“Golo Lasi to Daimon Nadidia Lau Davaria”
MICHALIS KAMINARIS ESE INAI SIVARAI IA GWAURAIA
South Africa dekenai lau lao golo tahua totona bena lagani ima murinai, golo ia hanaia gauna lau abia lao egu gabu dekenai. Mani unai davana bada gauna, lau dogoatao bona lau ura bada hariharilaia gauna, lau herevalaia sisina.
LAU be lagani 1904 ai, Greek ena motumotu Cephalonia, Ionian Sea dekenai, lau vara. Daudau lasi murinai egu tama sina ruaosi idia mase, unai dainai lau be tamana bona sinana lasi lalonai lau tubu. Lau ura heduru lau abia, bona nega momo Dirava lau guriguri henia. Ena be hanaihanai Greek Orthodox Church dekenai lau lao, to Baibel lau diba lasi momokani. Gau ta lasi ese egu lalona ia hagoadaia.
Lagani 1929 ai, egu lalona lau hadaia tano ma ta do lau lao bona mauri namona do lau tahua. Egu motumotu, tubutubu gaudia be momo lasi motumotuna, lau rakatania neganai, bouti amo England bena South Africa dekenai lau lao. Davara dekenai dina 17 murinai, Cape Town, South Africa dekenai lau ginidae, bona maoromaoro egu tano tauna ta amo moni gaukara lau abia. To, kohu ese lau ia durua lasi.
Gau Hereadaena
Lagani rua bamona South Africa dekenai lau noho murinai, Iehova ena Witness ta ese egu gaukara gabuna ia vadivadi henia bona Greek gado Baibel bukadia lau dekenai ia hariharilaia. Idia haida be Where Are the Dead? buklet bona Oppression, When Will It End? buklet. Lau laloatao goevagoeva mai egu ura ida idia lau duahia, bona idia torea siridia be egu kwarana amo lau gwauraia diba. Dina ta ai, egu gaukara turana dekenai lau gwau: “Lagani momo lalonai lau tahua gauna be hari lau davaria vadaeni. Africa dekenai lau mai, golo lau abia totona, to daimon nadidia lau davaria.”
Mai moale bada ida lau diba Dirava be mai ena ladana, Iehova, ena Basileia be guba dekenai ia haginia vadaeni, bona ita be inai tanobada ena dina gabediai ita noho. (Salamo 83:18; Daniela 2:44; Mataio 6:9, 10; 24:3-12; 2 Timoteo 3:1-5; Apokalupo 12:7-12) Iehova ena Basileia ese hahenamo hanaihanai do ia mailaia tanobada besedia ibounai dekenai, unai lau diba dainai lau moale bada! Lau moalelaia bada gauna ma ta be unai hereva momokanidia bona namodia be tanobada hegegemadai idia harorolaia.—Isaia 9:6, 7; 11:6-9; Mataio 24:14; Apokalupo 21:3, 4.
Daudau lasi murinai Watch Tower Society ena brens opesi ena adres Cape Town dekenai lau abia bona Baibel herevalaia bukadia ma haida lau abia. Lau moale bada sibona egu Baibel ta lau abia dainai. Lau duahia gaudia ese egu kudouna idia hamarerea dainai lau ura haroro. Haroro gaukara lau hamatamaia dalana be egu taoni Lixoúrion dekenai idia noho varavara, turadia, bona lau diba taudia ma haida dekenai Baibel bukadia lau siaia. Egu stadi amo sisina sisina lau lalo-parara, Iehova hamoalea totona ta ese ena mauri be ia dekenai ia gwauhamatalaia be namo. Unai dainai maoromaoro guriguri amo unai lau karaia.
Nega ta, Iehova ena Witness taudia edia hebou dekenai lau lao, to English gado lau diba lasi dainai, hereva ta lau lalo-pararalaia lasi. Port Elizabeth dekenai Greek taudia momo idia noho lau diba neganai, unuseniai lau lao do lau noho totona, to Greek gado Witness taudia ta lau davaria lasi. Unai dainai, egu lalona lau hadaia Greece dekenai do lau giroa, ful-taim haroro tauna ai do lau lao totona. Lau laloatao, sibona dekenai lau gwau, ‘Greece dekenai do lau giroa, herevana egu kohu ibounai do lau haboioa.’
Ful-Taim Hesiai Gaukarana Greece Ai
Lagani 1934 ena siahu negana ia matamaia neganai, lau be Italy ena bouti badana Duilio dekenai lau guia. Marseilles, France ai, lau ginidae bona dina 10 unuseniai lau noho murinai, taunimanima ia loalaia bouti ta Patris ai lau guia Greece dekenai lau lao totona. Davara dekenai, bouti ese mekaniki hekwakwanai ia abia, bona hanuaboi lalonai oda idia henia bouti maragidia idia hadihoa davara dekenai. Unai neganai lau laloatao guna lau gwau Greece dekenai do lau giroa, herevana egu kohu ibounai do lau haboioa. To, Italy taudia edia bouti goadana ta ia mai bona ai ia veria lao Naples, Italy dekenai. Dokonai Piraiévs (Piraeus), Greece dekenai, ai ginidae.
Unai amo Athens dekenai lau lao bona Watch Tower Society ena brens opesi lau vadivadi henia. Athanassios Karanassios, brens naria tauna ida lau herevahereva neganai, lau noia idia ese ful-taim haroro gabuna lau idia henia. Dina ta murinai Peloponnisos dekenai lau lao, unai be Greece ena tano badana ena saut kahanai. Unai distrik ibounai be lauegu teritori idia gwauraia!
Mai egu ura goadana ida haroro gaukara lau hamatamaia, taoni ta amo ma taoni ta dekenai, hanua ta amo hanua ma ta dekenai, animal ubua gabuna ta amo ma ta dekenai, bona daudau rumana ta amo ma ta dekenai. Daudau lasi murinai Michael Triantafilopoulos ia mai lau ia bamoa bona lagani 1935 ena siahu negana lalonai lau ia bapatisoa—unai be lagani ta ful-taim gaukarana lau hamatamaia murinai! PMV be lasi dainai, gabu iboudiai dekenai ai raka. Emai hekwakwanai badana be dubu gunalaia taudia edia dagedage karana, idia be kara idauidau idia karaia emai gaukara idia koua totona. Unai dainai, taunimanima ese ai idia lalo-dika henia kava. To, ena be hekwakwanai idia noho, emai haroro gaukarana ai hagugurua, bona Iehova ena ladana ai hahedinaraia gabu iboudiai.
Dagedage Haheaukalaia
Daba ta ai, Arcadia ena ororo kahanai ai haroro neganai, lau be hanua ladana Magouliana dekenai lau ginidae. Hora ta lau haroro murinai, lau kamonai dubu ena gaba idia toua bena lau diba unai be lau dainai idia karaia! Taunimanima orea ta idia hebou bona Greek Orthodox archimandrite (dubu biaguna badana, bisop henunai) ese idia ia hakaua. Karaharaga egu haroro baege lau koua bona egu lalona ai Iehova lau guriguri henia. Unai archimandrite be maoromaoro lau dekenai ia mai bona natudia hutuma be ia idia bamoa. Ia boiboi matamaia: “Tauna unai! Tauna unai!”
Unai natudia ese lau idia hagegea, bona unai dubu tauna ia mai kahirakahira bona ena bogana badana amo lau ia doria matamaia, ia gwau ia ura lasi ena imana amo lau ia dogoatao badina ‘reana lau miro dainai gorere do ia abia.’ Ia boiboi: “Botaia! Botaia!” To unai neganai pulisi ofesa ta ia ginidae bona ai ruaosi pulisi steiseni dekenai ia hakaua lao. Unai dubu tauna idia kota henia neganai idia gwau ia ese dagedage taudia ia hagoadaia dainai 300 drachmas bona kota ena davana do ia henia. Lau idia ruhaia.
Gabu matamata dekenai ai ginidae neganai, taoni badana ta be emai noho gabuna ai halaoa, bona unai gabu amo hora hani ai raka lao diba gabudia ibounai dekenai ai haroro. Anina be dabai momokani ruma ai rakatania bona adorahi ai ia dibura vadaeni neganai ai giroa lou, dina ta ta ibounai hanua ta o rua dekenai ai haroro. Unai hagegea hanuadia ai haroro henia murinai, ai noho taoni dekenai ai haroro bena gabu ma ta dekenai ai lao. Nega momo ai idia dogoatao badina dubu gunalaia taudia ese taunimanima idia hagoadaia ai idia dagedage henia totona. Kahana badana ta Parnassus, Greece ena ihuanai, hua momo lalonai pulisi ese lau idia tahua. To, nega ta lau idia davaria lasi.
Dina ta Tadikaka Triantafilopoulos bona lau be hanua ladana Mouríki, Boeotia ena provinsi dekenai, ai haroro. Hanua ai haria kahana rua dekenai, bona lau be ororo gabana dekenai lau haroro matamaia, badina lau be sisina matamata. Karaharaga henuna amo boiboi regena lau kamonai. Lau heau diho neganai, lau laloa, ‘Tadikaka Triantafilopoulos idia dadabaia noho.’ Hanua taudia be edia kofi rumana dekenai idia hebou, bona pris tauna ia raka lao raka mai, dagedage boromakau bamona. Ia boiboi badabada: “Inai taudia idia gwau ai be ‘Gaigai ena garana taudia.’ ”
Unai pris ese ena raka auna ia hamakohia vadaeni Tadikaka Triantafilopoulos ena kwarana ia botaia neganai, bona rara bada ia diho tadikaka ena vairana dekenai. Rara lau dahua oho murinai, unai gabu ai rakatania. Hora toi ai raka ela bona siti ladana Thebes dekenai ai ginidae. Unuseniai, kliniki ta dekenai, unai bero idia kumia. Ia vara gauna be pulisi dekenai ai hahedinaraia, bona samania pepana ai henia. To, unai pris ena turadia be mai edia siahu bona kota amo ia idia ruhaia.
Taoni ladana Leukas dekenai ai gaukara neganai, unai gabu ena politikol gunalaia tauna ta idia badinaia taudia ese ai idia “dogoatao” bona hanua ena kofi rumana dekenai ai idia mailaia, unuseniai taunimanima idia karaia kava kota dekenai ai idia samania. Unai politikol gunalaia tauna bona ena gaukara taudia ta ta ena nega ena nega ai, kahirakahira idia raka mai raka lao bona ai idia hereva henia—idia herevahereva loulou—bona edia imana idia lokua bona ai idia hagaria toho. Idia ibounai idia kekero. Edia badu herevadia be dina tubua amo ela bona dina ia diho neganai idia gwauraia, to ai lalo-hekwarahi lasi bona mai moale ida sibona ai gwauraia kerere lasi taudia, bona heduru totona emai lalona ai Iehova Dirava ai guriguri henia.
Dina ia diho murinai pulisi taudia rua ese ai idia ruhaia. Pulisi steiseni dekenai ai idia hakaua bona ai idia kara namo henia. Kerukeru, ena kara ena maoro ia hamomokania totona, unai politikol gunalaia tauna ia mai bona ai ia samania ia gwau ai be Greece ena King hadikaia herevana ai harorolaia. Unai dainai pulisi ese tatau rua be ai ida idia siaia taoni ladana Lamia dekenai, unuseniai unai gau do idia tahua namonamo totona. Dina 7 ai idia dogoatao bena hankap idia atoa bona taoni ladana Larissa dekenai idia abia lao kota totona.
Emai Keristani tadikaka Larissa dekenai be idia hamaoroa vadaeni bona ai idia naria. Idia hahedinaraia lalokauna be toana namona ia hahedinaraia ai idia hakaua taudia dekenai. Aiemai loea be Iehova ena Witness tauna bona ami ena ofesa gunana ta, taoni taudia idia diba namonamo tauna. Ia ese kota dekenai emai maoro ia hamomokania neganai, ia hedinarai ai idia samania herevana be koikoi, bona ai idia ruhaia.
Taunimanima ese Iehova ena Witness taudia edia haroro idia abia dae dainai dagedage karana ia bada ia lao. Lagani 1938 bona 1939 ai, ta ena tomadiho haidaua toho karana idia taravatua, bona Michael bona lau be nega momo unai gauna dainai kota dekenai idia samania. Gabeai, brens opesi ese ai ia hadibaia namona be ai gaukara hebou lasi, taunimanima ese emai gaukara idia itaia lasi totona. Lau davaria turana lasi lau noho be auka. To, Iehova lau abidadama henia dainai, Attica, Boeotia, Phthiotis, Euboea, Aetolia, Acarnania, bona Eurytania edia distrik ibounai dekenai aena amo lau raka loaloa bona lau haroro, bona Peloponnisos ena distrik dekenai danu.
Unai nega lalonai, salamo torea tauna ena hereva, Iehova abidadama henia hereva namodia, ese lau idia durua, ia gwau: “Oi ese goada lau dekenai oi henia noho, vadaeni lau idia hadikaia gwauraia taudia, be lau tuari henidia noho, bona siahu danu lau dekenai oi henia noho, edia magu do lau hamakohia diba. Dirava ese lau dekenai goada ia henia noho. Ia ese egu raka dalana ia hanamoa noho. Lohiabada ese egu aena be, dia ena aena hegeregerena ia halaoa, vadaeni ororo dekenai lau gini goada noho.”—Salamo 18:29, 32, 33.
Lagani 1940 ai, Italy ese Greece tuari henia herevana ia gwauraia, bona daudau lasi murinai Germany ena tuari taudia ese Greece idia biagua matamaia. Germany ena ami taudia edia taravatu idia haginia matamaia, bona Watch Tower Society ena buka idia taravatua. Greece dekenai unai be hekwarahi bada negadia Iehova ena Witness taudia dekenai; to, edia namba ia bada daekau—lagani 1940 ai Witness taudia 178 amo ia daekau lao 1,770, lagani 1945 ai Tanobada Ibounai Tuarina Iharuana ia doko neganai!
Betele Gaukarana
Lagani 1945 ai, lau idia boiria Iehova ena Witness taudia edia brens opesi Athens ai, do lau gaukara totona. Unai neganai Betele, anina be “Dirava ena Ruma,” be idia rentaia rumana ta Lombardou Street ai. Opesi idia noho foloa ginigunana dekenai, bona printa gabuna be ruma ena badina daiutuna dekenai. Ia lalonai printa masini maragina bona pepa utua masini ta idia noho. Matamanai printa gabuna ai gaukara taudia be rua sibona, to daudau lasi murinai ma volantia taudia be idia mai gaukara idia durua totona, to idia be sibona edia ruma ai idia noho.
Lagani 1945 ai, Watch Tower Society ena hedikwota Brooklyn, New York dekenai hereva ai siaia bona abia matamaia lou, bona unai lagani lalonai Gima Kohorona be Greece dekenai ai printaia loulou matamaia. Bena, lagani 1947 ai, emai brens ena gabu ai haidaua bona ai lao 16 Tenedou Street dekenai, to printa gabuna be Lombardou Street dekenai ia do noho. Gabeai printa gabuna ai haidaua bona Lombardou Street amo ai lao Witness tauna ta ena faktori dekenai, unai gabu ena daudau be kilomita 5 bamona. Vadaeni, unai nega lalonai ai be gabu toi huanai ai loaloa noho.
Lau laloatao emai noho gabuna Tenedou Street lau rakatania daba ia do rere lasi neganai bona printa gabuna dekenai lau lao. Unuseniai lau gaukara ela bona 1:00 adorahi bona unai murinai Lombardou Street dekenai lau lao, ai printaia pepadia be unuseniai ai abia lao. Unai gabu ai imana amo unai pepa ai lokudia magasin hegeregerena ai, ai turia hebou, bona ai utua. Gabeai ai karaia ore magasin be post opesi dekenai ai abidia lao, foloa ihatoina dekenai ai huaia daekau, gaukara taudia ai durua idia haria, bona udaia gauna dekenai stampa ai atoa do idia siaia totona.
Lagani 1954 ia abia neganai, Greece dekenai Witness taudia edia namba be 4,000 ia hanaia, bona gabu badana ai abia be namo. Unai dainai, Betele matamatana mai ena foloa toi dekenai ai lao, Athens ai, Kartali Street dekenai. Lagani 1958 ai, lau idia noia nadua gaukarana do lau naria totona, bona unai be lauegu maduna ela bona lagani 1983. Unai nega lalonai, lagani 1959 ai, Eleftheria lau adavaia, lau davaria ia be lau ia durua bada turana, Iehova ena hesiai gaukara lalonai.
Dagedage Haheaukalaia Lou
Lagani 1967 ai, ami ese siahu ia abia bena gavamani ia biagua, bona emai haroro gaukara idia koua lou. To, guna emai gaukara idia taravatua negana amo diba ai abia dainai, gaukara dalana ai haidaua haraga bona hunia dalanai gaukara ai karaia namonamo noho.
Tadikaka edia ruma dekenai ai hebou, bona laloa namonamo dalanai ruma-ta-ruma-ta gaukarana ai karaia. To, tadikaka idia dogoatao loulou, bona nega momo kota idia karaia. Emai loea taudia idia loaloa momo, Greece ena kahana idauidau dekenai idia karaia kota lalodiai idia vareai totona. Ena be ai idia dagedage henia, to Witness taudia momo be hanaihanai idia haroro noho, Saturday bona Sunday ai unai idia karaia momo.
Hanaihanai Saturday eiava Sunday ai, dina ena haroro gaukarana ai haorea murinai, ai tahua namonamo grup lalonai daika daika idia noho lasi. Nega momo, idia noho lasi taudia be unai gabu ena pulisi steiseni dekenai idia dogoatao. Unai dainai ai be bilankesi bona aniani ai abidia lao bona idia ai hagoadaia. Danu, emai loea taudia ai hadibaia, bena Monday ai kota vairanai idia dogoatao taudia totona do idia hereva. Unai be mai moale ida ai haheaukalaia, badina hereva momokani dainai dagedage ai davaria!
Gaukara idia taravatua lalonai Betele dekenai printa gaukarana ai hadokoa. Unai dainai Eleftheria bona lau ese ai noholaia rumana Athens ena kahana ta ai, be printa rumana bamona ai ia lao. Eleftheria ese taipraita badana amo Gima Kohorona ena hereva ia taipia. Ia ese pepa 10 bona kabon pepa 9 be nega tamona taipraita dekenai ia atoa bena ia botaia auka herea, revareva be pepa iboudiai dekenai do idia hedinarai totona. Bena lau ese rau idauidau lau gogoa bona hakapua hebou. Adorahi ibounai unai ai karaia ela bona hanuaboi momokani. Pulisi tauna ta be emai henuna daiutuna dekenai ia noho, bona ai do daradara dahaka dainai nega ta emai gaukara ia tahua lasi.
Orea Ia Bada Ia Lao Ai Moalelaia Noho
Greece dekenai, demokratik gavamanina ese siahu ia abia lou lagani 1974 ai, bona emai haroro gaukarana ai hunia lasi. To, emai gaukara idia koua laganidia 7 lalonai, ai moale bada badina pablisa edia namba be 6,000 amo ia bada daekau dainai, Basileia harorolaia taudia ibounai edia namba be 17,000 ia hanaia.
Danu, emai printa gaukarana be brens ena gabu dekenai ai karaia lou. Unai dainai, daudau lasi murinai Betele rumana ena bada Kartali Street dekenai be hegeregere lasi. Ai ese tano kahana hectare ta ai hoia Athens ena kahana ta ladana Marousi dekenai. Betele matamata idia haginia lalonai be mahuta daiutudia 27, faktori, opesi daiutudia, bona ma gau haida idia haginia. October 1979 ai unai ai hahelagaia.
Nega ia heau murinai ena bada danu be hegeregere lasi. Unai dainai tano kahana 22 hectare ai hoia, kilomita 60 Athens amo. Unai gabu be Eleona ai, ororo ta ena gabana ai bona unai amo ororo badadia bona tubutubu gaudia momo edia koura ai itaia diba. Unuseniai, April 1991 ai, ai be gabu badana ai hahelagaia, unai lalonai be ruma 22, idia ta ta ai taunimanima 8 idia noho diba.
Lagani 60 mai kahana ful-taim hesiai gaukarana lau karaia murinai, lau do goada noho. Lau moale, badina ‘lau buruka momokani neganai, lau ese huahua do lau atoa noho.’ (Salamo 92:14) Iehova lau tanikiu henia ena badina badana be, lau sibona egu matana amo ia idia tomadiho henia taudia edia namba ia bada daekau lau itaia. Peroveta tauna Isaia ese unai gauna ia perovetalaia: “Dina bona hanuaboi oiemu magu iduara be idia kehoa noho, vadaeni bese idauidau edia king taudia ese, oi dekenai edia kohu do idia abia vareai.”—Isaia 60:11.
Lau moale bada herea badina lau itaia diba, bese iboudiai amo taunimanima milioni momo be Iehova ena orea lalonai idia vareai bona unai taudia idia hadibaia edena dala ai hisihisi badana amo do idia roho mauri diba Dirava ena tanobada matamatana dekenai! (2 Petero 3:13) Momokani lau gwau diba, lau dekenai ful-taim hesiai gaukarana ena namo ese inai tanobada ai abia diba gaudia ibounai edia namo ia hanaia. Oibe, lau ese golo lau davaria lasi, to lauma dalanai daimon nadidia, egu mauri idia hanamoa momokani nadidia unai, lau davaria.
[Picture on page 23]
Michalis bona Eleftheria Kaminaris
(Idibana kahanai) Printa gabuna Lombardou Street dekenai