Dirava Momokanina Oi Abia Dae Diba, A?

BRITAIN ena iunivesiti ena haroro tauna badana ta ia gwau: “Oi be Keristani ta ai oi lao totona Dirava oi abidadama henia be anina lasi . . . Ita be hari lalohadai idauna ena kahana ta, to lagani 2000 murinai dubu lalonai guna idia abia dae Diravana do ia noho lasi.” Ia ese Sea of Faith oreana ena kahana ai unai hereva ia gwauraia, Britain ena pris taudia 100 bamona be unai orea idia durua. Unai “Dirava be lasi lalohadaina idia abia Keristani taudia” be mai goada ida idia gwau tomadiho be taunimanima ese idia havaraia gauna, bona idia ta ia gwau, Dirava be “lalohadai ta sibona.” Lauma Diravana ta be edia lalohadai danu ia hegeregere lasi.

Lagani 1960 ia lao 1969 lalonai idia herevalaia momo herevana be: “Dirava be ia mase.” Unai ese lagani 1900 ia do mai lasi negana lalonai ia noho aonega German tauna ladana Friedrich Nietzsche ena lalohadai ia hahedinaraia, bona unai ese matamata taudia momo edia dala ia kehoa idia sibodia edia ura gaudia idia karaia totona, idia sihari kava bona drag idia ania kava bona gau ta ese ia koudia lasi. To unai bamona ura kwalimu maurina ese matamata taudia dekenai moale bona mauri namona ia henidia, a?

Unai lagani lalodiai danu, Anglikan bisop ta, John A. T. Robinson, ese heiriheiri ia havaraia buka ladana Honest to God ia halasia. Ia danu idia gaukara hebou taudia momo ese idia badu henia badina ia gwau Dirava ‘be taunimanima edia mauri lalonai idia vara gaudia edia kahana ta sibona.’ Tomadiho ia stadilaia profesa Keith Ward ia henanadai, ia gwau: “Dirava abidadama henia karana be guna gari kava dainai idia karaia karana, bona hari aonega taudia ese idia negea, a?” Sibona ena henanadai ia haerelaia, ia gwau: “Hari inai negai tomadiho lalonai gau ma ta be anina bada lasi, to guna tomadiho lalonai Dirava idia tomadiho henia dalana idia karaia lou be mai anina bada.”

Hisihisi Bona Taunimanima Ia Laloa Diravana

Taunimanima ia laloa Diravana idia abia dae taudia momo ese idia vara dika badadia bona hisihisi be ia ida idia hahegeregerea diba lasi. Hegeregere, March 1996 ai, natudia maragidia 16 bona edia tisa be Dunblane, Scotland ai tau ta ese ia pididia mase. Ia dara doko hahinena ta ia gwau: “Dirava ena ura lau lalo-pararalaia lasi vaitani.” Unai dika idia lalohisihisilaia karana be unai natudia edia sikuli murimurina ai palaoapalaoa ida idia atoa kadi ta ese ia hahedinaraia. Kadi ese hereva kwadogina sibona ia gwauraia, “DAHAKA DAINAI?” Haere totona Dunblane Cathedral ena haroro tauna ia gwau: “Unai kara gwauraia hedinarai dalana be lasi. Ita diba lasi dahaka dainai unai bamona ia vara.”

Gabeai unai lagani tamona lalonai, Church of England ena haroro tauna matamatana, taunimanima momo ese idia ura bada tauna, be ta ese ia alaia mase. Church Times niuspepa ia gwau dubu idia lao taudia idia hoa Liverpool ena diakono badana ena hereva idia kamonai neganai, ia gwau, “Dirava ena iduara lau botaia bona lau henanadai dahaka dainai? dahaka dainai?” Unai haroro tauna danu be taunimanima ia laloa Diravana amo hahegoada herevadia ia gwauraia lasi.

Vadaeni, ita be dahaka do ita abia dae? Dirava momokanina abia dae karana be maoro. Unai dala amo ataiai ai gwauraia henanadai edia haere do ita abia diba. Oi ai boiria gabeai herevana ese ia gwauraia gaudia do oi duahia totona.

[Picture on page 3]

Kadi dekenai henanadai ia gwau, “Dahaka dainai?”

[Credit Line]

NEWSTEAM No. 278468/Sipa Press