese be gau hereana bona sibodia idia lohia be namo. Momo be unai hepapahuahu dainai idia mase. Roman Katolik taudia bona Protestan taudia be edena Gavamani henunai do idia noho, edia lalohadai be idauidau: Northern Ireland dekenai Britain ena lohia henunai do idia noho eiava Ireland tanona ibounai be sibona ena gavamani tamona henunai do idia noho.

Unai hegeregerena, guna idia gwauraia Yugoslavia tanona ai, lohia taudia idia ura dubu idauidau taudia, Katolik bona Otodoks danu, be tano dainai do idia tuari heheni. Hanua taudia edia maduna ginigunana be daika dekenai? Gavamani totona idia hereva taudia do idia badinaia, eiava Dirava do idia kamonai henia, badina be ia gwau: “Taunimanima do umui alaia lasi . . . Oiemu badibadinai tauna dekenai do oi lalokau henia, oi sibona oi lalokau henia bamona”?​—⁠Roma 13:⁠9.

Reana oi laloa unai bamona kara do ia vara diba lasi oi dekenai. To ia vara diba. Reana oi dekenai ia vara noho hari. Tomadiho ia stadilaia tauna Oscar Cullmann ena buka, The State in the New Testament lalonai, ia gwau “taunimanima edia dala idia koua momo gavamani ese hari iseda negai idia noho Keristani taudia idia dagedage henia neganai, reana Keristani taudia vairadiai mauri eiava mase abia hidi karana ia vara.” To danu, ia gwau, “Keristani taudia iboudiai be mai edia anina bada maduna korikorina ta​—⁠‘dina ta ta ai’ ena mauri ia ‘auka lasi’ Keristani tauna danu​—⁠ia be Keristani tauna dainai ia davaria hekwakwanai bada ia vara neganai, do ia haheauka bona gini goada.”

Unai dainai Keristani taudia ese tomadiho bona Gavamani hetura heheni karana idia laloa be namo, eiava? Oibe, idia laloa be namo. Gunaguna ema bona hari, Keristani taudia idia ura gavamani taudia dekenai lalohadai maorona idia abia. Roma Gavamani ese edia Biaguna, Iesu Keriso, idia kota henia, idia gwauraia dika, bona idia hamasea. Iena hahediba taudia ese edia Keristani maduna bona Roma Gavamani dekenai edia maduna idia huaia hebou. Edia hetura karana Roma Gavamani ida do ita riviulaia, bena unai amo do ita itaia Keristani taudia hari be dahaka do idia karaia be namo.

[Picture Credit Line on page 3]

Tom Haley/Sipa Press