Ta Abidadama Henia Karana Goevadae Lasi Tanobadana Ai

“KARA namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai.” Unai be momokani oiemu mauri lalonai, a? Namona be oi diba aposetolo Paulo ena hekwakwanai be oiemu hekwakwanai hegeregerena; to ia be kara maoromaoro Keristani tauna namo hereana ta. Unai kara ruaosi idia noho diba nega tamona ai, a? Paulo be ena revareva Roma Keristani taudia dekenai unai hekwakwanai ia gwauraia: “Bema lau ura lasi gauna lau karaia noho, karaia tauna be lau lasi, to egu lalona dekenai ia noho kara dika ese ia karaia noho.” Edena kara dika ia herevalaia, bona edena bamona ia hanaia, kara maoromaoro tauna ai ia lao totona?​—Roma 7:​19, 20.

Guna ena revareva lalonai, Paulo ia torea: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” Unai “tau tamona” be Adamu. (Roma 5:​12, 14) Tau ginigunana, Adamu, ena kara dika, ese taunimanima ibounai idia abia goevadae lasi maurina ia havaraia bona unai dainai kara maoromaoro badinaia karana be auka.

Paulo ena lalohadai guna idia gwauraia “kara dika ginigunana” dekenai be momo ese idia abia dae lasi, badina be dubu taudia momo ese Baibel ena sivarai, taunimanima edia matamanai sivaraina, idia dadaraia bona evolusen idia abia dae. Baibel ia herevalaia bukana ta ese Roma 5:12-14 ia herevalaia, ia gwau: “Diba bada taudia haida ese unai kahana idia negea.” To lagani 100 gunanai, Baibel idia herevalaia bukadia be hanaihanai idia gwau “Adamu ia kara dika neganai . . . unai kara dika bona ia abia davana ese ena natudia iboudiai ia hamiroa.”a

Kara Maoromaoro Karana Haboioa Negana Ginigunana

Taunimanima momo idia gwau tau ginigunana Adamu be guna ia noho lasi hegeregerena, idia laloa Satani Diabolo be gori ta sibona.b To diba bada tauna, Iesu Keriso, ese ita ia hamaoroa unai tauna be “hereva momokani be ia badinaia lasi,” eiava ita gwau diba, idia abidadama henia diba lasi. (Ioane 8:​44) Satani ese Adamu bona ena adavana, Heva, ia veridia dainai, Iehova idia gwau-edeede henia bona edia kara maoromaoro karana be unai hetoho negana lalonai idia badinaia lasi.​—Genese 3:​1-​19.

Ita ibounai be Adamu ena tubudia dainai, ita ibounai lalonai kara dika karaia urana ia noho. Aonega tauna Solomona ia gwau: “Kara maoromaoro tauna ta tanobada dekenai, be kara namo sibona ia karaia noho, a? Lasi momokani, ibounai ese nega haida kara dika do idia karaia diba.” (Hadibaia Tauna 7:​20) To, taunimanima iboudiai be edia kara idia naria namonamo neganai ita abidadama henia diba. Edena bamona unai ia vara diba? Badina be goevadae tauna sibona lasi be kara maoromaoro ia badinaia diba.

Kara Maoromaoro Ena Badina

Israela ena King Davida be kerere momo ia karaia, Bataseba ida ia heudahanai danu, bona sivarai ibounai be Baibel lalonai. (2 Samuela 11:​1-​27) Davida ena kerere momo idia hahedinaraia ia goevadae lasi momokani. To Iehova be dahaka ia itaia unai tau dekenai? Davida ena natuna Solomona dekenai, Iehova ia gwau: “Lauegu vairanai do oi noho mai maoromaoro bona momokani, oiemu tamana Davida hegeregerena.” (1 King Taudia 9:⁠4) Ena be Davida ena kerere be momo, to Iehova ese ia itaia Davida idia abidadama henia diba. Dahaka dainai?

Davida ese unai henanadai ia haerelaia Solomona ia hereva henia neganai, ia hamaoroa: “Dirava ese iseda laloa ibounai bona iseda ura ibounai ia diba.” (1 Sivarai 28:⁠9) Davida ese kerere momo ia karaia, to ia manau, bona ia ura kara namo ia karaia. Hanaihanai sisiba ia abia dae​—bona ia tahua danu. Ia noinoi: “Lohiabada e, lau do oi tahua bona tohoa, bona egu kara do oi itaia. Egu ura bona egu laloa danu do oi tahua.” (Salamo 26:2) Davida ese ena kara hagoevaia karana ia mamia momokani. Bataseba ida ia kara dika dainai, hekwakwanai ia davaridia noho bona ura kwalimu be lasi ela bona ia mase. To, Davida ese ena kerere ia gwauraia maoro toho lasi. (2 Samuela 12:​1-​12) Gau badana be inai: tomadiho momokanina ia rakatania lasi. Unai kara dainai, bona Davida be ena kerere ia lalohisihisilaia, bona ia helaro-kerehai momokani dainai, Iehova be ena kara dika ia gwauatao bona ia dekenai ia be kara maoromaoro tauna.​—Salamo 51 itaia danu.

Hetoho Neganai Ia Hedinarai Idia Abidadama Henia Diba

Satani Diabolo ese Iesu ia tohoa ena kara maoromaoro karana do ia rakatania totona. Iesu be hahetoho bona hisihisi negadia ai ena kara maoromaoro ia badinaia, to goevadae tauna Adamu ena kamonai karana ia tohoa gauna be idau, ia ese Dirava ia henia taravatu tamona sibona ia abia. Danu, Iesu ia tohoa gauna be inai: ia diba ena kara maoromaoro badinaia karana amo, taunimanima ibounai ese mauri do idia abia eiava do idia abia lasi.​—Heberu 5:​8, 9.

Satani ia ura Iesu ena kara maoromaoro ia hadikaia, unai dainai Iesu ia manoka momokani​—dina 40 lalonai taunimanima idia noho lasi gabuna dekenai ia loaloa bona aniani ia ania lasi​—neganai ia dibagania. Nega toi Iesu ia dibagania​—nadi be aniani ai do ia halaoa; dubu ena ataiai gabuna amo ia roho diho, anina be mai hekokoroku ida ia laloa aneru ese ia do idia hamauria bona do ia hamomokania ia be Mesia Tauna; bona tanobada ena basileia iboudiai do ia abia bema nega tamona sibona Satani ia “tomadiho” henia. To Iesu ese unai hedibagani ta ta ia dadaraia, bona Iehova ia badinaia noho mai kara maoromaoro ida.​—Mataio 4:​1-​11; Luka 4:​1-​13.

Iobu Ena Kara Maoromaoro

Iobu ena sivarai, hahetoho negana lalonai ena kara maoromaoro ia badinaia noho sivaraina, ita diba namonamo vadaeni. To Iobu ia diba lasi dahaka dainai unai dika ia vara ia dekenai. Ia diba lasi Satani ia gwau Iobu be lalo-maoromaoro lasi tauna, bona ia gwau Iobu be Dirava ia tomadiho henia, sibona ia ura gaudia abia totona, bona ena mauri dogoatao totona, ena kara maoromaoro do ia rakatania mai ena ura ida. Dirava ese Iobu dekenai idia vara hahetoho aukadia ia koua lasi, Satani ena hereva ia hakoikoia totona.​—Iobu 1:​6-​12; 2:​1-8.

Turadia koikoi toi idia hedinarai. Dirava ena taravatu bona ena ura idia gwauraia gageva mai edia ura ida. Iobu ena adavana danu ese idia vara gaudia edia anina ia lalo-pararalaia lasi, ena tau ia hagoadaia lasi unai hahetoho negana lalonai. (Iobu 2:​9-​13) To Iobu ia gini goada. “Harihari ia lao bona do lau mase, egu laloa maoromaoro, bona egu kerere lasi, do lau gwauraia noho. Egu kara maoromaoro do lau gwauraia noho, bona inai laloa do lau dogoatao noho, do lau negea lasi.”​—Iobu 27:​5, 6.

Baibel lalonai Iobu ena haheitalai namo hereana ta, bona abidadama tatau bona hahine momo herea ma haida edia danu, ese idia hamomokania Satani be koikoi tauna.

Keristani Hesiai Gaukara Bona Kara Maoromaoro

Iehova ese kara maoromaoro ia laloa bada ena badina tamona be sibona ia hamoalea dainai, a? Lasi. Kara maoromaoro karana ese ita taunimanima ia durua danu. Iesu be iseda namo ia laloa dainai ia gwau, ‘Iehova oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai ida.’ Momokani, unai be ‘taravatu bada herea momokani, ia be ginigunana,’ bona kara maoromaoro tauna, hahine, eiava memero o kekeni sibodia ese do idia badinaia. (Mataio 22:​36-​38) To kara maoromaoro badinaia be edena bamona, bona ena ahuna be dahaka?

Taunimanima sibona lasi ese kara maoromaoro tauna idia abidadama henia diba, to gau badana be Dirava ese ia abidadama henia diba. Ena kara amo ena kudouna goevana ia hedinarai; ia kara koikoi lasi. Kara dikana ta ia hunia lasi bona ena kara ia gageva lasi. Aposetolo Paulo ese ia gwauraia inai bamona: “Ai be hemarai karadia, taunimanima idia hunia gaudia, ai negea vadaeni, bona koikoi karadia be ai karaia lasi. Dirava ena hereva danu ai senisia lasi. Ai be hereva momokani ai gwauraia hedinaraia noho, Dirava ena vairana dekenai. Unai dekena amo taunimanima idia diba, ai be mai momokani danu Dirava ena gaukara ai karaia noho.”​—2 Korinto 4:​2.

Paulo ese Keristani hesiai gaukara lalonai idia be mai anina lalohadai haida ia herevalaia. Keristani hesiai tauna ta be ma haida do ia hesiai henia diba lasi bema ena kara ia goeva lasi, bona bema ia be kara maoromaoro tauna ta lasi, ani? Ireland tomadiho oreana ena biaguna tauna be vanegai sibona unai orea ia rakatania, bona ia ese unai ia haheitalaia namonamo. The Independent niuspepa ia gwau unai biagua tauna ia hamomokania “natudia ia sihari henia pris ta ia lulua lasi, ena be nega daudau vadaeni ia diba ia be natudia hadikaia tauna ta, to natudia ida ia gaukara noho.” Unai sivarai ia gwau unai kara dika ta ia karaia noho lagani 24 lalodiai. Unai pris be lagani 4 dibura rumana dekenai ia noho, to ia hadikaia natudia edia hisihisi unai lagani momo lalodiai mani oi laloa, bona ia vara noho badina ena biaguna tauna be kara maoromaoro dekenai ia dabu dainai, gau ta ia karaia lasi!

Kara Maoromaoro—Ena Davana Namodia

Aposetolo Ioane be gari lasi tauna. Iesu ese ia bona ena kakana Iamesi ia gwauraia “Guba boiboi natudia,” edia goada karana dainai. (Mareko 3:​17) Petero ida, kara maoromaoro momokani tauna Ioane ese Iuda lohia taudia ia hamaoroa ‘ena uduna ia koua diba lasi,’ Iesu ia bamoa neganai ia itaia bona ia kamonai gaudia do ia herevalaia noho. Aposetolo taudia, Ioane danu, idia gwau: “Dirava ai kamonai henia be namo, taunimanima ai kamonai henia be dika.”​—Kara 4:​19, 20; 5:​27-​32.

Ioane ena mauri lagani be 90 idia hanaia momokani neganai, ia idia lulua Patamo motumotu ai ‘Dirava ena hereva, bona ena abidadama Iesu dekenai ia gwauraia hedinarai noho dainai.’ (Apokalupo 1:⁠9) Reana ena mauri laganidia be momo dainai, ia laloa ena hesiai gaukara ia ore. To unai bamona kara maoromaoro tauna sibona do ia hegeregere Apokalupo ena matahanai abia bona ena sivarai torea totona. Ioane be unai gaukara ia karaia mai ena kamonai ida. Hahenamo bada hereana ta ia abia unai! Bona ma haida do ia abia. Gabeai, reana Efeso ena gabu ai, ena Evanelia bukana bona revareva toi ia torea. Unai bamona hahenamo badadia amo, kamonai hesiai laganidia 70 ia haorea bona idia abidadama henia diba!

Bema oi be kara maoromaoro tauna, moale do oi davaria. To bema Dirava ena matana ai oi be ia kara maoromaoro tauna, noho hanaihanai ahuna do oi abia. Hari iseda negai, tomadiho momokani taudia “momo herea” idia hegaegae noho maino bona noho namo tanobada matamatana ai do idia vareai, bona edia ura be do idia mauri hanaihanai. (Apokalupo 7:⁠9) Ena be inai tanobada oromana bona Satani ese ita ia hahekwakwanaia bona ia tohoa, to iseda kara ia goeva bona iseda tomadiho maoromaoro karana ita badinaia noho be gau badana. Namona be oi laloatao, Iehova ia henia siahuna amo do oi kwalimu diba!​—Filipi 4:​13.

Salamo torea tauna Davida ese ita ibounai ia hagoadaia, ia be hari bona nega vairai ia herevalaia, ena tanikiu gurigurina Iehova dekenai, ia gwau: “Oi ese lau do oi durua, badina be lau ese kara maoromaoro lau karaia noho. Oiemu vairana dekenai, oi ese lau do oi haginia noho, ela bona hanaihanai. Lohiabada, Israela ena Dirava be do ita hanamoa! . . . Amen bona Amen!”​—Salamo 41:​12, 13.

[Footnotes]

[Picture on page 4]

Ena be Davida ese kerere ia karaia, to ia hahedinaraia ia idia abidadama henia diba

[Picture on page 5]

Iesu be abidadama henia tauna ena haheitalai hereadaena

[Picture on page 7]

Kara maoromaoro karana ese moale bada ia havaraia