Tanobada Ena Aniani be Ia Hegeregere—Edena Bamona?

WORLDWATCH Institute ena presiden Lester Brown, Washington, D.C. ai, ia gwau: “Emai hekwarahi be sedira do ia hegeregere lasi aniani naria totona inai nega laganidia lalonai.” New Scientist magasin ia gwau, lagani 1995 ena hamatamaia neganai, idia haboua aniani be ton 255 milioni amo ia diho​—bona unai be dina 48 sibona lalonai taunimanima idia ubua diba. Lagani gunadiai ai haboua aniani ena bada ia diho bona dina 60 lalonai tanobada ia ubua diba ena maka neganai, aniani ai haboua lou diba. To hari Worldwatch ia diba lasi bema tanobada do ia hegeregere ia haboioa aniani do ia haboua lou totona.

Lagani toi lalonai aniani momo idia gogoa lasi bona ogogami tano momo ese hari aniani idia gaukaralaia animal ubua totona, unai dainai aniani be bada lasi ogogami taudia ese idia ania totona. New Scientist magasin ia gwau bema inai hekwakwanai idia hanamoa lasi neganai, taunimanima milioni ta, edia moni 70 pesen be aniani hoia totona idia negea taudia, be do idia hitolo matamaia.

Baibel ia peroveta hari iseda negai “hitolo bada,” do idia vara. (Luka 21:11) To Dirava ese unai hekwakwanai ia laloa noho. Momokani, ena Basileia ese inai tanobada do ia biagua neganai, iena ura taunimanima totona do ia hahedinaraia. Unai negai ‘tano ena anina do idia vara namonamo.’ “Koni momo herea, be tano dekenai do ia vara namonamo. . . . Ororo gabudia danu dekenai, uiti bona aniani avadia do idia tubu namonamo.” (Salamo 67:6; 72:16) Unai neganai iseda Havaraia Tauna ena peroveta hereva do idia guguru momokani: “Oi ese medu oi siaia noho. Inai kara dekena amo oi hedinaraia, oi ese tanobada oi naria namonamo noho. . . . Koura gabudia dekenai uiti momo idia tubu noho.”​—⁠Salamo 65:⁠9, 13.

Unai gwauhamata namodia ese emu lalona idia veria, a? Oi ura oi diba edena bamona oi danu be unai gwauhamata gaudia do oi abia, a? Vadaeni, bema nega ta Iehova ena Witness taudia be emu ruma dekenai idia mai, idia oi henanadai henidia bona Paradaiso gwauhamatana do idia kikilaia oi dekenai. Bema oi ura ta ia mai oi dekenai davana lasi Baibel stadi oi ia henia totona, mani leta oi siaia IBSA, Box 636, Boroko, NCD 111, P.N.G. dekenai, eiava emu gabu ai ia noho Watchtower brens opesi dekenai. Rau 2 itaia.

[Picture Credit Line on page 32]

Inset: Pictorial Archive (Near Eastern History) Est.