Tubu Negana Namona Equatorial Guinea Ai

EQUATORIAL GUINEA ena intenesenel peleini diho gabuna dekenai laolao tauna ena peleini ia diho neganai, uda badadia do ia hoalaia. Peleini ena heau dalana be au badadia ese idia gegea, bona idia be lata herea dainai peleini gabuna ena ruma edia toana be maragi momokani. Medu ia diho momo bona lagani ibounai siahu ena maka be 27° C. bamona dainai, tubutubu gaudia hereadia be kone dekena amo ia lao ororo ataiai dekenai idia tubu.

Equatorial Guinea dekenai tubu karana ma ta be mai goada ida ia vara noho, ‘Dirava ese ia hatubua karana.’ (Kolose 2:19) Etiopia dagi bada tauna be Filipo amo heduru ia tahua hegeregerena, iniseniai momo idia ura bada Baibel idia lalo-pararalaia. (Kara 8:​26-39) Tau ta ese Iehova ena Witness tauna be dala dekenai do ia hedavari henia bona Baibel stadi totona ia noia be hoa gauna lasi. Equatorial Guinea dekenai idia noho Witness taudia 325 bamona be Baibel stadi 1,000 bona ma haida idia karaia noho.

Matamanai Huahua Idia Hadoa

Africa dekenai, Equatorial Guinea be tano maragina momokani, ia be Nigeria bona Cameroon edia saut kahanai ia noho. (Mapu itaia.) Nigeria Witness taudia ese sivarai namona idia abia mai guna, koko uma gabudia dekenai gaukara idia tahua neganai. Ena be English gado kongregesen haida idia karaia, to gabeai unai tadikaka be Nigeria dekenai idia giroa lou dainai, kongregesen idia koua. To lagani 1968 ai Equatorial Guinea be gwaumaoro ia abia sibona ia naria totona bena daudau lasi murinai, Watchtower ena headava misinari taudia 6 be iniseniai idia siaia mai. Politikol hekwakwanai dainai idia noho daudau diba lasi, to edia haroro gaukara ese anina namodia ia havaraia.

Misinari ta, Santiago, ese Buenaventura ia davaria, ia be tau latana bona mai ena goada bada, hanua taudia ese ia idia gwauraia supaman. Baibel ia matauraia bada, to ia be badu haraga tauna. Gau maragina ta ese ia habadua neganai ia ura tauna do ia paisia sibona. Inuinu gabuna dekenai ia badu neganai, idia noho taudia ibounai idia heau, haida be ia botadia garina dainai uindo amo idia raka lasi. Santiago ena hereva ia kamonai henia neganai, ia laloa bema Baibel amo ena hereva ia hamomokania lasi, do ia dadabaia. Ia sibona ia hamaoroa, ‘Tau ta ese supaman do ia koia lasi.’ To paradaiso tanobadana ai taunimanima do idia mauri hanaihanai helarona ia kamonaia neganai, ia ura dikadika bona Baibel stadi ia abia dae.

Stadi idia karaia lalonai, Buenaventura dekenai Paradaiso ai do ia noho hanaihanai urana ia goada ia lao, bona ia diba unai hahenamo ia abia totona Dirava ena taravatu hegeregerena ai iena mauri do ia haidaua be gau badana. Keristani taudia korikoridia be ‘kara dika ena davana do idia henia lasi’ ia lalo-pararalaia neganai, ia hekwarahi bada iena badu haraga karana ia hadokoa totona.​—⁠Roma 12:⁠17.

Nega ta inuinu gabuna dekenai, hahetoho korikorina ta ia davaria, ia naria namonamo lasi dainai, ia ese ta ena inuinu galasi ia bampaia bena ia moru. Unai tauna ia badu haraga bona Buenaventura ia paisia. Karaharaga momokani, unai gabu dekenai idia noho taudia idia heau, badina idia laloa heai do ia vara. To Buenaventura be mai manau ida ia makohia galasi ena davana ia karaia, unai tauna ena inuinu gauna ta ia hoia, bona ena naria namonamo lasi karana dainai sori herevana ia gwauraia. Iena dekena taudia idia itaia Baibel stadi karana ese ena mauri ia haidaua neganai, haida idia ura ia ida do idia stadi. Buenaventura ia bapatiso neganai, ia be taunimanima ima ia stadi henia noho vadaeni. Idia hanaia lagani ima lalodiai ia ese elda gaukara ia karaia, bona ena be taunimanima ese ia idia do gwauraia supaman, to idia hevaseha sibona.

“Idia Diba Lauma Gaudia Idia Tahua be Namo”

Lagani 1970-1979 lalodiai, inai gabu ena Witness haida be idia hekwarahi idia haroro bona idia hebou noho totona. Gabeai, Spain headava misinari taudia haida idia mai idia heduru totona. Andrés Botella, lagani 12 idia hanaia vadaeni Equatorial Guinea dekenai ia gaukara tauna, ia laloatao ia ginidae negana sisina murinai, ia hoa badina ia itaia taunimanima be “idia diba lauma gaudia idia tahua be namo.” (Mataio 5:⁠3, NW) Ia gwau: “Unai bamona taudia ida Baibel lau stadilaia be moale bada gauna momokani.”

Spain taihu ta, Mary, be hahine matamata ta ladana María ida Baibel ia stadilaia, bona inai hahine matamata ia gwau iena tama sina, Francisco bona Fausta, be idia ura Baibel idia stadilaia danu. Mary be mai ena Baibel stadi ibounai 15 bona María ena tama sina be gabu daudau dekenai idia noho dainai, pura haida idia ore murinai ia vadivadi henidia.

Mary bona iena tau, Serafín, ese Francisco bona Fausta idia hedavari henidia neganai, idia be Mauri Hanaihanai Paradaiso Lalonaia bukana bona Baibel ta idia abia vadaeni, bona idia ura dikadika stadi idia hamatamaia. Maoromaoro idia hamatamaia. Serafín ia itaia María ena tama sina be idia stadilaia gaudia idia diba namonamo. Idia vadivadi henidia lou bona karoa iharuana idia stadilaia neganai, unai bamona ia vara lou. Serafín ia gwau: “Ia be hegeregere idia bapatiso vadaeni Witness taudia rua ida ai stadi bamona.” Nega ihatoina idia vadivadi henidia neganai, idia stadilaia gaudia idia diba namonamo dainai, Serafín ia gwau namona be henanadai bona haere karana amo do idia tahua dahaka gaudia idia diba namonamo vadaeni. Ia davaria Francisco bona Fausta be sibodia unai buka ibounai idia stadilaia ore vadaeni!

Idia davaria diba matamatana ese dahaka ia karaia idia dekenai? Idia dibaia gaudia hegeregerena, idia ese meamea heboudia lao henia karana idia hadokoa bona Katolik Dubu idia rakatania. Bona danu, Francisco ese kuku ania karana ia rakatania, bona rara idia bubua namonamo lasi vamu idia ania lasi. Idia dibaia gaudia be idia badinaia namonamo dainai, idia hagoadadia edia diba be ma haida dekenai do idia harorolaia. Maoromaoro edia dekena taudia idia haroro henidia matamaia. Hua toi idia do ore lasi lalonai, idia hegeregere bapatiso idia abia totona. Hari Francisco be hesiai tauna ta, bona edia haheitalai namona bona haroro goadagoada karana dainai, natudia kekeni toi be hari Witness taudia ai idia lao, natudia memero rua be hebou dekenai idia mai, bona edia varavara 6 be idia stadi noho.

Ia bapatiso bena daudau lasi murinai, Francisco ese Pablo ia davaria, ia be Katolik tauna goadana ta bona ena dubu ena helaga kohudia ia naria tauna. Pris ia noho lasi neganai Pablo ese haroro herevana ia henia. Bema dubu tauna ta ia gorere, ia vadivadi henia; bema tau ta be hebou dekenai ia lao lasi, Pablo ese ia vadivadi henia ia hagoadaia totona; bona bema ta ia mase, ena bese taudia ia durua. Unai dainai, dubu taudia iboudiai ese Pablo idia lalokau henia bada.

Pablo be Baibel ia matauraia bada dainai, Francisco ese Baibel stadi ia gwauraia neganai ia abia dae haraga. Karaharaga Pablo ia itaia Baibel ena sivarai be namo herea, bona stadi haida murinai ena lalona ia hadaia ia gorere dubu tauna ta do ia ‘vadivadi henia hagoadaia’ totona neganai, ia dibaia siri haida do ia gaukaralaia. Unai murinai, iena Sunday haroro herevana ta lalonai, Pablo ese dahaka dainai Dirava ena ladana, Iehova, ita gaukaralaia be mai anina bada bona dahaka dainai kaivakuku ita gaukaralaia lasi be namo ia hahedinaraia.

Ia ese hereva momokanina ia abia dae haraga dainai, ia laloa iena dubu taudia ma haida be do idia abia dae haraga danu. To Baibel amo hereva toi o hani ia henia murinai, Pablo ia itaia taunimanima be iena hereva idia moalelaia lasi. Unai dainai ena lalona ia hadaia dubu do ia rakatania bona Iehova ena Witness taudia do ia bamoa hanaihanai. Hua haida murinai, ia hegeregere bapatiso ia abia totona, bona hari ia be sivarai namona harorolaia tauna goadana. Ena be ful-taim haroro gaukarana ia karaia diba lasi, to hari ia be Baibel stadi 10 ia karaia noho.

Hebou Karana ese Tubu Dalana Ia Hagoadaia

Equatorial Guinea ai, Witness taudia ese Baibel ena oda hebou karana hadokoa lasi taravatuna dekenai idia laloa bada. (Heberu 10:25) Lagani 1994 amo gavamani ese gwaumaoro ia henia lou neganai, tadikaka idia hekwarahi bada Kingdom Hall namodia idia abia totona. Kongregesen momo be sibodia edia Kingdom Hall idia haginidia vadaeni, eiava idia haginidia noho.

Mongomo ai, Sunday hebou dekenai idia mai taudia edia namba ese Basileia pablisa taudia edia namba be nega rua mai kahana amo ia hanaia dainai, kongregesen taudia idia gaukara goada noho hebou gabuna badana haginia totona. Nega momo Mongomo dekenai idia noho tomadiho oreadia ma haida be moni idia henia gaukara taudia idia abia edia dubu idia haginidia totona, unai dainai Witness taudia edia gaukara idia raraia noho. Nega ta Iglesia Nueva Apostólica (New Apostolic Church) dubu ena pasto be konstraksen gabunai ia lao bona elda tauna amo ia ura diba inai gaukara goada taudia dekenai moni hida ia henia. Pasto ia gwau ena be iena dubu taudia haida dekenai moni ia henia biriki idia atodia totona, to idia be metairametaira momokani idia gaukara noho. Ia ura ia diba bema ia hegeregere Kingdom Hall idia haginia taudia dekenai moni do ia henia bona ia abidia. Ia hamaoroa idia gaukara Witness taudia iboudiai be davana idia abia lasi neganai, mai hoa bada ida ia raka oho.

Gabu daudau ai idia noho taudia be idia hekwarahi bada Kingdom Hall ena hebou dekenai idia mai totona. Lagani 1994 ai bapatiso ia abia tauna matamatana, Juan, be unai hekwakwanai ia davaria. Hereva momokanina be Gabon dekenai ia kamonai, unuseniai Mauri Hanaihanai bukana ena kahana ginigunana ia stadilaia. Bena ia giroa mai Equatorial Guinea dekenai, iena hanua dekenai ia lao, ia be kilomita 100 bamona Mongomo amo. Unai be hekwakwanai badana iena stadi ia karaia noho totona. To unai ese ia hamanokaia lasi. Hua ta ta ibounai, baisikele amo hora 8 bamona ia lao Mongomo dekenai, unuseniai Santiago, elda tauna ta, ese ia stadi henia. Mongomo dekenai dina haida ia noho bona nega toi eiava hani bamona stadi idia karaia. Unai dala amo iena stadi ia haorea bona ia hegeregere bapatiso ia abia totona.

Juan be edena bamona lauma dalanai ia goada noho bema Keristani taudia ma haida ia bamodia diba lasi? Mai anina bada gauna be sivarai namona ia harorolaia goadagoada dainai. Hanua taudia iboudiai ia haroro henidia vadaeni, bona bapatiso ia abia neganai, ia be Baibel stadi 13 ia karaia noho. Iena stadi taudia 6 be ia ida Mongomo dekenai idia lao, spesel hebouhebou dinana ai ena bapatiso idia itaia totona. Hari iena gabu dekenai kamonai taudia danu Gima Kohorona stadi ia karaia hanaihanai, bona hebou dekenai taunimanima 20 bamona idia mai hanaihanai.

Mai Haheauka Danu Uhe Idia Dairia

Lauma dalanai tubu karana ibounai be haraga lasi. Nega haida oi haheauka daudau ela bona uhe ese huahua ia havaraia. Paca dekenai unai be momokani, ia be lagani 1984 ai maketi dekenai, Edita, painia taihu ta, amo hereva momokani ia kamonaia. Pura ta murinai, Edita be Paca ena ruma dekenai ia vadivadi henia neganai, Paca ese Baibel stadi ia abia dae. Ena be lauma dalanai ia tubu haraga lasi, Edita ia haheauka badina ia itaia Paca be mai ena kara namodia. Edita ia gwau: “Iena toana be mamoe bamona, bona lau guriguri Iehova ese ena kudouna do ia kehoa.”

Lagani hani mai kahana lalonai Paca ia stadi bena stadi ia hadokoa bena ia stadi lou, to ia goada ia lao lasi. Unai dainai Mauri Hanaihanai buka idia haorea neganai, Edita ese Paca ia hereva henia ia gwau namona be hereva momokani do ia laloa bada. Ia hekwarahi Paca ena kudouna do ia hamarerea toho dainai, Edita ia taitai danu.

Paca ia gwau: “Ena kudouna amo ia mai sisiba ese lau ia botaia momokani. Unai nega amo egu mauri lau haidaua. Haroro Sikuli lalonai lau vareai, bona unai lagani tamona lalonai bapatiso lasi pablisa ta ai lau lao. Bapatiso lau abia dinana be moale bada dinana egu mauri lalonai!” Hari Paca ena goada be guna ena manoka karana amo ia idau vaitani. Hari ia be taunimanima 13 ida Baibel ia stadilaia noho, bona idia goada idia lao haraga lasi taudia dekenai ia haheauka.

Taunimanima Idia Durua Edia Mauri Hanamoa Totona

Iehova ena Witness taudia Equatorial Guinea ai be Baibel ena taravatu hegeregeredia ai idia noho dainai, momo ese idia gwauraidia kara momokani bona kara namo taudia. Edia kara ia hoalaia tauna ta ese Bata Kongregesen ena elda tauna ta ia nanadaia, ia gwau: “Oi be mai emu Herevalaia buka ta, a?b Tanobada ena kara lau badinaia dainai lau hesiku vadaeni. Lau ura Iehova ena Witness tauna ta ai lau lao!”

Malabo Kongregesen ai ia noho hesiai tauna ta, ena ladana Antonio, ese guna tanobada ena kara ia badinaia bena murinai Witness ai ia lao tauna ena kara ia haheitalaia namonamo. Baibel ia stadilaia lasi neganai, lebulebu maurina ia badinaia. Dina gauna hanamoa gaukarana amo ia abia moni be kekero muramura dekenai ia haorea, bona matabodaga karadia ia karaia danu. Dahaka ese ia durua ena mauri ia haidaua totona? Korinto Ginigunana 6:​9, 10 ena hereva goadana ese ia botaia, ia gwau: “Umui sibona do umui koia lasi: Lebulebu taudia, . . . kekero taudia, . . . ta lasi be Dirava ena Basileia do ia davaria diba.” Ia lalo-parara Dirava ena lalo-namo abia totona, iena mauri do ia haidaua be namo. Unai dainai iena hebamo karana ia naria namonamo matamaia. (Aonega Herevadia 13:20) Iena turadia gunadia ese inuinu totona ia idia boiria neganai, edia noinoi ia dadaraia bona ia haroro henidia. Daudau lasi murinai ia idia boiria lou lasi.

Unai bamona ia karaia ese namo ia havaraia, a? Antonio ia gwau: “Lau moale bada herea egu mauri lau haidaua dainai. Lau goada noho ena be lauegu mauri lagani be 60 bamona, to egu turadia gunadia be idia mase vadaeni eiava idia gorere momo. Hari lau be mai egu turadia momokani, lau idia tura henia edia kekero muramura do lau hoia totona lasi. Gau bada hereana be, lau be mai egu hetura karana namona Dirava ida. Hari lau be regula painia gaukara lau karaia, bona lauegu Baibel stadi tauna ta be mai ena hekwakwanai, inuinu karana dekenai, bona egu ekspiriens amo lau durua diba.”

Dirava Ena Hesiai Taudia ai Idia Lao

Lagani 200 gunanai, Equatorial Guinea ena kone kahana amo taunimanima idia gogodia bona America tanodia dekenai idia abia lao hesiai gaukara totona. Hari, iseda nega ai momo be sibodia idia henia hesiai gaukara karaia totona​—⁠Dirava ena hesiai taudia ai idia lao. Inai hesiai gaukara ese ura kwalimu korikorina ia henidia, Babulonia ena hahediba herevadia koikoidia bona meamea karadia amo idia ia ruhaia. Ia durudia edia mauri idia moalelaia bona kara namo idia karaia totona. Idia ese Iesu ena gwauhamata idia mamia, ia gwau: “Hereva momokani be do umui diba, bona hereva momokani ese umui do ia ruhaia.”​—⁠Ioane 8:⁠32.

Lagani 1995 ai taunimanima 1,937 be Memorial hebouna dekenai idia lao​—⁠unai namba ese inai tano ena pablisa taudia edia namba be nega 6 amo ia hanaia bona dala ia do noho momo be lauma dalanai do idia tubu totona. Equatorial Guinea ai, Witness taudia be mai goada ida hereva momokani ena uhe idia hadoa bona dairia gaukarana idia karaia neganai, idia diba ‘Dirava ese do ia hatubua noho.’ (1 Korinto 3:⁠6) Ita daradara lasi, Equatorial Guinea dekenai lauma dalanai tubu negana namona ia vara!

[Footnotes]