Mahuta Lasi Hanuaboidia Mai Edia Namo
NEGA haida King taudia danu be hanuaboi ai idia mahuta diba lasi. Lagani 500 B.C.E. murinai Parasa ia lohia tauna mai ena siahu bada, Ahasuero, dekenai unai bamona ia vara. Reana ia laloa ena gaukara haida ia karaia lasi dainai, ia ura iena lohia negana lalonai idia vara gaudia edia buka be ia dekenai idia duahia hedinarai. Ia davaria ena hesiai tauna namona ta, Morodekai, be king hamasea dalana ia koua to davana ia abia lasi. Ahasuero ia ura unai kerere do ia hamaoromaoroa haraga. Iena kara dainai Dirava ena taunimanima be namo idia davaria ese ia hahedinaraia Dirava ena kara ta dainai king be hanuaboi ta ai ia mahuta diba lasi.—Eseta 6:1-10.
South Africa ena taoni ladana Hermanus dekenai ia noho Iehova ena Witness taudia edia kongregesen be mai edia badina unai Baibel ena kahana idia laloatao totona. Guna idia be ruma ta idia rentaia edia hebou karaia totona. Lagani momo lalodiai tano idia tahua sibona edia Kingdom Hall haginia totona. Gabeai, lagani 1991 ai, unai gabu ena Town Council ese tano namona ta idia hahedinaraia do idia hoia totona.
To, haida idia ura lasi unai tano be Iehova ena Witness taudia dekenai idia hoihoilaia. Hua haida idia naria murinai, kongregesen idia hadibaia dubu idauidau dekenai gabu hoihoilaia karana be lagani toi lalonai do idia karaia lasi bona unai tano idia hoihoilaia karana idia koua. May 1993 ai, kongregesen be kaunsolo dekenai revareva idia torea lou, idia nanadaia edia lalohadai do idia laloa lou totona. Idia abia revareva ai sentens tamona ia noho, ia hahedinaraia unai taravatu ia do noho.
Unai lagani ena October lalonai, unai taoni ena kaunsolo hahinena ta be hanuaboi ta ai ia mahuta diba lasi. Unai nega ia gaukaralaia guna idia herevalaia gaudia ia tahua lou, ia ura itaia bema gau haida do idia herevalaia lou be namo. Witness taudia idia torea revarevana, kaunsolo taudia idia noia edia lalohadai do idia laloa lou revarevana, be ia itaia. Ia ese unai gauna be hebou ma ta dekenai do idia herevalaia gaudia edia lista dekenai ia atoa. Ia ura ia hahedinaraia unai taravatu idia do atoa lasi lalonai, Iehova ena Witness taudia be aplikeisini idia atoa unai tano idia abia totona.
Gabeai lagani 1991 lalonai idia hahedinaraia tanona be idia henia kongregesen dekenai! Ia be dala badana dekenai, kongregesen bona kamonai taudia idia davaria haraga diba gabuna. Kingdom Hall namo hereana ta idia haginia, bona October 5, 1996 ai, Iehova dekenai idia hahelagaia.
Ena be kongregesen taudia idia lalohisihisi unai kaunsolo hahinena be hanuaboi ai ia mahuta namonamo lasi, to reana ia moale bema ia diba guna unai bamona ia vara king Ahasuero dekenai danu. Bona unai nega rua amo namo ia vara. Hermanus ena kongregesen taudia idia moale bada herea badina sibona edia Kingdom Hall idia abia, unai kone taonina ai ia be tomadiho goevana bona tiokratik dalana hadibaia gabuna ta.—Heberu 10:24, 25.