Bioethics Bona Rara Lasi Opereisini

VANEGAI laganidia lalonai, medikol dalanai diba ia bada ia lao, guna bamona lasi. To, medikol hekwakwanai idia durua neganai, heduru gaudia haida ese hekwakwanai idia havaraia kara maoromaoro kahana ai.

Doketa ese inai bamona hekwakwanai idia lalohadailaia: Nega haida medikol heduru goadana idia rakatania be namo, gorere tauna be mai ena hemataurai ida do ia mase diba totona, a? Doketa ese gorere tauna ena ura ia dadaraia be namo, bema ia laloa heduru ta be gorere tauna ia hanamoa diba, a? Medikol heduru be edena bamona idia haria diba, bema davana bada heduru be hegeregere lasi taunimanima ibounai totona?

Unai bamona henanadai aukadia dainai hadibaia karana ta ladana bioethics eiava mauri ena kara maoromaorodia idia hamatamaia. Unai ese doketa bona saiens taudia edia mauri gaudia stadilaia karana bona medikol heduru matamatadia gaukaralaia lalonai, kara maoromaoro kahana dekenai idia vara hekwakwanai hanamoa daladia ia hahedinaraia. Henanadai aukadia momo be hospital dekenai idia vara dainai, hospital momo ese bioethics komiti idia haginia. Nega momo unai komiti taudia​—doketa bona loea taudia danu​—be bioethics heboudia dekenai idia lao, unuseniai medikol dalanai idia vara hekwakwanai kara maoromaoro ena kahana dekenai idia herevalaia.

Unai hebou dekenai nega momo inai henanadai idia vara: Doketa taudia ese Iehova ena Witness taudia, tomadiho dainai rara henia hanai karana idia dadaraia taudia, edia lalohadai be edena bamona idia matauraia be namo? Ena be gorere tauna ia ura lasi to doketa ese rara ia henia hanai be namo, bema unai be “kara maorona” medikol dalanai, a? Inai lalohadai ‘gorere tauna ia diba lasi gauna ese do ia hahisia lasi’ hegeregerena, rara be gorere tauna dekenai idia henia to ia idia hadibaia lasi bona idia hunia be kara maorona, a?

Unai hekwakwanai be dala maorona ai do idia haerelaia totona, namona be doketa ese Witness taudia edia lalohadai do idia lalo-pararalaia. Iehova ena Witness taudia idia ura edia lalohadai idia hadibaia doketa taudia dekenai, idia diba lalo-parara heheni karana ese hepapahuahu do ia koua diba.

Hadibaia Heheni

Spain ena profesa Diego Gracia, bioethics ia diba momo tauna badana, ia ura ena klas taudia be unai bamona diba do idia abia. Ia gwau: “Ia maoro umui [Iehova ena Witness taudia] ese emui lalohadai umui hadibaia diba . . . rara henia hanai karana lalonai umui abia hekwakwanai dainai.”

Unai hegeregerena, June 5, 1996 ai, Iehova ena Witness taudia toi idia boiridia Complutense University, Madrid, Spain ai, edia lalohadai idia hahedinaraia totona. Doketa taudia 40 bona ma diba taudia haida idia noho.

Witness taudia ese hereva kwadogina idia henia murinai, helai taudia be henanadai idia henia diba. Idia noho taudia ibounai idia abia dae gorere tauna badana be mai ena gwaumaoro medikol heduru ta do ia dadaraia. Klas taudia idia abia dae danu, gorere tauna idia hadibaia goevagoeva guna bena ena gwaumaoro idia abia murinai sibona, rara do idia henia hanai diba. To Witness taudia edia lalohadai dainai idia vara gaudia haida idia daradaralaia.

Henanadai ta be moni dekenai. Nega haida rara lasi opereisini dekenai gaukara gaudia idaudia idia gaukaralaia, hegeregere laser surgery bona davana bada muramurana, hegeregere erythropoietin, rara sel kakakakadia havaraia karana ia haharagaia muramurana, idia gaukaralaia. Doketa ta ia laloa reana Witness taudia ese davana maragi gauna (homologous blood) idia dadaraia dainai, idia ura pablik-helt heduruna be ma haida idia abia lasi dalanai idia abia.

Witness ta ia lalo-parara doketa taudia ese medikol heduruna ena davana idia lalo-hekwarahilaia be maoro, bona ia ese pepa ta amo homologous rara henia hanai karana ena davana hehunina ia hahedinaraia. Unai pepa ese rara henia hanai karana amo ia vara gorere hanamoa davana, bona unai gorere dainai idia gaukara diba lasi neganai idia halusia monina ia hahedinaraia. Ia ese United States dekenai idia stadilaia gauna ia herevalaia, unai stadi ia hahedinaraia rara mili-lita 500 ena davana be K300, to unai rara idia gaukaralaia neganai ena davana be K1,700 ia hanaia​—iena davana ginigunana be nega ima amo ia hanaia. Ia hahedinaraia unai bamona dainai, kahana ibounai idia laloa namonamo neganai, rara lasi opereisini ese moni bada ia halusia lasi. Danu, rara lasi opereisini ena davana ena kahana badana be idia gaukaralaia kohu totona bona idia gaukaralaia loulou diba.

Doketa taudia momo be orea taudia ese ma ta ena lalona ania karana idia henanadailaia. Idia laloa, dahaka do ia vara, bema Witness ta be ia manoka bona rara ia abia hanai? Witness taudia ese edia huanai amo do idia lulua, a?

Hekwakwanai hegeregerena do idia kara henia, badina Dirava ena taravatu utua karana be kerere badana, kongregesen elda taudia ese do idia tahua karana ta. Witness taudia idia ura ena mauri ia haboioa diba opereisini badana bona rara ia abia tauna ta idia durua. Ita diba unai bamona Witness tauna ta do ia lalohisihisi bada bona ena turana karana Dirava ida do ia laloa momo. Unai bamona tauna be heduru bona hebogahisi idia henia be namo. Lalokau be Keristani karana ena badina badana dainai, elda taudia idia ura, hahemaoro karadia ibounai idia karaia hegeregerena, dala ia noho neganai hebogahisi do idia hahedinaraia.​—Mataio 9:​12, 13; Ioane 7:​24.

United States amo ia mai vadivadi tauna, bioethics ena profesa ta, ia henanadai: “Kahirakahira emui kara maoromaoro badinaia dalana do umui haidaua, a? Vanegai laganidia lalonai tomadiho momo be unai bamona idia karaia vadaeni.”

Ia idia hadibaia, Witness taudia idia abia dae rara ena helaga be Baibel ena hahediba herevana ta, ia be nega haida idia haidaua taunimanima edia kara maoromaoro dalana ta lasi. Baibel ena taravatu ia goevagoeva dainai unai do idia utua diba lasi. (Kara 15:​28, 29) Witness ta dekenai unai Dirava ena taravatu utua karana be kaivakuku tomadiho henia eiava sihari kava karana abia dae bamona.

Iehova ena Witness taudia ese doketa taudia​—hegeregere bioethics ena hebou Madrid ai idia mai taudia​—idia laloa bada, badina Witness taudia ese Baibel ena taravatu hegeregerena rara lasi medikol heduruna idia tahua karana idia ura matauraia. Ita diba, bioethics be mai anina bada doketa bona gorere tauna edia hetura karana hanamoa bona gorere tauna ena lalohadai matauraia karana lalonai.

Spain ena doketa tauna badana ia gwau bamona, namona be doketa taudia be nega ibounai idia laloatao idia ese “goevadae lasi tulu bona idia kerere diba gaudia idia gaukaralaidia.” Unai dainai namona be “idia abia dae, diba be hegeregere lasi neganai lalokau do idia hahedinaraia.”