Lagani Hani Tuarina Lalonai, Heduru Ia Henia
LAGANI hani lalonai, guna idia gwauraia tanona Yugoslavia ena teritori ai, taunimanima momo ese hekwakwanai aukadia bona mauri gaudia be momo lasi negana idia haheaukalaia. Idia huanai be Iehova ena Witness taudia handred momo, bona unai neganai “durua ibounai ia henia Diravana” idia tomadiho henia noho.—2 Korinto 1:3.
Sarajevo ai, tuari negana ibounai lalonai, taunimanima edia mauri be auka herea badina unai siti badana idia koua ahu. Paua, ranu, lahi au, bona aniani davaria be auka herea. Iehova ena Witness taudia edia Sarajevo Kongregesen be unai mauri aukana lalonai edena bamona ia heau? Dekena tanodia amo idia mai Keristani taudia be heduru kohudia bada herea idia abia mai, herevana idia diba unai kara dainai reana do idia mase diba. (Gima Kohorona, November 1, 1994 gauna, rau 23-7 itaia.) Danu, Sarajevo tadikaka be edia kohu amo idia ta ta idia durua heheni, bona gau badana be lauma gaudia idia hariharilaia. Siti idia koua ahu negana lalonai, Keristani naria tauna ta unai siti amo be inai ripoti ia henia:
“Hebou ai laloa bada. Lau bona lauegu adavana be taunimanima 30 danu kilomita 15 [9 miles] ai raka lao hebou gabuna ai, bena ai giroa mai. Nega haida hadibaia hereva amo ai diba ranu do idia henia negadia be hebou ai abia ena negadia. Tadikaka be dahaka do idia karaia? Ruma dekenai ranu abia totona do idia naria, eiava do idia lao hebou? Aiemai tadikaka idia ura idia lao hebou. Tadikaka be hanaihanai idia durua heheni, bema kohu sisina ia noho, idia hariharilaia. Kongregesen lalonai taihu ta be siti ena murina kahana, uda kahirakahira ai ia noho, unai dainai lahi au ia abia diba. Paraoa gabua gabuna dekenai ia gaukara, bona gaukara davana idia henia palaoa amo. Bema mai dalana neganai, paraoa badana ia gabua bona hebou dekenai ia mailaia. Hebou murinai, idia lao gwauraia neganai, tadikaka ta ta dekenai ena kahana ta ia henia.
“Gau badana be tadikaka bona taihu ibounai idia diba edia tadikaka ese do idia rakatanidia lasi. Ai diba lasi gabeai ai huanai daika ese heduru do ia noia gau dikana ta ia vara dainai. Keru negana ai, dala be mai ena aisi bona taihu ta be ia gorere, to idia goada tadikaka matamatadia be ia idia atoa sleigh ta dekenai bona hebou ta ta ai unai gauna idia veria lao.
“Ai ibounai be haroro gaukara idia karaia bona Iehova ese aiemai hekwarahi ia hanamoa. Aiemai mauri aukana Bosnia dekenai ia itaia, to ai ia hanamoa dainai, hari ai momo daekau—tuari negana vairanai unai bamona ai momo daekau lasi.”
Danu, guna idia gwauraia tanona Yugoslavia lalonai tuari ese ia hadikaia gabudia ma haida ai, Iehova ena Witness taudia idia momo daekau, herevana hekwakwanai dikadia idia davaria. Iehova ena Witness taudia edia opesi Croatia dekena amo, Witness taudia haida edia grup maragina ta edia sivarai idia siaia: “Velika Kladuša ai idia noho tadikaka edia mauri be auka herea. Nega haida tuari taudia be edia hanua idia vareai. Tadikaka be Croatia tuari taudia, Serbia tuari taudia, bona Muslim tuari taudia dekenai edia gini siri karana idia hamaorolaia. Momokani, hekwakwanai momo—dibura, dadabaia karana, hitolo, bona mase garina—idia haheaukalaia. To, idia iboudiai idia gini goada bona edia hahenamo ta be idia itaia Iehova ese edia gaukara ia hanamoa.”
Ena be edia mauri be auka herea, to Iehova ena Witness taudia Velika Kladuša bona Bihać hanuadia dekenai be mai edia goada ida durua ibounai ia henia Diravana ena sivarai namona idia harorolaia edia dekena taudia dekenai bona edia namba ia bada daekau noho. Unai gabu rua dekenai, Basileia pablisa taudia edia momo be 26 bona idia be Baibel stadi 39 idia naria!