Hetoho Idia Vara, to Emu Abidadama Oi Dogoatao Auka!

“Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona.”​—⁠IAMESI 1:⁠2.

1. Edena bamona gaudia idia vara, to Iehova ena taunimanima ese mai abidadama ida ia idia hesiai henia bona unai idia “moalelaia”?

IEHOVA ena taunimanima, ena Witness taudia unai, be mai edia abidadama ida ia idia hesiai henia bona unai idia “moalelaia.” (Deuteronomi 28:47; Isaia 43:10) Hetoho momo idia vara, to unai bamona idia karaia. Ena be hekwakwanai momo idia davaria, to inai hereva ese idia ia hagoadaia: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.”​—⁠Iamesi 1:​2, 3.

2. Iamesi revarevana ia torea tauna be edena bamona tauna?

² Lagani 62 C.E. bamona ai, Iesu Keriso ena tadina, hahediba tauna Iamesi, ese unai hereva ia torea. (Mareko 6:⁠3) Iamesi be elda tauna ta Ierusalema kongregesen dekenai. Momokani, ia, Petero, bona Ioane “edia toana be ekalesia gunalaia taudia”​—⁠idia goada, bona idia be kongregesen durua bada taudia. (Galatia 2:⁠9) Lagani 49 C.E. bamona ai, “aposetolo bona kwarana taudia idia hebou” bona kopina utua karana idia herevalaia neganai, Iamesi ese Baibel ena hereva hegeregerena heduru herevana ia henia bona unai hakaua oreana ginigunana ese idia abia dae.​—⁠Kara 15:​6-​29.

3. Aposetolo taudia edia nega ai, Keristani taudia ese dahaka hekwakwanai haida idia davaria, bona edena dala ai Iamesi ena revareva amo namo bada ita davaria diba?

³ Lauma dalanai Iamesi be mamoe naria tauna namona dainai, ‘mamoe edia noho ia diba namonamo.’ (Aonega Herevadia 27:23) Ia diba unai nega ai Keristani taudia ese hetoho aukadia idia davaria. Haida ese edia laloa dalana idia hamaoromaoroa be namo, badina taga taudia sibona idia kara namo henia. Idia haida dekenai, tomadiho be idia badinaia kava karana ta sibona. Haida be edia gwau-edeede malana amo dika idia havaraia. Tanobada ena lauma ese idia ia hadikaia, bona idia momo idia haheauka lasi bona guriguri idia goadalaia lasi. Momokani, Keristani taudia haida be lauma dalanai idia gorere. Iamesi ena revareva be idia ia hagoadaia dalana ai unai bamona gaudia ia herevalaia, bona aposetolo taudia edia nega ai hegeregerena, hari inai negai unai sisiba be mai anina. Namo do ita davaria bema unai revareva ita duahia neganai ita laloa ta ese ia torea ita dekenai.a

Hetoho Ita Davaria Neganai

⁴ Iamesi ese hetoho laloa dalana maorona ia hahedinaraia ita dekenai. (Iamesi 1:​1-4) Ia be Dirava ena Natuna ena tadina ia gwauraia lasi, to mai manau ida sibona ia gwauraia “Dirava bona Lohiabada Iesu Keriso edia hesiai tauna.” Iamesi ese lauma Israela ena “iduhu 12 taudia” (NW) ia tore henia, idia be matamanai dagedage dainai, ‘tano idauidau ai idia noho.’ (Kara 8:1; 11:19; Galatia 6:​16; 1 Petero 1:⁠1) Oibe, ita Keristani taudia idia dagedage henia, bona “dibagani idauidau” ita davaria danu. Bema ita laloatao ita haheaukalaia hetoho ese iseda abidadama idia hagoadaia, ita dekenai idia vara neganai, do ita laloa “inai be moale gauna sibona.” Bema hetoho negadia ai Dirava ita badinaia noho, do ia noho daudau moalena do ita abia.

5. Iseda hetoho be dahaka dahaka, bona dahaka ia vara bema mai kwalimu ida idia ita haheaukalaia?

⁵ Ita davaria hetoho be taunimanima momo ese idia davaria danu. Hegeregere, reana nega momo ita gorere. Dirava be hoa karadia ia karaia lasi hari, to bema unai gorere haheaukalaia totona ita be guriguri amo aonega bona lalo-goada ita noia, unai guriguri do ia haerelaia. (Salamo 41:​1-3) Danu, ita Iehova ena Witness taudia be kara maoromaoro ita badinaia dainai dagedage ita davaria. (2 Timoteo 3:​12; 1 Petero 3:​14) Unai bamona hetoho ita haheaukalaia mai eda kwalimu ida neganai, iseda abidadama ita hamomokania, ia be “idia tohoa” vadaeni gauna. Bona iseda abidadama ia kwalimu neganai, ‘haheauka ia havaraia noho.’ Hetoho idia hagoadaia vadaeni abidadama ese ita do ia durua gabeai do idia vara hetoho ita haheaukalaia totona.

⁶ To, Iamesi ia gwau: “Do umui haheauka noho, ela bona inai haheauka emui lalona dekenai ia goada momokani.” Bema hetoho ta be Baibel ia taravatua karadia amo karaharaga ita koua toho lasi, haheauka be iseda lalona ai do ia goada bona do ia hamomokania ita be Keristani taudia bona abidadama dekenai ita dabu lasi. To momokani, bema hetoho ese manoka ta ia hahedinaraia, namona be Iehova ena heduru ita tahua unai ita hanaia totona. To edena bamona bema unai hetoho be sihari kava ena hedibagani? Namona be unai hekwakwanai ita gurigurilaia bena iseda guriguri hegeregerena ita kara. Reana iseda moni gaukara gabuna do ita haidaua be namo eiava kara ma haida do ita karaia Dirava ita badinaia noho totona.​—⁠Genese 39:​7-9; 1 Korinto 10:⁠13.

Aonega Tahua Karana

7. Hetoho ita abia neganai, edena dala ai heduru ita abia diba?

⁷ Ita daradaralaia hetoho ta ita davaria neganai, Iamesi ia hahedinaraia dahaka ita karaia be namo. (Iamesi 1:​5-8) Iehova ese ita do ia gwau henia lasi bema aonega dekenai ita dabu bona mai eda abidadama ida guriguri amo unai ita noia. Heduru do ia henia bena unai hetoho be dala maorona ai do ita laloa bona do ita haheaukalaia. Reana siri namodia do ita davaria Baibel stadilaia negadia ai, eiava tadikaka ese do ia hahedinaraia ita dekenai. Reana Dirava be dala ta do ia kehoa bena do ita itaia dahaka ita karaia be namo. Reana Dirava ena lauma ese ita do ia hakaua. (Luka 11:13) To unai bamona namo davaria totona, namona be Dirava bona ena taunimanima ida ita noho.​—⁠Aonega Herevadia 18:⁠1.

⁸ Iehova ese aonega do ia henia hetoho do ita haheaukalaia totona bema ita noinoi neganai ita ‘abidadama sibona, bona ita daradara lasi.’ Ia daradara tauna be “davara ena hurehure bamona. Lai ese ia doria lao, doria mai, ia be gini gabuna lasi.” Bema lauma dalanai ita marere lao marere mai, ‘gau ta Iehova dekena amo do ita abia diba’ lalohadaina be anina lasi. Namo lasi iseda guriguri eiava kara namo ma ta ai ita “laloa rua” bona ita “badinaia diba lasi.” Namona be Iehova, aonega ena Badina, ita abidadama henia.​—⁠Aonega Herevadia 3:​5, 6.

Taga Bona Ogogami Taudia Idia Moale Diba

9. Dahaka dainai ita Iehova tomadiho henia taudia ita moale?

⁹ Bema ita dekenai ia vara hetoho ta be ita ogogami, namona be inai ita laloa noho, taga bona ogogami Keristani taudia idia moale diba. (Iamesi 1:​9-​11) Iesu murinai idia do raka lasi neganai, horoa taudia momo be kohu bada lasi taudia bona tanobada taudia ese idia matauraidia lasi. (1 Korinto 1:​26) To Dirava ese idia ia “abia isi” bona Basileia do idia abia dainai idia moale. (Roma 8:​16, 17) To, guna hemataurai bada idia abia taga taudia be Dirava ese ‘ogogami taudia ia halaoa,’ badina tanobada taudia be Keriso murinai idia raka taudia idia matauraia lasi momokani. (Ioane 7:​47-​52; 12:​42, 43) To ita Iehova ena hesiai taudia ibounai ita moale diba, badina tanobada ena kohu bona ena hemataurai be anina lasi bema ita moalelaia lauma kohu ida ita hahegeregerea. Bona ita moale bada herea badina ita bogaraginai dagi heagilaia karana ita abia dae lasi!​—⁠Aonega Herevadia 10:22; Kara 10:​34, 35.

¹⁰ Iamesi ese ita ia durua bena ita lalo-parara kohu bona tanobada dekenai dagi bada abia be iseda mauri ena badina lasi. Dina “ena siahu” dainai palaoapalaoa ia mase bona ena hairai ese unai ia koua lasi hegeregerena, taga tauna ena kohu ese ena mauri ia halataia diba lasi. (Salamo 49:​6-9; Mataio 6:​27) Reana unai taga tauna be iena bisinesi o “iena gaukara ia karaia noho neganai,” do ia mase. Unai dainai, gau badana be ‘Dirava dekenai gau momo ita henia’ bona mai eda goada ibounai ida Basileia gaukara do ita durua.​—⁠Luka 12:​13-​21; Mataio 6:​33; 1 Timoteo 6:​17-​19.

Hetoho Idia Haheaukalaia Noho Taudia Idia Moale

11. Hetoho idia davaria to edia abidadama idia dogoatao auka taudia edia helaro be dahaka?

¹¹ Ita ogogami eiava ita taga be herevana, moale davaria dalana tamona be idia vara hetoho ita haheaukalaia. (Iamesi 1:​12-​15) Bema hetoho ita haheaukalaia mai eda abidadama ida, do ita moale, badina Dirava vairanai ia maoro karana ita karaia be mai ena moale. Edia abidadama idia dogoatao auka ela bona idia mase horoa Keristani taudia be “kwalimu ahuna,” mase diba lasi maurina guba dekenai, do idia abia. (Apokalupo 2:​10; 1 Korinto 15:50) Bema tanobada helarona ita abia bona Dirava ita abidadama henia noho, tanobada paradaisona dekenai mauri hanaihanai do ita abia. (Luka 23:43; Roma 6:23) Iehova ese ia idia abidadama henia taudia ibounai ia kara namo henia!

¹² Ita gwau diba Iehova ese hisihisi amo ita ia tohoa, a? Lasi. Namo lasi ita gwau: “Dirava ese lau ia dibagania noho.” Iehova ese ita do ia veria lasi kara dika karaia totona, to bema mai iseda abidadama ida ita gini goada, ia ese ita do ia durua bona goada do ia henia hetoho ita haheaukalaia totona. (Filipi 4:​13) Dirava ia helaga, unai dainai kara dika dadaraia urana idia hamanokaia gaudia be ita vairanai do ia atoa lasi. Bema helaga lasi dalana ta dainai kara dika ta ita karaia, Dirava ita samania lasi, “badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” Ena be Iehova ese hetoho ta ia koua lasi badina ia diba unai amo matahakani namona do ita abia, to mai ena ura dikana ida ita ia dibagania lasi. (Heberu 12:​7-​11) Satani ese ita do ia dibagania kara dika do ita karaia totona, to Dirava ese unai kara dika tauna amo ita ia hamauria diba.​—⁠Mataio 6:​13.

¹³ Namona be hanaihanai ita guriguri, badina gau ta dainai ura dikana ia daekau diba bona ita ia veria kara dika ita karaia totona. Iamesi ia gwau: “To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho.” Ita gwau diba lasi Dirava ena kara dainai ita kara dika bema iseda kudouna dekenai ura dikana ita dogoatao noho. Bema ura dikana ita kokia haraga lasi, ‘ia rogorogo bamona,’ kudouna dekenai ia ita ubua, bena “unai murinai kara dika ia havaraia.” Unai kara dika ita karaia murinai, “mase ia havaraia.” Unai dainai, namona be iseda kudouna ita gimaia bona ura dikadia ita dadaraia. (Aonega Herevadia 4:​23) Dirava ese Kaino ia hamaoroa kara dika ese ia biagua gwauraia, to ia dadaraia lasi. (Genese 4:​4-8) Unai dainai, bema ita be Baibel ia taravatua dalana ta ita tahua matamaia be edena bamona? Bema Keristani elda taudia ese iseda dala idia hamaoromaoroa toho, Dirava dekenai kara dika do ita karaia lasi totona, namona be idia ita tanikiu henia.​—⁠Galatia 6:⁠1.

Dirava​—⁠Gau Namodia Edia Badina

¹⁴ Namona be ita laloatao Iehova ese hetoho ia havaraia lasi, to ia be gau namodia edia Badina. (Iamesi 1:​16-​18) Iamesi ese ena tadikaka ia gwauraia “lauegu varavara e, lauegu lalokau,” bona ia hahedinarai Dirava be “gau namodia ibounai, bona harihari gaudia namodia momokani ibounai” Henia Tauna. Iehova ena harihari gaudia iboudiai, tauanina gaudia bona lauma gaudia, be gau “namodia momokani,” idia goevadae. “Dirava dekena amo,” o Dirava ena noho gabuna guba amo idia diho mai. (1 King Taudia 8:​39) Iehova ese “diari ibounai ia karaia”​—⁠dina, hua, bona hisiu. Ia ese lauma diarina bona hereva momokanina ia henia ita dekenai. (Salamo 43:3; Ieremia 31:35; 2 Korinto 4:⁠6) Dirava ena gau namodia henia karana ia goadalaia negana be tamona lasi, hanaihanai ia goada herea; ia be dina hegeregerena lasi, dina ia marere neganai dibura gabudia idia haidaua bona dina tubua sibona ai ena goada be herea momokani. Bema iena Hereva bona ‘hesiai tauna mai ena kamonai bona mai ena kara maoromaoro’ amo ia henia lauma durua gaudia ibounai ita gaukaralaia namonamo, ita do idia hagoadaia hetoho ita hanaia diba totona.​—⁠Mataio 24:⁠45.

¹⁵ Dirava ena harihari gaudia amo, namo hereana ta be dahaka? Ia ese lauma helaga amo lauma natudia ia havaraia, bona unai be sivarai namona eiava “hereva momokani” ena hereva hegeregerena. Lauma dalanai idia vara lou taudia be “anina ginigunadia ta” (NW) bona Dirava ese taunimanima amo idia ia abia hidi guba dekenai ‘Basileia ta bona Dirava ena hahelagaia taudia’ ai idia lao totona. (Apokalupo 5:​10; Efeso 1:​13, 14) Reana Iamesi be Nisan 16 ai, bali ena anina ginigunadia idia henia karana, unai be Iesu ia toreisi lou dinana danu, bona lauma helaga ia bubua dinana, Pentekoste ai, idia henia uiti beredi rua ia laloa. (Levitiko 23:​4-​11, 15-​17) Bema unai gaudia ia laloa, Iesu be unai anina ginigunadia bona ia ida do idia lohia taudia be “anina ginigunadia ta.” Bema iseda helaro be tanobada ai do ita noho be edena bamona? Iseda helaro ita laloa noho karana ese ita do ia durua “harihari gaudia namodia momokani ibounai” ia Henia Tauna ita abidadama henia noho, ia ese dala ia kehoa Basileia ena lohia henunai ita mauri hanaihanai totona.

‘Ena Hereva Oi Badinaia’

¹⁶ Herevana hari iseda abidadama idia tohoa gaudia ita davaria eiava lasi, namona be ‘Dirava ena hereva ita badinaia.’ (Iamesi 1:​19-​25) Namona be Dirava ena Hereva ita “kamonai haraga,” bona mai eda ura ida ita badinaia. (Ioane 8:​47) To, ‘hereva ita gwauraia haraga lasi,’ iseda hereva ita laloa namonamo guna be namo. (Aonega Herevadia 15:28; 16:23) Reana Iamesi ena hereva ena anina be hetoho idia vara neganai, namo lasi karaharaga ita gwau idia be Dirava amo. Ita ia sisiba henia danu, ia gwau: “Do umui badu haraga lasi. Badina be taunimanima edia badu ese Dirava ena kara maoromaoro ia havaraia diba lasi.” Bema ta ena hereva ese ita ia habadua, namona be ita ‘karaharaga lasi’ bena hereva dikana amo do ita haere henia lasi. (Efeso 4:​26, 27) Badu haraga karana ese ita ia hahekwakwanaia diba bona ma haida ia tohoa diba, bona unai kara dainai kara maoromaoro Diravana ia abidadama henia tauna ena kara namodia do ita havaraia diba lasi. Danu, bema ita be ‘mai eda aonega,’ ‘ena badu ia hakerua tauna’ ai do ita lao, bona unai ese iseda tadikaka bona taihu do ia veria mai ita dekenai.​—⁠Aonega Herevadia 14:29.

¹⁷ Namona be “miro karadia ibounai”​—⁠Dirava ese ia inai henia gaudia bona badu idia havaraia gaudia iboudiai​—⁠ita rakatania. Danu, namona be ‘laloa dikadia, bona kara dikadia ibounai ita rakatania.’ Namona be ita ibounai be iseda mauri amo tauanina bona lauma hamiroa karadia ibounai ita kokia. (2 Korinto 7:1; 1 Petero 1:​14-​16; 1 Ioane 1:⁠9) Iseda kudouna bona lalona amo dika ita kokia karana ese ita ia durua ‘iseda lalona dekenai ia hadoa hereva [hereva momokanina], do ita abia dae, mai eda manau danu.’ (Kara 17:​11, 12) Herevana nega daudau eiava nega daudau lasi ita be Keristani taudia, to namona be iseda lalona dekenai Baibel ena hereva momokani hadoa karana ita koua lasi. Dahaka dainai? Badina Dirava ena lauma helaga amo, unai hadoa herevana ese “mauri matamata” ia havaraia bona ita ia hamauria diba.​—⁠Efeso 4:​20-​24.

¹⁸ Edena dala ai ita hahedinaraia unai hereva ese ita ia hakaua? ‘Dirava ena hereva ita kamonai kava lasi, to ita badinaia’ karana amo unai ita hahedinaraia. (Luka 11:28) “Badinaia” taudia edia abidadama ese gaukara idauidau ia havaraia, hegeregere Keristani haroro gaukara idia karaia goadagoada bona Dirava ena taunimanima edia hebou ai haere idia henia loulou. (Roma 10:​14, 15; Heberu 10:​24, 25) Hereva ia kamonai sibona tauna be “sibona ena vairana ena toana hevarivari lalonai ia itaia bamona.” Ena toana ia itaia, bena ia raka siri bona ia laloaboio dahaka ia hanamoa be namo. Ita be ‘hereva ita badinaia’ taudia dainai, Dirava ena “taravatu namona bona goevagoeva momokani” ita stadilaia namonamo bona ita kamonaia, iena hahegani iboudiai ita badinaia. Ita moalelaia ura kwalimu be kara dika bona mase edia igui amo ia idau vaitani, badina mauri dekenai ita ia hakaua lao. Unai dainai namona be hanaihanai ‘inai taravatu ita itaia namonamo bona ita badinaia noho.’ Mani inai oi laloa! Ita be hereva ‘ita kamonai kava lasi, to gaukara ita karaia momokani’ taudia dainai, Dirava ena lalo-namo do ita moalelaia.​—⁠Salamo 19:​7-​11.

Tomadiho Karana Sibona Ita Karaia Lasi

19, 20. (a) Iamesi 1:​26, 27 ena hereva hegeregerena, tomadiho goevana ena anina be dahaka ita karaia? (b) Tomadiho goevana karadia haida be dahaka dahaka?

¹⁹ Dirava ena lalo-namo abia totona, namona be ita laloatao tomadiho momokanina be vaia ita karaia loulou karana ta sibona lasi. (Iamesi 1:​26, 27) Reana ita laloa ita be ‘Keristani taudia namodia,’ to mai anina bada gauna be Iehova ena lalohadai ita ta ta dekenai. (1 Korinto 4:⁠4) Kerere badana ta be ta ese ena “malana ia naria diba lasi.” Ita be sibona ita koia bema ita laloa Dirava ese iseda tomadiho ia abia dae, to ma haida edia ladana ita hadikaia, koikoi herevadia ita halasia, eiava dala idauidau ai iseda malana ita gaukaralaia kerere. (Levitiko 19:16; Efeso 4:​25) Momokani, ita ura lasi badina ta dainai iseda “Keristani kara be anina lasi” bona Dirava ese ia dadaraia.

²⁰ Ena be Iamesi ese tomadiho goevana ena kahana idauidau iboudiai ia herevalaia lasi, to ia gwau ena kahana ta be bema “tamana bona sinana lasi maragidia bona vabu be mai edia hisihisi,” idia ita naria. (Galatia 2:​10; 6:​10; 1 Ioane 3:​18) Keristani kongregesen ese vabu edia namo bona durua daladia ia laloa momo. (Kara 6:​1-6; 1 Timoteo 5:​8-​10) Dirava be vabu bona tamana lasi natudia edia Naria Tauna dainai, namona be Ia danu ita gaukara hebou bona lauma dalanai bona tauanina dalanai idia ita durua. (Deuteronomi 10:​17, 18) Tomadiho goevana ena anina ma ta be ‘tanobada ena kara mirodia dekena amo do ita raka siri,’ unai tanobada ena anina be Satani ena siahu henunai idia noho kara dika taudia. (Ioane 17:16; 1 Ioane 5:​19) Unai dainai namona be inai tanobada ena kara, Dirava badinaia lasi karadia amo ita siri, unai amo Iehova ena ladana do ita abia isi bona ena hesiai gaukara lalonai gaukara namona do ita karaia diba.​—⁠2 Timoteo 2:​20-​22.

21. Iamesi ena revareva dekenai, dahaka henanadai ma haida ita laloa be namo?

²¹ Iamesi ena sisiba, ita laloa vadaeni gaudia, ese ita do idia durua hetoho ita haheaukalaia bona iseda abidadama ita dogoatao auka totona. Unai ese harihari gaudia namodia Henia Tauna mai ena lalokau ita laloa bada karana ia habadaia. Bona Iamesi ena hereva ese ita idia durua tomadiho goevana ita karaia totona. Edena bamona sisiba ma haida ia henia ita dekenai? Dahaka gaukara ma haida ita karaia bena do ita hamomokania Iehova ita abidadama henia momokani?

[Footnotes]

Edena Bamona Do Oi Haere?

◻ Dahaka ese ita do ia durua hetoho ita haheaukalaia totona?

◻ Hetoho idia vara, to dahaka dainai Keristani taudia idia moale?

◻ Edena dala ai ita be hereva badinaia taudia ai ita lao diba?

◻ Tomadiho goevana karaia ena anina be dahaka?

4. Hetoho ita davaria neganai, edena bamona ita laloa?

6. Edena dala ai ‘do ita haheauka noho, ela bona inai haheauka iseda lalona dekenai ia goada momokani,’ bona dahaka ita karaia diba bema hetoho ita davaria?

8. Dahaka dainai ia daradara tauna be Iehova amo gau ta do ia abia lasi?

10. Keristani tauna ena lalohadai kohu bada dekenai be edena bamona?

12. Hetoho ita davaria neganai, dahaka dainai ita gwau lasi, “Dirava ese lau ia dibagania noho”?

13. Bema ura dikana ta ita dadaraia lasi, dahaka ia vara diba?

14. Edena dala ai ita gwau diba Dirava ena harihari gaudia be gau “namodia momokani”?

15. Iehova ena harihari gaudia amo, namo hereana ta be dahaka?

16. Dahaka dainai ‘ita kamonai haraga to ita hereva bona ita badu haraga lasi’ be namo?

17. Iseda kudouna bona lalona amo dika ita kokia dainai, dahaka ia vara?

18. Dirava ena hereva ia kamonai kava tauna ena idau bona ena hereva ia badinaia tauna ena idau be dahaka?

[Picture on page 9]

Hetoho oi davaria neganai, Iehova ena guriguri ia haerelaia diba siahuna oi abidadama henia

[Pictures on page 10]

‘Hereva idia badinaia’ taudia be tanobada ibounai lalonai Dirava ena Basileia idia harorolaia