Daika ese Ia Lohiaia?
“DAIKA ese tanobada ia lohiaia?” Bema ta ese unai henanadai oi dekenai ia henia, dahaka do oi gwau? Reana dubu taudia momo do idia gwau “Dirava” eiava “Iesu.” The Freeport News, Bahamas ena niuspepa ta dekenai ia hedinarai herevana be haida sibona ese idia laloa haerena ia henia.
Unai hereva ia torea hahinena ia gwau: “Egu iduara dekenai pepapepa ta lau davaria. Nega momo unai bamona idia rakatania gaudia lau duahia lasi, to hari lau duahia. Ena ladana ese henanadai ia henia, ‘Daika ese Tanobada Ia Lohiaia?’ ” Unai Baibel pepapepana ia duahia murinai, unai hahine ia diba inai tanobada lohiana be Dirava eiava Iesu lasi to Satani Diabolo.—Ioane 12:31; 14:30; 16:11; 1 Ioane 5:19.
Unai pepapepa ia gwau: “Taunimanima hahisidia bona hamasedia totona inai gau idia gaukaralaidia: gasi daiutudia, hahehisi dibura rumadia, lahi halasia gaudia, lahi bomudia, bona gau dika rohorohodia ma haida. . . . Dahaka siahu ese taunimanima ia doridia eiava ia hakaudia, unai kara dika rohorohodia idia karaia totona? Nega ta inai bamona oi laloa a: Reana ita itaia diba lasi siahuna dikana ta ese taunimanima edia lalodia ia veridia dainai unai bamona idia karaia a?” Baibel ese Satani ia gwauraia “inai tanobada ena dirava” ita hoalaia, a?—2 Korinto 4:4.
Ita moale, badina Satani bona ena demoni do idia noho lasi negana be kahirakahira. “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17) Oibe, Baibel ia gwauhamata Dirava ena ura idia karaia taudia edia helaro be kara maoromaoro tanobadana lalonai do idia mauri hanaihanai. (Salamo 37:9-11; 2 Petero 3:13; Apokalupo 21:3, 4) Satani bona ena demoni edia siahu dikana ia ore neganai do ita moale bada!
Unai pepapepa maragina ena hereva ia herevalaia murinai, The Freeport News ena hereva ia torea hahinena ia gwau: “Lau moale bada unai pepapepa lau duahia . . . badina guna lau danu be tanobada ena toana bona daika ese ia lohiaia lau laloa momo.”