“Hereva Momokani Ena Dava Bada Gaudia”

“Hereva momokani ena dava bada gaudia.” Nigeria dekenai Iehova ena Witness taudia edia brens opesi dekenai idia siaia revarevana ese edia magasin rua ia herevalaia neganai unai hereva ia gwauraia. Tau matamata ta ese unai ia torea, ia gwau:

“Mai egu tanikiu bada ida umui lau tore henia emui gaukara namona dina ta ta ibounai ena mauri daladia umui gwauraia Gima Kohorona bona Awake! magasin amo dainai.

“Lauegu mauri lagani be 17. Lagani gunanai reidio steiseni ta ese sivarai torea totona tahua karana ta idia hegaegaelaia, bona hereva kwarana be ‘Lalokau Ena Toana be Mahuta Hebou Karana Sibona Lasi​—AIDS Gorerena be Momokani.’ Sivarai ta ta ena lata be hereva 400 do ia hanaia be namo. Kwalimu tauna be davana moni 1,000 naira [K16.75] do idia henia. Idia gwau taunimanima do idia toretore kwalimu davana dainai sibona lasi, to ma gau ta idia dibaia danu. . . .

“Inai magasin rua lalodiai AIDS gorere idia herevalaia herevadia momo lau davaria. Lalokau ia kikilaia herevadia momo idia noho. Awake! ena August 8, 1978 gauna, ena lalohadai namodia momo lau gaukaralaia.

“Egu sivarai lau siaia vareai murinai hua rua idia do ore lasi bena emai haere idia halasia. Lau hoa, badina ibounai lau gunalaia, lau kwalimu inai gabu Cross River bona Akwa Ibom edia kahana ibounai lalonai!

“Lau gaukaralaia herevadia ibounai be unai magasin amo. Inai hekwakwanai bona hisihisi tanobadana lalonai, nega korikori ai Iehova ese hereva maorodia ita ia henia be gau hereadaena momokani. Ita Keristani taudia momokanidia ita diba lalokau ese mahuta hebou karana ia hereaia momokani. Bona ita goeva noho, bona kara maoromaoro maurina ese gorere idauidau, hegeregere AIDS amo ita ia naria.

“Lauegu tanikiu herevana ia doko diba lasi emui hereva momokani ena dava bada gaudia umui karaia hanaihanai dainai. Mani Iehova ese emui gaukara ia hanamoa inai magasin namo hereadia umui hegaegaelaia noho lalonai.”