Duahia Taudia Edia Henanadai

Baibel ese taravatu utua taudia hamasea karana, kota ese ia gwauraia davana unai, be edena bamona ia gwauraia?

Momokani, ita dekenai idia vara gaudia dainai eiava iseda mauri dalana dainai, reana ita ta ta ibounai be mai eda lalohadai unai kara dekenai. To, ita be Iehova ena Witness taudia dainai, namona be Dirava ena lalohadai taravatu utua taudia hamasea karana dekenai ita abia dae, bona politikol dalanai unai kara idia hepapahuahulaia karadia amo ita gini siri.

Hereva kwadogi ai anina korikori be inai, Dirava be ena Hereva lalonai ia gwau lasi taravatu utua tauna hamasea karana be kerere.

Idaunegai momokani Iehova ese iena lalohadai unai kara dekenai ia gwauraia, Genese karoa 9 lalonai ita duahia hegeregerena. Unai karoa ese Noa bona ena bese ia herevalaia; idia be taunimanima iboudiai edia tubudia. Lagatoi amo idia raka lasi murinai, Dirava ia gwau animal do idia ania diba​—⁠anina be, idia alaia bona edia rara idia bubua gaudia, do idia ania diba. Bena, Genese 9:5, 6 ai, Dirava ia gwau: “Bema tau ta ese emui mauri rarana ia habubua, lau be davana do lau henia, do ia mase. Bema boroma ta ese umui ia alaia, lau ese do lau hamasea. Bona bema tau ta ese taunimanima ta ia alaia neganai, lau ese davana do lau henia. Daika ese taunimanima ta ia alaia, be taunimanima ese do idia alaia. Badina be Dirava ese taunimanima ia karaia, iena toana bamona.” Unai amo Iehova ia gwau ala-ala taudia idia alaia mase be maoro.

Dirava ese Israela taudia be iena bese bamona ia kara henidia neganai, iena taravatu utua karadia dikadia ma haida idia karaia taudia edia davana danu be mase. Numera 15:30 ai inai hereva badana ita duahia: “Bema Israela tauna o Israela dekenai ia noho idau tauna ese mai hekokoroku bona mai laloa dika danu kara kerere ia karaia, inai be ia ese Lohiabada ia matauraia lasi. Vadaeni unai bamona tauna be do umui alaia mase.”

To Keristani ekalesiana idia haginia murinai dahaka ia vara? Ita diba Iehova ese taunimanima be gwaumaoro ia henia sibodia edia gavamani do idia haginia, bona ia gwauraidia siahu bada taudia. Baibel ese Keristani taudia ia hagania unai bamona gavamani taudia do idia kamonai henidia, bena ia gwau: “Gavamani be Dirava ena hesiai gaukara ia karaia, unai dainai ia ese oi do ia hanamoa bona durua. To bema kara dika oi karaia neganai, gavamani dekenai do oi gari, badina ia be mai ena siahu momokani, bona oi do ia panisia. Ia be Dirava ena hesiai tauna, ia ese kara dika tauna ena davana do ia henia.”​—⁠Roma 13:​1-4.

Unai ena anina be gavamani be mai edia gwaumaoro taravatu utua kara dika rohorohodia idia karaia taudia do idia hamasea, a? Petero Ginigunana 4:15 ena hereva amo ita gwau diba, oibe. Unuseniai aposetolo tauna ese ena tadikaka ia hamaorodia, ia gwau: “Ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hanamoa ta lasi.” Umui itaia a, ia gwau, ‘ia namo lasi bema umui ta ia hisihisi, ia ala-ala dainai’? Petero ia gwau lasi gavamani be mai edia maoro lasi ala-ala tauna do idia hahisia iena kara dikana dainai. Lasi, to ena hereva amo ia hahedinaraia ala-ala tauna ese panisi do ia abia be maoro. Do idia hamasea be panisi maorona danu, a?

Oibe. Paulo ena hereva Kara karoa 25 lalonai ese unai ia hahedinaraia goevagoeva. Iuda taudia ese Paulo idia samania, idia gwau edia Taravatu ia utua. Tuari biaguna ese ena dibura tauna, Paulo, be Roma ena gavana dekenai ia siaia lao neganai, Kara 23:29 ena hereva hegeregerena, ia gwau: “Unuseni lau davaria edia taravatu dainai Paulo idia samania, to ia hamasea badina, o dibura ruma koua badina ta lau davaria lasi.” Lagani rua murinai Paulo be Gavana Festo vairanai ia gini. Kara 25:8 ia gwau: “Paulo be ia haere, ia gwau, ‘Lau be Iuda taudia edia taravatu lau makohia lasi, Dubu Helaga lau hadikaia lasi, bona [Kaisara] dekenai lau kerere lasi.’ ” To hari, ia ese kara dika tauna ena davana henia karana, hamasea karana danu, ia herevalaia mani umui laloa. Kara 25:​10, 11 dekenai ia gwau:

“Paulo ia gwau, ‘Lau be Kaisara ena kota vairana dekenai lau gini noho. Inai be lauegu kota korikori. Lau be Iuda taudia dekenai kerere ta lau karaia lasi, oi danu oi diba. Bema taravatu lau makohia, o kara ta lau karaia, unai kara davana be mase, vadaeni, lau idia alaia mase be namo. To bema edia samani hereva be momokani lasi, tau ta be hegeregere lasi edia imana dekenai lau ia atoa. Lau be Kaisara dekenai lau noinoi. Iena kota dekenai lau lao be namo.’ ”

Paulo be unai gavana, gavamani ese ia abia hidi tauna, vairanai ia gini neganai, ia gwau Kaisara be mai ena maoro kara dika taudia edia davana do ia henidia, anina be ia hamasedia diba. Ia gwau lasi bema ia kara kerere dainai idia panisia, unai be kerere. Bona, ia gwau lasi Kaisara ese ala-ala taudia sibodia ia hamasea be maoro.

Momokani, Roma ena kota dalana ia maoromaoro momokani lasi; bona taunimanima edia kota daladia hari inai negai be idia maoromaoro momokani lasi. Unai nega lalonai bona hari inai nega lalonai danu, kerere lasi taudia haida idia samania bena idia panisia. Pilato ese Iesu ia herevalaia bamona, ia gwau: “Lau be mase ena badina ta ia dekenai lau davaria lasi. Lau ese do lau botaia, vadaeni do lau ruhaia.” Oibe, ena be gavamani ena siahu tauna ia gwau Iesu be kerere lasi, to unai kerere lasi tauna idia hamasea.​—⁠Luka 23:​22-25.

Unai bamona kara gagevadia dainai Paulo eiava Petero idia gwau lasi taunimanima panisia totona idia hamasedia be kerere. To, Dirava ena lalohadai unai kara dekenai be inai: Gavamani taudia idia do noho lalonai, idia be mai edia tuari kaiana, ‘kara dika taudia edia davana do idia henia’ totona. Unai ena anina be taunimanima panisia totona idia hamasedia diba. To bema inai tanobada ena gavamani ta be ala-ala taudia do idia hamasea ena maoro idia hepapahuahulaia, Keristani taudia korikoridia idia naria namonamo, unai kara lalonai idia vareai lasi. Kerisendom ena haroro taudia hegeregerena idia kara lasi, to idia be unai hepapahuahu amo idia gini siri.