Iehova Oi Dibaia—Ia be Ia Noho Momokani Diravana

HINDU tomadiho ena lalohadai Dirava dekenai be ma tomadiho daladia haida ida ia hahegeregerea neganai, India amo Dr. Radhakrishnan ia itaia: “Heberu taudia edia Dirava be idau. Ia be ia noho momokani Diravana bona histori lalonai kara haida ia karaia bona tanobada lalonai idia idau gaudia bona idia vara gaudia ia laloa bada. Ia be ita danu ia herevahereva Mauri Gauna ta.”

Baibel lalonai ia noho Diravana ena ladana Heberu gado ai be יהוה, nega momo idia hahanaia “Iehova.” Ia be dirava iboudiai ma haida ia hanaidia. Ia dekenai dahaka ita diba? Baibel negadiai ia ese edena bamona taunimanima ia kara henidia?

Iehova Bona Mose Idia Herevahereva Hebou

Ena be Mose ese Dirava ia itaia lasi, to Iehova bona iena hesiai tauna Mose be idia hetura heheni namo herea bona idia herevahereva hebou. (Deuteronomi 34:10; Esodo 33:20) Ia be mero matamata neganai, Mose ena kudouna be Israela taudia danu, idia be Aigupito dekenai igui hesiai taudia. Ia be Farao ena ruma bese tauna ta bamona ia noho maurina ia dadaraia, “ia laloa Dirava ena bese taudia danu do ia hisihisi hebou be namo. Kara dika ena moale, nega daudau lasi idia noho gaudia, be ia ura lasi.” (Heberu 11:25) Unai dainai Iehova ese Mose dekenai mai anina bada hahenamo momo ia henia.

“Aigupito taudia edia aonega ibounai Mose dekenai idia hadibaia” badina ia be Farao ena ruma bese tauna ta. (Kara 7:22) To Israela besena ia hakaua totona, ia ese manau bona boga-auka karadia do ia badinaia be namo. Midiana tanona dekenai lagani 40 mamoe naria tauna bamona ia noho neganai unai ia karaia. (Esodo 2:​15-22; Numera 12:⁠3) Ena be Mose ese Iehova ia itaia lasi, to Iehova ese ia sibona bona ena ura ia gwauraia hedinarai, bona aneru amo Dirava sibona ese Mose dekenai Taravatu 10 ia henia. (Esodo 3:​1-10; 19:​3–20:20; Kara 7:53; Heberu 11:27) Baibel ese ita ia hamaoroa ‘Mose be Lohiabada danu ia herevahereva.’ (Esodo 33:11) Momokani, Iehova sibona ia gwau: “Ai herevahereva neganai, lauegu uduna dekenai lau hereva, iena uduna dekenai ia hereva, ai hereva hunia lasi.” Ena be ia itaia diba lasi, to Mose ese ia noho momokani Diravana ida hetura karana namona ia moalelaia!​—⁠Numera 12:⁠8.

Israela besena ena sivarai ibounai danu, Mose ese Taravatu ibounai bona ena dika bona hahenamo ibounai ia toredia. Danu ia be ma hahenamo namona ta ia abia​—⁠Genese bukana ia torea. Ena bese taudia be unai buka ena dokona kahana ena sivarai idia diba bona unai dainai ia torea be auka lasi. To Mose be edeseni amo taunimanima edia sivarai ibounai ena matamana ia abia? Sedira Mose dekenai idaunegai toretore haida idia noho, iena tubudia ese idia naria namonamo gaudia, bona ia ese unai ia gaukaralaia. To danu, reana ia torea gaudia be taunimanima ese idia hamaoroa eiava Iehova ese ia hahedinaraia. Dirava idia matauraia taudia be nega daudau lalonai Mose be Dirava ida ia hetura namo herea karana idia abia dae.

Iehova​—⁠Elia Ia Diba Dirava be Ia Noho Momokani

Peroveta tauna Elia danu ia diba Iehova be ia noho momokani Diravana. Elia be tomadiho momokanina ia goadalaia bona Iehova ena hesiai gaukara ia karaia ena be Bala, Kanana taudia edia dirava badana, tomadiho henia taudia ese idia dagedage bona idia inai henia.​—⁠1 King Taudia 18:​17-40.

Ahaba, Israela ena King, bona iena adavana, Iesebele, ese Elia idia tahua idia hamasea totona. Mase garina ia gari dainai, Elia ia heau lao Bere Sieba dekenai, Mase Davara ena west kahana dekenai. (1 King Taudia 19:​1-4) Iehova ese Elia ia rakatania, a? Iena kamonai hesiai tauna ia laloa bada lasi, a? Reana Elia be unai bamona ia laloa, to ena lalohadai be kerere! Gabeai, Iehova ese metairametaira ia hereva henia, ia nanadaia ia gwau: “Elia e, dahaka oi karaia noho iniseni?” Iehova ese iena siahu ia hahedinaraia murinai, gado ta ese Elia ia hamaoroa, ia gwau, “Elia e, dahaka oi karaia noho iniseni?” Iehova ese Elia ia laloa bada karana ia hahedinaraia unai amo iena kamonai hesiai tauna ia hagoadaia. Dirava be mai ena gaukara haida Elia totona, bona Elia be mai ura ida unai gaukara ia karaia! Elia be mai kamonai ida ena gaukara ia karaia ore, Iehova, ena noho momokani Diravana ena ladana ia hahelagaia.​—⁠1 King Taudia 19:​9-18.

Israela besena ia dadaraia murinai, Iehova be tanobada dekenai iena hesiai taudia ida ia herevahereva lasi. To ita gwau lasi unai ena anina be ia ese taunimanima ia lalodia lasi. Lasi. Iena lauma helaga amo, ia hakaudia bona ia hagoadadia iena gaukara lalonai. Hegeregere, aposetolo Paulo, guna ena ladana idia gwauraia Saulo, ena haheitalai ita laloa.

Lauma Helaga ese Paulo Ia Hakaua

Saulo be Kilikia tanona ena siti badana Taso amo ia mai. Iena tama sina be Heberu taudia, to ia be Roma tauna ai ia vara. To, Saulo be Farisea taudia edia taravatu aukadia danu ia diba. Gabeai, Ierusalema dekenai, “Gamaliela” ese ia hadibaia, ia be Taravatu ia hadibaia tauna badana.​—⁠Kara 22:​3, 26-28.

Saulo be Iuda taudia edia sene hahediba herevadia ese ia hakaua kerere dainai, ia ese Iesu Keriso ena murinai idia raka taudia ia dagedage henidia. Ia ese Stefano, aposetolo taudia edia negai idia alaia mase Keristani tauna ginigunana, ena mase ia durua. (Kara 7:​58-60; 8:​1, 3) Gabeai, ia hahedinaraia ena be guna ia be Keriso ena ladana ia hadikaia bona ia be dagedage bona dika ia havaraia tauna, ‘to Dirava ese ia hebogahisi henia, badina be abidadama ia do diba lasi, bona ena kara ena dika ia do diba lasi dainai.’​—⁠1 Timoteo 1:⁠13.

Saulo ia ura dikadika Dirava do ia hesiai henia. Damaseko ena dala dekenai Saulo ese ena kara ia haidaua murinai Iehova ese dala badana ai ia gaukaralaia. Ia toreisi lou vadaeni Keriso ese Anania, Keristani hahediba tauna ginigunana ta, ia hamaoroa Saulo do ia durua. Unai murinai Iehova ena lauma helaga ese Paulo (unai be Saulo Roma ladana bona ia be Keristani tauna ai ia lao neganai unai ladana ia gaukaralaia) ia hakaua Europe bona Asia Minor edia kahana dekenai ia haroro nega daudau lalonai bona anina namona ia havaraia.​—⁠Kara 13:​2-5; 16:​9, 10.

Hari inai negai ita itaia diba lauma helaga be unai bamona haroro gaukara ia hakaua, a? Oibe, ita itaia diba.

Dirava be Lasi Lalohadaina ese Dirava be Taunimanima Ia Laloa Karana Ia Koua Lasi

Joseph F. Rutherford be Watch Tower Society ena presiden iharuana. Ia be lagani 1906 ai ia bapatiso bona Bible Student ta ai ia lao​—⁠unai neganai Iehova ena Witness taudia be unai ladana idia gaukaralaia​—⁠unai lagani murinai idia abia hidi Society ena loea gaukara ia karaia, bena January 1917 ai ena presiden ai ia lao. To, guna unai loea tauna matamatana be Dirava be lasi lalohadaina ia badinaia. Edena bamona ia be Iehova ena hesiai Keristani tauna ai ia lao?

July 1913 ai, Rutherford be Springfield, Massachusetts, U.S.A. dekenai idia karaia International Bible Students Association ena hebouhebou ena seamani. Unai gabu ena niuspepa, The Homestead, ese Rutherford ia hereva henia, bona ena sivarai be unai hebouhebou laloatao totona idia halasia buklet lalonai idia printaia lou.

Rutherford ese ia hahedinaraia ia headava gwauraia neganai, ia be Baptist dubu tauna, to ia adavaia gwauraia kekenina be Presbyterian dubu kekenina. Rutherford ena pasto ia gwau, do ia adavaia “kekenina be hel lahina dekenai do ia lao badina ia bapatiso lasi bona Rutherford be maoromaoro do ia lao guba badina ia bapatiso dainai, ena laloa maoromaoro lalona ese unai ia dadaraia bona ia ese Dirava be lasi lalohadaina ia abia dae.”

Rutherford be lagani momo lalonai tahua namonamo karana amo Dirava momokanina ia abidadama henia lou. Ia gwau ia be inai hereva ese ia hakaua: “Lalona ese ia abia dae diba lasi gauna be kudouna ese ia abia dae lasi be maoro”. Rutherford ia gwau, namona be Keristani taudia “idia diba maoromaoro Baibel amo idia dibaia gaudia be momokani. Namona be idia abia dae gauna ena badina idia diba be namo.”​—⁠2 Timoteo 3:​16, 17 itaia.

Oibe, hari inai negai danu Dirava be lasi lalohadaina ia abia dae tauna, eiava Dirava ena noho ia daradaralaia tauna ese Baibel ia stadilaia diba, ena abidadama ia hagoadaia diba, bona Iehova Dirava ida ia turana karaia diba. Watch Tower ese ia halasia, Diba ese Mauri Dekenai Ita Ia Hakaua Lao bukana ia stadilaia namonamo murinai, tau matamatana ta ia gwau: “Inai stadi lau hamatamaia neganai lau be Dirava lau abia dae lasi, to hari lau davaria Baibel amo diba lau abia neganai egu lalohadai ibounai lau haidaua. Lau ese Iehova lau dibaia bona ia dekenai lau tabekau matamaia.”

“Kavakava Taudia” Bona Dirava

A Dictionary of the Bible bukana lalonai Dr. James Hastings ia gwau: “TG [Heberu Revarevadia] idia torea taudia ta ia laloa lasi Dirava ia mauri noho hamomokania o hepapahuahu herevana ta do ia torea. Idaunega tanobada taudia ese Dirava ia noho herevana idia abia dae, bona unai hamomokania totona idia hepapahuahu lasi. Taunimanima ibounai ese edia lalona dekenai unai idia abia dae.” To ita gwau lasi, unai ena anina be unai neganai taunimanima ibounai be Dirava idia gari henia. Lasi, unai be momokani lasi. Salamo 14:1 bona 53:1 ese “kavakava taudia” idia herevalaia, be edia lalona dekenai idia gwau, “Dirava be ia noho lasi.”

Ia gwau Dirava ia noho lasi kavakava tauna be edena bamona tauna? Ia be aonega dalanai ia kavakava lasi. To, Heberu herevana na·valʹ ese kara maoromaoro diba lasi karana ia gwauraia. Profesa S. R. Driver be The Parallel Psalter lalonai ia gwau, kavakava tauna ena kerere be “ia lalohadai maoromaoro diba lasi karana amo lasi, to kara maoromaoro bona tomadiho karana ia abia dae lasi, ia be kavakava badina dahaka be maoro bona dahaka be kerere ia diba lasi bona ia laloa lasi.”

Salamo torea tauna ese unai lalohadai amo ia vara kara dika ia gwauraia: “Idia ibounai be dika, kara mirodia idia karaia vadaeni. Kara namo karaia tauna be ta lasi.” (Salamo 14:⁠1) Dr. Hastings ena hereva dokona ai ia gwau: “Tanobada taudia be Dirava idia laloa lasi bona edia kara dika ena davana idia abia lasi dainai, idia kara gageva bona idia kara bodaga bada.” Idia ese Dirava ia ura lasi karadia idia badinaia bona badina idia ura lasi ia ese edia kara ena davana do ia henia dainai, ia noho momokani Diravana idia dadaraia. To hari danu unai bamona lalohadai be kavakava bona anina lasi, salamo torea tauna ese lagani 3,000 idia ore vadaeni ia torea negana hegeregerena.

Hadibaia Hereva Ita Ia Laloa Diravana Amo

Mani iseda hereva ginigunana lalonai ita gwauraia henanadai ita lalodia lou. Dahaka dainai taunimanima momo ese taunimanima ia laloa Diravana be hari inai tanobada lalonai idia vara hisihisi bada karadia ida idia hatamonaia diba lasi?

Baibel lalonai “Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia” herevadia idia noho. (2 Petero 1:21) Ia sibona ese taunimanima ia laloa Diravana, Iehova, ia gwauraia hedinarai ita dekenai. Ia ese ita ia hadibaia danu kara dika tauna ta, taunimanima ese idia itaia diba lasi tauna, ia be mai ena siahu taunimanima edia lalona ia biagua bona ia gunalaia tauna ta ia noho​—⁠Satani Diabolo. Momokani, bema ita laloa Dirava momokanina ia noho lasi, vadaeni edena bamona ita abia dae diba Diabolo eiava Satani danu ia noho momokani?

Lauma helaga ena siahu henunai aposetolo Ioane be inai ia torea: “Iena ladana be Diabolo bona Satani. Ia be tanobada taudia ibounai ia koia noho.” (Apokalupo 12:⁠9) Gabeai Ioane ia gwau: “Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.” (1 Ioane 5:19) Unai atai herevadia ita duahia neganai, Iesu ena hereva, Ioane ese ena Evanelia bukana dekenai ia torea herevana ita laloatao: “Tanobada ena lohia ia mai noho. Ia be lau dekenai mai ena siahu lasi.”​—⁠Ioane 14:⁠30.

Unai Baibel hahediba herevana be hari taunimanima ese idia abia dae lalohadaina amo ia idau vaitani! Niuspepa ta ladana Catholic Herald ia gwau: “Hari inai negai taunimanima be idia ura lasi momokani Diabolo idia herevalaia. Iseda daradara negana bona saiens diba negana ese Satani ia kokia.” To, Iesu ese ia idia ura hamasea taudia be mai goada danu ia gwau henidia: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.”​—⁠Ioane 8:⁠44.

Baibel ese Satani ena siahu ia herevalaia dalana be maoro. Ia hahedinaraia dahaka dainai, ena be taunimanima momo idia ura maino bona noho namo dekenai idia noho, to tanobada be inai heheni karana, tuari, bona dagedage bada amo ia honu, hegeregere Dunblane dekenai ia vara bamona (rau 3 bona 4 dekenai ai torea sivaraina). Bona danu, ita be Satani sibona danu ita heai lasi. Baibel ese hadibaia herevadia ma haida ia gwauraia diabolo bona demoni dainai​—⁠idia be lauma dikadia guna Satani idia bamoa bona taunimanima idia hakaudia kerere bona idia hadikadia. (Iuda 6) Nega momo Iesu Keriso ese unai lauma siahudia ida ia heai, bona ia hadareredia diba.​—⁠Mataio 12:​22-24; Luka 9:​37-43.

Dirava momokanina, Iehova, ena palani be kara dika taudia tanobada amo do ia kokidia bona Satani bona ena demoni edia gaukara do ia hadokoa vaitani. Iehova ita diba dainai, ita ese iena gwauhamata gaudia ita abidadama henidia diba. Ia gwau: “Dirava ta lasi ese lau ia gunalaia, bona lauegu murinai danu, dirava ta do ia hedinaraia lasi. Lau inai, lau sibona be [“Iehova,” NW]. Lau sibona be Hamauria Tauna, hamauria tauna ma ta be lasi.” Iehova be taunimanima ia laloa Diravana, ia idia diba, idia tomadiho henia, bona idia hesiai henia taudia dekenai. Ia sibona amo mauri ita abia diba.​—⁠Isaia 43:​10, 11.

[Picture on page 7]

Lagani 1700 murinai idia karaia laulau dekenai lauma helaga ena siahu henunai Mose be Genese 1:1 ia torea ena toana ia hedinarai

[Credit Line]

From The Holy Bible by J. Baskett, Oxford

[Picture on page 8]

Iesu Keriso ese nega momo demoni ia hadareredia