Iehova ese Oiemu Kara Namona Ia Abia Dae Be Namo
“Egu Dirava e, inai kara danu dainai lau do oi laloatao, . . . Egu Dirava e, inai lauegu kara ibounai do oi laloatao, bona idia dainai mani lau do oi hanamoa.”—NEHEMIA 13:22, 31.
IEHOVA ena hesiai taudia be edia kara namona hahedinaraia totona idia dekenai heduru gaudia ibounai idia noho. Dahaka dainai? Badina be idia be Dirava ena tanobada oreana taudia dainai, Ia ida idia turana momokani. Ia ese ena ura be idia dekenai ia hahedinaraia, bona ena lauma helaga amo ia ese idia ia durua bona lauma dalanai lalo-parara ia henidia. (Salamo 51:11; 119:105; 1 Korinto 2:10-13) Ita itaia edia noho be unai dala ai ia idau dainai, Iehova ese mai ena lalokau ida ena tanobada hesiai taudia ia noia, idia be edena bamona taudia bona Dirava ena goada bona ena lauma helaga ena heduru amo idia karaia diba gaudia, be do idia hahedinaraia ia dekenai.
2 Dirava vairanai ena kara namona ia hahedinaraia tauna ta be Nehemia, Parasa ena King Aratasaseta (Longimanus) ena uaina kapusi naria tauna. (Nehemia 2:1) Nehemia be Iuda taudia edia gavana ai ia lao bona ena inai taudia bogaragidiai bona dika ia vara diba lalonai, Ierusalema ena magu ia haginia lou. Tomadiho momokanina ia goadalaia dainai, Dirava ena Taravatu ia haginia bona haida ese idia hahisia taudia ia hebogahisi henia. (Nehemia 5:14-19) Nehemia ese Levi taudia ia hamaoroa hanaihanai sibodia do idia hagoevaia, geiti do idia naria, bona Sabati dinana do idia hahelagaia. Unai dainai, inai bamona ia guriguri diba: “Egu Dirava e, inai kara danu dainai lau do oi laloatao, lau do oi hanamoa, bona oiemu lalokau badana dainai lau do oi bogahisihisi henia.” Danu, Nehemia ese ena buka, lauma helaga ena siahu amo ia torea bukana, be inai noinoi amo ia koua be maoro: “Egu Dirava e, inai lauegu kara ibounai do oi laloatao, bona idia dainai mani lau do oi hanamoa.”—Nehemia 13:22, 31.
3. (a) Kara namo ia karaia tauna ta be edena bamona oi gwauraia diba? (b) Nehemia ena kara ita laloa dainai reana ita sibona be edena bamona ita henanadai?
3 Namo ia havaraia tauna be kara goeva tauna bona kara maorodia ia karaia, haida edia namo totona. Nehemia be unai bamona tauna ta. Mai ena hemataurai ida Dirava ia gari henia bona tomadiho momokanina ia goadalaia momokani. Unai sibona lasi, Dirava ena hesiai gaukara lalonai ia abia hahenamo dainai Dirava ia tanikiu henia bona Iehova vairanai ena kara namona ia hahedinaraia. Iena kara ita laloa lou dainai reana ita sibona do ita henanadai, ‘Dirava ese lau ia henia hahenamo bona maduna be edena bamona lau lalodia? Lau sibona egu kara be edena bamona Iehova Dirava bona Iesu Keriso edia vairanai?’
Diba Dainai Ita be mai Eda Maduna
4. Iesu be dahaka gaukara ia henia iena murinai idia raka taudia dekenai, bona “Dirava ese ia abia hidi, mauri hanaihanai abia totona taudia” be dahaka idia karaia?
4 Iesu ese ena murinai idia raka taudia dekenai inai hahegani ia henia: “Umui lao, bese ibounai be diba tahua taudia do umui halaoa, bona . . . do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Hahediba taudia do idia halaoa dalana be do idia hadibadia. Idia hadibadia bona “Dirava ese ia abia hidi, mauri hanaihanai abia totona taudia” be bapatiso do idia abia, Iesu hegeregerena. (Kara 13:48; Mareko 1:9-11) Ia henia hahegani ibounai badinaia karana be edia kudouna amo do ia vara. Dirava ena Hereva amo diba maorona do idia abia noho bona badinaia noho vadaeni, bena edia mauri do idia gwauhamatalaia.—Ioane 17:3.
5 Iseda diba Baibel herevadia dekenai ia dobu ia lao neganai, iseda abidadama ena badina ita haginia namonamo. Unai neganai iseda maduna Dirava dekenai be ia bada. Iamesi 4:17 ia gwau: “Bema kara namona karaia ena dala oi diba, to oi karaia lasi, unai be oi kara dika.” Unai hereva amo hahediba tauna Iamesi ese ta be Dirava dekenai ia ura lasi tabekau momokani to ia heagi kava herevana ia hadokoa. Bema tau ta ia diba Iehova ena heduru ia abia lasi neganai ia be noho nega daudau gauna ta do ia hagugurua diba lasi, to unai diba hegeregerena ia kara lasi, unai be kara dika. To Iamesi ena hereva be kara ta reaia ena kara dika ia herevalaia danu. Hegeregere, Iesu ese mamoe bona nanigosi ia herevalaia parabolena lalonai, nanigosi ia gwauraidia dika ena badina be kara dikadia idia karaia dainai lasi, to Keriso ena tadikaka idia durua lasi dainai.—Mataio 25:41-46.
5, 6. Iamesi 4:17 be edena bamona ita lalo-pararalaia be namo? Badinaia dalana haheitalaia.
6 Iehova ena Witness taudia ida Baibel ia stadilaia tauna ta be lauma dalanai ia goada ia lao lasi, badina ena be ia diba kuku ania karana do ia hadokoa be maoro, to ia do hadokoa lasi. Elda tauna ta ese ia noia Iamesi 4:17 do ia duahia. Unai elda ese unai siri ena anina ia herevalaia bena ia gwau: “Ena be oi do bapatiso lasi, to oi be mai emu maduna bona emu abia hidi edia anina ibounai do oi abia.” Namo herea, unai tau be hereva ia badinaia, kuku ania karana ia hadokoa, bona daudau lasi murinai ia hegeregere bapatiso amo ena gwauhamata Iehova Dirava dekenai ia hahedinaraia totona.
Iseda Maduna Haroro Gaukara Dekenai
7. ‘Dirava ita diba’ dainai ita tanikiu henia dalana ta be dahaka?
7 Namona be mai eda lalona ibounai ida do ita ura eda Havaraia Tauna do ita hamoalea. ‘Dirava ita diba’ dainai ita tanikiu henia karana ta be taunimanima be iena Natuna, Iesu Keriso, ena hahediba taudia ai ita halaoa haheganina ita badinaia. Unai be Dirava bona iseda dekena taudia dekenai iseda lalokau hahedinaraia dalana ta danu. (Aonega Herevadia 2:1-5; Mataio 22:35-40) Oibe, Dirava ita diba dainai, ia vairanai ita be mai eda maduna, bona namona be do ita laloa iseda dekena taudia, taunimanima, be hahediba taudia ai idia lao diba.
8 Aposetolo Paulo ia diba sivarai namona ia abia dae bona ia badinaia mai ena lalona ibounai ida tauna be dokonai hahemauri do ia abia, to ia dadaraia neganai mase do ia davaria diba. (2 Tesalonika 1:6-8) Unai dainai Paulo ia diba ena haroro gaukara dainai ia be mai ena maduna Iehova vairanai. Momokani, Paulo bona ia idia bamoa taudia be edia haroro gaukara idia laloa bada herea dainai, idia ura lasi taunimanima do idia laloa idia be davana moni idia abia. Danu, Paulo be ena kudouna amo inai ia gwauraia: “To gau tamona, Sivarai Namona lau harorolaia dainai lau heagi diba lasi. Badina unai bamona do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!”—1 Korinto 9:11-16.
9. Dahaka abitorehai badana be Keristani taudia iboudiai ese idia hamaoromaoroa be namo?
9 Badina ita be Iehova ena hesiai taudia dainai, ‘sivarai namona do ita harorolaia be Dirava ese ia oda vadaeni.’ Basileia sivaraina harorolaia be iseda gaukara. Gwauhamata amo Dirava dekenai eda mauri ita henia neganai, unai maduna ita abia dae. (Luka 9:23, 24 itaia.) Danu, ita be eda abitorehai ta do ita henia guguru be namo. Paulo ia gwau: “Greek taudia bona Greek lasi taudia dekenai danu, aonega taudia dekenai bona kavakava taudia dekenai danu lau be abitorehai tauna: unai dainai lau ura dikadika sivarai namona be umui Roma ai umui noho taudia dekenai do lau gwauraia danu.” (Roma 1:14, 15, NW) Paulo be mai ena abitorehai badina ia diba iena maduna be do ia haroro, unai amo taunimanima be sivarai namona do idia kamonai bena hahemauri do idia abia. (1 Timoteo 1:12-16; 2:3, 4) Unai dainai ia hekwarahi ena gaukara ia hagugurua bona ena abitorehai taunimanima dekenai do ia henia totona. Ita be Keristani taudia dainai, ita danu ese abitorehai ta do ita henia guguru. Basileia harorolaia gaukarana be dala badana ta iseda lalokau Dirava, iena Natuna, bona iseda dekena taudia dekenai ita hahedinaraia totona.—Luka 10:25-28.
10. Haida be dahaka idia karaia edia hesiai gaukarana idia habadaia totona?
10 Dirava vairanai kara namona ita hahedinaraia dalana ta be iseda diba ita gaukaralaia iseda hesiai gaukara habadaia totona. Haheitalaia ta be inai: Vanegai idia hanaia laganidia lalonai, bese idauidau oreadia momo be Britain dekenai idia lao. Unai taudia ese sivarai namona idia kamonaia totona, painia taudia 800 (ful-taim Basileia harorolaia taudia) bona ma Witness taudia handred momo be gado idaudia idia dibaia noho. Unai ese edia haroro gaukara ia hanamoa momokani. China gado klas ia hadibaia painia hahinena ta ia gwau: “Guna lau laloa lasi egu gado be Witness taudia ma haida dekenai do lau hadibaia, bena idia ese inai dala amo ma haida ida hereva momokani do idia kikilaia. Egu mamina ia namo herea!” Unai bamona dala amo emu hesiai gaukara oi habadaia diba, a?
11. Keristani hahinena ta be nega idauna ai ia haroro dainai dahaka ia vara?
11 Ia maloa noho tauna ta hamauria totona, ita be kara ta do ita karaia. Unai hegeregerena, Iehova ena Witness taudia idia ura dikadika edia diba idia gaukaralaia dala ibounai ai ma haida idia haroro henia totona. Vanegai, Witness hahinena ta be basi ta lalonai hahine ta ena badinai ia helai bona ia dekenai Baibel ia herevalaia. Unai hahine ese ia kamonaia gaudia ia hoalaia dainai, henanadai momo ia henia. Witness hahinena be basi amo ia diho gwauraia neganai, unai hahine ese ia noia iena ruma dekenai do ia mai, badina ia be mai ena henanadai ma haida. Witness hahinena ia ura. Vadaeni, dahaka ia vara? Baibel stadi ta idia hamatamaia, bena hua 6 murinai, unai hahine be bapatiso lasi Basileia pablisa ta ai ia lao. Daudau lasi ia be sibona Baibel stadi 6 ia karaia. Basileia hesiai gaukarana ai ta ese ena diba ia gaukaralaia dainai, ahuna namona mai moalena ia abia!
12. Ita hesiai taudia eda diba be edena bamona haroro gaukara ai ita gaukaralaia namonamo diba?
12 Haroro gaukara ai ita be mai eda diba; buka idauidau hegeregere rau 192 bukana Diba ese Mauri Hanaihanai Dekenai Ita Ia Hakaua Lao ita gaukaralaia amo, iseda diba do ita gaukaralaia namonamo. April 1996 ia abia neganai, Iehova ena Witness taudia edia Hakaua Oreana ena Toretore Komiti ese gwaumaoro ia henia vadaeni, Diba bukana be gado 140 ai ia hanaia do idia halasia, bona unai nega ai kopi ibounai 30,500,000 be gado 111 ai idia printaia vadaeni. Unai buka idia torea ena badina be Baibel stiuden taudia do ia durua bena Dirava ena Hereva bona ena ura dekenai edia diba ia hegeregere, Iehova do idia gwauhamata henia bona bapatiso idia abia totona. Basileia pablisa taudia be lagani momo lalonai stiuden ta do idia stadi henia lasi dainai, taunimanima momo ida Baibel stadi idia karaia eiava edia ruma-ta-ruma-ta gaukara bona haroro daladia ma haida idia habadaia diba. (Kara 5:42; 20:20, 21) Edia maduna Iehova vairanai idia laloa dainai, taunimanima edia lalona idia veria Dirava ena sisiba idia laloa totona. (Esekiela 33:7-9) To edia ura badana be Iehova ena ladana do idia hanamoa bona taunimanima momo do idia durudia sivarai namona idia diba totona, inai nega dikana kwadogina lalonai.
Ruma Bese ai Emui Kara Namona Hahedinaraia
13. Dahaka dainai Dirava idia badinaia ruma besedia ese edia ruma bese stadi idia karaia hanaihanai be namo?
13 Keristani tomadiho momokani idia abia dae taudia bona ruma besedia ta ta be Dirava vairanai idia be mai edia maduna. Unai dainai ‘hereva badadia do idia tahua’ bona ‘edia abidadama dekenai do idia gini goada.’ (Heberu 6:1-3; 1 Petero 5:8, 9) Haheitalai ta be, Diba bukana idia stadilaia bona bapatiso idia abia vadaeni taudia be hebou idia lao henia hanaihanai karana amo bona Baibel bona Keristani bukadia duahia karana amo danu, edia diba Baibel dekenai do idia habadaia. Dirava badinaia ruma besedia ese edia ruma bese stadi idia karaia hanaihanai be namo, badina unai be mai anina bada, ‘idia naria namonamo, abidadama dekenai idia gini goada, metau ibounai lalonai do idia haheauka, do idia goada’ totona. (1 Korinto 16:13) Bema oi be ruma bese kwarana, Dirava vairanai oiemu maduna be bada; namona be lauma dalanai emu ruma bese oi ubua namonamo. Tauanina durua aniani namodia ese tauanina ia hanamoa hegeregerena, oiemu ruma bese ese lauma aniani momo idia abia bona idia abia hanaihanai amo edia ‘abidadama do ia maoromaoro’ noho.—Tito 1:13.
14. Idia hadibaia namonamo Israela kekenina ese hereva momokani ia gwauraia dainai dahaka ia vara?
14 Bema emu ruma lalonai natudia idia noho, idia dekenai sisiba namodia lauma dalanai oi henia dainai, Dirava ese emu kara namona do ia laloatao. Unai bamona hahediba ese edia namo do ia habadaia diba, Israela kekeni maragina ta dekenai ia vara bamona; peroveta tauna Elisaia ena nega lalonai Suria taudia ese unai kekeni idia abia mauri. Ia be Namana, Suria ena ami gunalaia tauna mai ena lepera gorerena, ena adavana ena hesiai kekenina ai ia lao. Ena be ia be kekeni maragina, to ena biaguna hahine ia hamaoroa, ia gwau: “Bema lauegu biaguna ese Samaria dekenai ia noho peroveta tauna dekenai ia lao neganai, iena lepera gorere do ia ore.” Hereva momokani ia gwauraia hedinarai dainai, Namana be Israela dekenai ia lao, gabeai Elisaia ena hereva ia badinaia bona Ioridane Sinavai ai nega 7 ia digu, bena ena lepera gorere ia ore. Unai sibona lasi, Namana be Iehova tomadiho henia tauna ta ai ia lao. Unai ese reana kekeni maragina ia hamoalea bada herea!—2 King Taudia 5:1-3, 13-19.
15. Dahaka dainai tama sina ese lauma dalanai edia natudia idia hadibaia namonamo be mai anina bada? Haheitalai ta gwauraia.
15 Inai tanobada, kara maoromaoro ia boio noho bona Satani ena siahu henunai koikoi amo ia honu tanobadana lalonai, Dirava badinaia natudia naria be auka. (1 Ioane 5:19) Timoteo be ia maragi negana amo, ena tubuna Loi bona ena sinana Eunike ese Revareva Helagadia idia hadibaia namonamo. (2 Timoteo 1:5; 3:14, 15) Emui natudia ida Baibel oi stadilaia, hanaihanai Keristani heboudia dekenai oi abidia lao, bona haroro gaukara ai oi idia bamoa be hadibaia dalana ena kahana idauidau, bona unai iboudiai amo Dirava vairanai emu kara do oi hahedinaraia. Keristani hahinena ta Wales ai, hari ena mauri lagani be 80 ia hanaia, ia gwau lagani 1920 ena murina laganidia ai, ena tamana be ororo ia daekau kilomita 10 ia raka lao (giroa danu be kilomita ibounai 20) hanua ta ai Baibel pepapepa ia hariharilaia neganai, ia ia hakaua lao danu. Mai ena moale ida ia gwau: “Unai raka negadia lalonai egu tamana ese hereva momokani ia atoa egu kudouna dekenai.”
Elda Taudia Edia Kara Anina Do Idia Gwauraia—Edena Bamona?
16, 17. (a) Idaunegai Israela dekenai, lauma dalanai idia goada tatau badadia be dahaka gaukara idia karaia? (b) Idaunegai Israela ita laloa neganai, dahaka dainai Keristani elda taudia hari inai negai edia maduna be bada herea?
16 Aonega tauna Solomona ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.” (Aonega Herevadia 16:31) To ta ena mauri laganidia sibona ese ia idia hahegaegaea lasi Dirava ena taunimanima edia kongregesen ai maduna ia huaia totona. Idaunegai Israela dekenai lauma dalanai idia goada vadaeni tatau badadia be hahemaoro gaukara idia karaia, hahemaoro karaia dalana idia naria, bona maino, noho namo, bona lauma dalanai goada ia noho totona, gaukara idia karaia. (Deuteronomi 16:18-20) Ena be Keristani kongregesen ese unai ia karaia danu, to elda taudia edia kahana be bada herea inai nega kahirakahira ia doko lalonai. Dahaka dainai?
17 Israela taudia be Dirava ese ia “abia hidi” besena, bona Aigupito amo idia ia ruhaia. Edia gwaukau tauna, Mose, amo Taravatu idia abia neganai, unai murinai idia vara taudia be gwauhamata besena lalonai bona Iehova ena hahegani bona taravatu idia diba. (Deuteronomi 7:6, 11) To, hari ta be unai bamona gwauhamata besena ta lalonai do ia vara lasi bona momo lasi be Dirava badinaia ruma besedia, Baibel idia diba namonamo besedia, lalonai idia vara. Namona be vanegai sibona “hereva momokani ena dala dekenai idia raka” matamaia taudia be sisiba idia abia bena do idia diba, Baibel ena hakaua herevadia be edena bamona idia badinaia diba edia mauri lalonai. (3 Ioane 4) Momokani unai abidadama elda taudia ese idia ‘dibaia gaudia idia badinaia noho, bona edia murinai idia raka’ noho lalonai Iehova ena taunimanima danu idia durua dainai, idia huaia maduna be bada herea!—2 Timoteo 1:13, 14.
18. Namona be Keristani elda taudia idia hegaegae edena bamona heduru idia henia totona, bona dahaka dainai?
18 Ia raka gwauraia natuna maragina ta ia hekwakwanai bena ia moru. Ia gari sisina bona ia ura ena tama sina ese idia durua bona hagoadaia. Unai hegeregerena, Iehova dekenai ia gwauhamata tauna ta be lauma dalanai ia hekwakwanai bona moru diba. Paulo danu be ia hekwarahi bada Dirava vairanai kara namona eiava maorona ia karaia totona. (Roma 7:21-25) Namona be Dirava ena mamoe naria taudia ese idia kerere to idia helalo-kerehai momokani Keristani taudia idia durua mai lalokau ida. Gwauhamata vadaeni hahinena ta be kerere badana ta ia karaia bona elda taudia ese idia vadivadi henia neganai, ena gwauhamata vadaeni adavana vairanai ia gwau: “Lau diba kongregesen murimurina ai lau do umui atoa!” To elda taudia ese idia hamaoroa idia ura diba, dahaka idia karaia diba lauma dalanai edia ruma bese ia goada lou totona; unai neganai ia tai. Elda taudia idia diba Dirava vairanai edia kara be mai anina bada dainai, mai moale ida idia be ia helalo-kerehai taihuna idia durua.—Heberu 13:17.
Emu Kara Namona Hahedinaraia Noho
19. Dirava vairanai iseda kara namona be edena bamona ita hahedinaraia noho diba?
19 Namona be kongregesen elda taudia bona Dirava ena hesiai taudia oredia ibounai ese Iehova vairanai edia kara namona idia hahedinaraia noho. Ita karaia diba bema Dirava ena hereva dekenai ita tabekau bona ena ura ita karaia. (Aonega Herevadia 3:5, 6; Roma 12:1, 2, 9) Namona be iseda abidadama tamona tadikaka bona taihu ita kara namo henidia bada. (Galatia 6:10) To, gogoa gaukarana be ia do bada herea, bona gaukara taudia be momo lasi. (Mataio 9:37, 38) Unai dainai namona be Basileia harorolaia goadagoada karana amo ma haida ita kara namo henidia. Iehova ese iseda kara do ia laloatao bema iseda gwauhamata ita hamomokania, iena ura ita karaia, bona mai eda abidadama ida Basileia sivarai namona ita harorolaia.
20. Nehemia ena kara ita laloa neganai, dahaka ita dibaia?
20 Unai dainai namona be Lohiabada ena gaukara lalonai gaukara momo ita karaia. (1 Korinto 15:58) Bona Nehemia ita laloatao be namo, ia ese Ierusalema ena magu ia haginia lou, Dirava ena taravatu ia haheganilaia, bona mai ena ura ibounai ida tomadiho momokani ia habadaia. Ia guriguri Iehova ese ena kara namo dainai ia do ia laloatao. Namona be oi hahedinaraia oi danu be ia hegeregerena, Iehova oi badinaia, bona ai ura bada emu kara do ia laloatao.
Oiemu Haere Be Dahaka?
◻ Nehemia ese dahaka haheitalai namona ia hahedinaraia?
◻ Dahaka dainai diba ita abia neganai, Dirava vairanai ita be mai eda maduna?
◻ Edena dala ai iseda hesiai gaukara lalonai Iehova vairanai iseda kara namona ita hahedinaraia diba?
◻ Ruma bese be dahaka idia karaia diba edia kara namona Dirava vairanai idia hahedinaraia totona?
◻ Keristani elda taudia be edena bamona edia kara do idia hahedinaraia?
1. Dahaka ese Dirava idia gwauhamata henia taudia ia durua, Iehova vairanai edia kara namona idia hahedinaraia totona?
2. (a) Edena dala haida ai Nehemia be Dirava vairanai ena kara namona ia hahedinaraia? (b) Nehemia be ena ladana ai idia hatoa Baibel bukana ena dokonai dahaka noinoi ia gwauraia?
8. Dahaka dainai ita gwau Paulo ia mamia ena haroro gaukara dainai iena kara be mai anina Dirava vairanai?
[Picture on page 18]
Paulo hegeregerena, Basileia harorolaia gaukarana amo Dirava vairanai eda kara namona ita hahedinaraia diba
[Picture on page 19]
Oiemu natudia edia abidadama ia goada, Israela kekeni maragina Namana ena ruma dekenai bamona, a?