Dirava Ita Abidadama Henia be Hoa Karana ta Dainai, A?

ALBERT ena mauri laganidia be 20 mai kahana neganai, Dirava ia tahua matamaia. Tomadiho daladia idauidau ia tohoa, to ena lalona ia do hegeregere lasi. Ia ese Baibel ena kahana ia duahia neganai, Dirava ese Noa, Aberahamo, Sara, bona Mose ia kara henidia dalana ia dibaia. Baibel ese ia gwauraia Diravana be Albert ese ia ura henia. To edena dala amo do ia diba Dirava be momokani ia noho?

Adorahi ta ai, Albert be taunimanima lasi gabuna ta dekenai ia lao, bena unuseniai ia guriguri, ia gwau, “Dirava e, mani toa ta lau do oi henia​—do ia hamomokania oi mauri noho.” Gabeai ia gwau, unai neganai gau ta ia vara lasi dainai, ena helaro be ia ore, bena ena lalona ia hisihisi, bona ia badu.

Albert hegeregerena, momo idia laloa Dirava idia tahua vadaeni be hekwarahi kava. Reana haroro taudia edia hereva idia daradaralaidia, o TV ai idia haroro taudia edia lalo-ani herevadia dainai idia lalohisihisi. Edia dekena taudia, sibodia idia gwauraia Keristani taudia, momo edia koikoi karadia idia laloa momo dainai, idia haida idia diba lasi edena hereva do idia abia dae be maoro. To idaunegai Israela ena King Davida ese ena natuna Solomona ia hamaoroa, ia gwau: “Bema oi ese Lohiabada oi tahua, ia ese oi do ia abia dae.”​—1 Sivarai 28:9.

Vadaeni, Dirava be sibona edena bamona ia hahedinaraia? Namona be do oi laloa Dirava ese hoa karana ta amo oi vairanai do ia hamomokania ia mauri noho, a? Time magasin lalonai idia gwau, vanegai idia davaria America taudia toi toi amo ta ta idia abia dae hoa karadia idia vara. Ma idia gwau, “America lalonai idia bada idia lao haraga tomadiho oreadia be Charismatic bona Pentecostal oreadia; edia tomadiho lalonai ‘toa bona hoa karadia’ be mai anina bada.”

“Toa bona hoa karadia” dainai Dirava ita abidadama henia be maoro, a? Gunaguna hoa karadia ia gaukaralaia. Idia ta be inai: Taso tauna ladana Saulo, Dirava ena natuna, Iesu Keriso, idia badinaia taudia ia dagedage henidia tauna, be Ierusalema amo Damaseko ia lao henia lalonai, hoa karana ta be ia dekenai ia vara. Hoa dalanai ia be Iesu, ia toreisi lou vadaeni tauna, ida idia hedavari dainai, Saulo ia helalo-kerehai. (Kara 9:​1-​22) Guna ia dagedage tauna be unai dala amo aposetolo Paulo ai ia lao, Keristani dalana ia goadalaia momokani tauna unai!

To hoa karadia be nega ibounai unai bamona kara namodia idia havaraia, a? Ta ese Dirava ia abidadama henia momokani, badina tamona be hoa karana ta be ia dekenai ia vara dainai, a?

[Picture on page 3]

Dirava ena Natuna ese hoa dalanai Saulo, Taso tauna, ia hereva henia. Hoa karana ta do oi naria be maoro, eiava?