Lagani 403 Headavana ese Dika Ia Davaria
SWEDEN dekenai, Dubu bona Gavamani ese lagani 400 ia hanaia lalonai turana karana namona idia moalelaia. Hari tomadiho bona gavamani edia huanai ia noho headavana ia manoka ia lao.
Lagani 1593 ai, Lutheran tomadiho be Gavamani ese tano ena tomadiho ai ia halaoa, bona namona be Sweden taudia ibounai be ena bapatiso memba taudia. Lagani momo murinai, 1850 ia lao 1859 lalonai, unai gauna idia haidaua sisina. Sweden taudia iboudiai do idia bapatisoa be gau badana lasi; to, idia ibounai be Lutheran Dubu ena memba taudia. Unai dainai, takisi idia henia monina amo 1 pesen be dubu durua totona bona ia karaia gaukara davana totona idia henia. Gabeai gau ta idia haidaua. Lagani 1952 amo ema bona hari, taravatu ia noho Sweden taudia ese dubu idia rakatania diba bona unai amo dubu ena takisi monina ena kahana badana henia karana idia rakatania.
Vanegai idia hanaia laganidia lalonai, Lutheran Dubu ena siahu Sweden dekenai ia maragi ia lao. Idia diba unai do ia vara, badina Sweden dekenai idia noho taudia amo 10 pesen be tano idaudia amo idia mai Lutheran lasi taudia, idia haida be Iuda taudia, Katolik taudia, bona Muslim taudia. Unai dainai, lagani 1996 ena matamana ai, Sweden taudia 86 pesen sibona be Lutheran Dubu taudia, bona edia namba ia diho noho.
Unai tomadiho laloa lasi karana ia bada ia lao dainai Dubu bona Gavamani idia parara noho. Idia gwauraia vadaeni, ia hegeregere bema king be Lutheran tauna lasi, bona Lutheran tama eiava sina edia natudia be vara negana amo Lutheran State Church ena memba taudia lasi. Danu, The Dallas Morning News ia gwau, lagani 2000 ia do abia lasi neganai, “dubu gunalaia taudia bona gavamani ese dubu ena kohu edia davana do idia sekea bona do idia haria. Dubu ese lagani ta ta ia gaukaralaia monina bilioni K2.17 do idia hamaragia be namo, badina unai moni ena kahana badana be takisi monina amo guna idia abia.” Lagani 2000 murinai, dubu ese sibona ena bisop taudia do ia abia hidi.
Kerisendom taudia ese tomadiho idia ura henia lasi bona dubu idia rakatania lalonai, Iehova ena Witness taudia edia namba Sweden ai be ia bada daekau noho. Unai tano dekenai, 1997 Yearbook of Jehovah’s Witnesses ia gwau, Dirava ena Basileia harorolaia taudia be 24,487, bona kahirakahira 10 pesen be ful-taim painia gaukarana idia karaia. Idia momo ese hesiai gaukara ena hahenamo badadia idia tahua noho. Hegeregere, Iehova ena Witness taudia edia lagani 1995 ena distrik hebouhebou lalonai, tatau 20 mai edia adavadia ida ese Watchtower Bible School of Gilead ena aplikesen pepana idia hahonua. Unai neganai, unai sikuli ena klas gunadia idia haorea Sweden taudia 75 be tanobada ena kahana idauidau ai misinari gaukara idia karaia. Edia haheitalai namona, edia hagoadaia revarevadia, bona vadivadi ese unai hahenamo idia lalohadailaia taudia idia durua bada.
Unai dainai, Kerisendom taudia milioni momo idia lalo-hekwarahi neganai, Iehova ena Witness taudia ese “ane do idia abia, edia moale bada dainai.”—Isaia 65:13, 14.
[Map on page 30]
Sweden