Basileia Haroro Ripoti

“Oiemu Taravatu Ibounai be Momokani”

MOSE be kahirakahira do ia mase gwauraia neganai, ia ese Israela taudia ia hamaorodia Iehova ena hahegani herevadia ibounai do idia badinaia. Ia gwau: “Hari dina dekenai umui lau hamaoroa herevadia ibounai do umui laloatao, emui natudia dekenai danu do umui hadibaia. Inai lau hadibaia taravatu ena hereva ibounai do idia badinaia bona edia kara do idia karaia. Badina be inai herevadia be gau maragina lasi umui dekenai. Lasi, idia be emui mauri.”​—⁠Deuteronomi 32:​46, 47.

Lagani handred momo murinai, salamo torea tauna ese ia hahedinaraia Dirava ena hahediba herevadia ibounai be mai anina bada. Ia gwau: “Oi Lohiabada, oi be lau kahirakahira oi noho, bona oiemu taravatu ibounai be momokani.” (Salamo 119:151) Iesu ena nega lalonai, ia hahedinaraia “Dirava ena uduna dekena amo idia mai hereva ibounai” be mai anina bada. (Mataio 4:⁠4) Bona Dirava ena hakaua henunai aposetolo Paulo be inai ia torea, “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu.”​—⁠2 Timoteo 3:⁠16.

Ia hedinarai goevagoeva, Iehova Dirava ia ura iena tomadiho taudia ese ena Hereva amo idia duahia gaudia ibounai do idia laloa bada. Baibel lalonai hereva ta lasi ena anina be maragi. Iehova ena Witness taudia ese Dirava ena Hereva be unai bamona idia laloa, Mauritius dekenai ia vara gauna ese ia hahedinaraia hegeregerena.

Mr. D​—— be daudau momokani hanuana ta dekenai ia noho, unuseniai hanuaboi ai gima gaukarana ia karaia. Nega daudau lalonai, mai ena momokani ida Dirava tomadiho henia dalana maorona ia tahua. Hanuaboi ia gaukara neganai, Baibel ia duahia matamaia. Dokonai, ia ese Baibel ibounai ia duahia ore. Ia davaria Dirava ena ladana be Iehova​—⁠unai lada be iena Hindi Baibel lalonai ia hedinarai momo. Ia davaria Apokalupo bukana be buka idauna momokani.

Bena sibona ia laloa, Baibel ibounai ia badinaia tomadihona ta ia noho eiava lasi. Ia itaia ia bamodia tomadiho oreadia be Baibel ena kahana haida sibona idia badinaia. Tomadiho haida ese Heberu Revarevadia idia abia dae to Keristani Greek Revarevadia idia dadaraia. Tomadiho haida be Heberu Revarevadia idia dadaraia vaitani, bona idia gwau Keristani Greek Revarevadia sibona be idia badinaia diba herevadia.

Nega ta Mr. D​—— ese tau ta bona ena adavana ia itaia medu lalonai idia paripari bona ia boiridia lao ena ruma dekenai idia kaukau totona. Idia be Iehova ena Witness taudia. Hahine be Apokalupo​—⁠Ena Hagugurua Negana Ia Kahirakahira!a bukana ia dogoatao. Karaharaga Mr. D​—— ese idia edia amo unai buka ia noia. Witness taudia idia laloa Apokalupo ena peroveta herevadia ia kikilaia bukana be ia dekenai do ia auka dainai, idia ese buka ma ta idia hahedinaraia. To Mr. D​—— be ia ura dikadika Apokalupo bukana do ia abia.

Ena kopi ia abia neganai, karaharaga unai buka ia duahia. Bena Baibel stadi ia abia dae Iehova ena Witness taudia ida. Daudau lasi murinai, ia hoa badina Witness taudia ese Baibel ibounai idia laloa bada. Iehova ena Witness taudia edia Kingdom Hall dekenai hanaihanai hebou ia lao henidia matamaia, unuseniai Heberu Revarevadia bona Keristani Greek Revarevadia idia stadilaia goevagoeva. Hari ia be Basileia harorolaia tauna bona Keristani kongregesen ena bapatiso tauna ta.

[Footnotes]