Dahaka Ia Vara Kara Maoromaoro Karana Dekenai?

LAGANI 100 bona ma haida gunanai, Barney Barnato, daimon hoia tauna ta, be South Africa ia rakatania bona ia giroa lou England dekenai. Ia ginidae neganai niuspepa ta dekenai ena mauri ena sivarai ia duahia bona ia ura lasi momokani. Unai dainai nouti haida ia torea bena edita tauna ia henia sivarai iharuana amo “gau haida ia hamaoromaoroa totona,” bona seke ta, moni bada herea, be unai nouti ida ia siaia.

Edita tauna, J. K. Jerome, be ena nouti ia negea momoru bosea lalonai bona seke ia henia lou. Barnato ia hoa, bona maoromaoro ia henia gwauraia monina ia habadaia nega rua amo. To Jerome be unai danu ia dadaraia. Barnato ese ia nanadaia: “Moni hida oi ura oi abia?” Jerome be unai nega ia laloa lou neganai, ia gwau: “Ia lau hamaoroa unai bamona kara be London dekenai ai karaia lasi.” Ena edita gaukara ai kara maoromaoro do ia rakatania lasi, moni abia totona.

“Kara maoromaoro karana” ena anina haida be “kara namo taravatudia badinaia; koikoi lasi.” Kara maoromaoro tauna oi abidadama henia diba. To hari, kara maoromaoro badinaia lasi karana ese gaukara idauidau idia karaia taudia edia kara ia hadikaia.

Britain dekenai niusi taudia be ladana ta idia atoa kara namo badinaia noho lasi karana dekenai, unai ladana be “sleaze.” The Independent niuspepa ese sleaze ia herevalaia ia gwau, ia be “lebulebu karadia, gavamani taudia be sibodia edia namo idia tahua dainai idia karaia koikoi karadia, bona kohu be ma tano ta dekenai idia siaia bena hehuni dalana amo moni idia henaoa karana.” Unai hekwakwanai be taunimanima edia mauri oromana ibounai lalonai.

Kara Maoromaoro Taravatudia Idia Haidaua

Momokani, kara maoromaoro ena anina be kara goevadae lasi, to ia be ta ena toana namona ia hahedinaraia. Hari iseda tanobada ai, taunimanima idia ura idia taga haraga dainai, haida idia laloa kara maoromaoro karana be kara namona lasi, badina reana unai ura hagugurua dalana do ia koua sisina. Unai hegeregerena, hari, nega momo stiuden taudia ese masini maragidia idia gaukaralaia, kara koikoi amo eksam ena haere davaria totona, bona unai gaudia idia hunia namonamo diba. Britain ena iunivesiti profesa ta ia gwau Britain stiuden taudia ibounai amo, 50 pesen bona ma haida be eksam idia karaia neganai, koikoi karana ta amo haere idia tahua. Unai be Britain sibona dekenai ia vara lasi.

Kerere lasi taudia be dika idia davaria, taunimanima haida edia hereva koikoi bona edia kara koikoi dainai. Haheitalai ta be lagani 1984 ai, India ena hanua Bhopal ai, tatau, hahine, bona natudia 2,500 mai kahana idia mase bona handred tausen haida be bero idia abia, hodahoda mai muramura dikana ia halasia dainai. The Sunday Times ia gwau: “Hisihisi idia abia taudia durua daladia idia heau namonamo lasi, kara kerere bada dainai. . . . Dika idia davaria momokani taudia tahua be auka, badina be taunimanima ma tausen tausen momo be edia koikoi hereva bona toana, bona koikoi pepadia amo kompensesini monina idia henaoa toho.” Unai dainai, lagani 10 idia ore bona kompensesini monina $470,000,000 amo, $3,500,000 sibona be hisihisi idia davaria taudia dekenai idia henia.

Tomadiho oreadia be edena bamona? Kara maoromaoro idia hahedinaraia, a? Madi, nega momo idia be tanobada taudia hegeregerena. Haheitalai ta be Roman Katolik bisop ta, Eamon Casey, ia hahedinaraia ia be ia bada vadaeni mero ta ena tamana, to unai mero ena sinana ia adavaia lasi. Britain ena niuspepa Guardian ia gwau Casey ena kara be idau momokani lasi, “unai bamona sivarai be momo.” Unai hegeregerena, The Times ia gwau: “Hereva momokani unai hemarai karana dekenai be inai, Bisop Casey ena kara kerere be nega ta ta sibona ia vara karana ta lasi. Mahuta hebou lasi gwauhamatana hamakohia karana be matamata lasi bona nega momo ia vara.” Scotland ai, The Glasgow Herald ese unai hereva ia hamomokania, ia gwau United States ena Roman Katolik pris taudia ibounai amo, 2 pesen sibona be sihari kava bona tatau be tatau ida mahuta hebou karadia idia do karaia lasi. Unai namba ia maoro eiava lasi be herevana, to kara maorodia badinaia dekenai pris taudia edia ladana dikana ia hahedinaraia.

Unai bamona haheitalai ia itaia momo dainai, tau ta be kara maoromaoro taravatudia ia badinaia diba, a? Unai kara be mai anina, a? Karaia dalana be dahaka bona dahaka namo do ia vara?