Tomadiho Taravatua Lasi Karana Idia Abia Isi Japan Ai

LAGANI momo lalonai Japan ai, Iehova ena Witness taudia edia sikuli matamata taudia ese inai hekwakwanai idia davaria: Edia lalona, Baibel amo idia hadibaia vadaeni gauna do idia badinaia, eiava edia lalona idia hadikaia sikuli karadia do idia karaia. Unai hekwakwanai ena badina be dahaka? Badina heatu gadaradia be eksasais klas ena kahana ta edia sikuli dekenai. Witness matamata taudia idia laloa unai gadara be Baibel ena hadibaia herevadia ida ia tamona lasi, hegeregere Isaia karoa 2, siri 4 lalonai ita davaria herevana bamona. Unai siri ia gwau: “Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.”

Idia ura lasi tuari bamona karadia, idia lalonai taunimanima ta idia hadikaia karadia idia dibaia bona unai dainai Keristani Witness matamata taudia ese edia tisa taudia idia hadibaia edia lalona idia hegeregere lasi heatu gadaradia lalonai do idia vareai. Sikuli karadia ibounai idia karaia totona stiuden taudia edia lalona idia ania toho murinai, mai lalo-parara tisa taudia momo idia gwau stiuden taudia edia lalona ena mamina idia matauraia bona gaukara idaudia idia henia.

To, tisa taudia haida edia lalona ia dika, bona sikuli haida ese eksasais klas ena maka idia henia lasi Witness matamatadia dekenai. Lagani 1993 ai, Witness natudia 9 edia greid idia haidaua gwaumaorona idia henia lasi, bona idia doria sikuli do idia rakatania eiava sikuli amo do idia kokia badina heatu gadaradia lalonai idia vareai lasi dainai.

Ia hedinarai goevagoeva, nega ia ginidae Keristani matamata taudia be edia lalona ia hadikaia lasi dalanai edukeisini idia abia ena maoro do idia hamomokania. Kobe Municipal Industrial Technical College (ladana kwadogina be Kobe Tech) dekenai, greid iharuana dekenai idia vareai gwaumaorona idia abia lasi stiuden ima idia laloa Kobe Tech do idia kota henia.

Idia Kota Henia Ena Badina

Lagani 1990 ena siahu negana ia matamaia neganai, unai stiuden taudia ima be Kobe Tech dekenai idia vareai neganai, idia ese tisa taudia idia hadibaia kendo (Japan ena tuari kaia gadarana) lalonai do idia vareai lasi edia Baibel amo idia abia lalohadaina dainai. Eksasais klas hadibaia oreana ese unai kara idia dadaraia goadagoada bona eksasais klas ena maka idia abia totona gaukara ma haida idia henia lasi. Dokonai, unai stiuden taudia ese eksasais klas ai idia kwalimu lasi bona unai dainai greid ginigunana idia karaia lou (koledi kosi ena lagani ginigunana unai). April 1991 ai, idia ese edia samania pepana be Kobe Distrik Kota dekenai idia atoa, idia gwau sikuli ena kara ese gavamani ia gwauraia tomadiho taravatua lasi karana ia badinaia lasi.a

Sikuli ia gwau gaukara ma haida idia henia karana be tomadiho dalana ta idia abia isi karana bamona bona unai amo ibounai be maka tamona ai edukeisini idia abia karana ia hadikaia. Danu, idia gwau sikuli gabuna bona tisa taudia edia namba be hegeregere lasi eksasais klas idauna idia karaia totona.

Distrik Kota Ena Hereva Idia Diba Taudia Idia Hoa

Unai hekwakwanai be kota dekenai idia lalohadailaia neganai, unai stiuden ima amo rua be eksasais klas ai idia kwalimu lasi dainai greid idia haidaua diba lasi, bona idia toi dekenai kahirakahira unai bamona ia vara to idia kwalimu bona greid ma ta dekenai idia vareai. Unai sikuli ena taravatu idia gwau, sikuli gaukara ia karaia namonamo lasi stiuden bona greid tamona be lagani rua lalonai ia karaia lou stiuden be sikuli amo do idia kokia diba. Unai dainai, unai stiuden rua amo ta ia laloa sikuli ia rakatania idia do kokia lasi neganai, to ma ta, Kunihito Kobayashi, ia ura lasi sikuli ia rakatania. Unai dainai ia idia kokia. Hoa gauna be inai, ena be eksasais klas dekenai maka 48 ia abia bona unai kosi dekenai ia kwalimu lasi, to ena sikuli gaukara ibounai edia maka, eksasais klas ena maka danu, idia haboua bona averes idia duahia neganai, Kunihito ese maka 100 amo maka 90.2 ia abia. Ena klas taudia 42 lalonai ia be ia kwalimu.

February 22, 1993 ai, Kobe Distrik Kota ese Kobe Tech ia hakwalimua bona ia gwau: “Sikuli ena kara ese gavamani ena taravatu ia utua lasi,” ena be ma ia gwau “ai gorea diba lasi, sikuli ena taravatu, kendo gadarana lalonai ibounai idia vareai taravatuna unai, ese kota ena heduru ia tahua tauna ena mauri lalonai tomadiho taravatua lasi karana ia koua.”

Paulo be aposetolo taudia edia negai ia karaia bamona, kota ena heduru idia tahua taudia ese edia hekwakwanai be siahu taudia badadia dekenai idia abia lao. (Kara 25:11, 12) Osaka Kota Badana dekenai idia abia lao.

Kota Ena Heduru Idia Tahua Taudia be Sibona Edia Namo Idia Tahua Lasi

Tsukuba University ena diba tauna badana, Profesa Tetsuo Shimomura, ia gwau Osaka Kota Badana dekenai uitnesi tauna bamona do ia hereva. Ia be edukeisini bona taravatu ia diba momo tauna, bona ia gwau sikuli ena kara lalonai stiuden taudia idia laloa bada lasi. Kunihito Kobayashi ese ena mamina be kota dekenai mai momokani ida ia gwauraia, bona iena kara ese kota dekenai idia noho taudia edia kudouna ia hamarerea. Ma danu, February 22, 1994 ai, Kobe Bar Association ia gwau sikuli ena kara ese Kunihito ena maoro tomadiho henia dalana abia hidi totona bona ena maoro edukeisini abia totona ia hadikaia, bona ia gwau namona be sikuli ese Kunihito ia abia dae lou.

Osaka Kota Badana dekenai kota herevana idia gwauraia be kahirakahira neganai, unai hekwakwanai lalonai idia noho Keristani matamata taudia ibounai idia ura bada kota hepapahuahu lalonai do idia noho ela bona ia doko. Edia mamina be idia ese Japan ena sikuli momo dekenai unai hekwakwanai idia davaria Witness matamata taudia tausen momo totona unai kota hepapahuahu idia karaia. To sikuli amo idia kokidia lasi dainai, reana edia samania hereva be kota ese do ia dadaraia. Bona idia itaia, bema idia ese edia samania hereva kota amo idia kokia, sikuli ese Kunihito ia kokia ena dika do ia hedinarai goevagoeva. Unai dainai, stiuden ibounai ese kota amo edia noinoi idia kokia, to Kunihito sibona ese ia kokia lasi.

December 22, 1994 ai, Osaka Kota Badana ena Hahemaoro Tauna Badana Reisuke Shimada ese kota ena hereva ia gwauraia bona unai ese Kobe Distrik Kota ena hereva ia haidaua. Kota dekenai idia davaria Kunihito ese kendo gadarana ia dadaraia mai momokani ida bona ena tomadiho lalohadaina ia badinaia dainai ia davaria dika be bada herea. Hahemaoro Tauna Badana Shimada ia gwau sikuli ese gaukara idauna ia henia be namo. Unai lalohadai namona dainai taunimanima iboudiai edia maoro idia laloa bada taudia idia moale. To unai sikuli ese Japan ena Kota Badana Momokani dekenai ia noinoi, bona unai kara dainai Kunihito ese edukeisini ia abia diba lasi lagani ma ta mai kahana lalonai.

Kota Badana Momokani Dekenai

Niuspepa Kobe Shimbun be gabeai ia gwau: “Namona be Kobe City School Board bona unai sikuli ese unai neganai [Osaka Kota Badana ese hereva ia henia murinai] Mr. Kobayashi be sikuli dekenai idia abia dae lou. . . . Edia mai anina lasi hepapahuahu karana ese tau ta ena mai anina bada negana idia hadikaia iena matamata neganai.” To, Kobe Tech ia do auka noho. Unai dainai, Japan ena nius ibounai dekenai idia herevalaia. Tisa taudia bona sikuli ena siahu taudia Japan ena kahana ibounai lalonai, be unai idia laloa bada, bona Japan ena kota badana momokani ese do ia henia herevana be gabeai unai bamona hekwakwanai lalonai do idia gaukaralaia hereva badana ta.

January 17, 1995 ai, sikuli ese Kota Badana Momokani dekenai ia noinoi bena pura ta murinai, Kobe ena tano mareremarere ese Ashiya City, Kunihito bona ena ruma bese idia noho gabuna dekenai ia vara. Dabai momokani 5:30 bamona, miniti haida idia do noho bena tano do ia mareremarere, unai neganai Kunihito ese ena ruma ia rakatania ena pat-taim gaukara dekenai ia lao totona. Ena baisikele amo Hanshin Expressway henunai ia noho dalana dekenai ia heau lao, bona tano ia mareremarere neganai, ia be Expressway ia moru kahana kahirakahira dekenai ia ginidae. Maoromaoro ruma dekenai ia giroa bona ia davaria ena ruma ena foloa ginigunana ia moru bona ia makohi momokani. Kunihito ia itaia unai tano mareremarere lalonai haraga ena mauri ia haboioa diba bona Iehova ia tanikiu henia ia roho mauri dainai. Bema ia mase, reana kota dekenai kendo hepapahuahu do idia hadokoa bona Kota Badana Momokani ena hereva idia abia lasi.

Nega momo Japan ena Kota Badana Momokani ese kota pepadia amo noinoi idia lalohadailaia bona lalona idia hadaia bema kota maragina ena hereva be maoro, eiava lasi. Bema kota maragina ena hereva idia hagiroa ena badina badana ia noho lasi, unai hekwakwanai be kota dekenai do idia herevalaia lasi. Unai kota ese idia hepapahuahu taudia idia hadibaia lasi edena negai ena hereva do idia gwauraia. Unai dainai Kunihito ia hoa bada March 8, 1996 ena daba ai, ia idia hadibaia unai dabai kota ena hereva do idia henia. Ia moale bada, Kota Badana Momokani ese Osaka Kota Badana ena lalohadai idia abia isi.

Hahemaoro taudia hani, kota biaguna Shinichi Kawai ese ia biagua neganai, be mai lalo-tamona ida idia gwau “sikuli ena kara be taunimanima edia kara idia biagua taravatu namodia amo idia idau momokani, laloa namonamo karana idia hadikaia, bona unai dainai idia ese taravatu idia utua.” Kota ia itaia Kunihito be mai momokani ida kendo gadarana ia dadaraia bona ia gwau: “Noinoi tauna ese kendo gadara lalonai ia vareai lasi ena badina be mai momokani bona ena abidadama amo ia vara gauna.” Kota Badana Momokani ia gwau sikuli be gaukara ma ta ia henia diba bona ia henia be namo noinoi tauna ena tomadiho lalohadaina idia matauraia totona.

Anina Bada Ia Havaraia

Unai hereva ese dala namona ia lailaia sikuli idauidau dekenai tomadiho taravatua lasi karana idia badinaia totona. The Japan Times ia gwau: “Unai be nega ginigunana Kota Badana Momokani ese edukeisini bona tomadiho taravatua lasi karana dekenai hereva ia gwauraia.” To, unai hereva ese stiuden matamata ta ta edia maduna ia kokia lasi abidadama tohoa hekwakwanai idia davaria neganai sibona edia lalona do idia badinaia.

Tsukuba University ena profesa Masyuki Uchino ia gwau hahemaoro taudia ese Kunihito idia hakwalimua ena badina ta be Kunihito be “mai momokani stiuden tauna bona ena sikuli gaukarana be namo herea momokani.” Baibel ese abidadama tohoa hekwakwanai idia davaria Keristani taudia ia sisiba henidia inai bamona: “To Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.” (1 Petero 2:12) Mai abidadama Keristani matamata taudia ese Baibel ena hakaua herevadia hegeregerena idia noho karana amo idia hahedinaraia Baibel idia badinaia dainai taunimanima ese idia matauraidia be maoro.

Kota Badana Momokani ena hereva murinai, Kunihito Kobayashi be Kobe Tech dekenai idia abia dae lou. Kunihito ida sikuli idia hamatamaia taudia momo be sikuli idia haorea vadaeni. Hari Kunihito ida sikuli dekenai idia lao taudia be lagani ima Kunihito murinai idia vara taudia. Tanobada taudia momo edia matana ai, iena matamata negana ena lagani ima idia ore kava. To, Iehova Dirava ena matana ai Kunihito ena badinaia karana be mai anina bada, bona ia reaia sikuli laganidia be ia reaia kava lasi.

[Footnotes]

[Picture on page 20]

Laurina kahanai: Kunihito ena ruma tano mareremarere murinai

Henunai: Kunihito hari