Dirava Ena Maino Gwauraia Taudia Idia Hebou

KERISTANI elda tauna ta, United States amo ia gwau: “Ai lao henidia Distrik hebouhebou iboudiai ese ai idia hagoadaia. To, inai lagani be idau herea. Hebou ena dina ta ta murinai kerukeru ena program ese dahaka do ia hahedinaraia ai lalohadailaia, bona ai kamonai gaudia ai moalelaia!”

Bema oi be “Dirava Ena Maino Gwauraia Taudia” Distrik Hebouhebou ta dekenai oi lao, reana oi ese unai hebou ia lao tauna ena hereva oi abia dae. Hebouhebou ena dina ta ta ese Iehova ena Witness taudia edia maduna Dirava ena sivarai gwauraia gaukarana ena kahana idauidau ia herevalaia. Unai dina toi edia program mani ita riviulaia.

‘Maino Ena Sivarai Idia Gwauraia Taudia . . . be mai Hairai’

Unai be hebouhebou ena dina ginigunana ena sinado. Isaia 52:7 amo idia abia. Inai nega dikadia lalonai, momo be mai edia hekwarahi bada ida Iehova ena hesiai gaukara idia karaia noho. Hereva ladana “Mai Goada ida Maino Idia Harorolaia Taudia Ita Kamonai” lalonai unai abidadama haroro taudia haida idia henanadai henidia. Edia hereva ese kamonai taudia ia hagoadaia, bona hebou lao taudia idia diba Iehova ese idia ia hagoadaia diba danu, “siahu badana” do ia henidia idia haheauka totona.​—⁠2 Korinto 4:⁠7.

Iehova ena taravatu be idia metau lasi. (1 Ioane 5:⁠3) Daba program ena dokona herevana ese unai ia hahedinaraia, bona rau 32 buklet ladana Dirava Ia Ura Dahaka Ita Karaia? idia halasia. Inai laulau namodia momo stadi buklet matamatana ese taunimanima momo do ia durudia bada Dirava ena ura idia dibaia totona. Inai buklet matamata gaukaralaia dalana be inai magasin ena stadi herevana ginigabena lalonai do oi davaria, bona rau 16 bona 17 dekenai danu.

Hereva ladana “Gaukara Namona Dekenai Ita Haheauka Noho” ese ia hahedinaraia Iehova be iseda hekwakwanai ia diba goevagoeva. Haheauka ena anina be do ita gini goada noho bona iseda helaro ita haboioa lasi. Iehova ese ena Hereva, ena lauma, bona ena orea ia henia ita idia durua totona. Haheauka be gau badana ita haroro totona, to haroro gaukara ese ita ia durua ita haheauka totona, badina iseda abidadama ia hagoadaia. Ita be inai nega ena dokona dekenai ita noho dainai, namo lasi iseda hekwakwanai ese iseda goada ia hamanokaia, badina idia haheauka ela bona dokona taudia sibodia do idia mauri.​—⁠Mataio 24:⁠13.

Hebouhebou ena hereva badana ladana “Ita be Dirava Ena Maino Gwauraia Taudia” ese Iuda igui hesiai taudia be Babulonia amo idia ruhadia bona lagani 537 B.C.E. ai Ierusalema dekenai tomadiho momokani idia haginia lou ia herevalaia. Hereva henia tauna ia gwau, unai kara be Dirava ena Basileia ese tanobada hegegemadai lalonai do ia karaia karana ia laulaulaia sibona. (Salamo 72:⁠7; Isaia 9:7) Iseda gaukara hari inai negai be unai Basileia ena sivarai namona do ita harorolaia bona unai sivarai hegeregerena do ita noho. Dirava bona iseda dekena taudia ita lalokau henidia ese ita do ia doria hesiku lasi ida unai gaukara do ita karaia noho.​—⁠Kara 5:⁠42.

Mai anina bada herevana Friday ena program dekenai be hereva rua inai sinado tamona henunai, “Moale Karadia Lalonai Idia Hunia Tarapu Dainai, Oi Naria Namonamo.” Inai nega ena miusik, muvini piksa, vidio, televisen, vidio gadara, buka, magasin, bona komik ese demoni edia lalohadai idia hahedinaraia. Unai dainai, ita ese ‘dika do ita negea momokani, to namo do ita dogoatao momokani.’ (Roma 12:⁠9) Oibe, namona be moale karadia dikadia do ita inai henia vaitani bona ita dadaraia, to kara maoromaoro, kara goeva, bona kara namodia do ita badinaia. (Filipi 4:⁠8) Iehova ena orea ese ia karaia buka bona stadi kohudia ese ita idia durua hahegoada lalohadai ita lalodia bona ita idia hadibaia dahaka be maoro bona dahaka be kerere ita diba totona. (Heberu 5:14) Unai gaudia ita dogoatao auka be namo, hegeregere hurehure bada davarana dekenai vanagi ita dogoatao auka bamona.

Unai murinai be hereva ladana “Diabolo Umui Dadaraia, Dirava Sibona Umui Ura Henia.” Kahirakahira Gwauhamata Tanona dekenai do idia vareai neganai, Israela taudia tausen momo be matabodaga karana dainai idia moru. Pineha be dirava idauna ta tomadiho henia karana ia dadaraia vaitani, tomadiho momokani sibona ia badinaia. Ia ese hamaoromaoroa karana ia karaia unai kara kerere taudia dekenai bona Iehova sibona ia badinaia noho karana ese Iehova ia hamoalea. (Numera 25:​1-13) Satani ia ura ita ta ta be do ita hegeregere lasi Dirava ena tanobada matamatana lalonai do ita vareai totona. Pineha bamona, namona be Diabolo ia ura ita ia hamiroa toho karadia do ita dadaraia. Herevana ita headava eiava lasi, ‘heudahanai karadia do ita rakatania.’​—⁠1 Korinto 6:⁠18.

“Dirava Ena Hereva Ena Maoro Ita Abia Isi mai Eda Kamonai Ida” be hebouhebou ena dina ginigunana ena hereva dokona. Baibel idia hahanaia taudia momo ese iena hereva haida idia haidaua eiava idia kokia. Hegeregere, hahine edia ura kwalimu karadia idia durua taudia habadua lasi totona, hahanaia taudia ese The New Testament and Psalms: An Inclusive Version lalonai Dirava idia gwauraia lasi Tamana, to idia gwau Tamana-Sinana bona Iesu be “Taunimanima ena Natuna” lasi to “Taunimanima ta” idia gwauraia. To, New World Translation be idau, ia be Baibel ginigunana ena gado korikorina ia badinaia auka bona ia ese iseda lalohadai haida ia hamaoromaoroa. Haheitalai ta be hegeregere, hereva henia tauna ia gwau: “New World Translation idia torea maoromaoro dainai, iseda orea ese kongregesen naria dalana ia haidaua bona elda oreadia idia abia hidi, aposetolo edia nega lalonai Keristani kongregesen ese idia gaukaralaia dalana ita badinaia totona.” Iseda abidadama Dirava ena Hereva dekenai ita hahedinaraia dalana be dina ta ta ai ita duahia bona iena sisiba ita gaukaralaia. Hereva henia tauna ma ia gwau: “Dirava ena Hereva ita harorolaia goadagoada, bona ma haida ita hadibaia noho neganai bema ita gaukaralaia namonamo, bona bema ita mogea lasi o ita haidaua lasi sibona eda lalohadai hamomokania totona, unai amo ita hahedinaraia unai hereva ita abia isi mai eda kamonai ida.”

“Dirava Ena Maino ese Taunimanima Edia Diba Ia Hanaia Momokani”

Unai sinado, Filipi 4:7 amo, ese hebouhebou ena dina iharuana ena program ena badina ia atoa. Idia henia herevadia momo be haroro gaukara, ruma bese, gwauhamata, bona dina ta ta ena mauri lalonai idia karaia gaudia lalohadailaia namonamo karana idia herevalaia.

Dina ena siri idia kikilaia murinai, hereva toi idia henia, sinado tamona ladana “Maino Ena Sivarai Namona Mailaia Taudia” henunai. Iseda sivarai be maino sivaraina, bona maino dalanai ita harorolaia be namo. (Efeso 6:15) Iseda ura be taunimanima edia kudouna do ita veria, hepapahuahu dekenai do ita kwalimu lasi. Iehova ena orea amo ita abia treinini bona buka ese ita idia durua unai ita karaia totona. Namo lasi idia kamonai to gau ta idia karaia lasi taudia eiava idia ura lasi kamonai taudia ese ita idia hamanokaia. To, namona be ‘do ita gaukara goada’ nega ibounai siboda eda stadi ita karaia, hebou ita lao, bona haroro gaukara lalonai ita vareai. (2 Timoteo 2:15) Do ita laloaboio lasi gauna be ma haida dekenai do ita kara namo, hereva momokani lalonai idia noho tadikaka dekenai unai do ita karaia badabada. (Galatia 6:10) Momokani, gaukara goada ena anina be inai lasi, do ita gaukara ela bona iseda goada ia ore. Lasi. Ta ta be iena diba bona noho dalana hegeregerena ai ia gaukara be hegeregere Iehova dekenai.

Dirava ena taunimanima ese edia nega, goada, bona kohu idia gaukaralaia Basileia ena gaukara durua totona. Hereva ladana “Gau Ita Henia mai Eda Moale ida, Iehova Ena Orea Lalonai” ese ia hahedinaraia mamoe taudia momo ese Basileia ena sivarai idia abia dae neganai, ena anina be kohu ma haida ita abia, hebou gabudia ma haida, bona brens opesi ma haida do ita haginia. Iseda kontribusen moni ese orea ia durua tanobada hegegemadai haroro gaukara durua kohu idia abidia hegaegae totona. Mai lalona ibounai ida henia karana ese Iehova ia hanamoa bona henia tauna dekenai moale ia havaraia. Unai dainai, ita Keristani taudia ese iseda tomadiho ena kara badana do ita laloaboio lasi.​—⁠2 Korinto 8:​1-7.

Daba kahana ena koua herevana be bapatiso herevana​—⁠Iehova ena Witness taudia edia hebou badadia dekenai ia be mai anina bada gauna ta. Idia gwauhamata matamata taudia be Iesu ena aena gabuna idia badinaia bona ranu amo idia bapatiso be moale gauna! (Mataio 3:​13-17) Unai bamona idia karaia taudia ibounai be aonega bada ena badina​—⁠Baibel​—⁠amo diba idia abia vadaeni. Danu, idia davaria edia mauri be mai ena anina, bona idia diba idia karaia karana be maoro dainai maino ena hahenamo idia abia.​—⁠Hadibaia Tauna 12:⁠13.

Hereva ladana “Lalo-Parara ese Oi Do Ia Gimaia” ese mai anina bada sisiba ia henia. Lalo-parara be mai anina bada bisinesi karadia lalonai. Namo lasi Kingdom Hall lalonai bisinesi karadia ita karaia, bona namo lasi iseda Keristani tadikaka ita gaukaralaidia siboda eda moni habadaia totona. (Ioane 2:​15, 16 itaia.) Lalo-parara be mai anina bada danu bema bisinesi ta dekenai emu moni oi atoa eiava ta amo moni oi abitorehai eiava ta dekenai moni oi heniatorehai neganai. Hereva henia tauna ia gwau: “Keristani taudia bogaraginai bisinesi idia moru negadiai, idia haida idia lalohisihisi, bona moni abia palani dikadia lalonai idia vareai haraga taudia haida be lauma dalana ai idia manoka idia lao.” Ena be Keristani ta ta huanai bisinesi idia karaia be kerere lasi, to do idia naria namonamo be aonega karana. Orea rua huanai bisinesi gwauhamata idia karaia neganai, hanaihanai namona be idia herevalaia gaudia ibounai idia torea pepa dekenai.

Dirava ena ura tatau bona hahine totona be hereva ladana “Tau Bona Hahine Ia Karaia” lalonai idia herevalaia. Tatau bona hahine edia kara be lagani momo lalodia ema bona hari idia hagagevaia. Hereva henia tauna ia gwau: “Momo idia laloa tatau edia kara korikori ena toana be inai: Hahine idia biagudia auka, idia hebogahisi lasi, eiava idia kara mai edia hekokoroku ida. Unai hegeregerena, bese haida lalodiai tatau be taunimanima vairadiai o hehuni gabudia dekenai idia taitai lasi, badina idia laloa unai be hemarai karana. To Ioane 11:35 ia gwau Iesu be taunimanima bogaragidiai, Lasaro ena gara gabuna murimurinai ia gini neganai, ‘ia tai.’ ” Hahine be edena bamona? Nega momo hahine ena kara toana be tauanina ena hairai ida idia hahegeregerea. To hereva henia tauna ia henanadai: “Bema hahine ta be mai ena hairai to ia be mai ena aonega lasi bona ia heai momo, o iena hereva idia idita, o ia hekokorohu, vadaeni ita laloa diba ia be mai ena hairai momokani o hahine ena kara korikori ia hahedinaraia, a?” (Aonega Herevadia 11:22; 31:26 itaia.) Edia hereva dalana, edia kara, bona edia hahegoeva dalana amo, Keristani tatau bona hahine idia goada karaia Baibel ena taravatu idia badinaia. Hereva henia tauna ia gwau: “Lauma ena huahua ia hahedinaraia tauna matauraia be haraga, bona unai bamona hahinena lalokau henia be haraga.”​—⁠Galatia 5:​22, 23.

Unai murinai be hereva rua inai sinado henunai, “Maino Diravana ese Oi Ia Naria.” Keristani taudia momo be moni ena hekwakwanai idia davaria. To, Iehova ia gwauhamata, ia gwau: “Lau ese umui do lau negea lasi, bona umui do lau rakatania lasi. Lasi bona lasi momokani.” (Heberu 13:⁠5) Ena be haida be moni dekenai idia hekwarahi bada, to idia hahedinaraia unai gwauhamata idia abidadama henia bona heduru painia eiava regula painia gaukara lalonai idia vareai. Ma haida, hari idia painia diba lasi taudia, be Basileia idia atoa guna, nega namodia ibounai idia gaukaralaia haroro gaukara totona. (Mataio 6:33) Unai bamona kara ibounai ita hanamoa be namo! Iehova ena orea be buka momo ia karaia iseda haroro gaukara durua totona bona ita idia durua iseda hekwakwanai ita hanaia totona. Bema Iehova ese ia henia lauma gaudia ita abia dae, moni ena hekwakwanai idia bada negana lalonai, maino do ia henia ita dekenai.​—⁠Salamo 29:⁠11.

Dina ena dokona ai, hereva gabena ladana “Ruma Bese Lalonai Dirava Ena Maino Umui Tahua” ia orea gwauraia neganai, hebou lao taudia be mai moale ida buka matamata, ladana The Secret of Family Happiness, idia abia. Hereva henia tauna ia gwau: “Inai buka do oi stadilaia namonamo bona emu ruma bese ida danu do umui stadilaia namonamo. Ena sisiba Baibel amo do umui badinaia toho mai emui momokani ida, bena emui ruma bese ena maino bona ena moale be momokani do umui habadaia.”

“Maino be Varo Bamona Umui Ia Guia Hebou, Orea Tamona”

Efeso 4:3 amo idia abia herevana be hebouhebou ena dina gabena ena sinado namona. Iehova ena Witness taudia, tanobada ena bese iboudiai amo idia mai be Dirava ese ia hadibadia. Unai dainai, maino idia ura henia. Iesu ena haheitalai idia badinaia bona idia hekwarahi ‘maino be varo bamona do ia guidia hebou, orea tamona’ bamona.

Dirava ena orea lalonai ia noho mainona be hereva toi lalonai idia herevalaia, edia sinado be “Gwaukau Taudia Maorodia Dibaia Dalana.” Idaunega Israela besena lalonai peroveta taudia koikoidia idia noho. To, Dirava ena gwaukau taudia korikoridia​—⁠peroveta taudia hegeregere Isaia, Esekiela, bona Ieremia​—⁠ese Ierusalema ena moru, Dirava ena taunimanima edia igui hesiai negana, bona edia roho mauri negana idia perovetalaia maoromaoro. Unai bamona kara be inai negai danu ia vara noho. Politikol oreadia bona tomadiho koikoi lalonai peroveta taudia koikoidia momo idia noho. To, Iehova ese iena Witness taudia ia abidia hidi iena ura inai nega dikana dekenai do ia karaia gauna idia harorolaia totona. Lagani 1919 amo, Iehova ese ena hesiai taudia ia gaukaralaidia ena sivarai harorolaia totona. Kerisendom ena peroveta taudia koikoidia amo idia be idau vaitani! Namona be ita ta ta ese inai gaukara do ita karaia noho ela bona Iehova do ia gwau gaukara ia ore vadaeni.

Hereva ladana “Dirava Ena Hereva Oi Kamonaia Bona Oi Badinaia” ese ia hahedinaraia badabada Baibel amo hakaua herevadia, hahegoada, bona helaro ita abia. (Isaia 30:​20, 21; Roma 15:⁠4) Hari inai nega ena tanobada taudia be taravatu ta idia badinaia lasi. Unai dainai, inai nega lalonai Dirava ena Hereva bona iena orea amo idia mai sisiba do ita kamonai henia be mai anina bada. Iehova be iseda manoka gaudia ia diba, bona iena Hereva lalonai namo do ita davaria dalana ia abia hidi vadaeni. Ita diba Iehova ese ita ia durua dainai goada ita abia ia ura do ita karaia gaudia ibounai do ita karaia totona.

Unai hereva ese helai taudia edia lalona ia hegaegaelaia drama totona. Ena ladana be “Badina be Dahaka Tiokratik Daladia Ita Badinaia be Namo?” Gideona ena sivarai Baibel amo idia gaukaralaia mai anina bada herevana hahedinaraia totona​—⁠namona be Dirava ena sisiba ita badinaia bona namo lasi siboda eda lalohadai ita badinaia eiava tiokratik sisiba ita dadaraia.

Pablik tok ena sinado be “Maino Momokanina Do Ia Vara!​—⁠Daika Ena Amo?” Dirava ese ia gwauhamatalaia mainona be inai tanobada ese ia havaraia diba lasi gauna. Hereva henia tauna ia gwau: “Maino momokanina ena anina be taunimanima be dina iboudiai do idia maino. . . . Dirava ena maino dainai, tanobada ibounai dekenai gorere, hisihisi, lalohisihisi, bona mase be lasi.” Baibel ese ita ia hamaoroa Iehova ese tuari “ia hadokoa noho, tanobada kahana ibounai dekenai.” (Salamo 46:⁠9) Edena bamona unai do ia karaia? Ia karaia dalana be Satani Diabolo, tuari ia havaraia tauna, do ia kokia. (Apokalupo 20:​1-3) Unai ese dala do ia kehoa manau taudia ese “tano do idia abia, do idia helai namonamo, mai moale bona mai maino danu.”​—⁠Salamo 37:⁠11.

Unai pura ena Gima Kohorona stadi idia karaia murinai, hebouhebou ena hereva gabena idia henia. Inai hereva goadana ladana “Ita Dirava Ena Maino Gwauraia Taudia Ita Raka Vaira” ese ia hahedinaraia iseda haroro gaukara be mai anina bada bona ita karaia haraga be namo. Hari be laga-ani, loa kava, eiava lalohadai kereredia lou henia negana lasi. Ita gaukaralaia gaudia ita abia vadaeni​—⁠Dirava ena sivarai, iena lauma helaga, bona iena lalokau tiokratik oreana ese ia karaia bukadia idauidau. Ita be Iehova ena hesiai taudia dainai, namona be Dirava ena maino sivaraina gwauraia gaukarana lalonai ita gaukara goada noho!

[Box/Pictures on page 9]

Ruma Bese Durua Gauna Namona Ta

“Dirava Ena Maino Gwauraia Taudia” Distrik Hebouhebouna ena dina iharuana dekenai idia lao taudia be mai moale ida buka matamatana The Secret of Family Happiness idia abia. Unai buka lalonai Baibel ena sisiba namodia idia noho, Dirava idia lalokau henia ruma bese taudia ia durudia totona.

Elda tauna ta Connecticut, U.S.A., amo ia gwau: “June 15 ai, emai Family Happiness bukana ai abia. June 16 ai, lau ese buka ena kahana lau duahia ore vadaeni. June 17 ai, unai buka dekenai emai ruma bese stadi ginigunana ai karaia, bona ai ia hagoadaia bada! Unai dina ai, buka lau duahia ore. Unai buka namona idia gaukaralaia taudia dekenai ia be dava bada gauna ai do ia lao. Unai buka ena hereva be momokani dalana ai idia torea bona inai nega ai ita gaukaralaia diba gaudia ia herevalaia amo ia hamomokania lou ‘hesiai tauna mai ena kamonai bona mai ena kara maoromaoro’ be ‘nega korikori ai anianai’ ia henia bona inai nega lalonai ita davaria hekwakwanai gaudia ia lalo-pararalaia goevagoeva.”—Mataio 24:45-47.

[Picture on page 7]

Matamata bona buruka taudia idia ura diba Dirava ena ura be dahaka ita dekenai