Abata Gori ese Baibel Ena Sivarai Ia Hamomokania

NOA ena negai ia vara Abata Badana be ia vara momokani gauna. Abata idia herevalaia ena sivarai idauidau be tanobada hegegemadai idia noho taunimanima idauidau edia gori dekenai ita davaria. Africa dekenai, Chad tanona ena Moussaye iduhu ese Abata be inai bamona ia herevalaia:

‘Idau negai momokani, tano daudauna dekenai, ruma bese ta ia noho. Nega ta edia sinana ia ura aniani namona do ia nadua ena lalokau taudia totona. Vadaeni, iena moia gauna ia abia, uiti ia moia, flaoa ia karaia totona. Unai nega ai guba be kahirakahira momokani, hari bamona lasi. Bema oiemu imana oi toia roro neganai, oi dogoatao diba. Mai ena goada ibounai ida uiti ia moia, bona unai uiti be flaoa ai ia lao. To uiti ia moia neganai, unai hahine be ia naria namonamo lasi bona ena moia gauna ia abia isi ataiai momokani, bona matu badana ia karaia guba lalonai! Karaharaga, medu badana herea ia diho matamaia tanobada dekenai. Ia be medu kavakavana lasi. Dina 7 bona hanuaboi 7 ia medu ela bona tanobada ibounai be ranu ese ia koua. Medu ia diho neganai, guba be ia daekau ela bona hari ia noho gabuna dekenai ia ginidae​—⁠ataiai momokani, ita dogoatao diba lasi gabunai. Taunimanima dekenai dika bada herea ia vara! Unai nega amo, ita be iseda imana amo guba ita dogoatao diba hahenamona ita haboioa.’

Hoa gauna be, unai abata idia herevalaia goridia be tanobada hegegemadai ita davaria diba. America tanodia bona Australia ena tano taudia korikoridia iboudiai be mai edia abata sene sivaraidia. Ena be unai sivarai edia hereva be idauidau, to idia momo herea edia anina tamona be inai: Abata ese tanobada ibounai ia koua neganai, taunimanima momo lasi be lagatoi ta dekenai idia roho mauri. Unai sivarai ena sinado be tano idauidau dekenai idia abia dae dainai, ia hamomokania Abata Badana be ia vara momokani, Baibel ese ia sivarailaia bamona.​—⁠Genese 7:​11-20.