Gau Momo Lau Dadaraia Gau Hereadaena Abia Totona

JULIUS OWO BELLO ESE INAI SIVARAI IA GWAURAIA

Lagani 32 lalonai lau be Aladura* ta. Lau laloa abidadama bona guriguri ese egu hekwakwanai bona gorere ibounai do idia hanamoa. Muramura be nega ta lau hoia lasi, hisihisi haorea muramurana lau hoia lasi danu. Unai lagani lalodiai, egu bese taudia ta be hospital dekenai ia noho lasi. Egu natudia idia gorere negadiai, dina bona hanuaboi ibounai idia totona lau guriguri ela bona idia namo lou. Lau laloa Dirava ese egu guriguri ia haere henia noho bona lau ia hanamoa noho.

* Yoruba gado herevana ta, ena anina be “ia guriguri tauna.” Africa ena dubu ta ena memba ia gwauraia, lauma amo hanamoa karana ia badinaia tauna.

LAU be Egbe Jolly ena memba ta, ia be hebamo heheni orea badana Akure ai, taoni ta Nigeria ena west kahanai. Emai taoni ena kohu momo bona siahu bada taudia be egu turadia. Deji, Akure ena lohia, be nega momo lau ia vadivadi henia egu ruma ai.

Egu adavana korikoridia be 6 bona ma hahine momo lau adavaia danu. Egu bisinesi ia heau namo herea. Egu mauri be namo herea momokani. To, Iesu ena davana bada nadi ena haheitalai lalonai hoihoi tauna ta bamona, davana bada gauna lau davaria dainai, egu adavana ima, lau adavaia ma hahine iboudiai, dubu, hebamo oreana, bona ladana badana lau dadaraia unai gauna abia totona.​—Mataio 13:​45, 46.

Aladura ta ai Lau Lao Dalana

Aladura taudia edia sivarai be nega ginigunana lagani 1936 ai lau kamonai, egu mauri lagani be 13 neganai. Egu turana ta ladana Gabriel ese lau ia hamaoroa, ia gwau: “Bema Christ Apostolic Church oi vadivadi henia, Dirava ia hereva do oi kamonai.”

Lau nanadaia: “Edena bamona Dirava ia hereva?”

Ia gwau: “Mani oi mai, bona do oi itaia.”

Lau ura bada Dirava lau kamonai henia. Unai dainai unai hanuaboi ai, Gabriel ida ai lao dubu dekenai. Ruma maragina be tomadiho taudia amo ia honu. Kongregesen taudia idia hereva matamaia, inai bamona idia hereva loulou: “Umui taunimanima, umui mai! Iesu be iniseniai!”

Unai idia gwauraia loulou lalonai, ta ia boiboi: “Lauma helaga, oi diho mai!” Ma ta ese gaba ia botaia, bona regerege be lasi momokani. Unai murinai, hahine ta be gado idauna ta bona dala idauna ai ia hereva matamaia. Haraga ia boiboi: “Umui taunimanima e, Dirava ena hereva umui kamonai! Dirava be inai bamona ia gwau: ‘Labana taudia dainai do umui guriguri, idia ese taunimanima idia hamasea lasi totona!’ ” Idia noho taudia be mamina goadana idia abia.

Lau laloa Dirava be unai hahine amo ia hereva, unai dainai lagani ta murinai Christ Apostolic Church ena memba ta ai lau idia bapatisoa.

Iehova Ena Witness Taudia Lau Davaria

Lagani 1951 ai, Witness tauna ta ladana Adedeji Boboye amo Gima Kohorona magasin ena kopi ta lau abia. Unai magasin lau ura henia dainai, sabskripsen lau abia bona hanaihanai magasin lau duahia. Lagani 1952 ai, dina hani lalonai Iehova ena Witness taudia edia distrik hebouhebou dekenai lau lao, Ado Ekiti dekenai.

Hebouhebou dekenai lau itaia gaudia lau laloa bada. Iehova ena Witness tauna ai lao karana lau lalohadailaia namonamo to unai lalohadai lau rakatania. Egu hekwakwanai be unai neganai egu adavana korikori be toi bona ma hahine ta lau adavaia vadaeni. Lau laloa lau hegeregere lasi adavana tamona sibona ida lau noho.

Akure dekenai lau giroa lou neganai, Adedeji lau hamaoroa lau do ia vadivadi henia lasi, bona egu Gima Kohorona ena sabskripsen lau hamatamataia lou lasi. Egu dubu lau goadalaia matamaia. Lau laloa, vadaeni, Christ Apostolic Church dekenai lau vareai murinai, Dirava ese lau ia hanamoa. Adavana toi lau adavaia bona natudia momo lau havaraia. Sibona egu ruma lau haginia. Hospital dekenai nega ta lau noho lasi. Toana be Dirava ese egu guriguri ia haerelaidia dainai, egu tomadiho lau haidaua ena badina be dahaka?

Ladana Badana Lau Abia Bona Abidadama Ia Boio

Moni bada be dubu dekenai lau henia matamaia. Nega daudau lasi murinai lau be dubu ena elda ta ai idia halaoa, bona unai dagi dainai dubu ena dagi taudia edia gaukara lau itaia diba. Lau itaia gaudia dainai lau lalohisihisi. Pasto tauna bona “peroveta taudia” ese moni idia ura henia bada; edia mataganigani ese egu mamina ia hadikaia.

Hegeregere, March 1967 lalonai, egu adavana idauidau ese egu natudia toi idia havaraia. Natuna ena ladana hatoa ariana be dubu ena kastom ta. Unai dainai lau ese harihari gaudia​—gwarume, siporo ranuna amo idia karaia inua gauna, bona kavabu loliwota​—lau abia lao pasto dekenai, unai aria hegaegaelaia totona.

Dubu ena guriguri dinana ai, pasto be helai taudia ibounai vairanai ia gwau: “Inai dubu ena kohu bada taudia edia kara dainai lau hoa. Idia ura ladana hatoa ariana idia karaia, bona loliwota bona gwarume sibona idia mailaia. Vamu be lasi! Nanigosi be lasi! Umui laloa! Kaino ese Dirava dekenai maho badadia ia bouboulaia, to Dirava ese unai boubou ia abia dae lasi badina ia lalonai rara ia noho lasi. Dirava ese mai rara gaudia ia ura henia. Abela ese animal ia mailaia, bona Dirava ese ena boubou ia abia dae.”

Unai neganai, mai badu ida lau gini toreisi bona dubu amo lau raka lasi. To, dubu dekenai lau lao lou. Nega bada lau haorea egu hebamo orea taudia ida bona ena hebou lau lao henia totona. Nega haida Kingdom Hall dekenai lau lao hebou totona, bona Gima Kohorona ena sabskripsen lau karaia lou. To, lau do hegeregere lasi Iehova ena Witness tauna ta ai lau lao.

Lalona Lau Hadaia Iehova Do Lau Hesiai Henia

Lagani 1968 ai egu mauri ia idau ia lao. Dina ta ai Gima Kohorona ena hereva ta lau duahia matamaia, ia ese Malawi dekenai Iehova ena Witness taudia idia dagedage henia bada karana ia herevalaia. Ia ese mauri lagani 15 kekenina ena sivarai ia herevalaia, au dekenai ia idia kwatua bona nega 6 idia hadikaia, iena abidadama ia rakatania lasi dainai. Lau lalohisihisi bada dainai, unai magasin lau rakatania, to ia vara gauna lau laloa noho. Lau lalo-parara egu dubu dekenai kekeni ta ena abidadama be unai bamona lasi. Nega sisina murinai unai hanuaboi ai, unai magasin lau abia bona unai rau lau duahia lou.

Mai momokani ida Baibel lau stadilaia matamaia. Egu diba ia bada ia lao neganai, lau itaia dubu ese ai ia hakaua kerere momokani. Guna hegeregerena, emai pris taudia ese “kara dika bada herea idia karaia noho.” (Hosea 6:⁠9) Unai bamona taudia be peroveta koikoi taudia, Iesu ese idia dainai sisiba ia henia taudia unai! (Mataio 24:24) Edia matahanai bona siahu karadia lau do abidadama henia lasi. Lalona lau hadaia tomadiho koikoi do lau rakatania bona ma haida do lau durua unai do idia karaia totona.

Idia Hekwarahi Dubu Dekenai Do Lau Noho Totona

Dubu ena elda taudia ese dubu lau rakatania gwauraia idia itaia neganai, tatau haida idia siaia lau idia hereva henia totona. Idia ura lasi moni bada henia tauna idia haboioa. Idia gwau lau be Baba Egbe, Akure ena Christ Apostolic Church ta ena naria tauna ai lau do idia halaoa.

Unai lau abia dae lasi bona ena badina lau gwauraia danu. Lau gwau: “Dubu be ai dekenai ia koikoi noho. Idia gwau taunimanima namodia ibounai be guba dekenai do idia lao. To lau be Baibel lau duahia, bona lau diba momokani 144,000 taudia sibona be guba dekenai do idia lao. Kara maoromaoro taudia ma haida be paradaiso tanobadana dekenai do idia noho.”​—Mataio 5:⁠5; Apokalupo 14:​1, 3.

Dubu ena pasto ese egu adavadia ia veria lau do idia dagedage henia totona. Ia hamaorodia namona be idia ese Iehova ena Witness taudia idia koua emai ruma dekenai do idia vareai lasi. Egu adavana ta be poisini ia atoa egu aniani dekenai. Idia rua ese lau idia hagaria, idia gwau dubu dekenai matahanai idia abia. Unai matahanai ia hahedinaraia bema dubu lau rakatania do lau mase. Ena be unai bamona idia karaia, to egu adavadia lau haroro henia noho, hebou dekenai idia lau boiria noho. Lau gwau: “Unuseniai umui be adavana haida do umui davaria.” To, idia ta be ia ura lasi, bona egu lalona idia hamanokaia toho.

Gabeai, February 2, 1970 ai, kahirakahira ia noho taoni amo lau giroa neganai, lau davaria ruma dekenai ta ia noho lasi. Egu adavadia ibounai bona natudia idia heau boio.

Adavana Tamona ida Lau Noho

Lau laloa, ‘Hari egu headava lau hamaoromaoroa diba.’ Egu adavana ginigunana, Janet, lau boiria do ia giroa ruma dekenai. Ia gwau do ia mai diba. To, iena ruma bese ese unai lalohadai idia ura henia lasi. Egu adavadia ma haida be idia kamonai Janet lau boiria neganai, idia be ena tamana ena ruma dekenai idia lao bona ia idia botaia gwauraia. Ena ruma bese taudia ese lau idia boiria hebou ta ai karaia totona.

Unai hebou lalonai taunimanima 80 bamona idia noho. Janet ena tamana maragina, bese ena kwarana unai, ia gwau: “Bema emai kekeni oi ura adavaia lou, unai hahine ma haida do oi abia lou danu be namo. To bema oi ura oiemu tomadiho matamatana do oi badinaia bona adavana tamona ida do oi noho, namona be adavana idauna do oi tahua. Bema Janet oi abia lou, oiemu adavana ma haida ese ia do idia hamasea, bona ai ura lasi emai kekeni be do ia mase.”

Herevahereva momo murinai, ruma bese taudia idia abia dae momokani lau ura adavana tamona sibona do lau abia. Dokonai edia lalohadai idia haidaua. Tamana maragina ia gwau: “Oiemu adavana be oi amo do ai kokia lasi. Oi abia lao be hegeregere.”

May 21, 1970 ai, Janet bona lau be dala maorona dekenai ai headava. Dina 9 murinai Iehova ena Witness tauna ta ai lau lao bapatiso lau abia. Unai lagani tamona, December ai, Janet ia bapatiso danu.

Iehova Ena Hahenamo Lau Moalelaia

Emai dubu gunana taudia idia peroveta Witness taudia ai ai lao neganai, do ai mase. Unai be kahirakahira lagani 30 gunanai. Bema hari lau mase, unai be Iehova ena Witness ta ai lau lao dainai, a? Bema egu adavana hari ia mase, ta ia gwau diba ena badina be Iehova ena Witness ta ai ia lao dainai, a?

Lau hekwarahi egu natudia 17 dekenai hereva momokani ena dala lau hahedinaraia totona. Ena be Witness tauna ai lau lao neganai, idia momo idia bada vadaeni, to idia lau hagoadaia Baibel idia stadilaia totona bona hebou bona hebouhebou dekenai lau abidia lao. Lau moale badina idia ima be lau ida Iehova ai hesiai henia hebou. Idia ta be lau ida elda gaukarana ia karaia kongregesen lalonai. Ma ta be hesiai tauna kahirakahira ia noho kongregesen ta dekenai. Egu natudia rua be regula painia gaukarana idia karaia.

Idia vara gaudia lau laloa neganai, Iehova ena hebogahisi lalokauna dainai lau hoa badina ia ese lau ia durua ena hesiai tauna ai lau lao totona. Iesu ena hereva idia momokani, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba”!—Ioane 6:44.