Eregabe Neganai Maduna Huaia
HARI inai “metau dikadia momo” negana ai, eregabe taudia be hetoho aukadia momo idia davaria. (2 Timoteo 3:1) Dina ta ta ai mata-bodaga, kuku ania, bona dika havaraia karadia idauidau idia hagoadaia herevadia idia noho. Baibel ena taravatu idia badinaia taudia be reana idia kirikirilaia, badina be momo idia karaia bamona idia karaia lasi, bona reana Keristani taudia do idia laloa bema idia haheauka lasi edia mauri do ia auka lasi.
Lagani 607 B.C.E. bamona ai, Ieremia be inai ia torea: “Tau ta ese ia eregabe neganai, maduna metau do ia huaia, unai be namo.” (Lalohisihisi Ena Ane 3:27) Iena hereva ena anina be dahaka? Anina be ta ia eregabe neganai hetoho idauidau ia haheaukalaia karana ese ia durua tau badadia edia maduna idauidau huaia totona do ia hegaegae. Ena be ita ura lasi hisihisi, to eregabe bona tau badadia ese idia reaia diba lasi. (2 Timoteo 3:12) To abidadama noho ena namo idauidau ese kara maoromaoro negea karana dainai ta ese ia abia laga-ani sisina ena namo ia hereaia momokani.
Bema oi be eregabe ta, oiemu abidadama tohoa karadia oi haheaukalaia mai emu momokani ida. Bema oi idia tohoa kara kerere ta lalonai oi vareai totona, emu kara maoromaoro oi negea lasi. Ena be reana unai nega ai oi haheauka be mai ena hekwarahi, to gabeai emu mauri lalonai emu lalo-hekwarahi do idia momo lasi. Iesu ia gwauhamata, ia gwau: “Egu huaia auna be emui pagana dekenai do umui atoa, . . . vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mataio 11:29, 30.
Oiemu mauri lalonai Baibel ena hakaua herevadia badinaia ena maduna oi abia dae. Bema unai bamona oi karaia, mauri dalana namona do oi abia hari inai nega lalonai, bona vaira neganai do oi lalohisihisi lasi. Baibel ena hereva hegeregerena, “tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
This article is repeated in w98 6/01.