‘Hereva Momokani’ Idia Hoia!

“HEREVA momokani do oi hoia mai, bona tau haida dekenai do oi hoia lao lasi.” (Aonega Herevadia 23:23) Aonega tauna Solomona ese unai hagoadaia herevana ia gwauraia. Nega ibounai hereva momokani dekenai unai bamona ita hereva diba, to Baibel, Dirava ena Hereva lalonai ita davaria hereva momokani dekenai unai hereva ia momokani vaitani. Unai bamona hereva momokani ese mauri hanaihanai dekenai ita ia hakaua lao diba! (Ioane 17:​3, 17) To, namona be ita diba, unai bamona hereva momokani ita abia be mai ena davana. Ia ura abia tauna ese do ia “hoia,” anina be, gau ta do ia bouboulaia eiava ia rakatania unai ia abia totona. (Mataio 13:​45, 46 itaia.) Nega momo, taunimanima idia ura lasi unai idia karaia. To tano momo lalonai, boga-auka taudia momo herea be Baibel ena hereva momokani idia hoia noho​—⁠nega momo unai dainai gau badana ta idia rakatania.

Hegeregere, West Africa tanona, Ghana, dekenai idia noho Iehova ena Witness taudia mani ita lalodia. June 1989 lalonai, taunimanima ibounai 34,000 ese Baibel ena hereva momokanina idia abia bona ma haida dekenai idia harorolaia goadagoada. Bena taravatu idia atoa haroro gaukara dekenai. To herevana, kudou maoro taudia be “hereva momokani” idia do hoia noho​—⁠ena be taravatu idia atoa. October 31, 1991 ai, unai taravatu idia kokia, bona taravatu idia kokia lagani toi mai kahana sibona murinai, lagani 1995 huanai, Ghana dekenai Iehova ena Witness taudia edia namba ia bada daekau 46,104 dekenai! Bona inai lagani ai namba be ia bada daekau 52,800 dekenai.

Dahaka ese taunimanima ia veridia mai Dirava ena Hereva ena hereva momokani dekenai. Haida ese dahaka gaudia idia rakatania ‘hereva momokani idia hoia’ totona? Haere totona, mani Ghana Keristani taudia toi edia sivarai ita itaia.

Baibel Ena Hadibaia Herevadia ese Idia Veria

Ita ese ena mauri lagani be 20 bamona hahine ta, ena sivarai do ita itaia guna. Ena tamana be pasto tauna, to ena lalona ia hadaia ena tamana ena tomadiho ia rakatania totona. Badina be dahaka? Hereva momokani ia lalokau henia.

Ia gwau: “Witness taudia be edia ruma ta ruma ta gaukara idia karaia neganai, aiemai ruma dekenai idia mai. Idia ida nega haida lau herevahereva murinai, lau lalo-parara idia hadibaia gaudia be Baibel amo idia hahedinaraia goevagoeva. Lau ese Toi Tamona Diravana, hel ena lahi, soul ia mase diba lasi herevana dainai lau henanadai, bona abidadama amo gorere hanamoa karana lau henanadailaia momo. Lau abia dae momokani unai hahediba herevadia be Baibel amo. To Witness taudia ese lau idia durua bona lau lalo-parara unai be maoro lasi.”​—⁠Baibel ena lalohadai unai gaudia dekenai diba totona, mani Mareko 13:32; Roma 6:​23; Kara 10:40; bona 1 Korinto 13:​8-10 oi itaia.

Unai hahine matamata ma ia gwau: “To, egu ruma bese be idia dagedage. Egu tamana be ia dagedage bada. Iena lalohadai be lau idia hakaua kerere. To, lau diba Iehova ena Witness taudia amo lau dibaia gaudia be hereva momokani. Egu tamana dekenai Baibel amo unai gaudia lau hahedinaraia toho, to ia ura lasi kamonai. Edia dagedage karana ia habadaia.

“To, lau gari lasi. Lau abia dae, diba momokani sibona ese Paradaiso mauri hanaihanai dekenai ita ia hakaua lao, bona egu lalona lau hadaia vadaeni do lau dogoatao noho. Unai gabu dekenai idia noho Witness taudia ese lau davaria hekwakwanai idia kamonai neganai, mai lalokau ida lau idia durua, lau idia hagoadaia bona egu dabu gaudia idia henia. Unai kara ese lau ia durua Iesu ena hereva Ioane 13:35 lalonai ena anina lau lalo-pararalaia totona: ‘Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.’ Egu abia dae karana Iehova ena Witness taudia be tomadiho momokanina idia badinaia be ia bada ia lao. Gabeai, egu tama sina idia itaia egu mauri lau haidaua bona lau noho namonamo, unai idia ura henia, bona edia lalohadai lau dekenai idia haidaua​—⁠ia idau momokani, egu tamana ese Witness taudia ia noia egu kakana merona danu Baibel do idia stadilaia totona!”

Oi Sibona Dekenai Hereva Momokani Oi Hamomokania

Witness tama sina ese idia habadaia matamata taudia ese ‘hereva momokani idia hoia’ be auka danu. Matamata taudia haida be hereva momokanina idia abia dae momokani lasi. Bema unai bamona idia karaia, edia abidadama be do ia manoka bona ia be murimuri gauna sibona. (Mataio 13:​20, 21 itaia.) Nathaniel, Ghana tauna ta ena mauri lagani be 30 bamona, ese edena bamona ia do matamata neganai ‘hereva momokani ia hoia’ ena sivarai ia gwauraia.

“Egu tama sina be lau do beibi neganai Baibel idia hadibaia lau dekenai. Lau tubu daekau neganai, idia ida haroro gaukara dekenai lau lao, to egu lalona lau hadaia lasi Witness tauna ta ai do lau lao. Bena, lau lalo-parara lau sibona ese Baibel do lau tahua be namo.

“Gau ginigunana be, lau sibona dekenai do lau hamomokania Baibel sibona be Dirava ena Hereva, tomadiho buka helagana ma ta lasi. Lau sibona egu stadi amo, lau davaria Baibel sibona lalonai peroveta herevadia momo herea idia noho bona idia guguru goevagoeva. Lau davaria danu Baibel lalonai saiens ena hereva momokanidia momo idia noho​—⁠hegeregere, tanobada be ‘gau ta latanai ia noho lasi.’ (Iobu 26:⁠7) Unai hereva be lagani tausen momo gunanai idia torea, saiens taudia ese iseda tanobada bona guba edia oromana idia diba lasi neganai. Dirava sibona ese unai tatau ia hasiahudia diba unai gaudia idia torea totona!a

“Gabeai, lau ura diba edena tomadiho oreana ese Baibel lalonai idia noho hereva momokanidia ia hadibaia bona ia badinaia. Tomadiho momo ese hel lahina, Toi Tamona Diravana, bona soul be mase murinai ia mauri noho herevadia idia hadibaia. To unai hadibaia herevadia lau lalo-pararalaidia lasi. Lau laloa: Tamana dikana sibona ese ena natuna ia panisia totona ia boela ranu siahuna lalonai natuna ena imana ia atoa vareai, ani? Vadaeni, lalokau Diravana ese edena bamona ena natudia be hel lahina dekenai ia atodia bona ia rakatanidia hisihisi idia ania totona? To, Iehova ena Witness taudia ese idia hadibaia gaudia be Baibel ena siri hegeregeredia. Siri ta be Roma 6:​23, ia gwau: ‘Kara dika ena davana be mase’​—⁠hel lahi gabuna ta lasi. Unai lau lalo-pararalaia.

“Lau itaia danu Iehova ena Witness taudia idia ura edia memba taudia ibounai be Baibel ena taravatu hegeregerena idia noho bona kara dika idia karaia bona idia helalo-kerehai lasi taudia ibounai be murimuri ai idia atoa. Unai gaudia ibounai lau tahua murinai, lau diba Iehova ena Witness taudia be hereva momokani idia abia, bona lau sibona egu lalona lau hadaia idia ta ai lau lao totona. Lau gaukara goadagoada lau hegeregere bapatiso lau abia bona Witness tauna ai lau lao totona.”​—⁠1 Korinto 5:​11-13.

Nathaniel ena sivarai ese ia hahedinaraia namo herea Keristani tama sina ese idia habadaia matamata taudia danu ese ‘hereva momokani do idia hoia’ be namo. Namo lasi idia be kongregesen hebou dekenai idia lao kava. Idaunega Berea taudia bamona, namona be ‘dina ibounai Buka Helaga idia tahua, ena hereva be ia momokani eiava lasi.’ (Kara 17:11) Unai karaia totona nega bada do idia atoa bona idia hekwarahi, to unai kara amo abidadama goada idia abia diba.​—⁠Efeso 3:​17-19 itaia.

Tomadiho Koikoi ese Idia Koia

Ghana tauna ta ladana Godwin ena mauri lagani be kahirakahira 70 neganai, Presbiterian Dubu bona Masonic Lodge oreana ia rakatania. Godwin ia gwau: “Dubu lalonai idia karaia karadia haida lau ura lasi. Hegeregere, dubu taudia huanai idia heai momo, bona ia do vara noho. Nega haida pulisi idia mai heai idia koua bona maino karaia totona! Lau laloa Keriso ena murinai idia raka taudia ese unai idia karaia be maoro lasi. Bena lau bona Presbiterian tauna ta huanai hekwakwanai ta ia vara. Kota ese unai hekwakwanai ia kamonai bona ia gwau unai tauna be ia kerere. To, dubu ena haroro tauna be unai tauna ia durua bona kongregesen ibounai vairanai lau ia hahemaoro henia toho! Ia dekenai egu laohadai lau gwauraia bona dubu amo lau raka lasi​—⁠lau giroa lou lasi.

“Dina haida murinai, Iehova ena Witness taudia be egu ruma dekenai idia mai. Nega ginigunana ai lau kamonai, badina lau ura lasi Dirava idia herevalaia taudia lau dadaraidia. To lau itaia ena be lagani momo lalonai lau be Presbiterian tauna, to Baibel dekenai gau momo lau diba lasi. Hegeregere, guna lau diba lasi Baibel ese tanobada dekenai Paradaiso lalonai mauri hanaihanai helarona ia gwauraia.b Bona Iehova ena Witness taudia edia hebou lau lao henia matamaia neganai, edia kara namo, bona idia huanai idia noho matamata taudia edia dabua bona edia toana ese egu lalona ia veria momokani. Unai taudia be Baibel ena taravatu hegeregerena ai idia noho!”

To, ‘hereva momokani ia hoia’ totona ia hekwarahi ena mauri lalonai gau haida ia haidaua. Godwin ia gwau: “Lau be Masonic Lodge oreana ena memba tauna ta. Bona ena be ia be tadikaka bamona orea ta bona ena memba taudia ia durua, lau ese kwara-koukou bona turia danu idia karaia tomadiho karadia lau badinaia bona lauma lau noinoi henidia. Idia gwau unai lauma be idia boiria taudia idia durua lauma dalanai idia goada lao totona.

“Egu stadi ese lau ia durua bona lau lalo-parara Iehova Dirava be babalau karadia ia inai henia badina unai kara ese tau ta be Satani bona iena lauma dikadia edia siahu henunai ia abia lao diba.c Masonic Lodge oreana ena memba ta bamona do lau noho bona ena babalau karadia do lau badinaia, eiava do lau rakatania bona Iehova lau hamoalea? Kara iharuana lau abia hidi. Lau dekenai idia noho Masonic Lodge oreana ena kohu ibounai lau hadikadia ore, ena hebou dekenai lau karaia lao dabua danu. Iesu ena gwauhamata lau mamia momokani, ia gwau, ‘Hereva momokani ese oi do ia ruhaia’! (Ioane 8:32) Hari lau ese lau dibaia gaudia be mai moale danu ma haida dekenai lau hadibaia. Gau ta dainai lau lalohisihisi lasi.”

Kudou maoro taudia tausen momo danu be ‘hereva momokani hoia’ totona edia gau badadia idia rakatania. Ita herevalaia Keristani taudia toi hegeregeredia, gau ta idia lalohisihisilaia lasi. Baibel ena hereva momokani dainai “badina namona idia abia hegaegae, vaira dinadia totona, unai amo mauri korikori do idia abia momokani.” (1 Timoteo 6:​19, NW) Unai “mauri korikori” bona ma hahenamo haida oi abia diba bema “hereva momokani do oi hoia.”

[Footnotes]

[Picture on page 9]

Nathaniel

[Picture on page 9]

Godwin