Headava Lasi Maurina—Gaukara Karaia mai Laloa Rua Lasi Ena Iduara Ia Kehoa
“Lohiabada ena gaukara do umui karaia momokani, mai laloa rua lasi.”—1 KORINTO 7:35.
APOSETOLO Paulo be ena Keristani tadikaka Korinto, Greece dekenai, ia laloa. Taunimanima momo ese unai taga gabuna ena lebulebu karana ena sivarai idia diba. Lagani ima gunanai, Paulo ese kongregesen ta unuseniai ia haginia. To lagani 55 C.E. bamona ai, Efeso, Asia Minor dekenai ia noho neganai, Korinto amo sivarai dikadia ia abia; kongregesen ia parara badina haida be taunimanima murinai idia raka, bona kongregesen lalonai sihari kava karana ta ia karaia tauna idia dadaraia lasi. Danu, Paulo be Korinto Keristani taudia amo revareva ta ia abia, idia be mahuta hebou karadia, headava lasi karana, headava, headava parara, bona headava lou karana dekenai iena sisiba idia noia.
2 Korinto dekenai lebulebu karadia dika hereadia momo idia vara dainai, dala rua ai Korinto kongregesen taudia ia hakererea. Keristani taudia haida be hanua taudia edia lebulebu lalohadai idia dadaraia lasi bona sihari kava karadia idia dadaraia lasi. (1 Korinto 5:1; 6:15-17) Ma haida be unai hanua lalonai idia noho sihari kava bona lebulebu karadia idia itaia momo dainai, idia gwau namona be iboudiai be mahuta hebou karana idia karaia lasi, idia headava vadaeni taudia danu.—1 Korinto 7:5.
3 Paulo be revareva latana ia torea Korinto taudia dekenai, bona kongregesen ia parara ena hekwakwanai ia herevalaia guna. (1 Korinto, karoa 1-4) Ia hamaorodia taunimanima murinai idia raka lasi, unai ese hapararaia karana mai ena hisihisi do ia havaraia. Idia be ‘Dirava ena gaukara karaia hebou taudia’ dainai, namona be idia tamona. Bena sisiba namona ia henia kongregesen be sihari kava karadia amo ia gini siri, ia goeva noho totona. (Karoa 5, 6) Unai murinai, aposetolo Paulo be edia revareva ia herevalaia.
Headava Lasi Maurina Ia Gwauraia Namo
4 Iena matamaia herevadia be inai: “Umui torea herevadia dekenai, tau ta ese hahine ia abia lasi be namo.” (1 Korinto 7:1, NW) Inai hereva “hahine ia abia lasi” ena anina be hahine ida mahuta hebou karana do ia tahua lasi. Paulo be heudahanai karana ia gwauraia dika vadaeni, to hari mahuta hebou karana, headava lalonai, ia herevalaia. Unai dainai, unai siri lalonai Paulo be headava lasi maurina ia gwauraia namo. (1 Korinto 6:9, 16, 18; Genese 20:6; Aonega Herevadia 6:29 itaia danu.) Bena gabeai ia gwau: “Headava lasi taudia dekenai bona vabu dekenai inai bamona lau hereva: Lau hegeregere, headava lasi umui noho be namo.” (1 Korinto 7:8) Paulo be adavana lasi, reana ia be dogae tauna.—1 Korinto 9:5.
5 Reana Korinto Keristani taudia be Greek taudia edia aonega hereva koikoina ta, ura gaudia ibounai dadaraia lalohadaina ta, idia kamonaia. Reana unai dainai Korinto taudia be Paulo idia nanadaia bema ia “namo” mahuta hebou karadia ibounai idia dadaraia, ani? Paulo ena haere be Greek taudia edia aonega herevadia bamona lasi. (Kolose 2:8) Paulo be Katolik hadibaia taudia bamona lasi, ia ese headava diba lasi bona ura gaudia iboudiai dadaraia maurina, monasteri eiava convent rumana ta lalonai, ia hanamoa lasi. Ia gwau lasi headava lasi taudia be helaga herea bona hamauria dalana do idia abia edia mauri dalana bona edia guriguri amo.
6 Paulo ia gwau headava lasi karana be namo badina “hari inai nega be dika dainai.” (1 Korinto 7:26) Reana Paulo be ena nega ai Keristani taudia idia davaria nega aukana ia kikilaia, bona headava be unai hekwarahi ia habadaia diba. (1 Korinto 7:28) Iena sisiba headava lasi Keristani taudia dekenai be inai: ‘Lau hegeregerena, headava lasi umui noho be namo.’ Dogae taudia dekenai ia gwau: “Oi headava lasi, a? Kekeni ta oi tahua lasi.” To Keristani vabu ia herevalaia, ia gwau: “Bema ia vabu noho be iena lalona do ia namo. Bona lau laloa danu Dirava ena Lauma be egu lalona dekenai ia noho.”—1 Korinto 7:8, 27, 40.
Headava Lasi be Hahegani Dainai Lasi
7 Paulo be unai sisiba ia henia neganai, Iehova ena lauma helaga ese ia hakaua. Headava bona headava lasi ia herevalaia mai laloa maoromaoro ida. Ta ia gwauraia lasi abidadama karana eiava abidadama lasi karana. Ia hahedinaraia unai be ta ta sibona ese ia abia hidi gauna, to edia kara idia biagua bona mai goeva ida idia noho headava lasi taudia edia noho ia gwauraia namo.
8 Paulo be ia gwau “tau ta ese hahine ia abia lasi be namo,” murinai, ma ia gwau: “To lebulebu ia vara garina tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo.” (1 Korinto 7:1, 2) Idia do headava lasi taudia bona vabu dekenai ia sisiba, ia gwau ‘lau hegeregerena, headava lasi umui noho be namo’ murinai, maoromaoro ia gwau: “To bema idia edia lalona ena ura, bona edia tauanina idia biagua hegeregere lasi neganai, namona be idia headava. Namo lasi ura dikadika ese idia ia araia, lahi bamona.” (1 Korinto 7:8, 9) Bona, dogae taudia dekenai iena sisiba be inai: “Kekeni ta oi tahua lasi. To bema oi headava, inai be kara dika lasi.” (1 Korinto 7:27, 28) Unai sisiba namona ese ia hahedinaraia ta ta ena ura hegeregerena do ia abia hidi diba.
9 Paulo ia hahedinaraia headava bona headava lasi maurina be Dirava ena harihari gaudia. “Lauegu ura be umui ibounai lau bamona do umui noho, to tau ta ta dekenai Dirava ese maoro ia henia, do ia headava, o do ia headava lasi. Ta ena maoro be inai bamona, ma ta ena maoro be unai bamona.” (1 Korinto 7:7) Reana ia be Iesu ena hereva ia laloa. Iesu ese ia hamomokania headava be Dirava ena amo ia mai gauna, bena ia hahedinaraia bema ta ia headava lasi Basileia gaudia ia ura ia tahua dainai, unai headava lasi maurina be harihari gauna ta: “Taunimanima ibounai lasi be unai hereva bamona do idia karaia diba, to ena harihari bada idia abia taudia sibona. Badina eunuko taudia haida be unai bamona edia sinana bogana dekena amo idia vara, bona eunuko taudia haida be taunimanima ese eunuko taudia ai idia halaoa, bona eunuko taudia haida be guba basileia dainai sibodia eunuko taudia ai idia halaoa. Namona be unai bamona ia karaia diba tauna be unai bamona ia karaia.”—Mataio 19:4-6, 11, 12, NW.
Harihari Bada Gauna, Headava Lasi Maurina, Idia Abia Hidi
10 Ena be Iesu bona Paulo idia hahedinaraia headava lasi maurina be “harihari bada” gauna, idia gwau lasi taunimanima haida sibona be hoa karana ta dainai do idia karaia diba. Iesu ia gwau “taunimanima ibounai lasi be unai hereva bamona do idia karaia diba,” to ia gwau “namona be unai bamona ia karaia diba tauna be unai bamona ia karaia,” Iesu bona Paulo idia karaia hegeregerena. Momokani, Paulo be inai ia torea: “Namona be idia headava. Namo lasi ura dikadika ese idia ia araia, lahi bamona,” to unai be “edia lalona ena ura, bona edia tauanina idia biagua” diba lasi taudia ia herevalaia. (1 Korinto 7:9) Ena revareva gunadia lalonai, Paulo ia hahedinaraia Keristani taudia be edia tauanina ena ura habadaia gaudia idia dadaraia diba. (Galatia 5:16, 22-24) Iehova ena lauma helaga ese iseda mauri dalana ia hakaua ena anina be iseda kara ibounai do ia biagua. Keristani uhau bona ulato ese unai idia karaia diba, a? Oibe, bema Iehova ena Hereva idia badinaia namonamo. Salamo ia torea tauna ia gwau: “Uhau tauna [eiava ulato] be edena bamona mai goevagoeva danu do ia noho? Ia ese oiemu taravatu do ia kamonai henia.”—Salamo 119:9.
11 Unai idia karaia totona, namona be idia naria namonamo TV, vidio, magasin, buka, bona ane edia hereva amo lebulebu lalohadaidia idia abia garina. Unai bamona lalohadai be tauanina gaudia. Keristani kekeni ta o mero ta, bema ia ura headava lasi maurina ia badinaia, namona be ‘Lauma Helaga ena kara do ia karaia, tauanina ena kara do ia karaia lasi. Unai dekena amo Taravatu ena kara maoromaoro ibounai do ia badinaia momokani. Tauanina ena kara idia karaia noho taudia ese tauanina ena ura gaudia sibona idia laloa. To Lauma Helaga ena kara idia karaia noho taudia ese Lauma Helaga ena ura gaudia sibona idia laloa.’ (Roma 8:4, 5) Lauma helaga ena kara be kara maoromaoro, kara goevagoeva, lalokau, kara namo karadia. Keristani taudia matamatadia bona burukadia danu, be “inai bamona karadia sibona” idia laloa be namo.—Filipi 4:8, 9.
12 Bema ta be headava lasi maurina ia tahua, namona be ena lalona do ia hadaia bona Iehova ena heduru ia noia unai bamona do ia noho totona. (Filipi 4:6, 7) Paulo ia gwau: “To bema tau ta ese iena lalona ia auka, bona ia laloa do ia headava lasi be namo, bona bema ia be mai ena goada iena ura do ia biagua, vadaeni ia ese unai kekeni ia adavaia lasi danu be namo. Unai dainai bema tau ta ese iena kekeni ia adavaia, ia be kara namo ia karaia vadaeni. To bema tau ta ese ia headava lasi, ia be kara namo [“momokani,” NW] ia karaia vadaeni.”—1 Korinto 7:37, 38.
Headava Lasi Maurina mai Badina
13 Headava lasi maurina noholaia sibona ita gwauraia lasi mai ena namo. To dahaka dainai ita gwau ia “namo momokani”? Ta ese ena ura kwalimu ia gaukaralaia hegeregerena, ena namo do ia davaria. Paulo ia gwau: “Lau ura lasi laloa hekwarahi umui abia. Headava lasi tauna ese Lohiabada do ia hamoalea daladia ia laloa. To headava tauna ese tanobada gaudia ia laloa, badina be ia ura iena hahine do ia hamoalea. Unai dainai iena laloa be rua. Headava lasi hahine, bona tau ia diba lasi kekeni ese Lohiabada ena gaukara idia laloa, badina idia ura edia tauanina bona lauma be helaga. To headava hahine be tanobada gaudia ia laloa, badina be ia ura iena tau do ia hamoalea. Umui durua totona inai bamona lau hereva. Lau ura lasi umui emui dala do lau koua. Lau ura kara namo bona kara maoromaoro do umui karaia, bona Lohiabada ena gaukara do umui karaia momokani, mai laloa rua lasi.”—1 Korinto 7:32-35.
14 Headava lasi Keristani tauna be ena mauri ia gaukaralaia sibona ena ura gaudia tahua totona neganai, headava Keristani tauna ena mauri ena “namo” ia hereaia lasi. “Guba Basileia totona” dainai headava lasi maurina ia abia hidi lasi, to ia sibona ena ura dainai. (Mataio 19:12) Ia do headava lasi tau o hahine ese ‘Lohiabada ena gaukara ia laloa’ be namo, “Lohiabada do ia hamoalea daladia” do ia tahua, bona ‘Lohiabada ena gaukara do ia karaia momokani, mai laloa rua lasi.’ Unai ena anina be Iehova bona Iesu Keriso do idia hesiai henia mai edia lalona ibounai ida. Unai dala sibona amo, headava lasi Keristani tatau bona hahine edia noho ena “namo” be headava Keristani taudia edia noho ena “namo” ia hanaia.
Gaukara Ia Laloa Sibona
15 Paulo ese 1 Korinto karoa 7 lalonai ia herevalaia gauna ena anina be inai: Headava be maoro, bona nega haida, ta ia headava be dala namona ia dekenai, to ia ura Iehova ia hesiai henia mai laloa rua lasi Keristani tau o hahine dekenai, headava lasi maurina ena namo be bada. Headava tauna ena “laloa be rua,” to headava lasi Keristani tauna be “Lohiabada do ia hamoalea daladia ia laloa” sibona.
16 Lohiabada hamoalea gaudia, reana headava taudia idia karaia badabada diba lasi, to headava lasi taudia idia karaia badabada diba gaudia, be dahaka? Iesu be ma gau ta ia kikilaia neganai, “Dirava ena gau” ia herevalaia—Keristani taudia ese Kaisara dekenai idia henia diba lasi gaudia unai. (Mataio 22:21) Unai gaudia be Keristani tauna ena mauri, ena tomadiho, bona iena haroro gaukara.—Mataio 4:10; Roma 14:8; 2 Korinto 2:17; 3:5, 6; 4:1.
17 Nega momo headava lasi taudia be nega bada idia atoa diba Iehova ena hesiai gaukara dekenai, bona lauma dalanai idia bona edia haroro gaukara ia durua. Nega bada idia atoa diba sibona edia stadi bona laloa namonamo karana dekenai. Nega momo, headava lasi Keristani taudia be Baibel duahiduahi karana idia atoa haraga diba edia sediual lalonai, to headava taudia idia hekwarahi karaia totona. Reana hebou bona haroro gaukara totona idia hegaegae namo herea diba. Unai gau iboudiai ese idia do ia “durua.”—1 Korinto 7:35.
18 Headava lasi tadikaka momo, hesiai taudia ai idia lao vadaeni taudia, be mai edia dala dainai, Iehova dekenai idia gwau diba: “Do lau lao! Lau do oi siaia!” (Isaia 6:8) Hesiai Gaukara Hadibaia Sikuli ena aplikeisini idia hahonua diba. Unai sikuli be headava lasi hesiai taudia bona elda taudia sibona totona, tadikaka be momo lasi gabudia idia lao diba taudia unai. Edia kongregesen idia rakatania diba lasi taudia danu be hesiai gaukara o elda gaukarana idia karaia neganai, edia tadikaka idia durua.—Filipi 2:20-23.
19Headava lasi taihudia be adavana ta dekenai do idia lao diba lasi ena sisiba tahua eiava edia hekwarahi herevalaia totona, unai dainai edia “laloa hekwarahi be Lohiabada dekenai do” idia henia. (Salamo 55:22; 1 Korinto 11:3) Iehova idia lalokau henia dainai, headava maduna idia tahua lasi taihudia dekenai, unai be mai anina bada gauna. Bema gabeai do idia headava, “Keristani tauna sibona do ia adavaia diba,” anina be Iehova dekenai iena mauri ia gwauhamatalaia vadaeni tauna ta sibona do idia adavaia. (1 Korinto 7:39) Elda taudia idia moale edia kongregesen dekenai headava lasi taihudia idia noho neganai; nega momo unai taudia be gorere taudia bona buruka taudia idia vadivadi henia bona durua. Unai kara amo idia ibounai ese moale idia davaria.—Kara 20:35.
20 Keristani taudia matamatadia momo be edia mauri dalana idia haidaua, bena ‘Lohiabada ena gaukara idia karaia momokani, mai laloa rua lasi.’ (1 Korinto 7:35) Idia be ful-taim painia gaukara, misinari gaukara, eiava Watch Tower Society ena brens opesi ta ai Iehova idia hesiai henia. Bona idia be moale taudia! Edia kara ese ita ia hagoadaia! Iehova bona Iesu edia matadia ai, edia hagoadaia karadia dainai idia be “daba maragi neganai paripari ia hedinarai bamona” gauna.—Salamo 110:3.
Do Idia Headava Lasi Gwauhamatana ta Idia Karaia Lasi
21 Paulo ena sisiba ena hereva badana ta be Keristani taudia edia mauri lalonai, headava lasi maurina ai ia noho be “namo.” (1 Korinto 7:1, 8, 26, 37) To, idia ia hagoadaia lasi, do idia headava lasi gwauhamatana karaia totona. Lasi, to ia gwau: “Bema uhau ta ia laloa headava lasi dainai ia kara namonamo momokani lasi, bema unai be ena matamata negana ia hanaia, bona ia laloa inai bamona do ia vara, iena ura ia karaia be namo; ia kara dika lasi. Idia headava be namo.” (1 Korinto 7:36, NW) Greek herevana ta (hy·peʹra·kmos) idia hahanaia “matamata negana ia hanaia,” ena anina korikorina be “ataiai gabuna ia hanaia,” eiava ta be ena tauanina ena ura ia bada negana ia hanaia vadaeni. Unai dainai lagani haida lalodiai headava lasi maurina ai idia noho taudia be gabeai idia ura abidadama tadikaka o taihu idia adavaia neganai, gau ta lasi ese ia koudia.—2 Korinto 6:14.
22 Keristani tauna matamatana ese Iehova ia hesiai henia mai lalo-tamona ida laganidia be mai edia anina namona. Unai nega lalonai, ia ese aonega, diba, bona lalo-parara do ia abia. (Aonega Herevadia 1:3, 4) Basileia dainai ia headava lasi tauna be unai gaudia ia abia vadaeni dainai, bema ia laloa ia ura ia headava bona reana natudia ia abia, ena maduna do ia huaia namonamo diba.
23 Headava lasi maurina lalonai, Keristani taudia haida be lagani haida lalodiai Iehova ena ful-taim hesiai gaukara idia karaia, bona unai bamona ful-taim gaukara idia karaia noho totona, adavadia idia tahua namonamo. Idia ai hanamoa. Haida idia laloa idia headava murinai, unai ese edia hesiai gaukara do ia hamaragia lasi be namo. To headava Keristani tauna ta do ia laloa Iehova ia hesiai henia diba, ia do headava lasi negana hegeregerena be namo, a? Hereva gabedia ese unai henanadai do ia herevalaia.
Riviu Karaia Totona
◻ Dahaka dainai aposetolo Paulo ia laloa Korinto kongregesen dekenai revareva ia siaia be namo?
◻ Dahaka dainai ita diba Paulo be taunimanima ia hagoadaia lasi monasteri lalonai idia badinaia maurina idia karaia totona?
◻ Tau ta be headava lasi maurina ai ia noho dalana be edena bamona do “ia karaia diba”?
◻ Headava lasi taihudia be dahaka namo idia davaria diba edia mauri amo?
◻ Edena dala ai headava lasi tadikakadia be edia metau lasi maurina idia gaukaralaia diba “mai laloa rua lasi” ida Iehova hesiai henia totona?
[Study Questions]
1. Paulo be edena sivarai dikadia, Korinto Keristani taudia edia, ia kamonaia?
2. Korinto dekenai, lebulebu karadia dika hereadia momo idia vara dainai, unai hanua ai idia noho Keristani taudia dekenai dahaka ia vara?
3. Paulo be ena revareva ginigunana lalonai Korinto taudia dekenai dahaka gaudia ia herevalaia guna?
4. Paulo ia gwau “tau ta ese hahine ia abia lasi be namo” neganai, ena hereva ena anina be dahaka?
5, 6. (a) Dahaka dainai ita itaia goevagoeva diba Paulo be taunimanima ia hagoadaia lasi monasteri lalonai idia badinaia maurina idia karaia totona? (b) Dahaka dainai Paulo be headava lasi maurina ia gwauraia namo?
7, 8. Dahaka ese ia hahedinaraia Paulo be Keristani tauna ta ia doria lasi, ia headava lasi totona?
9. Iesu bona Paulo be edena bamona idia hahedinaraia headava bona headava lasi maurina be Dirava ena harihari gaudia?
10. Tau ta o hahine ta ese headava lasi maurina ena dala “ia karaia diba” totona, dahaka ia karaia be namo?
11. ‘Lauma helaga ena kara do ia karaia, ena anina be dahaka?
12. Headava lasi maurina idia tahua taudia be dahaka idia karaia idia kwalimu totona?
13, 14. (a) Aposetolo Paulo be headava bona headava lasi taudia ia herevalaia neganai, edena idau gauna ia hahedinaraia? (b) Edena dala tamona ai headava lasi taudia edia noho be “namo momokani,” bona headava taudia edia noho ia hanaia?
15. Paulo ese 1 Korinto karoa 7 lalonai ia herevalaia gauna ena anina be dahaka?
16, 17. Dahaka dainai headava lasi Keristani taudia be “Dirava ena gau” idia laloa namonamo diba?
18. Headava lasi tadikaka momo be edena bamona idia hahedinaraia Iehova idia tomadiho henia “mai laloa rua lasi” ida?
19. Headava lasi taihudia be dahaka hahenamo idia abia, bona edena dala ai kongregesen lalonai idia be hahenamo ta?
20. Keristani taudia momo be edena bamona idia hahedinaraia idia be ‘Lohiabada ena gaukara idia karaia momokani, mai laloa rua lasi’?
21. (a) Dahaka dainai ita gwau diba Paulo be taunimanima ia hagoadaia lasi headava lasi gwauhamatana idia karaia totona? (b) Ia ese “matamata negana ia hanaia,” ia herevalaia neganai, ena hereva ena anina be dahaka?
22. Dahaka dainai Keristani taudia be mauri idia do manadalaia lasi neganai, idia headava lasi be namo?
23. Idia ura do idia headava taudia be dahaka idia laloa be namo, bona edena henanadai do ita laloa hereva gabedia ai?