Paradaiso Ena Sivarai Namona Tahiti Ai

TAHITI! Unai ladana oi kamonai neganai gabu idauna ta oi laloa. Laulau penia taudia bona toretore taudia Paul Gauguin, Robert Louis Stevenson, bona Herman Melville, ese South Sea Islands edia siahu, hairai, bona maino idia gwauraia bona idia penia laulau dainai, taunimanima momo be unai gabu idia lalohadailaia.

South Pacific ena French Polynesia motumotudia 120 amo, Tahiti be motumotu badana ta. Ena be taunimanima momo edia lalona ai unai South Sea motumotuna be paradaiso ida idia hahegeregerea, to Tahiti ena taunimanima be kahirakahira do ia mai paradaisona ma ta ena sivarai idia kamonaia be namo. (Luka 23:43) Hari, Tahiti dekenai Iehova ena Witness taudia edia namba ibounai be 1,918, bona idia bisi bada herea badina taunimanima 220,000 dekenai Dirava ena Basileia ena sivarai namona idia harorolaia, paradaiso korikorina do ia havaraia Tahiti dekenai sibona lasi, to tanobada ibounai lalonai.​—⁠Mataio 24:14; Apokalupo 21:​3, 4.

Lagani momo lalodiai Watch Tower Society ena Fiji brens opesi ese Tahiti ena haroro gaukara ia naria, to ena daudau be kilomita 3,500. Ia daudau herea dainai ia auka bona tubu daekau dalana be haraga lasi. Unai dainai April 1, 1975 ai, Tahiti dekenai brens opesi ta idia haginia, bona unai ese Keristani taudia korikoridia edia gaukara unai teritori lalonai ia haidaua. To unai ia do vara lasi neganai dahaka ia vara, bona Tahiti dekenai haroro gaukara be edena bamona ia matamaia?

Matamanai Edia Gaukara Ia Maragi

Tahiti dekenai, Basileia ena sivarai namona be lagani 1930 murinai idia kamonai matamaia, bona unai motumotu dekenai idia noho taudia be Baibel idia matauraia bada, bona idia kamonai namonamo. To, gavamani ese ia taravatua bona koua gaudia ma haida dainai, lagani 1956 bamona ai, unai motumotu dekenai Witness taudia be lasi. Unai neganai Agnès Schenck, America dekenai ia noho Tahiti hahinena, ia laloa ena adavana bona natuna ida do ia giroa Tahiti dekenai. Edena bamona unai ia vara ia herevalaia.

“Lagani 1957 Los Angeles distrik hebouhebouna ai, Tadikaka Knorr [unai neganai Watch Tower Society ena presiden tauna] ia gwau Tahiti dekenai Basileia pablisa taudia be lasi. Unai neganai lagani ta lau bapatiso vadaeni, bona lau gwau, ‘Ita lao Tahiti dekenai!’ Famili rua, Neill bona Carano ruma besedia, aiemai turadia, ese egu hereva idia kamonaia. Ai idia hamaoroa idia ura ai danu idia lao, to aiemai moni be momo lasi. Egu adavana be nega daudau vadaeni ia gorere, bona egu natuna merona ia do maragi. Unai dainai aiemai gabu ai rakatania be auka. Aiemai kongregesen badinai ia noho kongregesen ma ta lalonai idia noho turadia ese ai ura karaia gauna idia kamonai, bona ai dekenai moni bona ruma kohudia idia siaia. Bena May 1958 ai, bouti ta ai guia bona ai lao Tahiti dekenai, mai emai kohu idauidau bona bedi dabuadia 36 danu!

“Tahiti dekenai ai ginidae neganai, egu hemami be lau be idau gabu hahinena, badina unai motumotu be lagani 20 gunanai lau rakatania. Ai haroro matamaia, to mai aonega ida ai karaia badina aiemai Keristani gaukara idia taravatua. Magasin ai hunia, bona Baibel sibona ai gaukaralaia. Matamanai Gima Kohorona bona Awake! magasin ena sabskripsen idia abia vadaeni taudia sibona dekenai ai haroro.

“Lagani 1958 intenesenel hebouhebouna New York City dekenai ia ore murinai, Clyde Neill bona David Carano, mai edia ruma bese taudia ida, ese ai idia hedavari henia Tahiti dekenai. Ai haroro hebou bona taunimanima ai boiria tadikaka edia ruma ai hereva ta idia kamonaia totona. Metairametaira unai gaudia idia heau namonamo matamaia, bona Baibel stadi grup ta, taunimanima 15 ida, ai hamatamaia. Hua toi murinai, Neill bona Carano ruma besedia edia gwaumaoro pepana ia ore dainai idia lao. Unai tadikaka idia laloa namona be idia do lao lasi neganai, idia hegeregere vadaeni kamonai taudia do idia bapatisoa guna. Egu hahenamo ta be unai bapatiso herevana ginigunana lau hahanaia. Unai neganai motumotu taudia 8 be edia gwauhamata Iehova dekenai idia hamomokania bapatiso amo. Unai murinai Neill bona Carano ruma besedia be United States dekenai idia giroa lou.

“Aiemai haroro gaukara ai karaia noho. Grup maragidia ai karaia bona adorahi kahana ai taunimanima ai vadivadi henia. Nega momo, kamonai taudia ida ai herevahereva ela bona hanuaboi momokani. Nega haida Protestan haroro taudia ida danu ai herevahereva. Lagani 1959 ai, kongregesen ginigunana ai haginia. Bena, lagani 1960 dekenai, ai ia hamoalea bada gauna ia vara, gavamani be Iehova ena Witness taudia dekenai gwaumaoro idia henia. Unai guna laganidia dekenai, moale bada bona lauma dalanai ai idia hagoadaia gaudia momo ai davaria. Iehova ese ai abia hidi gauna, tadikaka be momo lasi gabuna dekenai do ai lao, ia hanamoa bada.” Hari Taihu Schenck ena mauri lagani be 87, bona mai abidadama ida Iehova ia hesiai henia noho ena kongregesen lalonai.

Gaukara Ia Heau Noho

Lagani 1969 ai, Witness taudia rua France amo, Jacques bona Paulette Inaudi, idia siaia Tahiti dekenai, spesel painia gaukara karaia totona. Jacques ia laloatao: “Tahiti dekenai ai ginidae neganai, pablisa 124 sibona idia noho, kongregesen tamona, Papeete dekenai, bona spesel painia rua be Vairao, motumotu ena diho kahanai idia noho.” Unai diho kahana bona Tahiti ihuanai, tano ta ese ia hakapua. Unai neganai “Maino Tanobada Dekenai” Intenesenel Hebouhebouna be kahirakahira do idia karaia. Jacques ma ia gwau: “Unai be nega ginigunana hebouhebou ta lau hegaegaelaia. English gado program ai palanilaia idia vadivadi taudia totona, bona Basileia ane karaia totona miusiki gadaralaia taudia ai tahua, bona drama rua ai hegaegaelaia. Unai gaukara ibounai be pablisa 126 sibona idia karaia. Lau diba momokani Iehova ese kahana badana ia karaia.” Idia mai taudia edia namba be 488, motumotu taudia idia hoa. Idia momo dekenai, unai be nega ginigunana tano ma haida amo idia mai Witness taudia ida idia hedavari totona.

Daudau lasi murinai, Jacques Inaudi idia abia hidi sekit naria gaukara ia karaia totona. Ia be motumotu idauidau ia vadivadi henia, ia itaia kamonai taudia be momo to unai taudia do idia durudia diba Basileia pablisa be momo lasi. Jacques ia gwau: “Unai dainai famili momo lau hagoadaia namona be idia lao unai tadikaka be momo lasi motumotu dekenai. Metairametaira, unai motumotu dekenai sivarai namona idia halasia.” Tadikaka Inaudi be sekit naria gaukara ia karaia lagani 1969 ia lao 1974 lalonai, bona hari Tahiti ena kongregesen ta dekenai elda gaukara ia karaia.

Tadikaka Inaudi ena hagoadaia herevana ia kamonai tauna ta be Auguste Temanaha, lagani 1958 ai idia bapatiso taudia 8 amo ia be ta. Dahaka ia vara ia gwauraia lou. “Lagani 1972 ai, sekit naria tauna, Jacques Inaudi, ese ai ia hagoadaia Huahine, Society Islands ena grup ta, Leeward Islands, ena motumotu ta dekenai ai lao be namo. Lau kara haraga lasi badina guna Baibel duahiduahi sibona lau karaia kongregesen lalonai bona lau laloa lau hegeregere lasi unai bamona maduna huaia totona. To herevana, Tadikaka Inaudi ese lau ia hamaoroa loulou, ‘Gari lasi, oi karaia diba!’ Gabeai aiemai lalona ai hadaia. Unai dainai, lagani 1973 dekenai aiemai kohu ibounai ai hoihoilaia bona aiemai natudia maragidia toi ida ai lao Huahine dekenai.

“Ai ginidae neganai, lau davaria egu maduna be hebou ibounai do lau hamatamaia​—⁠Gima Kohorona Stadi, Haroro Sikuli, bona gau ma haida. Ia auka, to Iehova ese ai ia gimaia bona ia durua. Nega haida ai ia durua, noho gabuna ai davaria totona. Bena, dagedage taudia edia grup ta ese Witness taudia be motumotu amo idia lulua gwauraia neganai, gavamani tauna ta ia gini toreisi bona ai ia durua. Momokani, unai nega ibounai lalonai Iehova ese ai ia gimaia.” Hari Huahine dekenai kongregesen rua idia noho​—⁠France gado kongregesen ta mai ena pablisa 23 bona Tahiti gado kongregesen ta mai ena pablisa 55.

Lagani 1969 ai, Hélène Mapu idia siaia motumotu ena diho kahana ai spesel painia gaukara ia hamatamaia totona. Hélène ia gwau: “Unai diho kahana gabuna ai kamonai taudia be momo, bona nega daudau lasi murinai, Baibel stadi momo lau hamatamaia.” Karaharaga kongregesen maragina ta idia haginia Vairao dekenai, to elda taudia be lasi. Gabeai, Colson Deane, ena noho gabuna Papara ena daudau be kilomita 35, be heduru ia henia. Tadikaka Deane ia gwau: “Vairao dekenai hesiai gaukara ai karaia totona, gau badana be aiemai nega ai haria namonamo. Lau be Faaa dekenai lau gaukara, unai be kilomita 70 Vairao amo, motumotu ena kahana ai. Moni gaukara lau haorea murinai, karaharaga lau giroa egu ruma dekenai, egu famili lau abia, bena ai lao Vairao dekenai. Gabeai, egu moni gaukara dainai, aiemai noho gabuna ai haidaua bona Faaa dekenai ai noho. Vairao Kongregesen do ai durua noho diba, a? Ai ura dikadika aiemai tadikaka ai durua, unai dainai ai laloa do ai lao noho. Hebou dinadia ai nega momo aiemai ruma dekenai do ai giroa lasi ela bona hanuaboi momokani, badina motuka lasi taudia ai durua totona edia ruma dekenai ai abidia lao guna. Lagani ima lalodiai unai ai karaia. Hari ai moale bada kongregesen hani idia noho unai kahana dekenai, bona unai dinadia ai laloatao neganai ai moale.”

Tahiti ese Brens Opesi Ia Abia

Lagani 1974 ai, Tahiti dekenai Basileia pablisa taudia edia namba ia bada daekau bona idia be 199. Murina laganina ai N. H. Knorr bona F. W. Franz, unai neganai Watch Tower Society ena presiden bona vais presiden, ese French Polynesia idia vadivadi henia. Idia itaia namona be French Polynesia ena haroro gaukara be Fiji amo idia naria noho lasi, ena daudau be kilomita 3,500, to Tahiti amo idia naria be namo. Unai dainai, April 1, 1975 ai, Tahiti brens opesi idia hamatamaia, bona sekit naria tauna, Alain Jamet, idia abia hidi brens naria gaukara karaia totona.

Lagani haida idia ore vadaeni, Tadikaka Jamet ese Iehova ena hahenamo namodia ia gwauraia. “Lagani 1975 amo, ai hekwarahi bada sivarai namona be aiemai teritori ena motumotu iboudiai dekenai ai mailaia, unai gabu ena bada be Western Europe tano ena bada hegeregerena. Idia vara gaudia dainai ai moale. Lagani 1983 ai pablisa taudia edia momo be 538. Unai lagani ai, Paea dekenai ruma ta ai haginia, ia be brens opesi bona Betele Rumana. Hari pablisa taudia be 1,900. Society Islands dekenai kongregesen 30 idia noho, Austral Islands dekenai kongregesen tamona bona grup maragina ta idia noho, Marquesas dekenai kongregesen ta bona grup maragidia rua idia noho, bona Tuamotu bona Gambier Islands dekenai grup maragidia haida idia noho. Kingdom Hall matamata momo idia haginia noho​—⁠toi be Marquesas dekenai bona 7 be Tahiti dekenai​—⁠hebou dekenai idia mai noho matamata taudia momo durua totona. Idia ore lagani 20 lalodiai, Iehova ese aiemai gaukara Tahiti lalonai ia hanamoa.”

Gaukara Momo Ia Do Noho

French Polynesia dekenai kamonai taudia momo idia noho, bona ai laloa pablisa taudia edia namba do ia bada daekau. March 23, 1997 ai, French Polynesia ena gabu idauidau ai, taunimanima 5,376 be Iehova ena Witness taudia ida idia hebou, Iesu ena mase ena Memorial karaia totona. Lauma dalanai unai kamonai taudia durua totona, iseda Baibel bukadia bona magasin be inai gabu ena gado haida dekenai ai hahanaia. Tahiti gado sibona lasi, buka bona magasin ai karaia Paumotu gado ai, Tuamotu Archipelago bona Marquesian North bona South dekenai idia gaukaralaia gadona ta.

Aiemai pablisa taudia edia namba ia bada daekau noho bona ekspiriens namodia ai davaria dainai, Tahiti ena Basileia pablisa taudia idia durua Iehova ena lalokau bona haheauka idia laloa bada totona, bona “ia ura taunimanima ibounai ese mauri do idia davaria, bona hereva momokani do idia diba,” South Sea ena motumotu daudauna dekenai idia noho taudia danu. (1 Timoteo 2:⁠4) Iehova ena Witness taudia Tahiti dekenai bona French Polynesia ena motumotu ma haida dekenai ese Iehova ena gwauhamata idia abidadama henia momokani: “Daudau idia noho [motumotudia] ese lau totona idia naria noho. Idia naria noho, lau ese idia do lau hamauria totona.”​—⁠Isaia 51:⁠5.

[Map on page 26]

Tahiti Brens Opesi ese French Polynesia ia naria

AUSTRALIA

[Picture on page 26]

Lauri kahana amo ela bona idiba kahana: Alain Jamet, Mary-Ann Jamet, Agnès Schenck, Paulette Inaudi, bona Jacques Inaudi

[Picture on page 27]

Tahiti brens opesi