Iehova Ena Ura Idia Karaia
Tama Sina Edia Abidadama Ena Davana Idia Abia
ISRAELA taudia dekenai natuna mero ta ia vara be moale bada gauna. Unai ena anina be edia bese do ia hesiriu noho bona edia bese ese tano do ia biagua noho. To lagani 1593 B.C.E. bamona ai, toana be natuna mero ta havaraia be reana hahenamo ia mailaia lasi, to dika do ia havaraia. Badina be dahaka? Badina be Aigupito edia Farao be ia gari, ia naria teritori lalonai Iuda taudia idia hutuma idia lao haraga dainai, vadaeni hahegani ia henia vara matamata memero ibounai do idia hamasea.—Esodo 1:12, 15-22.
Unai ala-ala negana lalonai Amarama bona Iokebeda, Heberu tauna ta bona ena hahine, be beibi merona ta mai ena hairai idia abia. Ita laloa diba, Farao ena hahegani idia laloa neganai edia moale be gari ese ia hanaia. To, Amarama bona Iokebeda ese edia beibi merona idia itaia neganai, edia lalona idia hadaia auka ia do idia rakatania lasi, herevana dahaka do ia vara.—Esodo 2:1, 2; 6:20.
Mai Abidadama ida Idia Kara
Amarama bona Iokebeda ese hua toi lalonai edia beibi idia hunia. (Esodo 2:2) To, unai idia karaia neganai edia mauri idia haboioa diba, badina Heberu taudia bona Aigupito taudia edia noho gabudia be kahirakahira. Bema ta idia davaria Farao ena hahegani ia hanaia toho, davana be do idia hamasea—bona unai beibi do ia mase danu. Vadaeni, unai lalo-goada tama sina be dahaka idia karaia diba idia bona edia natuna idia mauri totona?
Iokebeda ese papyrus haida ia gogoa. Papyrus be siriho goadana ta, baubau bamona, bona ena kahana be toi bona ena bada be imana kwakikwaki ena bada bamona. Ia tubu daekau diba mita 6 bamona. Aigupito taudia ese idia gaukaralaia pepa, geda, palai, tamaka, bona bouti mai edia metau lasi, idia karaia totona.
Iokebeda ese unai au amo bosea namona ta ia karaia, ia hegeregere ena natuna ia udaia totona. Bena pisi ia atoa bosea ia hagoadaia totona bona ranu koua totona. Iokebeda ese ena beibi be bosea lalonai ia udaia bena Naila Sinavaina lalonai siriho edia huanai ia atoa.—Esodo 2:3.
Beibi Idia Davaria
Iokebeda ena natuna kekeni, Miriama, be daudau lasi gabuna ta ai ia naria, dahaka do ia vara ia itaia totona. Vadaeni Farao ena natuna kekeni ia mai Naila Sinavaina dekenai do ia digu totona.a Reana Iokebeda ia diba unai lohia kekenina be unai kahanai ia digu hanaihanai dainai bosea be unuseniai ia atoa, do ia itaia haraga gabuna unai. Vadaeni, Farao ena natuna kekeni ese siriho edia huanai bosea ia itaia, bena ena hesiai hahinena ta ia siaia do ia mailaia totona. Bosea lalonai ia tai noho merona ia itaia neganai, ia hebogahisi. Reana ia lalo-parara unai be Heberu beibi ta. To unai natuna namo herea do idia hamasea totona ia henia be hegeregere lasi. Faroa ena natuna ena kara be hebogahisi dainai sibona lasi, to reana Aigupito taudia edia lalohadai badana dainai danu; idia laloa guba dekenai do idia vareai bema hebogahisi kara namodia momo idia karaia edia mauri ibounai lalonai.b—Esodo 2:5, 6.
Miriama be gabu sisina daudau amo idia ia itaia noho, vadaeni Farao ena natuna kekeni dekenai ia lao. Ia henanadai, ia gwau: “Lau lao, ani? Heberu hahine ta dohore lau davaria, ia ese mero do ia ubua.” Farao ena natuna kekeni ia gwau: “Oi lao.” Miriama ia heau lao ena sinana dekenai. Daudau lasi, Iokebeda ia mai Faroa ena natuna kekeni dekenai. Unai lohia kekenina ese ia hamaoroa, ia gwau: “Inai mero oi abia lao, do oi ubua lauegu. Lau ese iena davana do lau henia oi dekenai.” Reana unai nega ai Farao ena natuna kekeni ia diba Iokebeda be beibi ena sinana.—Esodo 2:7-9.
Iokebeda ese ena natuna ia naria ela bona rata ia rakatania.c Unai nega ai dala namodia momo idia noho ia ese Dirava momokanina, Iehova, ena sivarai ia hadibaia. Bena Iokebeda ese mero ia abia lao Farao ena natuna kekeni dekenai, bona ia ese ena ladana ia hatoa Mose, anina be “ranu dekena amo lau abia isi.”—Esodo 2:10.
Ita Dibaia Gauna
Amarama bona Iokebeda ese nega kwadogina idia gaukaralaia namonamo edia natuna dekenai tomadiho goevana ena hakaua herevadia idia hadibaia totona. Hari inai negai tama sina be unai bamona idia karaia be namo. Oibe, idia karaia be gau badana. Satani Diabolo be “laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:8) Ia ura abia taudia be matamata taudia—memero bona kekeni—idia be Iehova ena Witness taudia namodia ai idia lao diba taudia. Idia edia lagani be maragi to ia hebogahisi henidia lasi! Unai dainai, aonega tama sina be edia natuna maragidia idia hadibaia Dirava momokanina, Iehova, do idia gari henia.—Aonega Herevadia 22:6; 2 Timoteo 3:14, 15.
Amarama bona Iokebeda ese edia natuna idia hunia karana be Heberu 11:23 ese ia gwauraia abidadama karana. Unai Dirava gari henia taudia ruaosi, mero ena tamana bona sinana, be Iehova ena hahemauri siahuna dekenai idia abidadama dainai idia ura lasi mero idia negea, unai dainai hahenamo idia abia. Namona be ita danu ita hahedinaraia Iehova ena taravatu bona hakaua herevadia ita badinaia momokani, bona ita abidadama momokani Iehova ese ia koua lasi karadia be gabeai iseda namo bona moale do idia havaraia.—Roma 8:28.
[Footnotes]
a Aigupito taudia ese Naila Sinavaina idia tomadiho henia, idia gwau ia be natuna havaraia diravana. Idia laloa ena ranu be mai ena siahu natuna havaraia siahuna do ia henia bona mauri do ia halataia.
b Aigupito taudia idia laloa ta ia mase neganai ena lauma be Osiris vairanai ena kara hamomokania herevadia do ia gwauraia, hegeregere do ia gwau, “Lau ese tau ta lau hahisia lasi,” “Lau ese rata inua maragidia edia amo rata lau koua lasi,” bona “Lau ese paraoa be hitolo tauna dekenai lau henia bona inua gauna be ranu mase tauna dekenai lau henia.”
c Guna negadia ai, natudia momo be nega daudau rata idia inua, hari hegeregerena lasi. Samuela ena mauri lagani be reana toi neganai rata ia rakatania, bona Isako be mauri lagani ima bamona neganai rata ia rakatania.