Matamata Taudia Dekenai Dahaka Ia Vara Noho?

SIVARAI namona eiava sivarai dikana​—⁠edena oi ura oi kamonai guna? Unai henanadai idia kamonai neganai, momo idia ura sivarai dikana idia kamonai guna badina idia laloa sivarai namona be gabeai idia kamonai dainai edia lalona dekenai do ia noho daudau.

Matamata taudia dekenai dahaka ia vara ita tahua neganai, mani hari ia vara gauna ita laloa guna. Buruka taudia idia gwau hari inai nega ena matamata taudia be guna ena matamata taudia bamona lasi. To, matamata taudia idia ura lasi idia kamonai edia kara be guna idia noho matamata taudia edia kara hegeregerena lasi. Ena be unai idia laloa, taunimanima edia kara idia stadilaia goevagoeva taudia idia gwau hari inai nega ena matamata taudia be idia idau.

Edena Bamona Idia Idau?

Ena be taunimanima idia laloa namona be matamata taudia idia manau, edia maduna idia huaia, bona ma haida idia matauraia, nega momo unai ia vara lasi. London ena The Independent niuspepa lalonai tahua gaukara ta ia hahedinaraia matamata taudia be “ ‘gwau-edeede karana matamatana’ idia havaraia badina idia laloa inai tanobada ese idia ia durua lasi momokani.” Unai “gwau-edeede karana matamatana” ia hedinarai badina inai nega ena matamata taudia haida sibona idia laloa idia be “aonega bona edia maduna idia huaia” taudia. Idia ura idia be “kara dika bona kara kava” taudia.

Hegeregere, Britain lalonai, idia ripotilaia taravatu utua karadia​—⁠momo be matamata taudia ese idia karaia​—⁠be nega 10 bamona ia bada daekau lagani 1950 bona 1993 huanai. Drag bona kekero muramura gaukaralaia kerere karadia danu be unai bamona idia bada daekau. London ena The Times niuspepa ia gwau, unai nega tamona lalonai danu, taga bada tanodia ibounai lalonai ‘Tanobada Ibounai Tuarina Iharuana negana amo matamata taudia huanai unai bamona gwau-edeede karadia edia namba ia bada daekau momokani.’ Taravatu utua taudia edia kara ia stadilaia profesa tauna, David J. Smith ia gwau, unai hekwakwanai be “mauri durua gaudia dekenai idia dabu dainai eiava idia taga bada dainai idia vara lasi.” Tahua gaukara ese ia hahedinaraia hari matamata taudia bona buruka taudia edia idau ena padana ia hedinaraia goevagoeva.

Inai nega ai natudia bona matamata taudia be mauri dainai idia lalohisihisi bada. Sibodia edia mauri idia hadokoa karana, idia mase lasi eiava idia mase momokani, be nega momo ia vara gauna. Scotland ena Glasgow Herald niuspepa ia gwau, edia mauri lagani be 12 ia do abia lasi natudia maragidia be sibodia edia mauri idia hadokoa toho ena kara be lagani 9 lalonai nega rua bamona ia bada daekau. Edia mauri lagani be sisina bada natudia be idia daradoko dainai unai bamona idia karaia danu. Unai niuspepa ia gwau: “Sibodia edia mauri hadokoa karana be matamata taudia edia lalohisihisi bona kara kava karadia edia kara ginigabena, ia ese idia dekenai idia henia heduru gaukara ia hadikaia.”

Kerere be Daika Ena?

Taunimanima badadia ese matamata taudia edia ‘lalohadai idaudia’ dainai kerere be idia dekenai idia doria be auka lasi. To, momokani, matamata taudia huanai idia vara noho hekwakwanai be taunimanima badadia edia kerere danu, ani? Nega momo idia gwau edia turadia ese idia doridia, tama sina ese idia dadaraidia, bona idia abidadama henia diba haheitalai namodia be lasi, be matamata taudia edia kara kava karana edia badina. Profesa Sir Michael Rutter, Britain ena Medical Research Council Child Psychiatry Unit ia naria tauna ia gwau: “Lagani 30 idia hanaia vadaeni hegeregerena, taunimanima momo herea be hari idia lalo-metau.” Ma ia gwau: “To, matamata taudia bona uhau bona ulato huanai lalo-metau be ia bada herea momokani. . . . Daradara be lasi ruma bese maurina ia dika ese unai ia havaraia; headava hadokoa karana sibona lasi, to taunimanima badadia huanai heiriheiri bona heai karadia danu.”

Tahua gaukara ia karaia hahinena ta ia gwau matamata taudia be “taunimanima ese guna idia badinaia karadia idia dadaraia.” Dahaka dainai? “Badina unai kara be idia totona idia noho lasi.” Mani, tau bona hahine edia kara idia haidaua karana oi laloa. Kekeni matamata momo ese tatau edia dagedage bona heai karadia idia karaia, bona mero matamatadia be hahine edia kara idia karaia. Unai be kara gunadia amo idia idau vaitani!

To dahaka dainai, hari unai bamona kara idauidau ita itaia momo? Bona inai nega ena matamata taudia dekenai dahaka sivarai namona ia noho? Vaira negana namona be edena bamona idia abia diba? Gabeai herevana ese unai henanadai do ia haerelaidia.