Daika Ena Gwauhamata Dekenai Oi Tabekau Diba?
LAGANI 1893 ai, taunimanima edia mauri dalana herevalaia taudia 74 be Chicago World’s Fair dekenai idia hebou, vaira negana idia kikilaia totona. (Unai gabu ena laulau be ataiai.) Lagani 100 do idia ore bona vaira negana lagani 1993 idia laloa neganai, idia gwau inai gaudia do idia vara: “Taunimanima momo be lagani 150 do idia mauri diba.” “Dibura ruma edia namba do ia diho bona headava hadokoa karana do idia laloa lasi.” “Gavamani ena heau dalana do ia auka lasi, badina be bese ta ena namo korikorina be hanaihanai auka lasi dalana ia tahua.”
Unai hegeregerena, lagani 1967 ai, buka ta ladana The Year 2000 be vaira gaudia ia gwauraia, ia gwau: “Lagani 2000 ia abia neganai, kompiuta be ‘taunimanima bamona’ diba abia daladia ai, bona reana edia gaukara hairaidia bona gau idauidau karaia daladia ai, taunimanima ida do idia hegeregere, o idia tohotohoa, eiava do idia hereaia.” “Davana maragi robot masini ese ruma gaukara kahirakahira ibounai do idia karaia lalohadaina . . . be lagani 2000 ia abia neganai, toana be anina do ia vara.”
Taunimanima ese vaira negana idia itaia diba lasi karana ia hedinarai goevagoeva bema Dirava ena diba ida ita hahegeregerea neganai. Hegeregere, ataiai ai gwauraia herevadia be Baibel ese lagani 2,000 bamona gunanai iseda nega ia gwauraia guna daladia ida mani oi hahegeregerea, ia gwau: “Taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea.”—2 Timoteo 3:1-5.
Unai Baibel ena peroveta herevana, “nega ena dokona” ia gwauraia herevana unai, be iseda nega ai idia guguru vadaeni herevadia momo amo, ia be ta sibona. Dirava ena Hereva ia peroveta ia gwau, Iesu ia noho vadaeni “toana” ena kahana idauidau be tuari, aniani lasi, gorere, tano mareremarere, bona tanobada hegegemadai Dirava ena Basileia sivaraina namona harorolaia gaukarana.—Mataio 24:3-14; Luka 21:11.
Dirava ena gwauhamata edia anina idia vara momokani dainai, lagani handred momo gunanai Baibel torea tauna ta ia gwau: “Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.”—Iosua 23:14.
Oibe, ita abia dae diba kahirakahira Dirava ena gwauhamata iboudiai edia anina do idia vara. Dirava ena Basileia ese gorere, taravatu utua karadia, drag ania karana, hitolo, bona tuari do ia haorea—tanobada ibounai be paradaiso ai do ia lao. (Salamo 37:10, 11, 29; Apokalupo 21:3, 4) Oi abia dae diba unai gwauhamata be do ia guguru! Unai be ita ia Havaraia Tauna, “ia koikoi diba lasi” Diravana, ena amo ia mai.—Tito 1:2; Heberu 6:13-19 itaia.
[Picture Credit Line on page 32]
Cleveland State University Archive